مشاكل الحب والزواج

منهار بسبب ماضي حبيبتي ومتردد بالخطوبة

اسف جدا ع عنوان الموضوع بس فعلا انا محتاج لاراء الناس اوى انا حياتى هتتبنى ع كلامكم وعلى تفكيرى بعد الردود هنا ..

بدون ما اطول او اقدم مقدمات ..

فيه بنت اعرفها من صغر سنى بحكم علاقه بيتنا ببيتهم مش قرايب بس فى علاقه بين ابويا وابوها من 40 سنه تقريبا :
ومن زمان عارف انها كانت بتكلم شخص وهيا فى مرحله الثانوى : وفيه عدد مش قليل من منطقتنا يعرف انهم كانوا بيتكلموا ..

الموضوع بأختصار اننا اتكلمنا مع بعض من فتره وبدأت المشاعر بينا تتحرك وحبينا بعض حب فوق الخيال بدون ما حتى نحس وبدون مقدرمات وبسرعه اتفقنا ع الخطوبه والموضع كان واخد الجد جدا ،،

ومن اول يوم حب بينا سألتها على ماضيها وان عارف انها كانت بتكلم شخص ، وحكتلى بالتفصيل وقالت انها كانت كدا كدا هتقول وشايله هم اليوم ده ، انا كنت عارف بس لما هيا حكت وعرفت انهم كانوا مع بعض فتره كبيره اوى انا حسيت بوجع عمرى ما شوفته اشتريت بخاخه عشان كان نفسى بيقف احيانا من الالم والوجع .. وطلبت منى انى اسيبها وهيا عارفه انها عمر ما حد هيسامح ،

بس انا مقدرتش فضلت معاها ووعدتها اكتر من مره ان عمرى ما هسيبها وبمجدر ما حالى يتظبط هخطبها ، بس دايما طول ما احنا مع بعض كل فتره يتفتح الموضوع او يرجع او يبان عليا الوجع وينتهى اليوم بينا بالدموع ،

هيا انسانه ممتازه واخلاقها كويسه وبيتها ممتاز انسانه كويسه جدا وحياتها كلها تعب وعياط ووجع بسبب ماضيها من قبل انا وهيا ما نتكلم ،
بس دايما اتكلم ونبقى كويسين جدا ولما اقعد وحدى الوجع والالم بيقتلنى ،

انا عارف كل ماضيها بالحرف اقصى حاجه كانت بينهم مكالمه تليفون عمرهم ما اتقابلوا او قعدوا مع بعض او لمسها او اى حاجه وكانوا بيتكلموا ع فترات كبيره جدا وكان سنها 17 سنه .. بس المشكله الكبيره فعلا ان الشخص اللى كانت بتكلمه ده صحبى ودى اكتر حاجه موجعه فعلا يعنى هيبقى موجود فى حياتنا ، انا عاجز عن التفكير ،،

بخاف جدا يبقى الموضوع رسمى ووقتها مش هينفع انفصال هيبقى بوظت حتى علاقه البيتين ببعض ، هشيل ذنب كبير اوووى ، وازاى اسيب انسانه كل حاجه فيها كويسه الا نقطه سوده بتوجعها قبل ما توجعنى ، ازاى اسيب انسانه بتحبنى بالشكل ده ، طب حياتى هتبقى ازاى لما نتقابل فى مكان كلنا سوا ، طب هعيش حياه مليانه شك ووجع ، طب ازاى اتخلى عنها بعد الوعود : مش قادر اسيبها ومش قادر اخد خطوه تموتنى بعد كدا / انسانه بتقولى سيبنى انا ظلمتك قبل ما احبك انا قابله ع نفسى اعيش موجوعه بدونك بس انت متعش لحظه وجع يكون سببها اى حاجه ، ساعدونى بالله عليكم انا حياتى كلها واقفه مش عارف اعمل ايه ، كل الحلول قدامى انا عمرى ما هسيب الانسانه دى ، بس مرعوب من اللى جاى خايف اوووى من كلام الناس او نظرات حد او الشك مش عارف ..

اعمل ايه ..؟ انا منهار ..

مشاكل وحلول ذات صلة

اضيف بتاريخ: Friday, September 30th, 2016 في 14:26

كلمات مشاكل وحلول: , , ,

4 رد to “منهار بسبب ماضي حبيبتي ومتردد بالخطوبة”

