مشاكل الخطوبة

خايفة افسخ الخطوبة واندم

انا بنت عمري 23 سنة دكتورة تحاليل مخطوبة لانسان كويس جدا ومحترم والناس كلها بتحبه وبتحترمه لدرجه فوق الوصف وهو بيحبني وبيموت فيا وبيحب اهلي وبيحترمهم جدا ومع اني وحشه جدا في كلامي معاه وعصبيه معاه جدا الا انه عمره مازعلني اويحاول انه يحسسني انه زعلان ولوقلتله اي حاجه مهما كانت صعبه يقولي انا عمري مااقدر ازعل منك وبحبك مهما تكوني واوقات كتير بزعل من غير سبب وبيصالحني ويقولي انا اسف وممكن يبكي من زعلي ويقولي انه وحش وعمره ماهايزعلني تاني مع انه ماببقاش فيه حاجه اصلا وهو انسان ملتزم وخدوم جدا بس المشكله عندي انه معاه كلية علوم بس بيشتغل كاتب في النيابه وبحس دايما بفارق بينه وبيني واني لوكنت استانيت شويه كان جالي احسن منه وده كله علشان جال ناس بعد الخطوبه اعلي منه وقبلها برده فبحس دايما اني قلقانه ومضيقه بسبب الموضوع ده لدرجة اني بتحرج اقول لصحابي هو بيشتغل ايه وبتقلب عليه كل ماحد من اصحابي يسالني السوال ده اوافكرفي المستوي اللي كان نفسي اكون فيه اني اتخطب لدكتور اومهندس انا خايفه التفكير ده يفضل معايا حتي بعد زواجي مش عارفه اعمل ايه وخايفه افسخ الخطوبه اندم بعد كده واكون سبب لعذاب انسان مالوش ذنب مع العلم اني قلتله عايزاك تكمل الماجستير وهو موافق بكل حاجه انا بطلبها من غير تردد مش عارفه اعمل ايه تعبانه جدا وخايفه مع العلم اني بحبه والله وعمري مكانليا علاقات قبل الخطوبه

مشاكل وحلول ذات صلة

اضيف بتاريخ: Sunday, December 4th, 2011 في 03:39

كلمات مشاكل وحلول: , , ,

36 رد to “خايفة افسخ الخطوبة واندم”

  1. شيررو
    26/09/2020 at 12:21

    عملتي اي

  2. ادهم
    13/07/2016 at 21:35

    المهتدى بالله قال كل اللى كنت عاوز اقوله الله يباركله

  3. طيور الجنه
    26/07/2012 at 23:45

    اسمعينى كويس يا دكتوره يا محترمه لو فيه توافق بينكم وانتى بتحبيه يبقى الكلام انتهى ووافقى على طول فهذا لا يعيبه كليته فاذا جائكم من ترضون دينه فزوجوه ولا تحطى ف دماغك زمايلك والكلام الفاضى ده اما ان لم يكن هناك توافق بينك وبينه ولا تحبينه فلا داعى لان ترتبطى به لانك بعد الزواج هتفضلى متعقده من النقطه اللى انتى متضايقه منها ف فتره الخطوبه وهى كليته اذا لم يكن لديكى القدره على التخلص منها وانا لا اعتقد ذلك والسؤال اللى بيطرح نفسه ليه انتى قبلتيه من الاول طالما انك رافضه كليته واننى اشك انك قد كبرتى ف السن او شىء اخر جعلكى تقبلينه لذلك انصحك بان تتقى الله ف نفسك اولا ثم ف هذا الشاب ولا تعذبيه معك اكتر من ذلك وتفكرى بصوت عالى قدام احد الذين تثقين فيهم وتقررى مصيرك ولعل هذا الشاب يكون افضل من غيره وشكرا اتمنى وجهه نظرى تكون وضحت ……..

