الحب على النت

اكتئاب من الحب على النت وتحديدًا الفيس

السلام عليكم ورحمة الله تعالى وبركاته,

انا اول مرة فحياتى اعرض مشكله ليا عالنت ولكن بصراحه انا وقعت في غلطة مكنتش اتصور انى اقع فيها وكنت فاكرة ان ميقعش فيها الا كل ذى عقل غير متزن.

انا ملتزمة والحمد لله رب العالمين اصلى واحاول بقدر امكانى ان ابعد عن صغائر وكبائر الذنوب
وحبيت اعرض مشكلتى لعلى افيد بيها غيري.

طبعا انا اول الناس اللى مش مؤمنة بالحب عن طريق الانترنت لدرجه ان حتى لو حصل هنكر وهكدب نفسي.

الموضوع ابتدى بانى اتنيلت على عينى ضفت معيد بقسم الجراحه على الفيس بهدف التعليم فقط لانى طالبه ماجستير بنفس التخصص ولاني متعودتش اضيف شباب الا اذا كانو اقارب او زملاء اثق فيهم بس انا ظنيت ان التعامل لن يخرج ابدا عن الدراسة.

فالحقيقه هو شخص محترم “مع ان مفيش حاجه تثبت ده برده” بس مشوفتش غير كل خير محاضرات قيمة بتتبعتلى عالجاهز.

بيذكرنى بميعاد الصلاة اذا اذن بحيث نوقف النقاش فى العمليات الجراحية مثلا عشان نقوم نصلى
ومقرتش لفظ كده ولا كده يعنى معرفوش بس مشوفتش منه كلمه خارجه عن موضوع الدراسات لا بالحلو ولا بالوحش.

طبعا اتحطيت في ظروف صعبة جدا واختفيت لفترة وزادت تعابير الاكتئاب عالفيس ووجدته مهتم يعنى مثلا كان يبعتلى ادعيه لفرج الهموم ويحاول يخفف عني.

وطبعا مرة مرة كان بيمدح في اخلاقى وفي طريقتى في البحث او الدراسة، وكان بيشجعنى كتير واعطانى فرص محاضرات مهمه وقيمة جدا بدون ما اطلب، بصراحة عمل واجب جامد معايا.

بالصدفه كان متهبب حاطط صورته عالفيس معرفش انا مش هنكر ان اى بنت غصب عنها لو شافت حد شكله كويس وبيعاملها كويس غصب عنها هتتشد شويه يعني.

حاولت طبعا انكر الهبل اللى انا حسيته وحاولت اكره نفسى فيه باى طريقه، .لانى مش مقتنعه بحب عالنت اولاً، وثانياً مبحبش احب حد مبيحبنيش وغير كده عشان ربنا عز وجل فالاول والاخر “مش انا اللى ارتبط بالمنظر ده”

مع الايام زاد اعجابه بشخصيتى معرفش ازاى وكان بيصرح بده وللاسف شاف صورتى في صور مؤتمر علمى بدون قصد منى، وعرف ان دى انا وبعدها تعامله اتغير بقى بيهتم اكتر بيا وبيحاول يعرف حاجات شخصية عنى بقيت حاسه انه مراقبنى تقريباً، وانتهى الامر بانه قالى انتى جميله وانا مبسوط منك اخلاق وادب وكذا كذا و..

واللى يزهق بقى انه ديما لما يحب يفتح سيرة الارتباط يقولى انى عاوز ارتبط بواحده محترمه وكذا كذا زيك كده، هو طبعا من الصعيد وكان بيلمح انه عاوز يخطب واحده بحراويه من عندنا يعنى، طبعا الكلمه كانت بتحرجنى ماهو لو عاوزها زىى يا اما تكون انا يا اما يتكتم وميقوليش كده اصلاً.

كان مهتم بامرى اكتر من الناس اللى متواجدين معاه لدرجة ان بنات طلبة عنده فالليه كانو غيرانيين منى وهيطقوا ومستغربيين ليه بيسال عليا ومش بيسال عليهم.

منكرش ان الكلام ده كله هبل وليس دليل على شيء.

