ســلام عليكم ,,
لو سمحتوا انا محتاجة مساعدتكوا ورأيكوا خاصة اخواتي الاكبر ف السن والاقدم ف الجامعات .. انا اول سنة كلية تربية عام قسم لغة عربيه ,ظهرت نتيجة الترم الاول وشلت مادة
انا فعلا قصرت وعارفة انه مش حرام لاني اصلا داخلة الكلية دي مش حبا فيها تقدروا تقولوا استخسرت مجموعي في اني ادخل كلية اقل وكمان بابايا كان عايزني ابقى مدرسة مع انها عمرها ماكانت رغبتي ولا فكرت فيها ك كرير ف المستقبل ,بس انا يعني مش كارهاها اوي لاني بحب العربي وكنت طول عمري متفوقة فيه
المشكلة دلوقتي اني بعد المادة دي حاسة اني خلاص كده انا هقضي حياتي كده وهمشي ب الزق ,انا حتى مقولتش ف البيت اني شلت لانهم هيتصدموا فيا ودي حاجة مش هتحملها ابدا انا والله كنت طول عمري متفوقة جدا ,بس لما دخلت الجامعة قررت ارتاح بقى من تعب الثانوية وكده وطبعا دي النتيجة
انا بس محتاجة حد يفهمني هو انا فعلا خلاص بقى هفضل كده ؟؟ ولا ممكن يكون في امل اتظبط تاني ؟؟ والمادة اللي شلتها دي كمان هتعامل معاها ازاي وهتمحنها ازاي وكده ؟
بس وشكرا واسفة لو طولت عليكم
مشاكل التعليم الجامعي
شلت مادة فى الكلية وحاسة اني هفشل
اضيف بتاريخ: Tuesday, March 5th, 2013 في 09:52
كلمات مشاكل وحلول: فتاة, مشاكل
اية المشكلة شلتى مادة هى اخر الدنيا يعنى بصى قدامك وكملى
انا كنت فى نفس مشكلتك بالظبط دخلت كلية تجارة وانا مبحبهاش وشلت مادة فى الترم الأول وجالى نفس الاحساس بالظبط بالفشل واليأس وندمت بعد كده أنى حسيت الأحساس ده لأن الموضوع مش مستاهل اصلا أيه يعنى شيلتى مادة الدنيا مش هتقف يعنى المهم بعد كده امتحنت المادة دى السنة اللى بعدها عادى خالص وخدت فيها نص الدرجة ولما اهلى فى البيت سألونى على المجموع قلتلهم المجموع عادى وزودت عليه نص الدرجة بتاعة المادة اللى شايلها لأنى كده كده لازم هخدها وحبيت الكلية والدراسة بعد كده وبقيت اجيب تقديرات كويسة…نصيحة منى حبى الكلية والدراسة واياكى تضايقى!!!