أنا بنت في كلية و عرفت زميل ليا عن طريق الصدفة و كان السبب إني فكرته بأخته المتوفية و قالي إن ده خلاه يزيد احترامه ليّا كتير. بدأ يتكلم معايا كتير و حب يعرف عني أكتر و أنا كنت مقلقة منه شوية علشان هو كان قافل على نفسه بسبب الظرف إللي مر بيه و فجأة بقى كده معايا.
في الأول كان بيعرض عليا إنه يركبني تاكسي و “بلغيني لما توصلي” و “فلان ده خلي بالك منه” و بعدين كان بيعتذر إنه بيتدخل في حياتي. كان بيهرز معايا و يقولي إني سايب كل المعجبين و قاعد معاكي و كلام كده.
المهم كانت بتيجي عليه فترات بيبعد و كنت بحس إنه بيتجنبني و غالباً ده كان بيكون بعد فترة ه كان فيها تعامله معايا كتير ، و أنا كنت بديله مساحته.
قالي بعد كده إنه غصب عنه بيبعد الناس عنه لأنه مش عايز يتعلق بحد بعد أخته و أنا قولته إني متفهمة ده كويس ، و أنا فعلاً فاهمة أد إيه وضعه كان صعب و وجعه كبير.
بعدين لاحظت إنه بقى بيقولي في نفس كلامه برضة بهزار “أختي” زي( شكراً يا أختي والله) و كده ، و ده خوفني إنه يكون شايف إني فاهمة قربنا ده غلط و يكون بيحاول يوصلي رسالة بأسلوب مهذب عشان أفهم. و أنا نفسي ابتديت ابعد شوية.
في نفس الوقت إللي كان بيقول فيه كده ، كنت بشوف منه تصرفات متناقضة و ديه ناس كتيرغيري كانت بتلاحظها ، ممكن نكون بنتكلم وسط مجموعة و ألاحظه باصصلي بتأمل و إحراجي كان بيخليه يلف وشه و يتعامل عادي. مازال لما بيعدي بظروف صعبة بيجي يقولي إنه محتاج يتكلم معايا و بيحكيلي و مازال بيسأل على مواعيدي و بيقولي إنه عايز يشوفني و ديه بتبقى تصرفات متناقضة تماماً مع بعده و تجنبه ليا و كلمته إللي كان بيقولها.
كذا مرة علق إن شكلي كان حلو النهاردة و إني شخصية طيبة و عمري ما خذلته و إنه هو بيفهمني يمكن أكتر من نفسي.
أنا عايزة أفهم ليه ممكن يكون بيتعامل معايا كده و هو شايفني إزاي بالضبط؟ و ياترى إيه مصير الزمالة أو الصداقة إللي بينا ديه؟
انت ما اتكلمتيش عن ظروفه ليه ما ممكن تكون هي السبب لو هو فعلا شخص محترم يمكن يكون رايدك بس حاسبها لقيها مش هاتنفع فيبعد ويتوحشك فيرجع يحسبها يبعد وهكذا لكن لو ظروفه مناسبه وانت مش ملهوفه فخلاص اصبري لما يجي بكره واكيد بكره هيجيب معاه تفسير
-خالص تحياتي
تحياتي لمن أعطى مشكلتي الوقت لقرائتها و ترك الرد عليها.
أنا بس حبيت أوضح نقطة ، هو شخص محترم جداً و عارف حدوده معايا و مع إللي حواليه عمتاً. يعني استبعد تماماً فكرة إنه يكون فاضي و بيضيع وقته مع البنات أو بيتعرف على بنات و لما يمل يرجع يتعامل معايا لأنه مش إنسان تافه بالعكس ، عنده مبادئ و دي شهادة ناس كتير تعرفه قبلي و اتأكدت من ده لما اتعاملت معاه.
شكراً ليكم.
اعتقد انه يحب يضحك عالبنات و كلما يجد غيرك يبتعد عنك و عندما يمل منها يرجع لك , و حجة انك تذكرينه باخته , هذه لعبة ليتقرب بها منك
◘◘◘ بسم الله الرحمن الرحيم :
♦ إحساس الإنسان بأهمية حد في حياته بيزيده طمأنينة و راحة ، و غيابه – لأي سبب – بيوتره و يحسسه بالوحدة و عدم الأمان .
♦ الأنثى اللي الرجل بيأنس ليها ممكن تكون أمه أو أخته أو زميلته ..إلخ .
♦ و ده حصل هنا مع أخته ، اللي هو شايفها فيكي . شايف فيكي إنت بس – إحساس بالأمان و الثقة ( إنتي هنا مكان أخته ) ، و شايف فيكي كمان إحساس الحب و الاحتياج .
♦ و لكن لخوفه إنك تضيعي منه – زي أخته – أصبح محتار يقرب منك و يقولك إحساسه نحيتك ، و ممكن تصدميه و تعتبريه زي أخوكي أو مجرد زميل…أو يحفظ ماء وجهه مقدما و يحافظ على درجة القرب دي ، و في الحالة دي هو اللي بيناديكي ” أختي ” .
♣ المسألة مسألة اهتزاز ثقة في النفس و خوف من المحتمل الصادم ( رفضه كحبيب )، و لو حس بالأمان و شاف استعداد منك تقبليه حبيب هتلاقيه واضح مع نفسه و معاكي .
♦ أحييه على رقة إحساسه ، و أحييكي على صدقك مع نفسك .
♥♥♥ و الله أعلم ♥♥♥
بصي متستبعديش حاجه ممكن يكون فاضي وعايز يعلق اي حد بيه وممكن يكون معجب بيكي وبيحبك بس مش عايز يبين حاجه
فلازم تخلي بالك عشان مممكن فاي لاحضه يقولك انا محبتكيش انا بحسك زي اختي وممكن يقولك انا بحبك وانتي اجمل حاجه حصلتلي
فلازم متستبعديش حاجه وخلي بالك من نفسك