انا بنت عندي 18 سنة.احب شاب عنده 25 سنة.هو جه اتعرف عليه و حبيته و حبني جدا زماكانش في مشاكل في موضوعنا لغايت ما اتعرفت علي اخوه الصغير و هو معايا في الثانوية العامة وكنت بعاملو كزميل ليا وهو كان عارف علاقتي بأخوه الكبير والموضوع كان هادي ومستقر وعدت سنة كاملة من غير مشاكل لغايت ما في يوم واحد قريبي اتصل بيا و فاللي ان اخو حبيبي الصغير بيتطلع كلام مش كويس علي انتيمتي فقلت اتدخل و اشوفه عمل كده ليه .كالمتو و سألته اتنرفز و فاللي انا مافولتش حاجة عليها المهم زعلنا من بعض.بعدها ب كام شهر جاتلي رسالة علي الموبايل بتقولي ابعدي عن فلان و الأ حافضحك وانا مش عارفة اللي بعت الرسالة ده مين ولا حيفضحني بايه انا عمري ما عرفت واحد غيره و عمر ما حد مسك عليا حاجة .وريت حبيبي الرسالة وكلم اللي بعتها و شتمه ولكن اللي بعتها قال ليه انا بانصحك ابعد عنها دي بنت مشبوهة وقاله كلام وحش عليا .هو طبعا ماصدقش.بعدها ب كام يوم ناس اتصلوا بأمه وقالولها بردو اني بنت بطالة واني بضحك عليه وعاملة محترمة .الست في الأول ماكانتش متأكدة وهو قالها طب اسألي اخويا هوا عارفها وحبيبي فوجئ باخوه بيقول اني فعلا مش كويسة واني كنت بجري واراه قبل ما اعرف حبيبي وجاب صحابو في البيت شهدوا بأن الكلام ده صح حبيبي حاول كتير يدافع عني بس امه قالتله لو عاوزها يبقي انت مش لبني ولا انا اعرفك.انا وهو كنل بنتقابل في النادي و بعد ما حصل الموضوع ده فضل يقابلني و مسمعش كلام امه وكل ما كنا نتقابل كان بييجي مكالمات لأمه اننا مع بعض والمكان اللي احنا فيه وكانت امه تتخانق معاه و عشان هية عيانة بالقلب والضغط والسكر وكل ده بسبب ان ابو حبيبي طلقها ورماها بالعيال والسبب في كل ده حماتها وعشان كده حبيبي بيخاف عليها و مش بيرضي يزعلها.دلوقتي حبيبي من كتر ما تعب من المشاكل اصبح يائس اننا نتجوز وبأة يجرحني بالكلام ويقولي انا مش حينفع اخسر اهلي عشانك ومعاملته لية اتغيرت مانكرش انه لسة بيحبني بس كان بيذلني عشان يرجعلي لأن كان بعد كل مشكلة مع امه بيسبني زوكمان انا في الوقت الحالي بقابله بره النادي فعربيته وحصل بيننا تجاوزات وقلة ادب عشان بنضطرلر نقعد في مكان ضلمة عشان المشاكل ومن يوم ما ابتدي يلمسني وأنا حسة اني رخصت بالنسبة له اوى اعمل اية؟ اروح اتكلم مع مامته؟افهمها الحقيقة اني مظلومة؟ولا استني؟افهمها اني عمري ما هسيب ابنها لوحدة غيري وأن لو دة حصل انا ممكن اقتله و اقتل نفسي ؟ وأحمد ازاي ارجعله الأمل من جديد؟ اريد الحل ارجوكم
مشاكل الحب والزواج
احبه وهو يحبني ولكن امه تكرهني
اضيف بتاريخ: Sunday, February 6th, 2011 في 04:43
كلمات مشاكل وحلول: الثانوية العامة, الموبايل, بنت, شاب, مشاكل, مشاكل الحب, مشاكل الحب والزواج, موبايل