  4. توتا
    08/05/2012 at 16:10

    لا انتي مش بتدلعي ولا حاجة زي ما بيقولوا انتي بس عاوزة شوية تفكير بهدوء مع نفسك وقرار حاسم انك هتقدري تكملي ولا لاء وفي الحالة دي حكمي قلبك ودينك وعقلك ولو لقيتي حاجة فيهم رافضة يبقي خدي قرار علطول علشان متظلمهوش معاكي ودلوقتي احسن من بعدين طلاق لاقدر الله …بس في الاخر اتاكدي اوووي ان هو بيحبك بجد هتفرق كتير ولو كده ساعديه انتي انه يطور من شغله

  5. موافقة
    20/04/2012 at 21:28

    االمهتدى بالله انا معاك جداا
    بصى يا دكتورة اولا خريج علوم مش وحش وع فكرة ممكن يعمل دبلومة تحاليل ويبقى زيك وعنده معمل مش فاهمة ازاى بتتكسفى منه او من شغله وليه وافقتى عليه من البدايه يا دكتورة يا متعلمة لو كنتى فعلا متعملة مش كنتى مشيتى بمبدا ضل راجل ولا ضل حيطة
    اتقى الله فيه حرام عليكى

  6. محب المحامى
    01/03/2012 at 17:57

    شوفى يا دكتوره من كلامك سوف تجابين علىسؤالك
    انت بتتحرجى تقولى لزميلاتك على عمل خطيبك
    وهنا مفتاح الاجابة
    وهقولك كلمة نهائية ” كل الرجال زى بعض ، وكل الستات زى بعض طيب انا اختار مين ؟ اختارى اللى يناسبك طباعك ويوافق ظروفك واللى تفتخرى بيه امام نفسك وامام قرايبك وامام زميلاتك ”
    هل انتى تفتخرى بيه امام نفسك ؟
    كما ان الحب – وحده- لايكفى
    لابد من ” تناسب ” ثقلفى وفكرى واجتماعى 0
    هذا الاخ لايصلح ليكى يادكتورة 0
    مشاعرك اللى هى تابعة لافكارك ستبقى هى هى بعد الزواج 0
    الرب يبارك حياتك ويعطيكى حكمة سماويه 0
    سلام 0

  7. HanyMoh
    20/02/2012 at 12:34

    كلام عجيب مريب هو شكله شخصية ضعيفة لأنه مستحملك لغاية دلوقتي

  8. نونه
    15/01/2012 at 00:40

    ايه يعنى دكتوره يعنى انتى بنت 11وهو ابن 9 كلنا ولاد 9 واحب اعرفك حاجه انا ليا واحده صاحبتى جميله جداجداجدا كان متقدملها دكتور انتى عارفه مؤهلها ايه دبلوم زراعه بس رفضته علشان مش مرتحاله

  9. المهتدي بالله
    05/01/2012 at 08:50

    انا قرأت معظم الردود وسأردعليكي ردا مختلفا
    أنا هأقولك على اللي ها يحصل معاكي
    انتي ها تفضلي في شد وجذب مع نفسك وكل ما الموضوع هايقرب يدخل في الجد أكتر وكتب كتاب وفرح وغيره ساعتها ها تنتفضي ومش ها تكملي الموضوع لأنك مش متردده انتي مش مقتنعه وطماعه وتنظرين لما في يد غيرك
    انتي مستكتره نفسك على الولد مش هاقولك انك مش مالي عينك والله العظيم لو انا مكانه لو كنتي انتي حاصله على الدكتوراه من السوربون او من أوكسفورد أو كنتي آخر واحده في العالم وبعدك ها أعيش راهب طول عمري لكنت عطيتك بالجزمه وكنت سيبتك لو ها أخسر اللي وراي واللي قدامي ولو هاأبيع هدومي لأن الوضع ده ما ارضاهوش على كرامتي يا دكتووووووره الواحد ممكن يعيش بدون حب ولكنه لا يمكن ان يعيش بدون كرامه

    هاأسألك سؤال هو من الاول مش قال لك على مؤهله وعلى شغله انتي وافقتي ليه من الاول ما دام المؤهل مش عاجبك
    بعد كده يا دكتوره ( اكيد انك حاسه نفسك انك الدكتوره الوحيده في الدنيا وان طينتك غير طينة بقية البني آدمين) يا محترمه على ما يتكبر الانسان ويفتخر لو كل انسان نظر لما في داخل بطنه ما تكبر أحد على أحد يا دكتوره يا أم تفكير حلو البني آدم بيصاب بشوية برد بيخلو يتلقح زي الكلب في السرير ما يقدرش يتحرك

