الحب على النت

حبيتها على النت وخايف قوى من زواج النت

انا مش عارف ابتدى مشكلتى منين  انا كنت مرة قاعد على النت لا بيا ولا عليا لقيت واحدة دخلت على النت واتكلمت معايا واتعرفنا وبقينا صحاب مجرد صحاب بس والكلام دا كان لمدة 3 شهور صحاب والكلام كان على النت بس ورفضت تدينى موبايلها المهم بعد ال 3 شهور لقيت نفسى اتعلقت قوى بيها وقررت اقولها ان انا بحبها ويوم ماقررت اعترفلها بحبى لقتها هى سبقتنى وقالتلى انها معجبه بيا ومتعلقة بيا وكمان بتحبنى قولتلها الكلام كان على لسانى هى فى الاول ماسدقتش وقالتلى اكيد انت قولتلى كدا علشان علشان انا قولتلك فضلت احلفلها لحد ماصدقت المهم بقى فضلنا نتعرف اكتر لمدة شهر شهر كامل نتكلم كل يوم اكتر من 5 ساعات ع الموبايل لحد ماخلاص ماعنتش قادر ابعد عنها ولو ثوانى المشكله بقى ان انا اصلا عمرى ماتخيلت ان انا اجوز عن طريق النت وكمان هى قالتلى الكلام دا وقالتلى انها خايفه قوى من طريقة تعارفنا دى بس انا بحبها قوى وتعلقت بيها وحاولنا نبعد عن بعض اكتر من مرة بس انا وهى ماقدرناش مشكلتى بقى فى ان انا خايف قوى من زواج النت دا وكمان صحابى كتير قوى حزرونى من زواج النت داه بس انا شايف انها بنت ناس ومحترمة من كلامها وكمان متدينه ودا اللى انا طالبه مشكلتى بس فى طريقة التعارف يعنى لو كنت عرفتها فى الشارع او صدفه كان الموضوع بقى سهل قوى وكان زمانا مجوزين انا مستعد اتقدملها من بكرة بس قلقان ومش لوحدى هى كمان قلقانه من زاوج النت داه ارجوكوا قولوليلى اعمل ايه ؟ فى حاجه تانية انا تقريبا عمرى ماحبيت فى حياتى وطول عمرى بحلم ان انا احب واحدة ونعيش قصة حب مع بعض وبعد كدا نجوز يمكن دا السبب اللى مخلينى متمسك بيها قوى ارجو الرد

مشاكل وحلول ذات صلة

اضيف بتاريخ: Saturday, November 27th, 2010 في 02:52

كلمات مشاكل وحلول: , , , , , , ,

42 رد to “حبيتها على النت وخايف قوى من زواج النت”

  1. ساره
    24/02/2012 at 18:56

    انا عن نفسى ليا اصدقاء نت وعرفتهم على الحقيقه ومحترمين جدا وبعزهم جدا وعلاقتنا اتطورت بكل احترام على ارض الواقع فممكن من النت انك تتعرف على اشخاص محترمين وبتصادفنا طبعا اننا نتعرف على ناس مش محترمه وده بنبقى نبعد عنهم طلبعا لكن فيه محترمين فبرضه الجواز نفس الشئ بس انا بقرا لشيوخ كتير فى موضوع جواز النت ده كله بيقول مش مستحب والحقيقه انا محتاره بس انا مش حصلى حكايه حب النت ديه خالص

  2. TOTA
    27/01/2012 at 04:50

    ياجماعه زى ماانت قاعد علي النت وانت من جواك وبره شخص كويس اكيد اللي قاعد بيكلمك ده ممكن يكون كويس زيك المشكلة مش في النت اكنك شوفتها في اى مكان تانى المهم انها او انه يبقي كويس وتقدره فعلا تعيشوا مع بعض في هدوا واستقرار

