انا متزوجه من 4 شهور تخيلو 4 شهور جوزي قعد معايا شهر وسافر وهو معايا كان انسان كويس اوي احنا اتجوزنا جواز صالونات بس انا حبيته اوي وما اعرفش هو حبني ولا لا..وهو معايا كنت بحس انه بيحبني يمكن عشان ده شهر العسل وبعد ما سافر كل حاجه اتغيرت هو بيكلمني كل يوم مكالمه دقيقه واحده بيقول فيها انا روحت وتعبان وطالع انام بس كده كل يوم علي كده وهي دي كل علاقتي بيه ما فيش اي كلمه حلوه ولا اي كلام اساسا انا حاولت اقرب منه وببعتله رسايل كتير وفيها كلام حلو بس عمره ما رد ولا برساله ولا حتي حسسني انه اخد باله اني بعتله حاجه …حياتنا بقت بارده اوي وانا تعبت منه جدا وتعبت من طريقه الحياه دي .حاولت كتير اتكلم معاه بس من غير فايده اخر خناقه بينا كانت لاني بعد ما اتصل وقفل معايا حسيت اني محتجاله ومحتاجه اكلمه فضلت اتصل بيه كتير اوي وما ردش بعتله رساله اني محتاجه اتكلم معاه اتصل بيه وفضل يزعق ويقولي عايزه ايه انا مش لسه مكلمك طبعاطريقته ما شجعتنيش اتكلم خالص فقولتله خلاص مافيش حاجه اقولها اقفل وانااسفه اني لما احتجتلك اتصلت المهم فضل يزعق ويقولي خلاص قولي عايزه ايه ولما ما قدرتش اتكلم قفل في وشي وبعدها قفل موبايله ..مع العلم اننا كنا متفقين انه هيسيبني 3 شهور ويبعتلي وما نفذش وعده…انا اعصابي تعبانه جدا وخلاص مش قادره اكمل كده ارجوكم ساعدوني وانصحوني اعمل ايه مع العلم اني حاولت اقربله بكل الطرق وما عرفتش وخلاص مش قادره استحمل اعصابي ادمرت وحياتي فاضيه جدا وهو رافض اني اشتغل او اعمل اي حاجه فيها خروج من البيت وحاسه اني غلطه عمري اني اتجوزت…ارجوكم ساعدوني
مشاكل الازواج
ندمت على الزواج بعد 4 شهور بس
اضيف بتاريخ: Tuesday, April 5th, 2011 في 05:01
كلمات مشاكل وحلول: الحياة الزوجية, جواز, جواز صالونات, متزوجة, مشاكل الازواج, مشاكل زوجية, مشاكل زوجية
اتفق مع الاخت نور-والاخت مواطنة مصرية- في كل ماقالوه للاخت صاحبة المشكلة وارى انه عين الصواب والراي الصحيح لحل مشكلتها مع زوجها واتمنى انها تستفيد من كل قالوه لها وربنا يصلح احوالها ويسترعليها ويؤفقها
يااخواني خليكم ناس عقلاء ومقدرين وضع الفتاة وحالتها هي متزوجة حديثامن 4شهور وعريسها سابهاوسافرلاجل العمل ومافكرش فيها ولاعاوزهاتتصل به ومتضايق لمايكلمهاويقفل السماعة في وشها فهل هذة تصرفات انسان عاقل بالله عليكم وايه هوالشغل اللي يخليه يعامل زوجته اللي لسه مكملش معها4شهور بهذةالطريقةوالاسلوب الجاف والقاسي في المعاملة كانها تشحت منه الحب والمشاعروالعواطف لو واحدة منكم اوابنته اواخته مكانها اكيد مش هتقولواالكلام بتاعكم الفارغ ده لكن للناس الاخرين ترضون به وعندكم عادي وتحطوالاعذارالواهية والكاذبة للزوج ولاتقولواالحقيقة اختي الزوجة كان الله بعونك دعيك من كلام الناس اللي ردواعليك واسمعينى جيدا الموضوع خطير ولاينبغى اغفاله