أنا فتاة 16 سنة … علي قدر إلتزامي الديني إلا أنني منفتحة و إجتماعية. بعد أن أنهيت دراستي في مدرستي الصغيرة إنتقلت لمدرسة جديدة لأن مدرستي السابقة لا يوجد بها فصول للثانوي. أنا الحمد لله الأولي علي المدرسة حتي الآن… الجميع يحبني فتايات و فتية ، لكن الشباب يعرفون أننا مجرد إخوة فقط. و جميع المدرسين يشهدون لي بالخلق القويم و تم إختياري كطالبة مثالية للمدرسة بأكملها.
بعد أسبوعين من الدراسة جاء طالب جديد للفصل ، بصراحة أنا مخدتش بالي من وجوده أصلا لعدم إهتمامي بالشباب أصلا لكن أول مرة آخد بالي من وجوده … كنت رايحة معمل الكمبيوتر و هو وقفني في الطريق ، قالي “أنا عايزك في حاجة ضروري” و قلتله خير ؟ قالي لا مفاجأة و خدني علي مكتب المديرة و عرفني علي مامته و قعدت هي و المديرة يشكروا فيا و مامته تقولي كل المدرسين بيشكروا فيكي.. عدا اليوم ده و أنا مش فاهمة أي حاجة ، بعدها بكام أسبوع إكتشفت انه يبقي أخو واحدة صحبتي بس هي أكبر مني بثلاث سنين و هو قدي في السن.. أسبوع في التاني و بقي دايما يجي يقعد يتكلم معايا في أي حاجة و مرة كان ماشي ف مد إيده ليا قلتله مبسلمش … إنبسط أوي !! و اللي زاده إنبساط معرفته إننا بصوم إتنين و خميس .. (مع قدري العالي من التدين بس بابا رفض أني اتحجب) … يوم في اللي بعده كلامه بدأ يحلو و ينعم و بقي يلمح لحجات بعيدة أوي و بعد أسبوعين من التلميحات قالها صريحة أنه عايز يتجوزني. أنا معرفتش ارد يومها و سبته و مشيت بس بقيت بعدها لو جاب سيرة انه بيحبني اقوله سيب كل حاجة لوقتها. يعرف عني حجات محكتهاش لصحابي نفسهم.. مهتم جدا بيا و طول الوقت بيبصلي و بيقول أنه ديما بيفكر فيا و بيقول انه لو كان يقدر كان جاه إتقدملي من بكرة. أنا مصاحبة اخته و مصاحبة اخوة اللي عنده 6 سنين و انا و مامته بنتكلم كتير اوي و بنقعد نرغي في كل حاجة . و هي بتحبني اوي ، هو نفس سني … بل اكثر من ذلك ، إحنا مولودين ف نفس اليوم .. هو رياضي و انا كذلك .. صحيح مش نفس الرياضة بس إحنا الإتنين نفس الميول. مدرسين المدرسة بيشكروا في اخلاقه و خصوصا انهم مربينه من 11 سنة ف بيقولوا انه محترم و هو محترم فعلا بس انا خايفة… انا مستوايا الدراسي زاد من ساعة ما قالي انه بيحبني و بقيت بقفل الإمتحان مش مجرد اجيب احسن نمرة . بس خوفي من انه يغير اخلاقي او يكسرني… اسيبه يحبني ولا ابعد عنه خصوصا انه عارف و ملاحظ اني اتعلقت بيه ، هو السؤال المهم هنا … هل اثق ف ان حبه ليا حقيقي و هيستمر ولا إيه؟
مشاكل حب المراهقة
اسيبه يحبني ولا ابعد عنه وهل اثق به
اضيف بتاريخ: Sunday, February 15th, 2015 في 21:00
كلمات مشاكل وحلول: الثانوية, الحب, شاب, فتاة
كل الصفات الحميدة والطيبة عنك وعن الشاب ذكرتيها ودي مفخرة ومحل اعزاز من الجميع لكن ده مايسمحلك ان تتمادي معه في العلاقة دون علم اهلك لوعاوزك فعلا وجادفي الارتباط يبقى يتقدم هواهله يخطبوك من اهلك حسب الدين والاعراف غيركدا يبقى مرفوض نهائيا انكم تتكلموا مع بعض او تستمروافي العلاقة من غير رابط رسمى وتبصي لدراستك ومستقبلك اهم لك من اي شئ تاني ولاتخليه ياثر على دراستك ومذاكرتك ده الافضل لك تعمليه وكل شئ سابق لاوانه وربي يسترعليك ويوفقك ويكتب لك اللي فيه الخيروالصالح
لو حبه ليه معني بالنسبة ليكي ثقي فيه و لو حاجة ممكن تستغني عنها فمتجريش وراها
شوفي يابنتي الحب شي عظيم وكل صفاتك دي تخلى كل الناس تحبك ويتمنو قربك بس تاكدي انك لسه صغيرةوكذلك الشاب ماتخليش احديشغلك عن دراستك وتفوقك وده الاهم ولوكان الشاب ابن حلال ومحترم وعلى دين وخلق يستنى عليك لماتخلصي جامعة وهوبرضه يخلص جامعته وبعدهايتقدم لااهلك وربنايقدم اللي فيه الخير بس اوع تتكلم معه من غير رابط شرعي خليك محافظةعلى دينك وشرفك وسمعةاهلك وتربيتهم لك ربي يسترعليك ويوفقك في حياتك
ياروحي ده عمره ١٦ سنه يعني صغير بالزمه هيتجوزك ازاي و بأي عين هيروح يخطبك وهو لسه في ثانوي
قوليله ذاكر واجتهد وبعد ماتتخرج ابقى اتقدملي
ملاحظه / ياريت متعلقيش نفسك بحاجه لسه في علم الغيب انتي مش عارفه نصيبك مع مين وهو وارد جدا مشاعره تتغير ناحيتك لما يكبر فنصيحه مني تعاملي معاه بحدود