انا بنت عندي 17 سنه في تانية ثانوي بحس اني مقبوله من ناس كتير وليا اصحاب وزمايل بيحبوني اوي ودايما يتقالي اني عقلي كبير وتفكيري كويس بس بحس ان مشكلتي اني طيبه والطيبه دي تخليني اثق في اللي ادامي … كان عندي اصحاب شباب كتير وكنا بنخرج بس كله في اطار الاحترام والله بس دلوقتي انا قطعت علاقتي بيهم لاني قولت لنفسي ان الخروجات دي مش كويسه حتي لو كان كل حاجه باحترام وبس فضل معايا صديق كان اخويا بجد المهم الصداقة دي اتحولت لحب بس من نحيته هو لكن انا حسيت انه اخويا وبس مش اكتر من كدا هو فتح معايا الموضوع وانا رفضت وقولتله احنا اخوات بس هو فضل محملني زنبه دايما اي مشكله او اي حاجه غلط هو يعملها يقولي انتي السبب المهم كنت بحاول اهديه وبعديها يرجع يتأسفلي ويقولي انتي ملكيش اي زنب كان كل كلامنا تليفونات عمري ما خرجت معاه لاني كنت برفض ده المهم بعدنا عن بعضا فتره وبعديها بكلمه واحده ردت عليا وقالتلي انها حبيبته بعديها بيوم كلمني وقالي ايه اللي انتي عملتيه ده انتي دمرتي كل حاجه كلامه ضايقني قولتله دي عيله رح قالي العيله دي احسن منك واعد يغلط فيا ورغم كل اللي عمله فيا ان كنت معتبراه اكتر من اخويا وكنت بحكيله علي اي حاجه وكنت بشاركه في فرحه وفي حزنه وكنت دايما واقفه معاه لاني عارفه ان باباه ومامته متوفيين والسبب اني رفضت حبه واني مقدرتش احبه هو اني حبيت انسان جدا واتعلقت بيه وعطيته كل الثقه وفي النهايه باعني ورح كلم بنات تانيه لانه معرفش ياخد مني اللي هو عايزه ودلوقتي انا طيبتي بتخليني اثق في الناس رغم اني مريت في حياتي بمواقف كتير تخليني اتعلم من الدنيا صح ومش بدي ثقه لاي حد لكن لما ادي ثقه لانسان فجأه بعد مده بيطلع الانسان ده ميستاهلش الثقه ياريت تساعدوني ومحدش يقولي انتي في مرحله المراهقه لان بحس للمواقف اللي مريت بيها اني عديت مرحله المراهقة .. ارجوكم ساعدوني
مشاكل البنات مع الشباب
فقدت الثقة في الكل بعد ما حبيت واحد وباعني
اضيف بتاريخ: Thursday, January 13th, 2011 في 20:32
كلمات مشاكل وحلول: اصحاب, البنات, الشباب, الصداقة, المراهقة, بنات, بنت, تليفونات, ثانوي, شباب, صديق, مشاكل البنات, مشاكل البنات مع الشباب
انت بنت محترمةومتربية وتشرفي كل انسان يرتبط بك انسي كل ماحدث لك في الماضي ورميه وراءظهرك تماما وخليك واثقة من نفسك وبدينك واخلاقك وتربيةاهلك والثقة في الناس لهاحدود وماتعطي ثقتك لمن هب ودب من الناس حولك ونشاءالله تلاقي ابن الحلال الصالح اللي يستاهلك ويقدريسعدك في حياتك
ماحدش مضيع البنات الا الطيبة الزائدةعن حدهاوالتساهل مع التعاطي مع الشباب وفي الاخربلاوي ومصايب تجلب الفضيحةوالعار لهاولاهلها وتخليها اتعس انسانةفي هالكون ومكروه من الجميع لفساداخلاقها وتفريطهافي شرفهاوكرامتها لشاب سافل منحط مايسوى الجزمةاللي هي لباستها اختي عليك بقطع علاقتك نهاية مع هالشاب اوغيره واحترمي نفسك وصوني شرفك وكرامتك وكرامةاهلك وماتجري وراء الاوهام والاكاذيب اللي يقولهاالشاب للبنت وتاكدي انك باخلاقك الحميدةوتربيةاهلك تكوني اسعدانسانةفي هالكون ربي يسترعليك ويهديك
ايه الكلام الفارغ بتاعك زي اخويا مافيش بنت محترمة ومتربية تكلم شاب وتقول انت زي اخويا ابعدي عن مكالمة اي شاب لاجل كرامتك وحفظ لك من الوقوع في الرذيلة وربنايكرمك بالرجل اللي يحبك ويتقدم لاهلك ويخطبك رسمي