اوالتساهل معه لازم تصارحي زوجك المحترم بكل ماتشعرين به وتطالبي حقوقك الشرعية منه بان تكوني معه وتعيشي معه وبجواره مثل بقية الزوجات مع ازواجهن وبحسن المعاملة لك في الكلام وانك زوجته ولازم يقدر كلهذا وان رفض واستمر على معاملته الجافة الغيرانسانية معك ومش معبرك ولاسائل فيك ولايقدر مشاعرك واحساسيك فمن الافضل انكم تطلقوا وكل واحد ينام على الجانب اللي يرتاح له ولااشك ان زوجك اما انه تزوجك غصباعنه ومش بيحبك او ان قلبه مشغول بواحدة تانية قدرت تخليه ينساكي ويعاملك بهذةالمعاملة الجافة والقاسية والغيرمقبولة على الاطلاق احيانا الغربة تغير الناس وتفسدالاخلاق والتربية في البشروتجعلهم يقسون على اقرب الناس لهم
عليك بالصبر وتقدير ظروف زوجك في الغربة قديكون الشغل مااخذكل اهتمامه ووقته انت خليك مقدرةكلده وتاكدي انه لن ينساكي اويتخلى عنك ابدا اشعريه بالحب والحنان والعواطف الرومنسية عن طريق الرسايل اوالتويتر اوالواتس اب بدون اتصالات واذا برضوه مانفعش كلدهمعاه واستمر في تجاهلك واللامبالة بك فعنداذا خلي احدمن اهله يتكلم معه ويعرف حقيقة مايفعله معك من تجاهل ولامبالة في غيرمحلها فانت زوجته لك عليه حقوق وواجبات زي ماله بالضبط ومايصح يعمل معك كلهذا وحرام عليه شرعا والا كل واحدمنكم ينام على الجانب اللي يريحه وربنا بيكرمك بغيره ماوقفت الدنيا على كده اهم حاجة عندالانسان الكرامةوعزةالنفس
اختي العزيزة لازم احدمن اهلك يدخل في الموضوع ويتكلم مع الشاب ويعرف ايه الاسباب التي تخليه يعمل معك كلده اوحتى ابوك اواخوك بسافر لعنده ويتكلم معه بكل شفافيه واريحية واكيد فيه حاجة في الراجل مش طبيعية اماانه مغصوب على الزواج منك او شايف له شوفة تانية والله اعلم وماتسكتي على الحال ده لان فيه تفريط لكرامتك كزوجة وعدم اهتمام بك ولابمشاعرك وماتعانين منه وفي الاخركل شي قسمةونصيب اذاتعذر اصلاح حاله وفقد الحب والمشاعر بينكم فكل منكم يذهب لحال سبيله والطلاق ارحم لك من الوضع ده ربي يصلح الحال ويهدي النفوس
اختي اذاكان الزوج بهذةالصفات وتلك المعاملة لازم احدمن اهله يتدخل في حل المشكلة قبل ان تتعقد وتوصل الى طريق مسدود وان استمرالوضع على ماهوعليه من التجاهل واللامبالة فلاخيارامامك غير طلب الطلاق منه وفورا كي تحفظ كرامتك وعزةنفسك وكرامةاهلك وتصوني عرضك من الوقوع في الحرام وربي بيكرمك بابن الحلال اللي يقدرك ويستاهلك ويسعدك في الحياة
الى كل الاخوةالقراءالكل منكم طلب منها الصبر والانتظار الى متى الرجل مايعبرش البنت ولاسايل فيها ودايم بيزعق لهااذااتصلت به هل هذاتصرف ناس عقلاءمهماكانت الظروف الكلام الطيب صدقة وتبسمك في وجه اخيك صدقة قولوالهاخيرا اواصمتوا بلاش فلسفة زايدة اختي الصغيرة اسمع لكل ماقوله لك اذاانت بتحبي الشاب داه وحاسه انو بيتغير استمري معه واذا شايفه انوالحياة معه صارت صعبه وانت مش قادرةالاستمراراطلبي الطلاق فورا ارحم لك من العذاب دا وخصوصا وانت لسه صغيرة والمستقبل قدامك والف من يتمناكي ربي يسعدك في حياتك
