مشاكل البنات النفسية

عندى اكتر من مرض نفسى ولا احد يعلم

السلام عليكم و رحمة الله وبركاته
انا فتاة عندى 17 سنة لا امتلك اصدقاء و ليس لدى اخوات بنات انا الكبيرة فى اخواتى الاتنين الصبيان
انا عندى مرضين نفسيين مختلفين هما البيكا و هوس نتف الشعر
انا هتكلم عنهم الاتنين عشان الاتنين مضايقنى اوى و مش عارفة ايه الحل لهم و خصوصا ان انا مش عايزة اعرف حد عنهم خالص و انا عرضت مشكلتى قبل كدة و كل الردود كانت بتنصحنى انى اقول لاهلى مع انى كنت قايلة انى مش هاقدر خاالص انى اعرف حد حتى امى فياريت لو سمحتو تلاقولى حل و متقولوليش اعرف حد لانى بجد مش هاقدر
اولا هوس نتف الشعر
بدأ عندى من آخر الصف الاول الثانوى و كنت بشد فى شعر حواجبى بس كان الموضوع قليل لكن لما جت الاجازة زاد لدرجة انى يعتبر مكنش عندى حواجب (مع العلم انا من النوع اللى حواجبه تقيلة اوى )
وماما لاحظت و انا فهمتها ان حواجبى بتقع وخصوصا انى اصلا شعرى بيقع فهى صدقت
وكانت حواجبى بدرجة ملحوظة اوى فلما رجعنا الدراسة تانى بقيت مكسوفة جدا من شكلى و خايفة لحد يقولى حاجة
و بعدين انا دلوقتى سبتها تتطول تانى عشان شكلى كان وحش خالص لانى كنت شده شعر حواجبى كله تقريبا
بس دلوقتى بشد ف شعر حواجبى برضو بس مش كتييير
بس اول امبارح وانا قاعدة كدة عادية جدا لقتنى بشد ف رموشى لدرجة ان فى حتة مبقاش فيها رموش خااالص و واحدة من زمايلى لاحظتها
وانا مضايقة جدا و املى ف ربنا و فيكم كبييييير انى اخف ف يوم وارجع زى الاول و احسن وان حد يساعدنى عشان اقدر اتغلب ع المرض دا واخف وبكرر تانى اهو انى مش هقدر اقول لحد حتى امى وبالتالى مش هقدر اروح لدكتور
ثانيا مرض بيكا
المرض ابتدى من وانا تقريبا ف اولى اعدادى بس مكنش زايد زى اليومين دول
باكل السنون الرصاص و من برضو انا فى آخر سنة اولى ثانوى الموضوع زايد اكتر من الاول بكتيييير يعنى باكل اكتر من 1000 سن ف الشهر يعنى انا عاملة زى اللى بيشربوا السجاير و اكتر منهم بكتيييييييير باكل 144 سن ف يومين بس

والله الكلام دا كله مضايقنى جدااا و مستوايا الدراسى فى النازل (وانا دلوقتى ف 2 ثانوى وامى نفسها تشوفنى حاجة كويسة كتعويض ليها عن كل اللى هى مرت بيه )
وانا تعبانة اوى من كدا
كمان انا عمرى محسيت ان فيه حد بيحبنى و مهتم بيا من اهلى واسرتى
وعشان كدا لما بلاقى اى شاب بيبصلى فبتهيألى انه بيحبنى و مهتم بيا مع ان الكلام دا كله وهم وان بجد تعبانة نفسيا جدا
انا اتمنى ان حد يقدر يساعدنى عشان ابقى زى انسان/ة طبيعي/ة عشان اقدر انتبه لدراستى و ابقى زى زمايلى عشان هما كلهم متفوقين و شاطرين وانا مستوايا فى النازل
ولآخر مرة بكرر انى مش هقدر اعرف حد خاااالص
و بدعى ربنا ان فيه حد يقدر يساعدنى

مشاكل وحلول ذات صلة

اضيف بتاريخ: Sunday, November 8th, 2015 في 19:13

كلمات مشاكل وحلول: , , ,

7 رد to “عندى اكتر من مرض نفسى ولا احد يعلم”