  3. ميرو
    04/12/2011 at 18:54

    انا عندى نفس المشكلة تقريبا اتعرفت على شخص عن طريق النت وخدنا ارقام بعض كاصحاب وبعدا اتعلقنا ببعض جدا وقالى انة بيحبنى وانا كمان قولتلة وطلبنى للجواز وانا وافقت واتعرفنا على بعض اكتر وحبنا بعض اكتر ولما قال لمامتة موافقتش وهى اللى عايزة تختارلة عروستة بس احنا لسة مع بعض من غير متعرف طبعا على امل ان فى يوم تغير رايها احنا نعرف بعض بقالنا سنتين وانا علفكرة غيرتة للاحسن وهو كمان بس انا خايفة من تاثير والدتة علية ويسبنى

  4. كوكو
    11/05/2011 at 03:02

    انا عندى نفس المشكلة انى بحب واحد من على النت وبعدين قلى انا بحبك وكنت خارجة من تجربة قصرت فيا اوى ومش قلتلة انى بحبك الا بعديها بشوية المهم الشاب الى اتعرفت علية دة قلى انا بحبك قلتلة لاء مش ينفع احنا من ع النت ودة اسمة لعب عيال ولو انت فعلا بتحبنى اثبتى وهو بيشتغل فى السعودية عشان مش اطول المهم خت عنوانى وخلى ماماتة تتصل بماما وجم وقريت فاتحة واتخطبتلة .المهم انى بقيت شكة فية اوى وعارفة ان هو بيكلم بنات وكل ما معاد جوازى يقرب اخاف اوى..بس هو كويس معايا وبيخاف عليا وبيحبنى

  5. بطه
    30/03/2011 at 11:45

    انا بنصحك انك تصلى صلاه الاستخاره لله وسيب الامور على ربنا وعادى يعنى الجواز على الشات فيها ايه يعنى مدام بتحبها وبتحبك

  6. مهاب
    18/01/2011 at 04:26

    انا عن نفسي مرتبط بوحده عرفتها من النت وخطبتها وبحبها اوي وهيه كمان وبنت محترمه وفيها كل حاجه حلوه وبقلنا سنتين مع بعض ولا في اي حاجه واالك علي حاجه كل حاجه نصيب ربنا مقدرلك كل حاجه لو مكتبلك تتجوز من النت هتتجوز من بره بردو هتتجوز مش مكتبلك خالص مش هتتجوز هههههههههه انشاء الله هتتجوز وتكون زوجه صالحه

  7. البوب
    06/01/2011 at 17:42

    بصراحه انا غير راضي علي جواز النت ده خالص لاني اكيد البنت الي كلمتك اكيد كلمت 600 شاب غيرك يعني بقت مش قطه مغمطه دي فتحت وجامد اوي ويا عالم بالادب والاحترام وانا كا متربي في شعب شرقي استحاله اتجوز وحده من النت وممكن كمان متجوزس وحده علقتها او اتعرفت عليها في تعليقه طبعا انتو فهمين وياريت كلو يبص للمستقبل احسن …………مع تحيات عمر …………. القاهره ……….وشكرا

  8. يارا
    13/12/2010 at 17:53

    عادى انك تتجوز من النت مهو ده زى الكافيه او الشارع او الكليه اماكن تعارف ودا صدفه ويمكن دى نصيبك اتجوزها بس قبل كل شىءاعرف كل شىء عنها بالصدق لانها ممكن تكون بتكدب او مخبيه حاجه وبعدين اللى بيعرف حد وبيحب من النت مره مش بيكررها لاى شك ممكن يكون جواك انها ترجع للشات تانى بعد الجواز وتخون لا ساعتها هتنضج ويكون تتفكرها مختلف واهى اتعرفت وخلاص كتير ستات متجوزيين بطريقة تقليديهومش من على النت وبعد الجواز حبو يجربو الشات والبتعارف وخربو بيتهم لانها تجربه اوله بالنسبالهم احمد ربنا انها خاضت التجربه دى قبل الجواز اتعلملت مش بعد بجد\ ربنا يوافقكم