الانسان ذاشخص غيرطبيعي بالمرة ممكن تسميه اناني مايحبش الانفسه اوبلاشعورولااحساس كالجماد مافيش حاجة تمنعه من التحدث اليك والانصات لك اوالسوال عنك وخصوصاوهو مغترب بعيد عنك انامن رايي انك تطلبي منو االعودة في اقرب وقت والجلوس والحوارمعه في تفاصيل حياتكماواسباب التغير المفاجي معاك وذالم تجدي حلامقنعا انصحك بطلب الطلاق حل يرضي كلا الطرفين لان الحياة اصبحت مستحيلة
سيدتى السلام عليكم
عايز ابدأ بكلامى بعبارة وبعدين أدخل بالموضوع ساعات صبر الزوجه على ظلم الزوج بيدخلها الجنه والعكس
سيدتى ما يفعله زوجك فهذا ظلم وعم أحساس بيكى ولم يتقى الله ولا يراعى حقوقك مع العلم أنه بعيد عنك والمفروض يكون قريب جدا منك ولو بالحوار ولكنه رفض هذا كله أما بخل علشان ما يدفع كثيرا فى مكالماته أو هو أنسان ليس لديه مشاعر ولا أحساس ولا حنان ولا عاطفه ولكن هناك زواج وبيت أسس ومن الصعب أن فى الفترة القصيرة نحكم على كل الأمور
وأنا أرى أن لازم حد يتدخل من طرفه يكون بيحبه ويكون بيسمع كلامه مثل أمه أخته أخوه أى حد يكون قريب منه ويتكلم معاه أن يغير من علاقته بيكى ويحتضنك ويحتويكى حتى وهو بعيد عنك ولا نطلب الطلاق أبدا إلا إذا طرقنا كل الأبواب تحياتى وربنا يوفقك
والله عندك حق الراجل ميستهلش الحنان والحب انا حكايتي زي حكايتك اجوزت وبعد اقل من شهر سافر يعني قولي كده 28 يوم سافر كنا منفرقش بعض تلفونات كل شوية تعبت مرة كده وروحت للدكتور وقالي اني حامل فرحت وهو كمان طاير من الفرحة بس للاسف بعد اسبوع ضاع الحمل لاني كنت تعبانة جامد قالي مش مشكلة دي ارادة ربنا فعلا ربنا مكتبليش ده بس الاصعب من ده ان طريقة معاملتو ليا اتغيرت بقى يصرخ ويشخط في وشي ويتهمني اني باردة واني مبقدروش اكثر من كده كل ما يقولي انا عاوز اكلمك عى النت مثلا الساعة كزا يقوم يفتح بدري قبل الميعاد افتح انا في التوقيت اللي اتفقنا عليه يقولي انت مبتحترمنيش ويكدبني ويقولي انا قلتلك افتحي في كدا وانا والله صابرة على كل ده منكرش اني بيني وبين نفسي بموت نفسي من العياط على حظي وعلى الراجل اللي كنت بموت في التراب اللي بيمشي عليه بس هعمل ايه ده مكتوب علي والمكتوب ما منو هروب الصبر يا اختي الصبر ربنا يفرجها عناويعوضنا وربنا يهديهم امين يارب
ابنتى حاولى تشغلى نفسك بشئ نافع وفى البيت والنفس ان لم تشغليها بالطاعة شغلتك بالمعصية واذا كان كل زوج يسافر ويجتهد على المعيشة يتخرب البيت كان مفيش علاقة زوجية تستمر ولابد ان تقفى معه وتدعى له بالتوفيق وتصبريه وتصبرى اما عن عدم تلبية طلبك بالسفر له بعد ثلاثة اشهر فهذا ليس خلف بالوعد لان الظروف فى الغربة اختلفت كثيرا ومعظم المسافرين يعملون فى ظروف عمل قاسية جداااااااااااا