  1. مجنون نسوان
    10/12/2015 at 14:30

    شوفي يابنت ناس انت عيانة ولازم تروح لدكتور يكشف عليك ويعطيك العلاج المناسب لحالتك مافيش حل غير كدا واحب انصحك بذكرالله وقراءةالقران باستمرار واداءالصلاةفي اوقاتها وبر الوالدين والاحسان لهما والابتعادعن التوتروالقلق والعزلة عن الناس اخرجي مع زميلاتك وشاركيهم افراحهم واحزانهم ومارسي حياتك مثل كالبنات ونشاءالله كلهذا يزول عنك وترجع احسن مماكنت عليه وربي يوفقك ويسعدك

  2. أمجد عبد الوهاب
    09/12/2015 at 06:39

    الطالبة النجيبة صاحبة المرضين الاثنين
    أطلب منك التركيز في كلامي وبشئ من عدم السرحان وانتي طبعا فاهماني
    أولا : – أنتي ليست لديك أي أمراض نفسية بالمرة – أنتي لديك مشاكل سلوكية فالفرق كبير بين المرض النفسي والسلوك الشخصي فأحيانا المرض النفسي يحبه المريض ولا يفصح عنه وهو قد ينفث عنه كثيرا من ضغوطات الحياة أو المهنة (لا أنسي النقطه دي وشرحها هيطول وأساسا إنتي مش كدا) تمام ؟
    أنتي عرضتي مشكلتك وأيضا نطقتي بالحل – هتقوليلي إزاي ؟ سوف أنسخ لك من كتاباتك : ((( انا عمرى محسيت ان فيه حد بيحبنى و مهتم بيا من اهلى واسرتى )))
    نعم وألف نعم من هنا أنتي بدأتي تخترعين أشياءا تجعلك تشعرين بالاهتمام فبدأتي بنتف شعر حواجبك ثم تندمي ثم تعودي – ثم تندمي وتبحثي عن الحلول لدى المجتمع والآخرين – ودفعك ذلك لشعورك بالوحدة فبدأتي في إيجاد طريقة للفت انتباه من حولك لكي يشعرون بكي ويحتفون لوجودك ولعلمك المسبق أنك (مكسوفة) من هذه العادة قررتي عدم إعلام أي شخص بها حتى والدتك تخافين إطلاعها على الأمر – أنتي وضعتي نفسك في بوتقة الشعور بالذنب وهذا مخالف تماما لتكوينك النفسي – أنتي تريدين أن تقولي لمن حولك أنا هنا – فأحيانا المجتمع يكون مئولا عن سلوكيات شخص مع نفسه دون أن يعرف الشخص أنه الضحية – وهذا يتضح جليا في الشخصيات الحساسة والمرهفة المشاعر أنتي تحتاجين للإنخراط في مجتمع رياضي أو مجتمع فنون يدوية لتتخرجي ما بداخلك من طاقة ووقتها إذا كنتي رياضيه فسوف تلفتين الأنظار إليكي وإذا كنت ذات أعمال يدويه أيضا ستنعمين بجذب إنتباه من حولك – لكن المشكله عندك أنتي مكبراها وحطيتي نفسك في منطقة (جلد الذات) باعتدائك على رموشك – لاحظي أن جمالك سوف يخبو إذا تماديتي في نتف الرموش – فكري أنك يجب أن تكوني جميلة وهذا أبسط حقوقك التي قررتي أنت تعسفا منك أن تحرمي نفسك منها – أتركي حواجبك واستعملي زيت الخروع دهان يومي وأيضا بدعكهما بفص ثوم مقشر مشطوف بالسكين ليكون الدعك باتجاه نمو الشعر وفي اتجاه واحد كأنك ترسمينها بالقلم – أرجوكي يابنتي نفذي ما انصحك به
    تانيا : – أكل سن القلم الرصاص عبارة عن عصبية تخرج منك لتدمري شيئا سهلا وتهدأي بعدها وهذا اعتراض على شعورك الداخلي (أنه محدش مهتم بيكي) فرحتي أنتي تهتمين بنفسك في صورة سلبية تعذبينها وتهتمين بها – لا ياجميلة أنت لابد وفورا أن تتعاملي مع نفسك (كأميرة) فأنتي حقا أميرة لاينبغي أن تتركي تفسك لشيطان (جلد الذات) وانهضي حالا وانفضي عنك تعذيبك لذاتك وأعلمي أنك لست مريضة نفسية أبدا وبالمرة وعلى مسئوليتي – لاتذهبي للطب النفسي فقد تتعودين عليه والأهم من ذلك أنه لو حدثت أدنى مشكله والصقت بك سوف يهرول من لايحبك ويوصمك بالخلل النفسي ويستشهد بكلامه ببعض الشهادات التي سوف يحصل عليها بطريقة أو بأخرى من عند الطبيب وحتى لو قضائيا – اسمعي كلامي – انتي (صاغ سليم) كل ما ينقصك هو التغلب على شعورك بإهمال من حولك لك – واسألي نفسك : من هم من حولي دول ؟ ؟ ؟ ! ! ولا شئ قولي لنفسك أنا لايعنيني من حولي مادمت أثق بذاتي ونفسي – لعلي أكون قد أخذت بيدك إلى ضوء النهار – أرفضي ظلامك وتعالى الى النهار- ربي يسعدك ويحميكي