  9. nana
    05/12/2010 at 22:52

    اخي اتوكل على الله زي النت زي الشارع زي الجيران زي بنت عمك كلو خير وبركه انا عندي اصدقاء كثير متزوجين من لنت وسعيدين و انا شخصيا جوزت صديقين ليا انا في بلد وهما في بلد
    ودورت لهم من النت على بنتنين كويسين و ضبطلهم موعد زيارات و راحو و اتجوزو و بقى عندهم عيال كمان
    مفيش حاجة تخوف بالعكس هي لو مش محترمة ايه قعدها في البيت تكلم واحد متعرفوش كانت طلعت برا و اتعرفت بكل حرية
    بس هي بنت محترمة جدا وربنا يوفقك

  10. واحد وخلاص
    30/11/2010 at 19:33

    يا اخى انت عرضت مشكلتك وعرضت الحل كمان عندما قلت انك تتخيل انك رايتها فى الشارع او كدة انت قابلتها شفتها يعنى ولا تلفون بس واكيد من كلامها معاك تقدر تحدد شخصيتها واخلاقها والحاجات دى تعامل كانك تعرفها مش عن طريق النت وتخيله بس وسيلة تعارف بينكم وبحكم كلامك معاها تقدر تحدد شخصيتها وتتقدم لها وربنا يوفق الجميع الى ما فيه الخير والرشاد

  11. soso
    29/11/2010 at 20:42

    انا من رأيي انك اولا تشيل من دماغك حكاية التعارف علي النت وتتعامل معاها كأنك عرفتها بأي طريقه تانيه وادخل بيتها واتعرف علي اهلها زي ما اي حد تاني بيعمل كأنك عرفتها مثلا في الجامعه في الجامعه بتحب واحده بتتكلم معاها ماتعرفش اهلها بيتها
    بتحبها وبتحبك وبتروح تتقدم في البيت وتتعرف علي اهلها وهي كمان تتعرف علي اهلك وتسألوا علي بعض وتصلوا صلاة استخاره وطبعا ان شاء الله هيحصل خطوبه وبعدها هيبقي القرار بعد التعارف الجاد يهتكملوا حياتكم مع بعض للابد علي اسسه تتفقوا عليها يامش هيحصل نصيب لان ده نصيبكم وربنا يوفقك…………..

  12. soso
    29/11/2010 at 19:19

    ايه التخلف والراجعيه دي هو يعني لو اتعرف عليها في الشارع بقيت بنت ناس ومحترمه كده خلاص النت ده ماهو الاوسيله تعارف زيها زى الشارع المعارف اى حاجه لكن الحكم على انك تتجوزها او لا هو من معشرتك ليها واحساسك معااها بجد ده راجعيه اوى تخلف السنين يعني
    على فكرة انا مخطوبه وبحب خطيبي جدا وقصتنا نفس قصتك بالظبط اتعرفنا على النت وكنا صحاب وبعدها حبنا بعض واتخطابنا وعمرا ما شغل بالنا طريق التعارف لانها زى اى وسييله تعارف نفسي حد يقولى اى العيب في التعارف على النت انا شايفه ان تعارف الشارع عيب اكتر من النت؟؟؟؟؟؟؟؟

  13. احمد ايتوا
    29/11/2010 at 14:49

    مش عارف اقولك ايه عشان انا زيك بالظبط بس لو السما اطربقت ع الارض انا عمري ما اسبها عشان بحبها اووووي ولازم اتجوزها وعايز اقولك ان اللي بيحب حد بيموت نفسه عشانه لو انت بتحبها طظظظظ ف كل الدنيا بس اهم حاجه اتاكد من نفسك ياتري انت فعلا بتحبها ولا لاء
    بس عايز اقولك لو انت فعلا بتحبها عمرك متقول انك قلقان شكرا