استعينى بالصبر والصلاة الدعاء وان شاء الله الظروف تتحسن مع زوجك ويأخذك عنده وتسعدى معه ان شاء الله
اصبري واستحملي لاني الشغل بره بيبقه صعب وكله توتر علي اعصاب زوجك اصبري وخليكي معاه وشديه ليكي بكلام حلو
assfa 7abibti , bess yemken ykoun 3ala 3alaka b wahda tanya , ili ya3mel keda akid warah 7agha .ana akida enou 3ala 3alawa bewa7da tanya .wa allah a3lam
حبيبتى انا عذراك جدا بس عارفة انت لو سافرت معاه هاتحسى بيه العمل بالخارج على قد ما له عائد مادى على قد ما ياخد تعب وجهد شديد دا غير انكم لسه اول سنة جواز يعنى لسه ما فهمتوش بعض كويس دا انت يادوب جوازك الفعلى شهر الحياة الزوجية ياما هاتقابلكم مواقف لازم نتحمل بعض حاولى تخليه هو يتصل بك فى الوقت اللى يناسبه يعنى يكون ارتاح بعد الشغل انا طبعا عارفة انك نفسك تعيشى الرومانسية اللى كنت بتحلمى بها وانت انسة ان شاء الله دا يحصل لما تسافرى معاه بس اصبرى
انا مع كلام الاخت نورا كلامها مظبوط وداانسب حل اصبري لغاية مايوصلك بالسلامة وربنا يهدي العاصي
حاولي تصاريحية بحقيقة افعالة لية انت كارهني لية ولية المعاملة دية وحاولي كلامك معاة باسلوب لطيف يمكن في حاجة مضايقة في الشغل انما لوحسيتي انة مبيحكيش يبفي هو حس انة مااحسنش الاختيار والافضل الفراق قيل مايبقي في اولاد وهو ميكنش عايزك وعلي فكرة هو عندة شعور بنقص في شيء اللة يعلم بية او شيء مش قادر يعملوا وهو دة اللي مخلية عصبي وجاف
السلام عليكم
بصي يااختي انا كنت زيك اتجوزت و انا صغيرة و قضيت معاه 21 يوم و سافر كنت بشتغل و لما اتجوزت بطلت شغل و قعدت في البيت بين اربع جدران و كنت بحس بوحدة و فراغ بس اعمل ليه لازم الواحدة تصبر عشان تقدر تكمل الكلام معاه في التلفون مش حيقيب فايدة عشان ضغط الشغل و الغربة سبيه لحد مايجيلك عشان تعرفي تكلميه و هو بين احضانك عشان يحس بيك اكتر قوليلو كل الي نفسك فيه عبريلو عن احتياجك ليه و عن حبك و انو مالكش في الدنيا غيرو عشان و الله لو قعدتي سنين تكلميه ع التلفون مش حيحس بيك زي مايكون قدامك و بصي الغربة صعبة اوي و ظروف العمل كمان انا حاسه بيك عشان مريت بدا و كنت حتجنن مش من السهل الواحدة تلاقي نفسها سجينة اربع حيطان و لوحدها تعرفي انا بدات اعيش من تاني لما خلفت بقت بنتي هي الملجا من وحدتي و ربنا يرزق ان شاء الله باولاد يملو عليك البيت و حبي زوجك قد ماتقدري و قربيه منك انتي لسه عروسة جديدة و في ايدك كل حاجة و ربنا يوفقك ان شاء الله يارب
حبيبتى اصبرى يمكن فى حصل تغيرات عنده فى الشغل اومضغوط بس صلى واتقربى لربنا وادعيلى ربنا يهديهولك ويقربكم من بعض ويرزقكم بالذريه الصالحه حاولى كمان تفهمى منه فى ايه عندك فحياتك مغيرك من ناحيتى وفى ادعيه جميله اعرفيها لهدايه الزوج ربنا يوفقك