  1. رجل شهم وشريف
    04/10/2016 at 09:35

    شوف يا سيدي بعد الصلاه على النبي
    انا عشت تجربتك دي تماما وبالحرف الواحد قبل زواجي من 13 سنه وانا حاسس بيك جدا وعارف اد ايه الموضوع صعب عارف وقتها كنت بقفل على نفسي الغرفه واظل ابكي من شدة الالم وفي ليله وانا ببكي كده ابويا الله يرحمه دخل عليا الغرفه وسألني كنت منهار ووقتها ما قدرت اخبي عليه وحكيت له يومها بعد ماسمعني قعد يتضحك وقالي هو ده اللي مزعلك وقال لي كلمتين الله يرحمه ريحوني وخلوني شلت موضوع انها كانت بتحب شخص قبل مني من دماغي الى الابد قال لي ( البنت زي الجوهره في محل الذهب ممكن كتير من الناس تتفرج عليها وساعات تمسكها لكن لن يملكها الا من دفع ثمنها وقال لي البنت اللي ماتحب وهي في فترة المراهقه تبقى جاموسه هههههه بجد قال لي كده وقال كمان النبي عليه الصلاة والسلام تزوج من مطلقات وارامل يعني كانت متجوزه وعلاقه جنسيه كمان )
    اللي بيحصل معاك ده شغل الشيطان علشان يعيشك في هم وحزن وفي ايه في القران بتقول كده
    الخلاصه يا بن الحلال طالما انت شايف الحب بعيونك من خطيبتك وحاسه بقلبك وشايف لهفتها عليك واشتياقها لك يبقى بتحبك بجد والحب القديم ده مات في قلبها للابد
    انت على فكره اللي كل شويه تفتح الموضوع وتولعه وتجيب الهم والحزن ليكم
    ياعم انا اهو الحمد لله سمعت كلام ابويا الله يرحمه وكملت مع البنت والحمد لله عايش معاها من 12 سنه في حب وسعاده وهنا وبعشها وبتعشقني بجنون وانجبت 3 اولاد منها وكل ماافتكر الموضوع القديم ده اقعد اضحك على نفسي واقول لنفسي هو انا كنت كده ازاي
    اسمع كلامي لوجه الله وكمل مع البنت والحمد لله اهلك واهلها حبايب وده هينجيك من مشاكل كتيره في المستقبل بيقع فيها كتير من الازواج
    قوم كده اتوضى وصلي رقعتين واتصل على خطيبتك وقول لها انا بعشقك انا انا كلي لك انا
    ربنا يبعد عنك الشيطان

  2. علي
    01/10/2016 at 19:52

    وعليكم السلام
    ان تواصلك مع فتاة لا يربطك بها رباط شرعي محرم فسارع اخي بالعقد على محبوبتك فلم ير للمتحابين مثل النكاح

    بالنسبة لما تفضلت به فاني اجيبك بالتالي:

    اولا: ان الفتاة ارتكبت خطا في فترة المراهقة وهي فترة الطيش لدى البنات وهي الان نادمة والله غفور رحيم

    ثانيا: لا ارى مبررا للانفصال خصوصا وان الخطا لم يصل الى مرحلة متطورة ولله الحمد

    ثالثا: ندم الفتاة وصراحتها معك دليل على انها تحبك وهي تقول لك اتركني ولكنها لا تريد ذلك فقط هي تحبك ولا تريد ان توجعك

    رابعا: يمكنك اخي قطع علاقتك بهذا الشخص واخرجه من حياتك حتى لا يكون مصدر قلق والم لك

    خامسا: ان كنت لا تستطيع ان تسامحها على هذا الخطا فيمكنك حينها قطع الاتصال واسال الله تعالى ان يرزقك زوجة صالحة ولكني ومن خلال معطيات الاستشارة لا اشجعك على هذا الخيار

    فتوكل على الله اخي واخطب الفتاة واعمل على زيادة تدينها لتحفظك وتحفظ نفسها واوصيك واوصي نفسي بتقوى الله تعالى والتوبة اليه.

  3. ابوالبتول
    30/09/2016 at 21:12

    اخي العزيز لقد قرات مشكلتك بالكامل وعارف كل ماتفكرفيه او تحس به اخي انت بتقول انك تعرف الفتاة واهلها جيدا بحكم انكم عايشين في منطقة واحدة وابوك وابوها صحاب من 40سنة والفتاة كويسة اخلاقها ومحترمة وتحبك مثلما قلت فتوكل على الله وتزوج بها ماتخليش الشك او الظنون تفرقكم عن بعض صدقني دام البنت صادقة وصريحة معاك وماخبت عنك ايتها حاجة وقالت لك كل شي عن علاقتها بالشاب في السابق والى اين انتهت فايه يمنع انك ترتبط بها اغلب البنات في سن المراهقة بتكون لهن نزوات وعلاقات مع شباب اخرين وتنتهي تلك العلاقة وتختفى وماحصلش انهم تقابلوا اولمسها حسب كلامك فالبنت تستاهل كل الاحترام والتقدير ولايجب ان تفرط فيها لمجرد شكوك لااساس لها من الصحة في دماغك استهدي بالله عزوجل وماتضيعش البنت من يديك فتندم طوال العمر والله يتمم لكم بالخير ويجعلها من نصيبك وعقبال الفرح الكبير نشاء الله

  4. محمد
    30/09/2016 at 18:43

    بص يا أخى أنا لو مكانك حسيبها عشان شعور غير مريح حيفضل ملازمنى طول حياتى انها كانت بتحب واحد صاحبى, ألم أنى أسيبها أرحم من ألم مستمر طول حياتى معاها, ويبقى القرار قرارك.

اترك رداً أو حلاً لهذه المشكلة