يابنتي الحلال بين والحرام بين وربنامطلع على كل السرايرولايخفى عليه شي ابدا علاقتكم غلط ولابدمن انهايهافورالاجل ماتوقعوافي الحرام تاني وتستمروفيه واطلبي منه يتقدم لاهلك ويخطبك رسمي غيركدا ماينفع تستمروامع بعضكم واحفظ كرامتك وشرفك وكرامةاهلك واتركيه للابد وربك بيكرمك ويعوضك بالزوج الصالح اللي يستاهلك ويسعدك وربي يوفقك
مثلا جيب لاموا هدية فعيد ميلادها وروح شوفيها من الشهر لشهر لشهر وهتصير تحبك وينتهي المشكل
ربنا يهديك ولاترجعي تااااااااني مره له لوتحبيه ربنا يعوضك
دة انتى نيلتيهااكتر كان لازم تحفظى على نفسك انتى كدة اكدتيلوا كل الكلام الوحش الى اتقال عليكى والله اعلم ممكن دة كان اختبار ليكى وانتى فشلتى فقال عادى بقى اكمل تسلية
وبعدييييييييييييين فى اية لية كل الناسدى بتقول عليكى كلام وحش مهو مفيش دخان من غير نار شوفى انتى عملتى اية بقى وبتدفعى تمنة كدة / دة كمان صحبتك بيتقال عليها كلام مش كويس يعنى السكة من اولها مش مضبوطة
حصلت حاجات كتيره هتخلى موضوعك صعب :
– اخوه وأمه ضدك .
– لمسك وحصلت تجاوزات وانتى قلتى ” قلة أدب ” !
* طب ليه تعدى معاه فـ مكان ضلمه ؟
* ليه تخليه يهينك عشان يرجعلك ؟
* ليه كل دا حاصل ولسه متمسكه بيه ؟
عيبنا كشباب بنبص تحت رجلينا يعنى بنبص ع الموقف الـ احنه فيه واللحظه الـ عيشنها مش بنبص لأدام !
لازم تفكرى ان لو اتجوزتيه مثلاً مش هيحترمك ودايماً هيهينك ويقلك مش انتى ياما عملتى كذا وكذا معايا فـ العربيه …الخ
كمان أمه تعبانه واخوه طبعاً مش حابك وحبيبك خانك بأنه يلمسك
/// من وجهة نظرى : لازم تبعدى عنه لأن دا مينفعش يبقى زوج ليكى .
بالنسبه لامه انا شايفه انك مينفعش تتكلمى معاها لانك مهما عملتى هى مش هتصدقك وتكذب ابنها انتى حاولى تتكلمى مع اخوه وتعرفى بهدوء وعقل ليه قال كدة عليكى ولو كسبتيه فى صفك اكيد هيساعدك ويحنن قلب امه عليكى 0 اما بالنسبه للى بيحصل بينك وبين حبيبك كدة اكبر غلط لازم تلحقى نفسك قبل ميحصل بينكم حاجه اكبر من كدة لازم يلاقى فيكى بنت حالحة تنفع تكون ام صالحه لاولاده 0 قربى من ربنا ومش لازم تتقابلو الفتره دى يكفى انكم تتكلمو فى التليفون و حاولى تاخدى بالك من نفسك وانشاء الله ربنا هيكرمك وهيغير حالك
اختى انتى لسة صغيرة على كل المواضيع دى اول حاجة هو لو كان بيحبك فعلا كان خطبك عشان مفيش اى حد يكلم عليكى اى كلمة اى كان وانتى بتقولى حصلت بينكم تجاوزات يبقى معناها هو مش خايف عليكى فاحسن حل انك تبعدى عنه نهائيا وتقوليلى لو عاوز نفضل مع بعض يبقى يخطبك من اهلك عشان تبقى علاقتكم فى النور انتى مش ملاحظة ان هو راجل وخايف على اهله ازاى انتى بنت ولازم تحافظى على اهلك كمان ولو بيحبك وحا يحس انك حاتضيعى منه حايجى يخطبك لكن لو بيلعب بيكى ولا حا يسال