معلش يا اختى انتى رومانسيه ذياده عن اللزوم انا مش بلومك طبعا من حقك انك تكلمى زوجك بس لازم تراعى ظروفه وظروف عمله ده واحد متغرب وسايب بيته وعروسته علشان لقمه العيش وبيجى هلكان من شغله ما بيصدق ينام ويريح جسمه بعد عناء يوم طويل وانتى يا اختى مش حاسه بيه لانك مش فى نفس ظروفه ومش مقدره تعبه انا بكلمك كلام واقعى وبعدين حاولى تتقلى شويه يعنى بلاش كل يوم تليفون ورسايل سيبيه هو يشتقاق لك ويحاول يكلمك لما توحشيه طيب جربى صدقينى مش هتندمى وهو اللى هيكلمك متتصليش بيه ومتبعتيش رسايل خالص وشوفى هو هيعمل ايه حتى لو مكلمكيش فى الاول متساليش لغايه لما يتصل بيكى واكيد لما يتصل بيكى هيكون وقت فراغه ولو قالك مبتطصليش ليه قوليلوا علشان مشغلكش واسيبك ترتاح ولما تكون انت فاضى وعاوز تكلمنى كلمنى انت
بصي انا هقلك علي حاجة بس تهدديه بيها طبعا مش هنعملها من قلبنا انا راجل ولو مكان جوزك وبحبك لازم هفوق واخد بالي من حبيبة قلبي
انتي هتتصلي بيه مكالمة ناشفة شوية هتطلعي فيها كل اللي جواكي ونهايتها هتخيريه بين استمراره في السفر والبعد عنك لوحده وبين استمرارك في الحياه معاه يعني القصد انك هتقليله يا تقربني ليكي تاني اسافرلك او ترجعلي او خلاص بقي مفيش داعي نكمل كده انا ست ومقدرش اعيش لوحدي من غير راجل وانتا طبعا مش اي راجل انتا حبيبي وجوزي اللي انا محتاجاه والامر راجعلك لو لسه باقي عليا وبتحبني ومش هاخد منك رد دلوقتي فكر براحتك وبلغني قرارك بس وانتا بتفكر لازم تكون متاكد اني بتصرف معاك كده من واقع حبي ليك واللي بتحب بتحتاج حبيبها في حضنها وجنبها وايديها في ايده هي دي الست
الاخت العزيزة انتى لسة فى بداية زواجك وزجك شغال فى الخارج لظروف مادية وعشان يكون احسن ليكى ولة وانتى عارفة ان طبيعى الشغل فى الخارج مجهدة والغربة صعبة علية هو كمان اكتر منك وبتبقيش انتى والغربة عالية انتى الا المفروض تصبرية وتقوليلة كلام يسعدة ويصبرةوالايام الا جاية هتكون احسن وربنا معاكى ويقرب بينكم على خير
الغربة من غير زوجة أكبر غلط ، كان لازم مايحصلش دخلة إلا لما تتأكدي انه هايبقى معاكي وهاتبقي معاه ، بس بعد شهر العسل يسيبك ويسافر ده غلط كبير ، وانتي كمان لازم تقدري الحالة اللي هو فيها بعيد عن زوجته ومالحقش يتهنى بيها بس سافر علشان مستقبله ومستقبلك ، اعذريه اللي مسافر وسايب أهله وأنا منهم أعصابه بتبقى تلفانة أكتر من كدة بكتير ، قلق وتوتر وعدم استقرار وعيشة كلابي مش كل بني آدم يستحملها وشغل مفرمة اعذريه ولما ييجي في أقرب أجازة لازم توضعي حد للبعاد ده بجدول زمني محدد إمتى وازاي وأن ماكنش نلم شملنا يبقى مافيش سفر ، أو كل واحد يشوف حاله ولازم الاتفاق ده يبقى بحزم وعدم تراجع ولا تقبلي أي تبرير أو تأجيل للموضوع ده ، بكدة تعرفي راسك من رجليكي ، إنما عروسة جديدة وعريس جديد ويعيشوا بعاد عن بعض بالمنظر ده وعلشان حفنة ريالات أو دولارات يبقى انتحار وحرام رسمي .