    يادكتوره انتي ها تسيبيه في النهايه بس صدقيني انك ها يجي لكي واحد يطلع عينيكي لانه هذه سنة الله في خلقه كما تدين تدان

    انتي ومن هن مثلك في تفكيرهن لا تجدي معهن النصيحه انهم يجب ان يعيشن التجربه بأنفسهن والله انا عارف ان كل اللي كتبوا لكي رأيهم قبلي بينفخوا في قربه مقطوعه

    الواحد يا دكتوره يا حلوه ما يعرفش قيمة أمه غير لما يجرب مراة أبوه
    وساعة الندم عندما لا ينفع الندم ابقي خلي الدكتره بتاعتك تنفعك ( اصلي الدكتوره زايده عن بقية البنات يعني مناخيرك بتلات فتحات ولا أيه )

  10. مهندس/أحمد
    02/01/2012 at 00:46

    يا دكتورة أنصحك إنك تتركيه لإنك مترددة وحتي لو أخذتيه هتندمي وبعدين لو إنتي جميلة يبقي ده حقك وأنا عارف إنك مترددة يبقي سيبك منه علشان إنتي ما تذلهوشي وهو أصلا غلطان إن ياخد واحدة أحسن مستوي ف الشهادة
    وربنا يكرمك بمهندس أو طبيب

  11. مصرية بجد
    02/01/2012 at 00:26

    انا رايى انك تتركية لان موضوع التكافؤ ده هسيبلك عقدة مع نفسك وربنا هتدايئى وانا تربية انجليزى ومخطوبة لمهندس ومن عيلة كبيرة كمان يبقى انتى يادكتورة مش هتتشرطى ده انتى تتشرطى وبالقوى كمان ومتسمعيش كلام الناس اللى بيقولوك اعصرى ع نفسك لمونة وحاولى تشوفى ان مفيش غيره لا فى طبعا ولازم تاخدى اللى يملى عينك عشان تقدرى تسعديه وحد تفتخرى انك اتجوزتيه وربنا يوفقك لما يحب ويرضى وربنا يرزقك بالمهندس او الدكتور او اللى تحبيه

  12. مصرية بجد
    02/01/2012 at 00:23

    انصحك ان تتركيه فورا لازم الراجل اللى تاخديه يبقى مالى عينك عشان تقدرى تسعديه وان شاء الله هتلاقى دكتور او مهندس انتى دكتورة يابنتى ماتستهونيش بنفسك تعبتى عشان تبقى دكتورة يبقى لازم تاخدى حد يقدر تعبك سواء مهندس او دكتور وانا هتكلم عن نفسى واخدة تربية انجليزى ومخطوبة لمهندس فعادى يعنى انتى كمان من حقك تتشرطى لان موضوع التكافؤ هيدايقك طول حياتك حتى بينك وبين نفسك

  13. مودى
    26/12/2011 at 11:44

    انا بس عايز اقولك حاجة بسيطة اتقى ربنا فى اللى معاكى وحاولى تحافظى على مشاعر خطيبك انا مش عارف بجد ليه الواحدة لما تلاقى واحد بيحبها وبيديها كل ما عنده بتتنمرد عليه وبتديله بالجذمة تفتكروا هوه ده الجزاء وكلمة الشكر اللى ممكن يستناها من واحدة حبها واخلص لها للاسف يا انسة لو كان بيتعامل معاكى بأسلوب اوحش من كده كنتى انتى اللى هتموتى فيه وبعدين انتى بتقولى مستوى الزمن اللى احنا فيه يا انسة مبقاش فى حد بيفكر زيك كده لان ببساطة مبقاش حد لاقى لقمة العيش بسهولة بجد بجد ربنا يهديكى .

