مشاكل البنات قبل الزواج

عريس مش عاجب بنت

انا ام لبنتين اتخرجوا من الجامعة … جولي بعد سنين حرمان .. انا وابوهم اللي علي المعاش دلوأتي بنعشقهم … هم ولله الحمد والشكر جميلتين بشكل ملفت … حد ان واحدة فيهم ( صاحبة المشكلة ) كنت نازلة معاها مول شهير نشتري طلبات للبيت … وإذا بسيدة محترمة تتبادل معايا الحوار وتصر علي عمل مقابلة في نادي شهير بين بنتي وابنها خريج ارقي الجامعات صاحب الماجستير اللي بيشتغل في دولة اجنبية وعنده شقة في كومباوند وامكانياته المادية عالية ومتميز بالذكاء والخلاق ووالده راجل رتبة كبيرة في جهة سيادية …
المهم وبعد تبادل ارقام الموبايلات … تم الاتفاق علي موعد مقابلة اليوم التالي بعد ما أمهد لبنتي اللي كانت واقفة بعيد عني بعربية المول ومش واخدة بالها من الحوار الداير بيني وبين أم العريس !
المهم
وبعد اقناع لبنتي اللي بتتضايق من فكرة الجواز بالطريقة دي … اتصلت بالست وطلبت منها تبعتلي صور لابنها … وقد كان … الحقيقة البنت ماعجبهاش نفسيا شكله ! لكن بعد الحاح مني وافقت تشوفه علي الطبيعة لعل وعسي تكون الصورة ظالماه .. واللي شجعها شوية انه كان طويل القامة ورشيق زي ماهي عايزة مبدأيا بالإضافة لمواصفاته الاجتماعية التانية المتميزة زي ماسبق وقولت
ومع اول طلة لما وصلنا النادي … انا نفسي لاحظت عيب معين ربنا يسامحني ( خلقة ربنا الشريفة لا اعتراض عليها ) وشه صغير اوي بالنسبة لمقاس جسمه !!!!
الولد كان ذوق جدا ومحترم ومتكلم ولا غبار عليه ولا علي والدته اللي كانت ملهوفة بمنتهي القوة علي بنتي وبعد ما اديناهم الاذن يتمشو ف النادي سوا بعيد عننا عشان يتعارفو بدون حرج … لاحظت اصرارها بعد ماعرفت مستوانا وظروفنا العائلية المناسبة ليهم … لاحظت اصرارها الشديد علي عمل قراءة فاتحة وخصوصا ان ابنها كان مسافر بعد كام يوم الدولة الاجنبية اللي بيشتغل فيها !
طبعا انا اكدتلها ان بمجرد ما اتأكد من موافقة بنتي … حنبتدي نتكلم مع والدها عشان يشوفهم ونمشي ف الاجراءات … لكن بكل أسف !
بمجرد ماركبت العربية مع بنتي لئيتها بتقولي مش ممكن ياماما … قلبي مااتفتحلوش نهائي !
هو مؤدب وذوق ومتكلم … لكن فيه حاجة علي قلبي قافلة من ناحيته نهائي !!!!
ولما عرضنا الامر علي والدها … اقترح نعمل مقابلة تانية تفصل الآمر ويكون فيها القرار الأخير لبنتي !
وف المقابلة التانية … الولد كان في قمة الفرحة ببنتي … ولكن ! بكل أسف هي تظاهرت طبعا بالسعادة عشان ماتجرحهوش … لكن لما روحنا البيت فضلت تعيط بحرقة لسببين
انها مش متخيلة نفسها تكمل حيتها معاه
وف نفس الوقت
كان صعبان جدا عليها … لشدة ذوقه و رقته معاها وحرصه انه يأكدلها اعجابه الشديد بيها !!!!
بصراحة وبعد حوار طويل مع بنتي اللي كانت منهارة من العياط … قررت اقابل والدته لوحدي اليوم التاني وأعتذرلها عن اتمام الموضوع … لأننا ماينفعش نماطل او نسوف وهو كان فاضله يومين ويسافر شغله في الدولة الاوروبية اللي بيشتغل فيها !
وفعلا … عملت كدا وانا في منتهي الحرج … لأني مؤمنه ان البيوت الناجحة لازم بدايتها تكون ناجحة وقايمة علي التقاء نفسي بين الشريكين …
المشكلة ان الشاب حاول يتكلم مع بنتي علي الفيس ويفهم سبب اعتذارنا … وهي فهمته انها مش قادرة تحس ناحيته بأي مشاعر ايجابية تخليها تكمل الموضوع !
ولكن هو مصر يستمر ف التواصل معاها … عي أمل يقدر يلين قلبها
هي بتقولي ياماما انا فهمته اني مش حاقدر اكمل معاه ودا قرار نهائي …
وانا باقولها ماترديش عليه ف اي رسايل يبعتهالك
المشكلة انها محرجة تصده وخصوصا انه مؤدب وبيتكلم ف موضوعات عامة زي مايكون عايزها بس تكون معاه !
تنصحوني بايه اقولهولها ؟؟؟؟
لأني خايفة يفتكر ردها عليه تشجيع ليه انه يستمر … أو موافقة منها عليه !
وهي بتأكدلي انها استحالة تقدر ترتبط بيه ومش هو دا فتي أحلامها !

شكرا

مشاكل وحلول ذات صلة

اضيف بتاريخ: Wednesday, September 6th, 2017 في 20:40

كلمات مشاكل وحلول: , , , ,

3 رد to “عريس مش عاجب بنت”

  1. Dr-aaa
    21/09/2017 at 16:20

    هو سؤال واحد بس هل بنتك صلت صلاة الاستخارة اذا كان لا أطلب منها تصليها،، وتواصلهم ربما يلين قلبها اذا كان فيه الخير لها

  2. ابوالبتول
    07/09/2017 at 01:09

    عزيزتي الزواج قسمة ونصيب وماحدش ياخذ الا نصيبه اللي كتبه الله له في هذة الدنيا ولاعاوزكي تزعلى من بنتك او تخاصميها على رفضها الشاب طالما انها مش مرتاحة له ولاقلبها انفتح له فمن الصعب انكي تجبريها على حاجة مش عاوزتها او متقبلتها قولي للشاب مافيش نصيب وربنا بيرزقك ببنت الحلال اللي تستاهلك وانتهى الموضوع وان كنت ارى انو بنتك استعجلت في الحكم على الشاب من اول مرة طالما انو على دين وخلق ومحترم ومن عيلة كويسة ومقتدر ماديا فيه كل المواصفات اللي تتمناها اي بنت عموما ربنا يكرم بنتك باحسن منو وهو كمان ربنا بيكرمه باحسن منها والسلام ختام

  3. ااا
    06/09/2017 at 21:26

    قول له ملكش نصيب فيه وربنا يرزقك ببنت الحلال بس

اترك رداً أو حلاً لهذه المشكلة