طبعا انا كونى دكتورة جراحة ورقمى موجود على صفحة عالفيس فطبيعى رقمى هيكون موجود لو حب يجيبه.

وعرض عليا اكتر من مرة يتصل بيا عشان يوضحلى حاجه مش فاهماها طبعا عملت فيها واعيه ونفضت كذا مرة وللاسف اضطريت اوقف الهبل ده ورديت عليه بحيث اقطع الحاجه اللى عاملالى قلق يعنى قولت اهو يتصل ويخلص وتبقى مكالمة وخلاص احسن ماكل شويه ينطلى

وياريتنى مافتحت عليه

اتكلم حوالى 3 ساعات وتقريباً مكنش حد بيتكلم اده وكأنه مكنش بيكلم بنى ادمين وكان بيحاول يتكلم عن حاجات شخصية شويه بيسال عن اشخاص في عيلتى
“لحد هنا احب اوضح بس انها كانت فالاول كلام بريء عالفيس للدراسه فقط واهى قلبت بمكالمة تلفون” اظن هنا بدأت خطوة من خطوات الغلط.

انا بس بحاول افهمكم ان الأمر ميسلمش الله أعلم كان ممكن يكون فى ايه بعد مكالمة تلفون انا لحد دلوقتى مش مصدقه انها وصلت لكده في الآخر ده شخص غريب من عالفيس يكلمنى تلفون ليه

بعد المكالمه دى عادى الامور يومين تلاته بعدها قطع حوالى شهر عالفيس او 3 اسابيع، اقصى حاجه ممكن يعملها لايك على حاجه جراحيه على الصفحه فاستغربت”هل ممكن مكالمه التلفون كانت اختبار ليا وفشلت فيه بانى وافقت اكلمه”

المهم اضطريت انى ابعتله رساله باننا لازم نكمل الابحاث على النت بالتعاون مع طببيه تانيه تعرفنى وتعرفه.

مش عارفه الله أعلم كده اثناء المناقشات حسيت انه بيتكلم بالعافيه او الرد موجز اوى او جايز بيتهيألى عارفين لما تكونو مستنيين طريق رد معينة او اسلوب معين وفجأه تلاقى الشخص قدامك بقى تقيل ورخم “سورى عالالفاظ بس دمى محروق”
فاتئمصت وقلت للدكتورة انا مش مكمله ابحاث معاكو وانا غلطانه انى دخلت الاخ الكريم ده معانا فالابحاث وسلام عليكم.

وهى طبعا بعتتله ان انا زعلانه وان هى مش فاهمه ايه اللى حصل
وادخل الاقيه بيهزر مع صحابه عالصفحه عنده وبيعمل لايك لبوستات بنات فيها حب ومشاعر وكلام فاضى كده وفي نفس الوقت مش بيرد على الدكتورة دى ولا حتى حاول يسالنى انا طلعت ليه.

حسيت ساعتها انى رخيصه اوى لان رد فعل طبيعى لما حد يزعل منك تصالحه او عالاقل تفهم منه لكن انا زعلت وسيبتلهم البحث، وده ولا الهوا قاعد في الطراوة مش فاهمه بقى ده برود ولا قله ذوق.

فانا زعلت انى المفروض دكتورة بيعاملها على مستوى عالى من الاحترام لفترة وفجأه احس انى رقم 10 في الاولويات.

بعدها بيومين لقيته بيتصل بيا”منكرش انى فرحت” بس بصراحه مردتشى عليه.