  14. مهندس/أحمد
    21/12/2011 at 15:15

    يا دكتورة إحمدي ربنا علي خطيبك ده علشان ربنا يباركلك في حياتك وذريتك وسيبك من كلام الناس كلام الناس أخره هلاك وبلاش
    تردد وخوف وتوكلي علي الله وبلاش إنك تنتظري حد يقولك سيبك منه _ لأ يا دكتورة أفتخري إنك هتاخدي خلق وأدب مش هتاخدي منصب يذلك_ الدنيا فانية والمناصب ف زوال

  15. لولا
    18/12/2011 at 19:00

    انتى الصراحه غلطانه خطيبك ده حافظى عليه لان فى الزمن الى احنا فيه نادر انك تلاقى واحد يحبك بجد ويحافظ عليكى ويحب اهلكويحترمك اوعى تسبيه عشان متندميش بعدين وان شاء الله ربنا يكرمه بشغل احسن من كده مع انى شايف ان الشغل فى المحكمه لاعيب ولا حرام وخصوصا مفيش وظايف دلوقتى

  16. فريد
    17/12/2011 at 19:26

    والله يا أختى رغم أنك دكتورة تحاليل الا أنك لا تعرفين كيف تعيرين العلاقة الصحيحة المثلى بين الرجل والمرأة التي هي أساس الزواج الناجح والحياة السعيدة ان كان هذا الشخص يحبك ويتفهمك ويحترمك ويخاف عليك وهو مثقف ويعمل كذلك فماذا تردين أكثر من ذلك هل تردين شخصا مستواه المادي عالي يجرد من مشاعرك وأحاسيسك لا يفهمك أبدا يراك مجرد سلعة مثلما اشتراها فهو قادر على أن يبيعها أنا لا اقول بأن كل الشخص مستواه عالي يكون كذلك ولكن يا أختي أنت تردينه هكذا مثلما تحددين الشخص حسب مظهره ومستواه حتما سوف يحس بك ويعاملك على أساس ذلك يا أختي الزواج السعيد يبنى على الحب والتفاهم والاحترام بين بعض والزواج التعيس غالبا ما ينتهي بالطلاق لأنه تنعدم فيه المحبة والاحترام والتواصل فالزواج السعيد يحتاج الى تلاحم وتماسك عاطفي وليس مجرد حسابات أو غايات في أنفسنا.أما عن الاصدقاء اذا سألوك عن مستواه فقول لهم أن الحب والاحترام والمفاهمة أهم وهي اساس الزواج وأنت الحمد لله دكتورة وهو كذلك انسان يعمل يعني أمور الحياة متيسرة لديكم يا أختي يجب أن تحمد الله لأنك وجدت نصفك الآخر من يكملك من يحس ويشعر بك ومثله قليلون في يومنا هذا فحافظ عليه لأنك ان ضيعته قد لا تجدينه ابدا وهذا ما قاله رسول الله صلى الله عليه وسلم (إذا جاءكم من ترضون دينه وخلقه فزوجوه)

  17. مهندس مدني/ أحمد معتمد
    17/12/2011 at 19:20

    أنا عندي نفس المشكلة أنا مهندس مدني عندي25 سنة وأهلي بيقولولي إتجوز طبيبية أو صيدلانية حتي تناسبك وضعك بس أن شايفها مش
    شرط وأهم حاجة الأدب وبعدين كم من طبيبة تزوجت من دكتور وكانت النهاية لا يتقبلها أحد ا الطبيب في العيادة لا يهتم بالبيت والزوجة
    وعلاقتهم الزوجية فاشلة بسبب البعد والإهتمام بالمناصب فكري كويس يا دكتورة وربنا يوفقك وتتم علي خير

  18. اشرف
    17/12/2011 at 09:11

    من حقها الإختيار

  19. جنان
    14/12/2011 at 19:27

    السلام عليكم.والله العظيم نفس المشكلة اعاني منها بالحرف الواحد الي ذكرتيها.واعاني مثلك وخايفا اندم لو فسخت الخطوبة خصوصا انو الان بيجيني خطاب احسن منو في المستوى العلمي لكن ادعي ربي يرضيني. ويثبتني على ديني.وربنا يهدينا لسراطه المستقيم.