  3. mahmoud
    01/12/2015 at 18:38

    انا كان عندي مشاكل شبيها بيكي الي حد كبير من سنه تقريبا وكنت ف 3ث وكان جال اكتر من مرض نفسي باسبباب ظروف كتير مريت بيها وكان اخرهم موت اعز صديق ليا وهو صديقي الوحيد وكنت وصلت لدرجه اني كرهت حيتي وكرهت الناس حتي اخواتي وامي كنت بكرهم وكنت شخض عدولني الي حد كبير وكنت بكسر كل حاجه في البيت لدرجه انت البيت تقريبا مكنش فيه حاجه تتكسر 🙂 مش عاوز ابالغ بس انا فعلا كنت بنام علي الارض لاني كسرت السرير والموبايل واللاب وولعت في كل كتبي
    وسبحان الله كل ده اتحول ف كام شهر باني قربت من ربنا وكنت بتابع مع دكتوره نفسيه وهي اللي اعطتني كل الطاقه والتحفيز والحمد الله ربنا اكرمني ودخلت كليه قمه
    وكل ما افتكر ده بضجك علي نفسي
    انتي معندكيش مشكله يابنتي انتي بتوهمي نفسك
    شوفي حد تكوني وياه علي راحتك ويعطيكي طاقه ايجابيه

  4. mostafa
    11/11/2015 at 14:12

    لما يكون الواحد عنده مشكلة بسيطة ساعتها ممكن نقوله حاجات تساعده و لو مساعدتوش مش هتضره ،، انما لما تبقي مشكلة كبيرة بيبقي لازم تتدخل مختص لأننا ممكن نقولك علي حاجات تضرك اكتر و كمان انتي في سن صغير و سهل جدا تتعالجي في الاول قبل ما تحصل حاجات تزود الموضوع و والدتك من حقها تعرف عشان تقدر تساعدك

  5. فارس بلا جواد
    09/11/2015 at 11:13

    اختاه كل الى اقدر اقدمه ليكى هو ان تتوضئى والساعه 2 بليل تقفى بين يدى الله وتصلى وتدعى له ان يشفيكى من هذا لمرض وعليكى بدعاء سيدنا ايوب عندما اصابه المرض رَبِّ إِنِّىْ مَسَّنِّىَ اَلْضٌرٌّ وَأَنْتَ أَرْحَمٌ اَلْرَاَحِمِيِِّنْ وان شاء الله يستجيب لكى الله ولكن عليكى ان تدعى وانتى واثقه من الاستجابه
    وربنا يفرج عنك الهم

  6. khalad
    09/11/2015 at 01:43

    لا بد ان تعرضيي نفسك على طبيب نفسي في اقرب أجل اتمنى لكي الشفاء العاجل ان شاء الله آمين.

  7. اتمنى افيدك
    08/11/2015 at 22:34

    انا عندي مرضين نفسيين تانيين ومستواياه في النازل وانا ثانويه عامه ربنا يعينا انا تعبت فعلا وبفكر اموت واخلص نفسي بس متخفيش انا هدعيلك وانتي ادعيلي

اترك رداً أو حلاً لهذه المشكلة