مشاكل الشباب مع البنات

خطيبتى مش طبيعية

أنا شاب عندى 23 سنه خاطب بنت عندها 21 بنحب بعض واهالينا كويسين مع بعض والظروف كلها ماشيه بشكل كويس فى صالحنا

لكن المشكله ان خطيبتى بتعمل حاجات معايا بتخلينى اقول عليها انها مش طبيعيه وهقولكم بعض من الحاجات اللى بتحصل منها معايا

أولا فى مره من المرات قالتلى أنا عايزه اكمل تعليمى فى الجامعه لكن اهلى منعونى بعد ما فشلت اكتر من سنه فى التعليم نصحتها وقلتلها بلاش لانك جربتى كتير وماكنش ليكى نصيب والجامعه هتكون صعبه عليكى وانا مش هستحمل انى اشوفك كل يوم بتركبى مواصلات وتبقى وسط الشباب فى العربيات وفى الكليه وهتتبهدلى وممكن نبقى متجوزين وتروحى الكليه ده صعب طبعآ هى عاندت واتعصبت وقالت لازم اكمل واخد شهاده طبعآ أنا ما بحبش ازعلها ولا اعاند معاها فقلتلها خلاص عادى كملى تعليمك لو اهلك وافقوا المهم انها عرضت على اهلها الموضوع فرفضوا المشكله انها قالتلهم ان خطيبى فلان هو اللى غصبنى على انى اكمل تعليمى وطبعآ بعتولى وعملوا مشكله معايا وقالولى انت ازاى تغصبها على كده وانت متقدملها وعارف ان اخرها كده فى التعليم وطبعآ دافعت عن نفسى ووضحت الموضوع ولما جيت اكلمها بعد كده فى الموضوع قالتلى اصل أنا لما بكون متضايقه من حاجه بقول كلام ما بعرفش معناه

ثانيآ فى مره قالتلى أنا مش هحمل واخلف واجيب اولاد لانى بخاف جدآ من تعب الحمل والولاده وسمعت وشفت بعينى التعب ومش هقدر استحمل خصوصآ ان جسمى نحيف وضعيف فقالتلى انت هتسينى ولا هتتجوز عليا؟ قلتلها كلام كتير اقنعتها وخليتها صدقتنى انى عمرى ما هسيبها على حاجه زى دى وعمرى ما هبص لغيرها وهفضل معاها واسعدها واعاملها معامله كويسه وكل حاجه هتبقى تمام وهى شافت كده من تصرفاتى وكلامى معها المهم مع مرور الايام الكلام جاب كلام ولقيتها بتقولى انت بعد الجواز هتسيبنى او هتتجوز عليا وممكن تسيبنى فى الخطوبه كمان فضلت احلفلها واعيدلها فى الكلام اللى قلناه قبل كده انى مش هسيبها بردوا اللى فى دماغها فى دماغها اقولها انتى مش اطمنتى انى مش هسيبك خالص وصدقتينى وواثقه فيا وكلامى وتصرفاتى بتدل على كده ومواعدين بعض اننا مش هنسيب بعض ان شاء الله الا بالموت يبقى بتجيبى سيرة الموضوع ده ليه؟ ووجعت دماغى بسبب الموضوع ده وخلصت المكالمه وصبحت تانى يوم اتصلت بيا اعتذرتلى واتأسفت على الكلام اللى قالتهوتقولى وبردوا قالتلى اصل أنا لما بابقى متضايقه بقول كلام ما بعرفش معناه __ وطبعآ قعدت انصح فيها كتير قالتلى هحاول اتغير وابقى كويسه لكن ترجع تانى فى اقرب موضوع يضايقها زى ما هتعرفوا دلوقت

ثالثآ هى عارفانى وفهمانى كويس ان أنا ما عرفتش بنات قبليها خالص ولا هعرف بعديها لاحب ولا جواز ولا معاكسات حتى وهى عارفه ومتاكده وواثقه فيا خصوصآ بعد موضوع انى وافقت انى اكمل معاها وهى رافضه الخلفه__ تخيلوا بقى راحت قالت لاهلها ان خطيبى فلان هيسيبنى واحنا لسه مخطوبين وهيعرف غيرى وهيخطب واحده احسن منى واكيد هيسيبنى__ طبعآ هما عشان واثقين فيا قالولها لا مش هو يعمل كده_ وانا عرفت الكلام ده منهم بعد كده وطبعآ هى بررت الكلام ده زى كل مره ان أنا لما بابقى متضايقه بقول كلام ما بعرفش معناه