مش هقولك غير كلمة واحدة لانى عشت الموقف دا قبل كدا (مسألة وقت ) مسيرك تلاقى حد محترم ويقدرك دا مش كلام وخلاص دا من واقع تجربة
انا عندي 15 سنه بس انا بدخل ع الفيس وبكلم ولاد وبنات بس والله العظيم اخويا ووالدي ووالدتي عارفين واحيانا اخويا بيكون قاعد جمبي وبيحذرني من حاجات كتير بس وقعت في حاجه وهي اني صدقت واحد بس عمري ما قلتله اني بحبه لاني معتقدش انه حب دا كان مجرد اني بحب اتكلم معاه وكلام عادي يعني عمري ماقلتله سر بس نزل من نظري اوي واعتبرتها غباء مني لما استغل مكانته عندي وطلب مني اولا التليفون مره تانيه صورتي وكده يعني اخر ما زهقت من اصراره وطبعا كنت برفض كان بيكلمني وقفلت معاه وهو بيتكلم وسبته لحد دلوقتي ممكن يكون بقالي شهرين مش بكلمه وقلت لوالدتي هي مش زعلت مني اد مافرحت من تصرفي انا مكدبش عليكي ده قصر فيا ولحد دلوقتي بس لما افتكر طريقته اخر مره بيزيد احتقاري ليه لان مقدرش مكانته عندي لذلك اللي باعني ببيعه مع ان دي والله مش طريقتي بس اللي زي ده لازم يكون له معامله خاصه ودلوقتي مش بتكلم غير مع ماما في الصغيره قبل الكبيره وبحكم عقلي بس وده ان شاء الله يبعدني عن الخطا ويارب انا وانتم جميعا يارب وبجد سوري جدا اني طولت بس بجد كنت محتاجه اني اقول الكلام ده .
يا بنتى معلهش ده عبط مش طيبة الطيبة انك تبعدى عن كل العلاقات المحرمة ولا تسمحى لنفسك من الاصل تكلمى شباب ولا تحملى ارقام شباب وخليكى فى دراستك حتى تتفوقى ويكتب الله لكى النجاح
hkانا عندى نفس المشكله بس انا حبيتوه اقولك حاجه الكلام ببلاش محدش بيدفع فيه فلوس وصدقى كلام الزملكاوى
انت اكيد فى مرحلة المراهقة و انا راى انك ما تحبى اى حد لان كلهم كذابين و اسمعى نصحتى و اهتمى بمذاكرتك بدل الكلام ده و ابحثى عن مستقبلك و النهايه الغلط فى ان اهلك انهم سيبينك تخرجى من غير ما يعرفوا انك اكيد بتخرجى مع شباب وما تقولى انهم عارفين لانك تبقى كاذبة
انا زيك بردة بثق فى الناس بسرعة ودة من طييبتى الزيادة فكرى كويس شوفى اللى كنتى بتعرفيهم دول عاملوا اية معاكى واتعلبمى من الاخطاء دى وربنا يفرحك وانتى لسة الدنيا كبيرة قدامك
من تجربتى مافيش فرق من بين حب اول واخير دة كلام بنوهم نفسنا بية بس.. والمشكلة ان كل اللى حولبنا بيتكلما طول الوقت عن الحب يا الجواز يالفرقة فبقت دماغنا مش مليانة باى حاجة غير كدة… انصحك بشغل وقتك باى حاجة مسلية كبداية مثلا قراية كتب خفيفة واول حاجة لازم تعرفيها ان نصيبك مكتوبلك ورفيق حياتك متقدرلك فبلاش تتسرعى تانى وكدة ولاكدة حبيب العمر هيجيلك بس الاحسن انة يجى وقلوبنا صافية ومشرقة بدل مايجى وقلوبنامجروحة ومليانة كرة ونار وفرقة …. ومحدش بيموت من غير حب والحب مايتسماش حب من غير قلبين حاسيين ببعض وبيحبوا بعض فقلوبنا ربنا خلقها صافية والشيطان بيحاول يعكرها باى حاجة حتى لو كانت فكرة او هم لانة بكدة ممكن يدمر حياتنا بالفكرة والهم….. عيشى حياتك وحبيب العمر هايجى هايجى ماتخفيش يعنى ومحدش يستاهل اننا نبكى علية الا اللى يحس بينا وبقلوبنا ويخاف علينا……. واتمنى ليكى التوفيق
يا بنتي ما تستعجليش علي نفسك فكري في دروسك وبتقولي عقلك كبير ما تغلطيش ولا تعرضي نفسك للشبهات ما فيش حاجه اسمها زي اخويا
مرحلة مراهقه ايه بس
هقلك على حاجه
انا زيك بالظبط بس الفرق انك بنت وانا ولد
دايماً الجملة اللى بسمعها ( انت طيب زياده عن اللزوم ودا غلط خفف من طيبتك )
وكأن الطيبه بقت عيب وحاجه مش كويسه !!