  14. ميدوالاسوانى
    29/11/2010 at 14:48

    اتوكل على الله واخطبها
    والله الموفق

  15. سعيد
    29/11/2010 at 14:08

    اعتقد انك لو اتقدمتلها حتروح للبيت وتتقدم يغنى مش حتتقدملها عن طريق النت
    وتقعد تكلم اهلها على الشات ولا حتعرف ظروفهم وحياتهم الخاصة عن طريق النت ولا طريقة معاملتهم عن طريق النت ولا صفاتهم عن طريق النت
    انت حتروح تتقدم وحتعرفهم عن قرب و كل حاجة حتبقى على عينك يا تاجر
    اخى الكريم توكل على الله استخيره اولا وبعد كدة لو لاقيت قبول روح اتقدم ولو ليك نصيب فيها حتاخدها ان شاء الله ومحدش بياخد واحدة غير مراته

  16. دائب اليائس
    29/11/2010 at 13:37

    السلام عليكم ورحمه الله وبركاته يمكن انشالله ربنا يكرمك واكيد انشالله الى كاتبه لك ربنا عز وجل هو الى هيكون مكتوب واكيد ربنا هيكرمك انشالله

  17. أخيك في الله
    29/11/2010 at 08:13

    أخي الفاضل هذا زواج مش هزار ويجب أن تحرص ولا تخون ولكن إذا كنت حبيتها من كل قلبك فيجب أن تقرب منها أكثر وتتفقوا على الصراحه وأن تسأل عليها وتراقبها من بعيد حتى يطمئن قلبك وإذا قدرت أن تأخذ إميلها بالرقم السري وتفتحه أنت وتغير الرقم السري ومن هنا تقدر تعرف إذا كانت مازالت بتتعرف على أصدقاء غير محترمين أو لا وإذا إكتشفت أنها محترمه في كلامها مع الأخرين وأنقطعت العلاقة معهم من يوم ماعرفتك وحبتك توكل على الله وأتجوزها وإذا ثبت عكس ذلك فلا تحذوا هذه الخطوة لأن كل بنت تبحث عن شريك حياتها بأي وسيله ولها الحق في ذلك المهم ان يكون التعارف في غاية الادب والحدود وفقق الله.

  18. العتموني
    29/11/2010 at 07:31

    احلي حاجة صلاة الاستخارة دي حتي في الحب والشات

  19. حبيبه
    29/11/2010 at 07:01

    اا بص يااخي علم العقل والمنطق بيقول صحه البدايات وسلامتها تؤدي الي سلامة النتائجز اسئل نفسك الاول انت كنت داخل تتعرف بنيه ايه وهي كمان بعدين قرر وصللي صلاة الاستخارة واستعين بربنا وان شاء الله يلهمك الصواب

  20. الحب المستحيل
    29/11/2010 at 05:23

    بص يا صاحبى لو عاوز رائ البسيط المتواضع يعنى التعرف عن طريق النت ده نصيب يعنى مثلا حضرتك كنت ممكن تتعرف عليها فى فرح واحد من اصدقائك او ممكن كنت تشوفها فى مصيف او ممكن تقبلها فى المترو او ممكن فى الجامعه يعنى فى خمسين الف سبب للتعرف مش معنى تعرفها من على النت تبقى بنت مش كوويسه بالعكس دى ممكن تكون افضل مليون مره من بنت تعرفها من 10 سنين يعنى ببساطه عاوز اقولك انى النت ده الجواز من عن طريق النت قسمه ونصيب ووعد ومكتوب اتوكل على الله وخير اكيد اخوك فى الله

  21. ono
    29/11/2010 at 03:57

    اقولك على حاجة من النهاية انا مرريت بنفس التجربة بس يا صحبى انت قاعد قصاد شاشة عمياء مش بتخرج احاسيس يعنى ممكن فى يوم وليلة تقفل الموبايل بتاعها و تغير الاميل وانت تعيش حزين مش عارف مين اللى ظلم مين نصيحة لله لو عاوز تتجوز الاول لازم تقابلها وتعرف كل شئ عنها انا قولتلك انت قاعد على جهاز اعمى ومتعرفش طباعها او تصرفتها انا مش بكرهك فى الموضوع بس اعقلها وتوكل على الله واسف انى طولت عليك