وهكذا حاجات تانى بتعملها بتخلينى اقول انها مش طبيعيه وحاولت كتير انصحها او اغيرها واخليها كويسه عن كده لكن مفيش فايده احيانآ تقول هحاول اتغير واحيانآ تقول أنا طبعى كده

طبعآ هى دلوقت زعلانه ومتضايقه منى أنا لانى اشتكيتها لاهلها وعرفتهم اللى هى بتعمله معايا يمكن الاقى معاهم حل للموضوع لاكن هما اتصرفوا بشكل خطآ لانهم شتموها وضربوها وحاولوا تغييرها لاكن هى بعد ده كلوا اصبحت معايا اسخم وأضل من الأول وبقت عصبيه اكتر وعنديه اكتر وعلى صوتها اكتر وغيرو

طبعآ أنا خلاص فاض بيا لاقادر اسيبها ولا قادر اكمل معاها وهى كده__ وهى كمان بتحبنى ومش عايزه تسيبنى طب اعمل أيه؟ أنا دايمآ كويس جدآ معاها فى مواصفاتى واخلاقى وفى كلامى واسلوبى ومراعاة مشاعرها واهتمامى بيها وخوفى عليها وحبى واخلاصى ليها ووعدتها بتحقيق كل احلامها حتى قالت لى انت فتى احلامى وزوج مثالى ومش هيفرق بينا الا بالموت وهنعيش سعداء طب ازاى وانتى كده__ نظامك ده مش مناسب لكلامك ولا للحياه السعيده اللى نفسنا نعيشها__ أنا خلاص انتهيت ياريت تفيدونى

مشاكل وحلول ذات صلة

اضيف بتاريخ: Thursday, November 4th, 2010 في 16:48

كلمات مشاكل وحلول: , , ,

6 رد to “خطيبتى مش طبيعية”

  1. samo
    09/11/2010 at 11:01

    لما تتجوز هتهدى
    املا حياتها بكلام خيالى عن الاولاد وحلاوتهم وهكذا
    متديهاش فرصة فراغ ف دماغها عشان هي عايزة تجذب الانتباه ليها(خالف تعرف يعنى) حسسسها بقيمتها وان هى هتبقى ست مش بنت

  2. moniana
    06/11/2010 at 02:43

    السبب احساسها يلبنقص هيا شايفه انها اقل منك ف حاجات كتير
    حاول تبعد شويه وترجع حنون اكتر م الاول وكل غلطه ليها عقاب مش تسامح بسهوله عشان مش تتمادى ف الغلط

  3. بسمت امل
    05/11/2010 at 19:29

    مشكلتها انها مش واثقة من نفسها والسبب هما اهلها واول دليل على ذالك هو انك اول مااشتكيتها ليهم راحو شاتمينها وضاربينها ومش عاملين اي اعتبار لانسانيتها ولا ايه هي الاسباب الي خلاتها تشك انك هتسيبها انت لازم توقف جنبها وتحاول تمحي فكرت انك هتسيبها من دماغها حاول تبني عندها الثقة في نفسها الي كسروها عندها اهلها بمعاملتهم ليها بالضرب والشتم وكمان لازم تروح معاها لطبيب نفسي وماتتزوجهاش الا وهي زاهجة تكون زوجة وام يعني ايه حب وزواج من غير ثمرت جميلة تملا حياتكم ربنا يهديها ويقويك يارب

  4. الإسكندرانى
    05/11/2010 at 08:18

    خدها لدكتور نفسانى عشان ده فى علم النفس مرض أسمه الضلالات وهو التوهم بأشياء مش بتحصل فى الحقيقة ويبقى عندها شك فى جميع الأشخاص القريبين منها مع عصبية شديدة ونرفزة بدون سبب
    أسرع بعلاجها عشان الحالة ما تدهورش أكتر من كده
    وربنا يشفيهالك

  5. فضه
    04/11/2010 at 19:47

    هي يمكن بتحب تعاكس فيك في شخصيات كده تحب تعاكس في الناس اللي بتحبها ر
    ربنا يقويك

  6. beroo
    04/11/2010 at 18:20

    المشكله فيها
    هي ماعندهاش ثقه ف نفسها وكمان هي تقريبا عاشت فتره ف حياتها صعبه خلت ماعندهاش ثقه ف حد ودايما حاسه بالخوف
    نصيحه مني حاول تخدها وتخرج معاها ف مكان رومانسي بعد اذن اهلها طبعاودايما حسسها انها الانسانه الي انت بتمناها وان مفيش زيها وحسسها بلامان دايما وربنا يعينك

اترك رداً أو حلاً لهذه المشكلة