لكن الموضوع كله متعلق بالسن والخبرات .. ازاى ؟
يعنى كل ما الواحد بيجرب وسنه بيكبر بيزيد خبره
انا اكبر منك بحاجه بسيطه بس بحس ان كل تجربه بتعدى عليا يتزيد من سنى
يعنى بحس ان مرور الأيام مش بيفرق فى سنى اكتر ما بتفرق التجارب
من غير فلسلفه :
– انتى عاديه جداً وناس كتيره كدا زيك وانا منهم فمش تخافى المسأله بس فى الوقت
مع الوقت هتزيدى خبره وهتعرفى تتعاملى مع كل الناس بأحترافيه اكبر
– حاولى مش تثقى فاى حد بسهوله وكمان مش تشكى فأى حد ولا تخلى حد يقلك خففى من طيبتك دى
لأ خليكى طيبه بس فكرى كويس
قبل ما تكلمى حد لازم تعرفى انه مهما عمل ومهما كان كويس وارد انك تشوفى منه حاجه مش كويسه ومش مناسبه ولا كنتى متوقعاها منه
– انا لما بكلم حد ببقى واثق من نفسى ومش بخليه يقدر يستغلنى دلوقت على اد ما اقدر وعلى اد خبرتى فى الحياه بصراحه يعنى .
والثقه دى متبقاش لأى حد امال تبقى لمين ,, تبقى لحد قريب مني
اخويا اختى وهكذا
انما صحاب والكلام دا لأ انا مش بقول كل حاجه لصحابى رغم انهم قريبيين مني اوى
بس مش بحب اقول كل حاجه بحب ابقى غامض فى حاجات كتيره
صحابى مثلاً الاقيهم بيكلموا عن البنات اللى بيحبوها وحد يكلمنى عن حاجه اقله الله يسهلك ياعم انا مش بتاع الكلام دا واساساً انا كنت بحب فعلاً واعدت سنه ونص
ولا حد يعرف حاجه
ولما كلمتهم وعرفتهم مكنوش مصدقين لأن محدش لاحظ حتى عليا
ولا انا كنت بغيير لما كانوا بيكلموا مع بعض بالعكس كنت بحس ان انا كبير ودماغى اكبر منهم
بس طبعاً لما اتخدعت فيها كان زلام اكلمهم عشان اخد اكتر من رأي
حاجه كنت مضطر
اذن الموضوع خلاصته :
1- مش تثقى بأى حد ولازم يبقى ليه اسرار بينك وبين نفسك تبقى فى الصندوق الخاص بيكى ( قلبك )
2- كلمى اى حد بس بلاش شباب عشان عيب ومش تخونى اهلك وجايز دا بيحصل معاكى عشان بتغضبى ربنا
فبيكون دا انزار انك كنتى غلطانه اصلاً فى انك تكلمى ولد
3- خلى بالك من نفسك ومش لازم تثقى فى الناس 100% لازم يبقى فيه نسبه انه ممكن يخدعك عشان لما تتخدعى مش تتصدمى وتبقى كنتى عارفه
4- اوعى ثقتك بالناس تقل لدرجه الانعدام
وربنا ان شاء الله يوفقك ويسعدك ومش فى يخونك ابداً وعلى فكره كلنا كدا مش انتى بس ,, لكن حاولى تخلى بالك على اد ما تقدرى وشم تزعلى على حد باعك او صدمك وخانك
وخدى بالك من مذاكرتك