  22. امل يحيى
    29/11/2010 at 02:01

    اخى الا تعملو قبل ما تروح تتقدم ليها اسال عنها قوى قبل ما تتدخل بيتهم وبدقة ولو بجد لقيت سمعتها كويسة ولية لا انك مش ترحلهاانهردة فى مواقع جواز انك تكتب بيناتك وتلاقى انسانة بنفس المواصفات الا كتبتها دى زى دى ومش تتراجع مادام بجد انتم الاتنين حبيتوة بعض واجمل ما فى الدنيا الحب بس قبل كل دا اسال عنها الاول مرة واتنيت وتلاتة وصلى صلاة استخارة والا ربنا عايزة هيكون ومادام البنت بتحبك وانتت حاسس بكدة مش تتراجع انك تروح لاهلها تتقدم ليها والله ولى التوفيق ورنبا يوفقكم اللهم امين يارب العالمين وفى فترة الخطوبة انت هتعرف من معاملتها معاك انها كويسة او لا الفترة دى بتبين للولد البنت بجد انها مودبة او لا

  23. حنين الحب
    29/11/2010 at 01:48

    خد منها عنوان بيتها واتقدم ليها على الاقل قراءه فاتحه واتعرف من خلالها اكتر عليها وعلى البيئه الا محيطه بيها وعلى اهلها والا مكتوبك هتشوفه مش فارقه انك عرفتها من النت او الشارع تو من الصالونات المهم انك عرفتها واتعرف عليها اكتر من خلال انك تدخل فى العيله

  24. امل
    28/11/2010 at 23:12

    قبل اى شى استخير ربنا ومش كل اللى من النت وحشين فى ناس كويسة وربنا يوفقك ويسعدك

  25. غاوي
    28/11/2010 at 21:26

    السلام عليكم, بص حبيبي يمكن المشكلة دي أصبحت مشكلة كتير من الشباب, وده طبعا لأن النت أصبح وسيله سهلة وميسورة للكل ومسالة الحب على النت أصبح أمر وارد وبالتالي يتبع الحب الجواز طالما إنك صادق في حبك كل اللي عايز أقولة إن ليه الولد بيدي نفسه الحق إنه يحب على النت ويرفض الحق ده من البنت مع إن المسألة واحدة ومشتركة أنا بقولك علشان ما طولشي عليك
    النت وسيلة من وسائل التعارف الحديثة فإنته أكيد عرفتها بعد كلامك معاها 4 شهور ما تخليش حد يأثر على فكرك لو شايفها إنها مناسبة توكل على الله لو قلقان منها يبقي الباب اللي يجيلك منه الريح سده و……….. والسلام عليكم

  26. شهريار
    28/11/2010 at 21:25

    بصراحه يا اخوتى التعارف ايا كان نت او غيره فهو تحت اسم واحد تعارف
    وممكن تكون البنت دى فعلا محترمه وملهاش فى الخروج مع الشباب
    عشان كدا اتجهت للنت
    بس الخوف ان مثل هذه البنت تكون قد تكلمت اكثر من مره مع شباب
    ومن الممكن ان يكون خدش حيائها بلفظ وخلافه
    حاول انك تكون صريح مع نفسك ومعاها عشان تصارحك هيه كمان
    واذا تاكدت انها مغلوبه على امرها توكل على الله
    وصلى استخاره
    بس اسال جيرانها اولا
    واعلم ان كما تدين تدان
    واذا صلحت نيتك صلح عملك وبالتوفيق

  27. السندباد
    28/11/2010 at 12:20

    بص يابني انا اصحك نصيحه لله قبل ما تتسرع وتعمل حاجه أسأل عليها الاول بس مش عن طريق النت اكيد انت فاهمني

