مشاكل الخطوبة

خطيبي عايزني اسرق اهلي

انا بنت عندي 25 سنة مخطوبه بقالي اربع شهور كنا بنحب بعض قبل الخطوبة وفضلنا نحب بعض سبع شهور قبل الخطوبه المهم انه وافق بيا رغم ان اهلي كلهم مش كويسين وميشرفوش وقالي انتي اهم عندي من الناس دي وانا مش فارق معايا اي حد المهم خطبني وبقينا كويسين بس هو دالوقتي بقي عليه ديون كتير اوي بسبب اهله ومش عارف يعمل ايه او يسد الديون ازاي ففكر انه يسافر ويمشي خالص لحد ما ربنا يكرمه ويرجع يسدد الديون اللي عليه قالي هقعد سنة او اتنين لحد ما اكمل الفلوس اللي عليا المهم اني مش قادرة اعيش من غيرة قالي خلاص تعال نتجوز ونسافر مع بعض وبعدين نرجع بس المهم انه ممعهش فلوش نسافر ونتجوز بيها قالي هاتي دهبك من امك وتعالي نتجوز وقبل ما تسلميني اي حاجة هكون متجوزك علشان تطمني وانا مش عارفه اعمل ايه حد يدلني اسيبه ويسافر ويضيع مني وافضل انا في زل اهلي ليا لانهم بيعاملوني اسوا معامله ولا اسافر معاه

مشاكل وحلول ذات صلة

اضيف بتاريخ: Saturday, February 4th, 2012 في 07:25

كلمات مشاكل وحلول: , , ,

23 رد to “خطيبي عايزني اسرق اهلي”

  1. ندي
    12/06/2014 at 17:08

    لو انتي وثقه فيه اعملي اللي بيقولك عليه علشان ماتكمليش حياتك لوحدك من غير زوج وعلشان ماترجعيش لزل اهلك ليكي

  2. ابواميرة
    05/01/2013 at 13:58

    اهم شي انكم تزوجتو وربنايسعدكماويرزقكمالذريةالصالحة الف مبروك ياحبيبتي

  3. صاحبة المشكلة
    21/02/2012 at 01:23

    يا جماعة شكرا ليكم بس احب اقولكم ان احنا الحمدلله اتجوزنا بموافقة اهلنا وقدام كل الناس وبنجهز لفرحنا وكل اللي هو عملوه ده كان بسبب اهله لانهم كانوا عايزينة يسيبني ويفشكل الخطوبة لكن الحمد لله النصيب اقوي من اي حاجه في الدنيا

  4. .بحب الجد مش التهريج وهئ ومئ
    18/02/2012 at 17:09

    ممكن يكون بيضحك عليكى وعايز دهبك
    وممكن يكون بيحبك بجد
    اعملى اللى قلبك وعقلك يوفقو عليه
    ماتمشيش ورا قلبك بس
    ومتمشيش ورا عقلك بس
    حكمي الاتنين قلبك وعقلك
    واكيك هتختارى صح .

  5. حرام يابشر
    14/02/2012 at 13:41

    طبعا غلط اوعى تصدقيه هتندمى والله ما فى حد يستاهل انك تسرقى اهلك علسانه ولو وصلت انك تسبيه سبيه والله انتى اللى هتبقى كسبانه احمدى ربنا انه بان من الاول كده دلوقتى تسرقى اهلك طب بعدين هيغليكى تعملى ايه صلى وادعى ان ربنا يقربلك اللى فيه الخير وربنا يقويكى

  6. تقى
    10/02/2012 at 19:40

    احمدي ربنا انه طلع شخص محترم ويارب ابدا مايخيب ظنك فيه وربنا يصلح الاحوال وييسر امورك معاه ويتمم ليكم على خير يارب

  7. عجايب يا دنيا
    09/02/2012 at 19:49

    بصي عادى مفيش حاجه بس الانسان ساعات من ضغط الدنيا والديون وحجات كتير الواحد بيبقا مش عارف يتصرف ونصيحه مني ليكي لو حصل اى حاجه لقدر الله متسمعيش كلموا فى الغلط فوقيه مش فى وقتها زى ما هوة قالك لو سبتى بيت ابوكى هتسبي بيتي شوفتى ربنا يديم محبتك ويزيد حبو ليكو خد بالك منو ويارب تتجوزي على خير وتروح دنيا تانى ومحدش ليه دعوه بيكم