اسفه انى طولت عليكو بس بصراحه كده وبدون مجاملات
هو ممكن يكون فى دكتور جامعى ومتدين ويشهد ليه ناس باخلاقه ويلعب بواحده عالنت عادى يعنى؟؟
وهل انا غلطانه؟

انا عاوزة اتخلص من الاحساس اللى جوايا
اعمل ايه؟ لما ابقى واحده مش معترفه بالحب عالنت وفنفس الوقت جوايا احساس بيضغط عليا وبيخنقنى

مشاكل وحلول ذات صلة

اضيف بتاريخ: Sunday, March 10th, 2013 في 21:36

كلمات مشاكل وحلول: , , , , , , ,

10 رد to “اكتئاب من الحب على النت وتحديدًا الفيس”

  1. حلال المشاكل
    20/11/2014 at 10:48

    اختي الدكتورة الفاضلة الحب مايعرفش مقامات ولا شهادات ولاطبقات قديكون الرجل فعلا احبك لدينك واخلاقك ونبوغك في التعليم واهتمامه الكبيربك دون كل زميلاتك يوكدالشي ده لكنه انصدم من برودمشاعرك وخاف من ردةفعلك اذا صارحك بحقيقة مشاعره ففضل الصمت والسكوت ولاارادان يجرحك اويسبب لك مشكلة مع اهلك وبماانك تركت اكمال الابحاث معه فده من حقك وانصحك ان تنسيه خالص دام الرجل ماعمل لك شي يخدش كرامتك اوينال من شرفك واهتمي بنجاحك وتفوقك وربنا بيكرمك انشاءالله بابن الحلال الصالح اللي يستاهلك ويقدريسعدك والف من يتنماك يادكتورة ادب واخلاق وتربية وعلام وياليتك تفكري في الزواج كي تكتمل سعادتك وفقك الله واكرمك

  2. عمار
    07/06/2014 at 17:05

    أنا شايف مبالغة, البنت بتبص لواحد عجبها فالشارع بتعد تحلم احلام يقظة معاه.
    هدي نفسك كدا و استهدي بالله, بعد ما قرأت رسالة الدكتورا الأنتي كتباها دي أقدر اقولك ان هوا كان بيتصرف على طبيعته و أنتي من جواكي نفسك يقولك انا معجب بيكي.

  3. توتا
    31/03/2014 at 01:50

    سببك منه

  4. توتا
    31/03/2014 at 01:49

    انارائى انك تفكرى بعقلك مش بقلبك لان القلب كتير اوى ممكن اما نمشى وراه يتعبنا انا كانت عندى نفس المشكله بس انا سبته واتخطبت ده لو عايزك كان اتقدم على طول لو بيحبك سبيه قبل ما يحرجك وادعى ربنا وقربى ليه

  5. ابواميرة
    18/01/2014 at 18:34

    شوفي ياعزيزتي الدنيا دي فيهاالعجب العجاب وكل شي متوقع فيهاومن الناس اللي عايشين فيها ماتستغربيش ابدا واللي حصل معك بيحصل مع كثيرمن الستات المحترمات زي حضرتك وعاوز اقولك نصيحة كبيرةوغالية لوجه الله تعالى اولا- ماتنساقي لكلام اي شخص كاين من كان سواءزميل اوقريب منك ولاتنخدعي بكل مايقوله لك من عبارات الاعجاب اوالثناءاوالاطراء ثانيا-حافظي على شرفك وتربيةاهلك لك وثقتهم فيك وماتخدشي هذي الصورة بتصرفاتك طائيشة اومتهورة فتندمي طوال عمرك ثالثا- احسني الاختيارللزملاءوالاصدقاء من حيث الدين والاخلاق والسيرةالطيبة بغض النظر عن مراكزهم وشهاداتهم العليا ومناصبهم المرموقة رابعا- ماتعطيش رقمك الخاص اوايميلك لاي احد الا من تثقي فيه جيدا وتتاكدي من اخلاقه الحميدةوحرصه عليك وعلى سمعتك بين الناس خامسا- انت ولله الحمددكتورةومتعلمةومحتاجةلراجل يحميك ويخاف عليك ويصون شرفك وكرامتك امافكرتي في الزواج ياعزيزتي تاكدي انك حتلاقي الخيروالسعادةوراحةالبال مع الانسان اللي يختاره قلبك ويستاهلك والف من يتمناكي يادكتورة الى متى وانت مضربةعن الزواج العمريخلص والعلم لاينتهي كالبحرننهل منه ولاحدودله فكري جيدافي كل ماطرحته عليك وماقصدي الاكل خيرا لك واردت لك التوفيق والنجاح والصلاح في حياتك والله الموفق