  20. dr-f
    09/12/2011 at 23:04

    يا حبيبتي لا تفسخي الخطبة وادعي ربك يرضيكي بنصيبك انتي رح تتجوزي شخص مو شهادة وبعدين انتي ضمنانة لو انخطبتي لدكتور او مهندس انو رح يعاملك بهالطريقة ويكون منيح معك لهدرجة
    او انو رح يحبك اصلا
    كل مرة بيخطرلك انو في فرق بينكم(مع العلم انو الجامعي للجامعية) تذكري معاملتو الحلوة وانو بيحبك وبيخاف عزعلك وانك اذا تركتي احتمال كبير يجي يوم وتندمي عند اول مشكلة بينك وبين شريك حياتك المستقبلي خاصة اذا ما خاف عليكي وعزعلك هيك ورح تقولي يا ريت وساعتا ما بتفيد

  21. انسان
    09/12/2011 at 22:43

    انا شايف ان كلية العلوم كليه محترمه جدا وهيه زى الطب يا ريت تفكرى كتير قبل ما تاخدى القرار فعلا ممكن تاخدى واحد بتاع هندسه او طب والحياه متكونش حلوه وممكن تاخدى والحياه تكون اسعد بس انا بنصحك لو مش راضيه بالوضع سبيه ديه عشره وحياه ربنا يعلم نهايتها

  22. الوردة الزرقاء
    09/12/2011 at 19:47

    لو كنتى بتحبيه بجد عمرك متفكرى فى شغله انتى عارفة انتى اللى زيك المفروض يحسدوها عارفه لية بس من غير زعل عشان كل بنت نفسها تعيش فى اللى انتى فية يا انسه اجب اقول لكى ان خطيبك ده مفيش منه تانى يعنى يعتبر هو اخر الزمن الاصيل فحافظى عليه بكل جوارحك اما بالنسبة الى شغلة فاظرى الى زوجة الزبال الى بتفتخر بزوجها مهما كانت الفوارق الاجتماعية فى الاخر هما زوج وزوجة ستر وغطا على بعض ارجوكى يااختى فكرى كويس عشان محدش عارف يتزوج الان بسهولة ومن النادر انك تلاقى انسان كويس زى الى معاكى وارجوكى استخيرى ربنا بس متحتيش فى دماغك وانتى بتستخيرى انك عوزة تسبيه اتقى الله فيه وفى نفسك

  23. ام عمار
    09/12/2011 at 19:46

    اعرف واحده متزوجة دكتور وبيخونها مع الممرضات واعرف واحدة متزوجة مهندس لكن نصاب اثار واعرف واحدة متزوجة ظابط شرطة بيصبحها بعلقة ويمسيها بعلقة ايه رايك ربنا يديكي الثلاثة دول عشان تحسي بالنعمة اللي في ايدك

  24. نورهان
    07/12/2011 at 09:14

    انا ردى انى مش كل واحد يقول لواحده انه بيحبها فهو بيحبها ساعات كتير بيكون بيمثل والله لغيت لما يخليكى تحبيه وبعدكدا هتلقيه هيتغير صدقنى والله وهيجى مع اهله عليكى بكره هو عامل نفسه زى الملاك اللى نزل على الارض دا بس فى فتره الخطوبه بعد كدا شتيمه وضربه وبهدله والله انصحك انك تصلى صلاه استخاره واللى هتحلمى بيه لو قومتى مبسوطه يبقا كويس لو حلمت حلم وحش يبقا بيمثل

  25. ميلاد
    05/12/2011 at 19:18

    انا عاوز اقول حاجة وماحدش يزعل منى ( هذا الشاب المحترم خسارة فيكى )

  26. ya
    05/12/2011 at 18:30

    ياحبيبتي متفكريش في كده وتخاوليش تعملي فرق بينك وبين خطيبك واوعي تفسخي الخطوبة وتكوني سبب فى تحطم قلب بيحبك وعلي فكرة انا كمان خطيبي مؤهله متوسط وده مش عيب في الرجل ومع ذلك بفتخر فيه وسط الناس كلها

  27. الساجدة تحت عرش الرحمن
    05/12/2011 at 13:31

    دة واحد بيحبك وبيحترمك وبيخاف عليكى وكمان ملتزم ومتدين والرسول قال من ترضون دينه وخلقه انى عايزة ايه اكتر من كدة وفعلا هتندمى لو سيبتيه احمدى ربنا انك لقيتى حد بيحبك كدة رغم كلامك القاسي معاه وبعدين الراجل بيشتغل مش عاطل يعنى ولا حاجة والشغل مش عيب حتى لو كان بسيط راجعى نفسك واتقي الله في الانسان اللي حبك للدرجة دى