  8. صاحبة المشكله
    06/02/2012 at 19:02

    شكرا ليكي يا استاذة سمر ولكل اللي نصحوني بس احب اعرفكم انه اتصل بيا وقالي متعمليش اي حاجة من اللي انا قلتلك عليها انا مش مسافر ومتسبيش بيت اهلك لانك لو سبتي بيت اهلك اكيد هتسيبي بيتي وانا بحبك وبخاف عليكي ومعنديش استعداد حد يتكلم عليكي وحش لو عملتي كده واتفق مع اهلي انه يكتب كتابنا كمان 15 يوم واني افضل في بيتنا كمان كام شهر لحد ما شقتنا تخلص وقالي انه لما طلب مني كده دي كانت ساعة شيطان وعلي فكرة انا متكلمتش عن اهلي وحش ولا اتبليت عليهم فعلا اعمامي مش كويسين وسمعتهم مش كويسه وفي بنات كتير في العيلة حالهم واقف من الزواج بسبب سمعتهم دي رغم اننا علي قدر عالي من الجمال وخريجين جامعات وبالنسبه لمعملتهم ليا في البيت فهي اسوا من معامله الكلاب في الشارع وبالرغم من كل ده حبني ومتخلاش عني وجيه خطبني رغم انه يعرف كل حاجه عنهم وقال انهم ميهمهوش في اي حاجه المهم انا لانه هيتجوزني انا وعلي فكرة هو انسان متدين جدا وحتي السيجارة مبيشربهاش بس انا اتصدمت لما طلب مني كده والحمد لله ربنا ردله عقله وصلح غلطة

  9. سارة
    06/02/2012 at 03:23

    بلاش الله أعلم نيته إيه

  10. سمر
    05/02/2012 at 22:17

    احب اقولك انك انتى السبب فى انه يقولك اسرقى اهلك لانك للاسف متستهليش اصلا انك تعيشى فى ظلهم لانك انتى بتسيئى ليهم و اللى ملوش خير فى اهله ملوش خير فى حد و هو باين جدا جدا انه بيضحك عليكى و عايز ياخد فلوسك بس لا اكتر و لا اقل لو فعلا هو كويس هينحت فى الصخر عشانك مش ياخد دهبك و انا بجد بجد زعلانه ان فيه بنت زيك بتتكلم كدا عن اهلها لان دول اللى حاجوا عليكى 25 سنه و بكرة تقولى نار اهلى و لا جنه خطيبك دة اتمنى ربنا يهديكى و تحسنى الكلام عن اهلك السلام عليكم و رحمه الله و بركاته

  11. HanyMoh
    05/02/2012 at 02:16

    أنا لا أعلم مدى صدقه وإخلاصه

    ولكن من طلب من مخطوبته طلبا كهذا فإن الشك يراودني في إخلاصه

    فإن كان مخلصا فلا أرى مشكلة بأن تتزوجا، ثم تبيعي الذهب لتساعديه على السفر وتسافري معه..

    وخاصة إن كانت معاملة أهلك سيئة ومعاملته لك جيدة، ومعاملته مع الناس أيضا جيدة

    فلا تغتري بمعاملته لك فقط، وإنما انظري لمعاملته مع الناس كافة..