  28. remo
    28/11/2010 at 05:59

    بص انا كنت زيك كدة وفضلت اقول لأ جواز ايه ده اللي من ع النت لحد ما زهق وراح منى وساعتها بجد ندمت جدا لانه فعلا كان انسان محترم وحاولت اتصل بيه ما ردش وده كان شئ طبيعي فياريت ما تضيعهاش من بين اديك والبنت الكويسة بتبان والوحشة بتبان ما فيش حد بيقدر يمثل علطول يا ريت تكلمها وتطلب تقابل والدها ده ها يزود ثقتها فيك وانت كمان تدي نفسك فرصة تعرفها اكتر وفي الاول والا خر الحكاية كلها مساله نصيب لو ربنا كاتبهالك ها تكون ليك بس يا ريت انت تسعى في الخير بسرررررررعة وربنا يوفقك يا رب

  29. حسام
    28/11/2010 at 01:05

    اخي علي الغم من الاراء الكثيره السابقه وانا لم اقراء معظمها حتي لا اتاثر بارئي الا ان لي سؤال واحد ايه اللي يفرق في طريقه التعارف سواء كان عن طريق النت او الصالونات او الشارع او رقم تليفون غلط كلها اسباب للتعارف المهم انها تكون انسانه كويسه وتستاهل وانت تكون جاد في طلبك
    توكل علي الله والخطوبه فتره تعارف اكثر وبعد ما تتاكد من كل شيء خد الخطوه الاخيره واتجوزها بس ابقي اعزمنا

  30. مغربية
    28/11/2010 at 00:43

    اتوكل على الله اخطبها الاول و شوف علاقتك بها عن قرب اكيد حترتاح انا اخي اتزوج من النت و انا بفكر اتزوج هيك ان شاء الله اما حكاية الصالح و الطالح في النت او غير النت و الحمدالله اخي مبسوط كثير معها و الله

  31. محمد جاك
    28/11/2010 at 00:05

    يا ابنى دى مشكلة لان زواج النت ما ادراك فية اية و طالما انت واثق منها توكل على اللة و ربنا الموفق وعسى ان تكرهو شى و هو خير لكم

  32. اسامه الحناوى عبد الفتاح
    27/11/2010 at 23:44

    والله انا شايف ان معظم الاراء ال سبقتنى فى مشكلتك كويسه وانا مع ال بيئلك توكل على الله وتقدم لخطبتها فعسى الله ان تكون بنت اصل وحسب ونسب كما تقول وانت حقا لاتعرف اين المصلحه واين الخير فربما تكون هى من تبحث عنها بحق
    توكل على الله ولن يخذلك الله طاما انت حسن النيه

  33. قمر الزمان
    27/11/2010 at 23:28

    لا طبعا ابعد عن جواز النت

  34. ربنا يستر
    27/11/2010 at 19:52

    سبحان الله انا بعانى نفس المشكله وبرضه مرعوبه وقاعده اقنع نفسى مفيش حب ولا جواز بيجى من طريق النت بس الحقيقه انى مش قادره انساه

  35. محمد أمين
    27/11/2010 at 16:04

    والله غريب امر الناس دى .. يعنى 3 شهور رغى عالنت بينك وبينها وأفكاركم اتقربت من بعضها وحبتها وحبتك وقلت انها طيبة ومن اسرة محترمة .. طب ايه المانع إنك تعمل لهم زيارة وتشوف الحال ايه .. والله لو تمام ربنا يتمها بخير ولو حسيت بغير كده مش عيب إنك تفلسع ..
    يعنى بصراحة كده لو امك جابت لك عروسة محتاج قد ايه عشان تتعرف عليها ؟؟؟
    يا أخى الفاضل .. مش العيب فى النت .. لكن العيب فينا لاننا بنستعمله كغاية وليس وسيلة والصداقة من خلال الشات مش حرام طالما انها مبنية على الاحترام والآداب العامة دون أى مصالح نهائيا .. فهمت والا نقول كمان .. توكل على الله فربما هى نعمة من الله أهداك اياها فحاقظ عليها ولا تفقدها وأتمنى لكم حياة سعيدة .. والف مبروك مقدما