ا
عزيزتي الغالية ماتزعليش ابدا حبيبتي صدقيني الامور دي كلها هتتغير لكن صبرك بالله صدقيني انا كنت عروسة جديدة وجوزي سبني وسافر وهتجنن عليه وبحبه جدا لكن صبرت واستعنت بالله ووقفت جانبة علشان هو في الغربة بيلاقي ضغوط جامدة من شغلة وكمان جوزك هو اكيد مضايق انه سايبك محدش بيكون سعيد وهو بعيد عن اسرته لكن انتي ليسا عروسة جديدة ولازم تكوني قويه شوية والله لو استعنتي بالله ودعيتيله ودعيتي لنفسك هتلاقي ربنا سهل الامور والله صدقيني ولعلمك جوزك ممكن جدا مش بيشتكي ممكن يكون الوضع سئ شوية في شغله او في مشاكل في سفرك معاه وهو مشدود ومش عاوز يقولك لكن شوفي خليكي برده شويه وهقولك على حاجة حلوة اوي وصدقيني حياتك هتتغير ويمكن الاجازة الجاية يكون في نونو جميل تفرحوا بيه شوفي حبيبتي اقراي يوميا سورة البقرة وادعي لنفسك وجوزك ربنا يحللك الامور والله وهيجعل بينك وبينه مودة ورحمةعن تجربة ربنا كريم قوي حبيبتي هتلاقي الامور هديت والمشاكل بدات تتحل وادعيلي وياريت كل سيدة متزوجة كل يوم تقرأ سورة البقرة يوميا لانها بجد تجنن وربنا بيبارك بيها قوي والله لكن ماتسيبهاش خالص وشوفي نتيجة لجؤوك لربنا هيكون نتيجته ايه وبلاش تضغطي على جوزك وماتكلميش معاه في اي شئ بالعكس خلي لسانك حلو معاه وبلاش عتاب في اي حاجة بالعكس اكتمي زعلك واصبري شوية وخلي كلامك حلو معاه هتلاقيه اتهدى كدا وهيحاول يصحح الامور معاكي ونصيحة لا تستهيني برسالتي ولا تنسيها وتذكريني دايما بدعاءك وربنا معاكي حبيبتي ويلهمك الصبر ويحللك امورك ويجعل بينك وبين زوجك مودة ورحمة
وعاوزة كل ست بتحب جوزها تقراها وتشوف الامور ربنا ازاي هيحلها واسالكم الدعاء
السلام عليكم و رحمة الله و بركاته,
نصيحتى لكى اختى, اصبرى لحد ما يجى من السفر و احتسبى صبرك عند ربنا, و معلش يا اختى اغذريه من الممكن ان يكون زوجك عنه مشاكل فى الشغل و مش من النوع اللى بيعرف يشتكى, أنصحك انه ان شاء الله لما يرجع لا تعاتبيه اول ما يجى و لكن اصبرى بعض الوقت و حاولى بقدر الامكان اظهار حبك ليه و الاستمرار فى التعبير عن مشاعرك ناحيته و ادعى ان ربنا يهديه ليكى ان شاء الله و باذن الله سيشعر بتقصيره ناحيتك و الذنب و ان انتى بتحاولى اسعاده.
و تانى يا اختى اصبرى و اعتبرى ان الامر ما هوا الا اختبار من الله لمقدرتك على الصبر و حاولى تعذريه قدر الامكان, لان الغربه فعلا صعبه و لا تعلمى ما يمر به خلال اليوم.
و ربنا يبارك لك فى زوجك و يجمع بينكما دائما فى الخير و ييسر لنا و لك و لكل المسلمين كل ما هوا خير لنا و ان يقينا وساوس الشياطين.
و ربنا يجزيك خيرا على صبرك معاه
ربنا يكون في عونك حبيبتي حاولي تكلميه وتقوليله كل حاجه حتى لو زعقلك برده فهميه وقوليله انك مش قادره على بعده وانك محتاجه تكوني وياه قوليله والله مش بنام الليل من خوفي عليك ..ما فيش حد بيغسلك ولا فيش حد يطبخلك ولا حد بيراعيك قوليه هترجع امتى من السفر ..قوليله انا عايزه اسافر عندك نعيش مع بعض لو رفض قوليله انك قررتي تشتغلي علشان تملي وقت فراغك بحاجه مفيده….بس الاهم من ده كله في الدقيقه اللي بيكلمك فيها فهميه اد ايه انتي محتاجه وخليه يشتاقلك ويحتاجلك ولو منفعش كلمي حد من اهله