الحب الاول

بحب واحد وتقريبا هو بيحبنى عاوزه اتأكد

انا طالبة جامعية 21 سنة مش بحب اختلط بالأولاد او الاختلاط بيكون فى حدود ومعانا ناس … مشتركة فى نشاطين تبع الكلية دول المسؤل عنهم شخص واحد تقريبا …واحد اكبر منى بسنة من نفس بلدى
فى بداية دخولى فى النشاط الاول المفروض بنطرح افكارنا وبنعرف دماغ بعض … وفى كل مرة كنت بسمع منه عبارات تشجيع وانه فخور انى من بلده وانه بيحترم دماغى وما إلى ذلك ولما مرة قولت معلومة غلط وباقى التيم قعدوا يضحكوا فضل يقول ما كنتش اتوقع منك كده بس انتى تقولى اللى عاوزاه انتى ليكى معزه خاصة… كل الحكايات دى عادى ما تخلنيش أفكر فى أى حاجة … …..صاحبتى لاحظت انه بيركز معايا جدا فى حواراتى مهتم يعرف اذا كنت روحت بلدى ولا لأ مهتم يسمع منى …حتى نظراته لو اى حد جنبى بيتكلم بحس انه سايبه ومركز عليا انا واكتر من مرة لاحظتها لما ارفع وشى الاقيه باصص ناحيتى ومركز ,, ساعتها انا برتبك جدا اول ما عينه تيجى فى عنيا وبحس احساس غريب عمرى ما حسيته وارجع وشى بسرعة الناحية التانية .
فى العادى انا لما اكون بكلم ولد يا اما وشى فى الارض او على اى نقطة تانيه وما بين فترة والتانية طبيعى هبص عليه وعلى وشه وخلال سنتين الكلية انا عمرى ما ارتبكت قدام حد كده …. الشخص ده انا قلبى بيقف لما اشوفه او اسمع صوته ووشى بيحمر جدا . حقيقى انا اول مرة اقع بالشكل ده .
وفى العادى برضه هو نفسه مش كده يعنى ما بيركزش فى حوارات باقى البنات اللى فى التيم او يجاريهم كتير هو حد خجول جدا وده اللى خلانى الاحظ ان المعاملة غير.
مرة كنت واقفة مع واحدة من التيم وجه يكلمنى وهى مشيت وسابتنى وفضل يقول انا بعزك وانتى منين بالظبط واللغة بتاعتك كويسة واى كلام بس انا فى العموم ما بحبش اقف وحدى مع ولد فرديت باقتضاب ومشيت
مرة تانية كان فيه سيشن تبع نشاط وانا كنت مرهقة شوية ف تقريبا بسمعهم بس لاحظ انى مش بتكلم ف سحب كرسى جنبى وفضل يسال مالك طب عملتى ايه فى الامتحان طب نغير الموضوع طب تعالى نحكى عن البلد .
الغريب انه فى العادى هو مش بيركز مين مرهق مين متضايق بس بحسه معايا غير مش انا وحدى اللى حسيت كده صاحبتى كمان بتقولى طريقة كلامه معاكى غير .
اخر مرة كنا فى مشروع تبع الجامعة وبقى يتجاهلنى تماما بس حسيته بيبص من بعيد لبعيد … وقف وكلم كل اللى ف المشروع وانا كنت جنبيه ولا الهواء بعد المشروع عملنا اجتماع برضه مركز جدا وسايب كله وباصصلى وكل ما يتكلم فى نقطه للكل يبقى باصص ناحيتى انا بس .
مش عارفة بقى ايه ده دى مش أوهام لان اكيد الاوهام مش هتجيلى انا وصاحبتى ف نفس الوقت .

المفروض انا بقى اعمل ايه اعرف ازاى انه فعلا بيحبنى .. بالنسبة ليا انا حبيته بس مش علشان كلامه بس عجبانى جدا طريقة تفكيرة وحاجات كتير اتغاضيت عنها لو كانت موجوده فى غيره كنت هرفضه .

مشاكل وحلول ذات صلة

اضيف بتاريخ: Sunday, April 2nd, 2017 في 06:30

كلمات مشاكل وحلول: , , , , ,

2 رد to “بحب واحد وتقريبا هو بيحبنى عاوزه اتأكد”

  1. ابوالبتول
    24/06/2017 at 02:23

    يابنت الناس كل الشباب بيعملوا كده في البداية مع البنات حتى يجذبوها ويلفتوا نظرها لهم احذري من التمادي في النظرات المحرمة مع الشاب ولاتسمح له بالتواصل معك او انه يخرج معك اوتروحوا للكافتيريا اوخلافه كما يفعل الشاب مع البنات الاخريات كلهذي مرفوضة ولاتنسي انو الشاب من بلدك لواحد من اقاربك اواقاربه شافوكم مع بعض ايه ممكن يحصل قد يجلب لااهلك العار والفضيحة وسط اهليكم في البلد وخصوصا وانت فتاة وسمعة الفتاة من سمعة اهلها والشرف غالي اوي ولايمكن احد يفرط فيه اويتساهل في هالامر لازم يكون تعامل معه وسط حدود ضيقه لايمكن تجاوزها مهما كانت المغريات اوالاسباب والله يصلح حالك ويسترعليك ويوفقك

  2. الانسان الطيب
    13/04/2017 at 23:26

    أختي الفاضلة ….
    اخر جملة ديه بالذات اللي قولتيها يعني ايه ( وحاجات كتير اتغاضيت عنها لو كانت موجوده فى غيره كنت هرفضه ) .
    زى ايه مثلا الحاجات ديه ؟ ! ، هل هى حاجات من اللي حكتيها في القصة ولا حاجات وصفات بتقصديها تانية غير اللي حكتيه ، معلش اني وقفت عند النقطة ديه بس النقطة ديه عايز أقولك انها مهمة أوووووي …….
    عالعموم أولا أنا بحييكي على أخلاقك وأدبك واحترامك صفاتك ديه مطلوبة وشخصيتك ديه مطلوبة انك تبقي محافظة على نفسك وان يبقا في خطوط لازم كلنا نحييوا في البنت الحتة ديه ، بس يعني متبقاش زايدة عن حدها لدرجة انك متخلكيش تتعاملي مع المواقف ، تبقا كدة وصلت لحد المشكلة ، كل حاجة بحدود أفضل
    عالعموم صاحبتك وليها رأيها وممكن رأيها يكون صائب أو لأ في الرأى ده ،،،، بس انتي ممكن تحسي أكتر اذا كان بيحبك أو لأ
    عالعموم بردوه عايز أقولك حاجة في فرق بين الاعجاب وما بين الحب ، مش عايزك تفهمي وتاخدي الموضوع بطريقة تانية ممكن في الاخر تجرحي مشاعرك بنفسك خصوصا ان محصلش أى خطوة خارجة عن التعامل الطبيعي سوى الكلام ما بينك وما بينه وما زال التعامل بحدود
    بصي التأكد بييجي بأكتر من طريقة وعن طريق الكلام ، ولكن خلينا نقولوا لا بد وأن نتعامل مع كل موضوع كما يتوجب له لا بالزيادة ولا بالنقصان ، لا تكبري من موضوعك ولا تصغري منه ، وتعاملي كما يجب أن يتم التعامل فيه
    وتأكدي ان اللي فيه الخير مهما أى حاجة حصلت ربنا هيقدمها بأمره تعالى
    ربنا يحفظك ويبارك فيكي يارب ويسعد قلبك ويفرحك
    وشكرا

اترك رداً أو حلاً لهذه المشكلة