  6. ابواميرة
    16/10/2013 at 00:31

    شوفي يادكتورة انت فاهمةوعاقلة وعارفة ان النت سلاح ذوحدين ممكن نستخدمه في الخيروالاستفادةمنه في امورالحياةوممكن نستخدمه في الشروالاساءةللاخرين ونشرالفضايح ودامعلوم عند كل اللي جربوا النت انت تماديت في العلاقةمع الانسان الغيرمحترم وخليته يقرب منك اكثر ويطلع عل صورك الخاصة ودي غلطةكبيرة زي مايقولون غلطةالشاطر بعشرة المطلوب منك تغير ايميلك في النت وارقامك الخاصة وقطع اي علاقةاواتصال مع السافل داه وممكن تستعيني باحدي زميلاتك في اتمام الابحاث اللي تحتاجي لها ووربي يكرمك ويوفقك في حياتك ويسترعليك يادكتورة

  7. مصطفى
    02/06/2013 at 18:38

    ده بيلعب بيكي ليس الا انسيه و ابتعدي عنه الدين بقلك لا تحكي مع حد غريب

  8. الانسان الطيب
    01/05/2013 at 18:46

    أختى العزيزة…….
    كثيرا ما تراودنا أفكارا عن الحب وكثيبرا ما تأتينا مشاعرنا أتجاه أشخاص معينين فى حياتنا رغما عنا وذلك لأن النفس البشرية تحتوى ولو ضئل هذا الجزء من براءة النفس عندما ترى شخص كويس أو معاملته كويس……..

    أختى العزيزة …
    من رأيي أنك أذا كنتى أولا وأخيرا وضعت هدفا واحدا لا غير اتجاه هذا الشخص ما كنتى لتصلي الى ما انتى فيه الان
    بمعنى هذا دكتور أنا مشعايزة منه الا محاضرات واكمل بحثى معاه لغايط ما يخلص البحث على خير بأذن الله والموضوع انتهى على كدة
    الهدف ده فى رأيي ماكنش حيوصلك لما انتى فيه الان
    ربما يكون كلامى صغيرا لكن صدقينى له معان وانعكاسات فى النفس كبيرة

    أختى العزيزة ……..
    ماتشغليش نفسك وبقولها للمرة التانية والتالتة والرابعة حضرتك جوهرة يحاول الجميع الحصول عليها مش هى اللى تحصل عليهم
    يعنى خلى الحب هو اللى يجيلك مش أنتى اللى تروحيلوه
    وكونى على علم ان اللى بيحبك مهما حصل عمرهما حيفكر أصلا يبعد عنك وحييجى مش من عالنت بقا حييجى يخبط باب البيت يقول انا عايز الانسة الفلانية

    اجابة بردوه على الكام سطر الاخارى………..
    لا تعليق على مافعله الشخص ولا تعليق على الشخص نفسه
    الدنيا فيها الحلو والوحش
    ربما يمكن أتوقع كان نفسه يتخذك طريقة لعب وتسلية ولكن ماجتيش معاه عالموم اذا عايزك فى والدك وووالدتك والبيت وهو مش صغير على فكرة
    أحساسك ده تأنيب الاحساس الصادق النقى اللى مفيهوش كدب

    أنسى الموضوع واهتمى بدراستك
    وماتنسيناش من الدعاء واسف وبعدين انا طولت زى ماطولتى انتى عادى يعنى هههههههه بضحك معاكى

    وشكــــــــــــــــــــــــــــــــــــــــــــــــــــــــرا
    الانســــــــــــــــــــــــــان الطيب
    والسلام عليكـــــــــــــــــــــــــــــــــــــــــــــــــــــــــــــــــــم

  9. عاشق الحنين
    20/04/2013 at 14:10

    نسيت اقلك خليكي بدراستك و ابحاثك افضل لانو مثل ما قلتلك بيلعب وبس

  10. عاشقزالحنين
    20/04/2013 at 14:07

    سيبك منة ،، دة بيلعب عيني عينك

اترك رداً أو حلاً لهذه المشكلة