  12. حازم الاهلاوى
    05/02/2012 at 01:30

    اختى
    لاء طبعا بلاش تسافرى معاه من ورا اهلك
    قوليلي لا ده حرام وعيب جدا انى اعمل كدا من ورا اهلى
    انا اقديك بروحى اه بس انى اعمل حاجه تغضبهم فده مستحيل
    صدقيني هتكبري في نظره
    طب انا هقولك ع موقف شبيه بكدا
    انا في من الايام قررت اسيب حبيبتى بسبب ظروف ماديه بمر بيها
    مع انى بشتغل في اوروبا بس غصب عنى المهم
    قلتلها معلش مش هينفع نكمل مع بعض عشان مظلمكيش معايا
    قلبها اتكسر وانا كمان كان قلبي بيتقطع انا وبقولها بس انا خايف عليها
    لحسن تستنانى كتيرررر وتندم بعد كدا المهم بعدت عنها اسبوع فتحنا نت سوا صدفه
    قالتى حازم انا هبيع دهبي وابعتلك فلوس دهبي
    قلتلها لاء طبعا مستحيل اقبل فلوس من بنت مهما كانت هي مين ومكانتها ايه ف قلبي
    وكانت مصره جدا انها تبيع دهبها وانا كنت رافض كدا
    انا شايف ان الراجل بجد لما يكون مزنوء في فلوس ممكن يتصرف من صاحبه
    من اخوه من حد قريبه .. لكن انو يستلف فلوس من بنت انا من رأيي ان دي مش مرجله يعني
    حتى لو كان هيديكي الفلوس دي تانى بعد كدا
    بلاش تبيعي دهبك عشان اى حد
    ممكن يكون طمعان فيهم وبعدين يضحك عليكي
    فكرى بعقلك اكتر من قلبك شويا
    مشكله معظم البنات التفكير بالقلب دي مصيبه عندكم هي دي اللى بتوديكم في داهيه
    ربنا يكرمك

  13. شاطئ الأحزان
    04/02/2012 at 23:41

    الراجل اللى عايز يبدأ حياته الزوجية بسرقة ده معناه أنه لا يخاف الله يعنى مش حيتقى ربنا فيكى .. متوفقيش على طلبه و معنى أن خطيبك بيطلب منك طلب زى ده يعنى بيستغل المشاكل اللى بينك و بين أهلك و ألا مكنش أتجرأ و طلب منك دهبك علشان يبيعه و ده مش من حقه و خلى فاكرة أن الزواج اللى بدايته معصية ربنا مبيكنش راضى عنه و حتعيشى فى معاناة معاه .. فكرى كويس قبل ما تتخدنى قرار خاطئ و تندمى عليه عمرك كله

  14. زينا
    04/02/2012 at 22:47

    صلى صلاة استخارة ……… بس فى حاجة هنا هوا معمعوش فلوس يسافر بيها هيبقى ازاى هيصرف عليكى هناك هيشغللك فى بلد متعرفهاااش ولا ايه لازم تفكرى بعققل ممكن يكون عيشة اهللك افضل بكتيير

  15. توتا
    04/02/2012 at 21:27

    لو ضميرك يسمحلك انك تسرقى اهلك عشان واحد ميستهلش وواطى زى دة حتى لو اهلك وحشين مش انتى اللى هتحسبيهم ولا هو دة واحد عاوز يستغلك وخلاص ومش هيتجوزك وهيخاف منك لو سرقتى مرة تسرقى مية مرة

  16. MIDOOOO
    04/02/2012 at 20:44

    لو سيبتى اهلك علشانه هو بكره هيرميكي رمي الكلاب لان هيقول بينه وبين نفسه اذا كانت باعت اهلها يبقى اكيد هتبيعنى حتى لو حلفتيله مليون يمين هو مش هيصدقك وهياخد على قد عقلك لحد ما ياخد مصلحته

    يا بنت الناس حافظى على نفسك وصدقيني والله هتندمى اشد الندم بكره بدل ما كنتى كاتبه مشكلتك وقلتى بحبه هتقولى الحقووووووووونى نصب عليا

    اتقى ربنا فى نفسك وفى اهلك
    اما معاملة اهلك ليكي فتأكدى ان ربنا بيعوض الانسان وماتستعجليش مش يمكن ربنا مخبيلك حاجه احسن منه

    فكرى بعقلك ماتمشيش ورا عواطفك وبس
    صونى نفسك وعرضك وشرفك وكرامتى وماترخصيش نفسك ابدا