انتى المفروض من اول ما معملتة اتغيرت كنتى بعدتى وحافظتى على كرامتك وعلى فكرة اللى حصل بينكو فى العربية دة ممكن يخلية يتاكد ان الكلام اللى طلع عليكى صح انتى لازم تاخدى موقف يا تقدم يا تبعدى عنة وعن مشاكلة انتى لسة صغبيرة على الهم دة وبعدين بدال مامتة مش عاوزاكى يبقى عمرة ما هيتجوزك وهيرضى امة لو انتى تقبلى على نفسك انك تكملى مع واحد مش هيتجوزك براحتك ولعلمك بدال بداتى انة يلمسك ممكن بردة يعمل معاكى كل حاجة وبردة فى الاخر يسيبك اتقى اللة فى نفسك وارجعى لربنا وسيبك من اللى انتى فية دة دة انتى لسة 18 سنة
انا عارفه انى ال هقوله ده صعب عليك بس انا محترمه جدا راى الاخت ال بعتتلك رساله قبلى لان رايها كويس جدا ويريت تعملى بيه وتفتكرى ربنا وتفتكرى انه لو بيحبك هيحافظ عليك من اى حد ومش بقول كده انه يبيع مامته على الاقل يفضل جمبك لو كان بيحبك ويحاول مره وتنين مع ماته لو مش حصل نصيب دى تبقى ايرادت ربناوانا شايفه انه مش عارف اصلا يحافظ عليك وافتكرى ان فى ربنا وافتكرى ان ممكن تتجوزى وبعد الجواز يرميكى عشان خاطر امه وقولى الحمد لله وربنا هيوفقك مع ال يستهلك
مشكلتك صعبة ومعقدة بس انا من راى انك تبعدى عنه خالص لحد مالامور تهدى ابعدى عن عنيه متخلهوش يعرف اخبارك وهو لو بيحبك هيدور عليكى وهيعتذرلك لازم يبقى عندك عزة نفس وكرامة لازم هو اللى يحس انه محتاجك ابعدى فترة لحد مالموضوع يهدى وكل واحد فيكم يقرر هو عاوز ايه من الاخر اتقلى وخلى عندك كرامة وحافظى على نفسك لانك مدام حسيتى انك رخصتى فى نظرة يبقى انتى فقدتى احترامك لنفسك وربنا معاكى ويحللك مشكلتك
انتى مشكلتك يا قمر فيها جوانب كتير
اولا اللى حصل بينكم وانتى شايفة انه قلة ادب مش شايفة برضه انه حرام؟؟ وانك محتاجة ترجعى لربنا لأن اولى واول شئ لازم تحرثى عليه هو رضاه؟
يا حبيبتى بلاش تخسرى نفسك بجد
وكمان مجرد اجتماعك معاه حتى لو فى مكان عام ده غلط وحرام
ومش معنى ان المجتمع فيه نماذج كتير بالشكل ده انك تعملى كده
انتى عارفة الحرام والحلال يبقى تعملى اللى ربنا بيقوله حتى لو هيغصب كل الناس
ثانيا انك تنتحرى او تقتليه تبقى بتخسرى الدنيا والآخرة
صحيح الحب شئ جميل بس فين ربنا من حياتك كده؟؟
انا عارفة اللى بقوله صعب بس انتى تقدرى تقربى من ربنا
ليه لأ؟
انتى لسه صغيرة ليه مش تحافظى على مشاعرك لحد ما يجى اللى يستاهلها بجد
انا لو مكانك هأعمل حاجة واحدة
أتصل بيه حالا أقوله( لو قدرت تيجى تتقدم لأهلى فى يوم ومامتك وافقت تعالى لو مش قدرت ربنا هيرزقنى بإنسان يحافظ عليا )
اقسم بالله ما هتخسرى
ولو خسرتيه عمرك ما هتخسرى نفسك
وياريت تحاولى تقربى من ربنا بالصلاة والقرآن والتزمى بالحجاب زى ما اوجبه ربنا عشان ما تبقيش مطمع لعين أى وحد نفسه مريضة
ربنا يهديكى للخير