  36. ابو اسامه
    27/11/2010 at 13:59

    ليس العيب فى النت ولكن العيب فى معاملة كل طرف للاخر عزيزى النت وسيلة تعارف لا يقل اهمية عن الكلية او الكافى او الشارع اوى تجمع

  37. اميره
    27/11/2010 at 13:49

    فعلا مش كل البنات اللى بيدخلو على النت مش محترمين فى كتير جدا كويسين لكن انا اعتقد ان البنت اللى تبدا هى وتقولك بحبك تبقى بنت مش كويسه مينفعش انها تسبق وتقولك بحبك المفروض الكلمه دى تطلع من الولد انا شايفه انك تفكر كويس قبل ما تاخد اى خطوه فى الحكايه دى لان ده جواز مش هزار وربنا يوفقك وشكرا

  38. احمد
    27/11/2010 at 12:58

    انت قولت انك اتعرفت عليها علي النت صدفه ولقيتها انسانه كويسه ومحترمه خلاص حاول تتعرف عليها اكتر يعني حاول تقابلها وتتكلم معاها عشان تعرف اكتر عن شخصيتها وحياتها وساعتها انت اللي هتقرر اذكانت دي اللي تناسبك فعلا ولا لا وبعدين الجواز قسمه ونصيب جايز النت وسيله وبعدين ركز اكتر عليها هي مش عرفتها ازاي ولا امتي وسيبك من كلام الناس اللي لا بيقدم ولا بيفيد وربنا يوفقك

  39. احمد ايطاليا
    27/11/2010 at 12:42

    اولا سلام عليكم ثانيا احب اقولك ان تجارب النت موش زى بعضها وزى مايكون واحد مسافر واهلة هما الا بيخطبولة انا كنت خاطب وكنت اعرف اهلها تمام بس للاسف بعد الخطوبة اتضح لي اني ولا اعرفهم صوابعك موش زى بعضها اتوكل علي الله بس خد عنوانها واسال عليها كويس وكمان ماتخبيش عنها اي حاجة وتوكل علي اللهوربنا يوفقك

  40. sorour elbosaty
    27/11/2010 at 10:49

    لو بجد عاوز تخطبها حاول انك تعرفها أكتر تعرف أهلها لازم تدرسها صح وتعرف البيت اللي اتربت فيه والبيت كويس ولا لا ولو البنت بنت حلال ومحترمة ايه المانع انك تخطبها مش قاعدة يعني ان أي واحدة تدخل على النت مش مناسبة اخواتنا وبناتنا بيدخلوا عالنت ربنا يوفقك ويهديك للي فيه الصح.

  41. حسن الدمياطى
    27/11/2010 at 04:53

    اخى الفاضل انا هئلك كلمتين “”تعددت الاسباب والموت واحدا”” انا عرف بنت عن طريف التلوفون بصدفه وكانت من محفه ونا من محفظه بس محصلش نصيب بس اقسم بلله لو لفيت الدنيا بحلها مش هلاقى دفرها”” اتوكل على الله بس اتاكد من حبها ودا برجع لاحساسك انتا يابطل

  42. بسمت امل
    27/11/2010 at 03:08

    اخي الفاضل اتوكل على الله واتقدملها بعد ماتصلي صلات استخارة
    لو اهلها وافقو حدد فترة للخطوبة عشان تتعرف عنها وعن اهلها عن قرب ده مهم جدااااااا
    وكمان لازم تسال عنها كويس شوف راي الناس فيها وفي اهلها ده مهم اوي
    جميل انك تتزوج وحدة بتحبها وبتحبك بس بعد ماتقتنع بيها وباهلها واخلاقها تماما
    ربنا يتمملكم بخير يارب

اترك رداً أو حلاً لهذه المشكلة