  17. ياسمين
    04/02/2012 at 20:32

    طبعا ترفضي اللي هو بيقولك عليه لانه بكد هيبقي حد مش كويس ولا امين عليكي

  18. تقى
    04/02/2012 at 19:31

    لو هو شخص ملتزم وامين وموثوق من اخلاقه وصادق وقد كلمته ومسؤول
    مفيش مانع تساعديه انه يسدد ديونه وتبداى معاه حياه جديده
    بس انتى ادرى بشخصيته والموضوع عندك انتى لانك وياه وعارفه شخصيته
    ومن وجهة نظري مش عيب انك تساعدى شخص بتحبيه بالعكس دي حاجه جميله اوى
    وهتكبرك فعنيه وهيحس انك نصه التانى فعلا وقت الحاجه هيلاقيكي دايما جنبه ومعاه
    ولو هو هيتجوزك زي مابيقول مش هيبقى في فرق بينك وبينه انتو الاتنين واحد
    وربنا يتمم ليكو على خير ونشوفكم احلى عرسان باذن الله

  19. أويس
    04/02/2012 at 19:29

    (ومن يتقى اللة يجعل لة مخرجا) خلية يسافر.. واصبري وصلي صلاة استخارة..لكن ما تتجوزي من وراء أهلك وارضي بما قسمة اللة لكى ولو بيحبك بجد هيتجوزك ولو بعد 5 سنين وما تصغري من نفسك

  20. رورو
    04/02/2012 at 18:12

    اوعى انتى اتاكدى انة علية ديون ولا عايز ياخد دهبك وعييب انك تقولى كدة على اهلك

  21. ساره
    04/02/2012 at 18:06

    لو الراجل محترم وابن ناس ويقدر يحافظ عليكي اتجوزيه لكن كل حاجه بتعمليها تكون بعلم وبموافقه اهلك مش معنى ان اهلك مش كويسين انك تروحي نفسك وسط النار الجواز عشره عمر بالنسبه للسفر هوا هيسافر فين يعني حد يسافر لاول مره ملوش شغل ولا بيت ولا حتى معارف هتكون حاجه صعبه يعني انتو هتتجوزو بمساعدتك انتي وهوا مش قادر يكون تكاليف الفرح ولا الشقه ولسه هتسافرو تكونو نفسكو انا من راي لو هوا عاوز يسافر يسافر يكون نفسه ويرجعلك انتي دلوقتي مشكلتك الوحيده اهلك انما لو اتجوزتي دلوقتي في الظروف دي المشاكل هتكون اهلك وجوزك ومعيشتك وغربتك واولادك فكري كويس

  22. w
    04/02/2012 at 12:00

    رقم 1 انتي واضح عليكي عدم احترامك لاهليك ويجل ذلك علي انك ***** انا اسف بس دي الحقيقة
    رقم 2 لو اعطيتيه الذهب حتي لو تزوجك هيطلقك تاتي لانك انتي مش امينة علي اهلك الي ربوكي 25 سنة هتكوني امينة عليه بالمنطق كده.
    رقم 3 تصيبك موجود بس انتي خلي علاقتك بالله اكبر من كده ومفيش حاجة اسمها يضيع من ايدي بلاش ترخصي نفسك اوي كده.
    رقم 4 عيب عليكي تقولي اهلي ميشرفوش لانة النفيهش خير في اهله مافيهش خير في اي حد
    والله اعلم

  23. xالمواطن
    04/02/2012 at 09:29

    لا حاسبى ماتعمليش كده اوعى والله هتقعدى طول عمرك مزلوله منه هو مش من اهلك وبعدين قوليلى ايه ضمنك بعد ماياخد الدهب مايطلقكش انتى تعلمى الغيب وبعدين دا لو بيحبك مايقولكش كده دا يستاذن اهلك والله ياجماعه عندى شويه ظروف وهسافر وهرجع بعد سنه او اتنين واكيد هما هيقبلو بالوضع لانه جالهم دغرى وشرحلهم وضعه وبعدين هو لما هيسافر اكيد هيهتم بيكى وهيبعتلك كل شهر اى حاجه كده مصاريف يعنى تغنيكى من دوشه ابوكى وامك اما يقولك حدى الدهب وبيعيه لا انا فى الغربه وعارف ان عمر مالسفر مابيكون ساهل دا بيتعب علشان يحصل شغل وغير كده كمان علشان يااخدك معاه فى اوراق وشروط لازم يعملها علشان تسافرى اظن انه مش هيبقا فاضيلك فاحسنلك صونى كرامتك

اترك رداً أو حلاً لهذه المشكلة