  28. نور
    05/12/2011 at 07:37

    رب زمن بكيت فيه فلما صرت في غيره بكيت عليه

    انا رايي تصلي الاستخاره

  29. عايش الواقع
    04/12/2011 at 21:31

    اختى الكريمة انا قاعد اشوف المشاكل اللى موجودة على الموقع معلقتش على اى مشكلة غير لما استفزتنى مشكلتك
    اصل انا مش عارف ايه حكاية البنات لما الواحد يبقى محترم وميعيبهوش حاجة ويتمنى يعمل اى حاجة لخطيبته اى حاجة البنات تقولك اصل مش عارف ايه ولما ما يعبرهمش تجروا وراه انتوا عايزين ايه
    تانى حاجة انتى بتقولى معاه بكالوريوس علوم يعنى راجل متعلم وشغله ميعيبهوش ما دام مش حيدخل بيته قرش حرام حضرتك بتقولى كنت عايزاه دكتور او مهندس لو حضرتك بتدورى على المستوى يبقى سيبيه لو بتدورى على اللى حيصونك ويخاف ربنا يبقى فكرى شوية لكن اقولك حاجة ايه ضمنك انك لو اتجوزتى مهندس او دكتور انك تعيشى سعيدة صدقينى ممكن تفسخى الخطوبة وبعدين متلاقيش حد فى مواصفاته وتندمى وممكن تلاقى حد فى مواصفاته واحسن منه بس ده فى علم الغيب وبعدين لما ربنا يبعتلك هدية ترفضيها الشخصيات اللى زى خطيبك ده عملة نادرة اليومين دول ومن خلال تجربتى فى الحياة صدقينى لما البنت او اهلها بيتنطتوا او بيرفضوا الانسان الكويس مش بيجى حد زيه او مبيجيش اساسا ده من تجارب سمعتها ومن تجارب اصحابى وتجارب الناس واخرهم انا انا الحمد لله تقريبا زى شخصية خطيبك لما روحت اتقدمت لواحدة اهلها اتعاملوا معايا على الجوازة كأنها بيع وشراء وكلفونى اكتر من طاقتى واتكنسل الموضوع مع انها كانت مخطوبة لواحد قبل منى كان شبه بلطجى طيب دلوقتى بقالها 4سنين من بعد ما اتقدمت متقدملهاش حتى واحد زبال مش دكتور او مهندس وسنها بيكبر واحب افكرك بحديث النبى صلى الله عليه وسلم اذا جاءكم من ترضون دينه وخلقه فزوجوه إلا تفعلو تكن فتنة وفساد كبير) وسامحينى لو كنت اساءت فى اى جزء من الكلام

  30. الهدى
    04/12/2011 at 20:16

    انا بكلمك كاخ اكبر لاخته الصغيره نصيحه لوجه الله احب اعرفك ان التفكير اللى انتى بتفكرى فيه مش يبعدك عنك ابدا لا قبل الزواج ولا بعد الزواج ما دامت انتى بتعملى مقارنه باصحابك طبعا فيه اللى جوزها دكتور واللى جوزها مهندس وهكذا وانتى طبعا مكسوفه تقولى ان خطيبك وظيفة ايه فارجوكى افسخى الخطوبه لانك لو اتجوزتوا انتى اللى خسرانه فى النهايه لان الراجل مش هيخسر حاجه ممكن بعد كتر المشاكل هيطلقك ويروح يتجوز بنت بنوت كمان لانه لا يعيبه شئ اما انتى طبعا بعد الطلاق لو حبتى تتجوزى مش هتلاقى الا الجوازات النصف كم زى ما بنقول لان فرصك هتقل ولانك كده هتظلمى نفسك وهتظلميه معاكى وفى النهايه نقول الجواز قسمه ونصيب لو فيه نصيب هتتجوزوا وربنا يوفقك لما فيه الخير والصلاح

  31. سجي الليل
    04/12/2011 at 19:32

    انا علي فكرة هرد عليك عشان كلامك واضح انتي زي ما تكوني عايزة حد يقلك سيبية عشان ترفعي عن نفسك الندم المشكلة بعد كدة عشان الاحساس بانة ديما اقل منك سوف يلازمك وهتحسي بالاحراج من وظيفتة مع اني مش شايفة فيها حاجة نظرا للظروف الحالية اي شاب بيحاول يجد وظيفة في اي مكان وياما مهندسين شغلين في وظائف متدنية بس المهم الانسان نفسة لكن انتي بصيت للمتقدمين ليك قبل وبعد ودة ينم علي فشل هذا الموضوع وعدم اقتناعك بية فكري مع نفسك بصدق وشوفي اذا كنت هتقدري تكملي ولا لا عشان لا تظلمي نفسك ولا تظلمية هو والله خير موفق واكثري من الاستخارة

  32. الدكتور
    04/12/2011 at 17:00

    يا دكتوره اول شى الراجل لا يعيبه شى اللى جيبه وده مثل بلدى تانى شى العظمه والكبريا لله وحده تانى شى ده شاب بيشتغل وده احسن من غيره وكفايه انه بيحبك احنا فى زمن قليل لما تلقى انسان يحبك باخلاص زى ده احمدى ربنا بدل ما تندمى كان من الممكن ان يتزوجك دكتور ولا مهندس ويخليكى تكرهى اليوم اللى اتولتى فيه حبيبتى انا دكتور ومتزوج بامراءه ست بيت والحمد لله مرتاحين وسعداء اهم شى السعاده والرحه النفسيه اهم من الالقاب والتباهى مع تحياتى دكتور/رضا من القاهره

  33. xالمواطن
    04/12/2011 at 14:20

    طالما بيحبك وخايف عليكى يبقا هيصونك اما بالنسبه للشغل بتاعه فهو انسان جامعى متعلم وذا كان اشتغل الشغلانه دى فاكيد اضطرارى لقله الشغل اليومين دول وفى اى وقت يمكن يلاقى احسن منها بس انتى اقفى جنبه وابنو حياتكم وسيبك من كلام الناس اللى لابيقدم ولا ياخر

  34. الاء
    04/12/2011 at 13:47

    انا يعتبر فى وضعكك بس انا كليه ادبيه وخطيبى مؤهل متوسط وبيعمل زى خطيبك كدا بس انا مقدرش ازعله وساعات بحس انه اققل منى فى التعليم ولما حد من صحابى بيسالنى خطيبك مؤهله ايه ساعات بتلعثم ومش بعرف اتكلم بس مع الوقت بحس انى لواخدت واحد انا اللى بحبه وهو مش بيحبنى هيذلنى لانى فعلا كنت مخطوبه لواحد قبله وكنت بحبه وكان بيبهدلنى وبيشتم ف اهلى وكل ده كنت بستحمل بس عشان بحبه وبعدين مقدرتش استحمل الوضع ده وحسيت انى ولا حاجه وكرامتى ضاعت يا حبيبتى انا جربت الوضعين وصدقينى خدى الى بيحبك متخديش اللى بتحبيه وسيبك من حكاية التعليم دى وهو برده مؤهله عالى وربنا يوفئك

  35. اختك في الله
    04/12/2011 at 10:38

    معلشي انتي بتدلعي اوي
    هو معاه دبلوم ولا اعدادية مكسوفة من ايه
    حتى لو معاه دبلوم
    ياحبيتي مااحنا متجوزين اهو وكليه زيي وجبنا عيال وناسيين موضوع الشهادات دي خالص
    وبعدين حد طايل حد محترم وبيحبك ويخاف عليكي ومستحملك
    بلاش دلع
    اصحاب مين دول
    مايمكن تتجوزي دكتور ولا مهندس ويديكي بال……….
    بلاش احسن
    مادام راجل محترم وبيحبك خلاص اتوكلي على الله

  36. الطيار الرايق
    04/12/2011 at 07:18

    التزمى معاه وشوفى الصح واعمليه انتى مش صغيره ولا نونه هتدلعى على ايه مفيش وحده لاقيه انسان محترم وبيحبها وتعمل كده / المحامى

اترك رداً أو حلاً لهذه المشكلة