الحب وفارق السن

بحب زميلي وانا اكبر منه بـ 8 سنين

السلام عليكم ورحمة الله وبركاته

لي زميل بالشغل محترم جدا ومحبوب بين زملائنا انا لاحظت انه من الاول يهتم بي اهتمام زائد ويخاف عليا جدا بس عمره ما كلمني في حاجه لحد اليوم اللي اتفاجئت بيه بيقولي انه عاوز يتقدم لي انا اندهشت جدا وخصوصا اني اعرف فرق السن بينا (8 سنين) نبهته لده وقولتله مينفعش هو رفض يسمع اي كلام بخصوص فرق السن وقالي اني الفتاة اللي يتمناها زوجة بغض النظر عن اي حاجه قولتله الموضوع منتهي وانه مش هينفع

بعدها اخد اجازة مفاجئة من الشغل وقتها حسيت اني قلقانه عليه جدا بس محبتش ابين وبعد يومين لقيت مامته بتكلمني بعد ما اعطاها رقمي وبتوصف لي حالته وتقولي ان ابنها شاريني قوي ومش مشكلة فرق السن

مامته عشان بتحبه قوي عاوز تشوفه سعيد حتى لو هي مش مقتنعه بتصرفاته المشكله بقت فيا انا كمان مش قادره اتخلص بشعوري نحيته هو فيه المواصفات اللي اي بنت تحلم بيها وعيلته كبيرة جدا بس انا خايفه من رد الفعل من كل اللي حواليا (باباه واهلي والناس وزمايلنا) هو بدأ يكلمني من وقت للتاني بغرض الاطمئنان عليا لما مش بنزل الشغل حاسه اني اتعلقت بيه بس برضه خايفه انه لو اتجوزنا يرجع يندم لما انا اكبر وهو يكون شباب وانه يتجوز عليا

اعمل ايه ارجوكم دلوني انقل من الشغل بس لو عملت كده ابقى بهدم حياته هو مش شايف غيري وميقدرش ابعد عنه طب اعمل ايه ولو وافقت عليه ازاي هقدر اواجه نفسي واواجه كل الناس اللي هتلومني انا اكتر ما هتلومه هو

ارجوكم ادعولي وانصحوني

مشاكل وحلول ذات صلة

اضيف بتاريخ: Saturday, March 5th, 2011 في 09:33

كلمات مشاكل وحلول: , , , , , , ,

29 رد to “بحب زميلي وانا اكبر منه بـ 8 سنين”

  1. ابواميرة
    04/12/2013 at 20:52

    اختي فارق السن احيانا بيكون حجرعثرةفي التوافق بين الزوجين وحتى وان كانوايحبو بعض لكن ماتخلوا الحياة الزوجيةمن المنغصات والهمز والكلام من ده اومن الاهل وتكبر المشاكل وتودي الى الطلاق في النهاية انتي اخبريه انه بيكون عمره 42سنة وانتي في 50سنة يعني في سن الياس ماتخلف الست بعدها هل يرضى بالشي ده ويتقبله فان اجابك بنعم وعارف الاشياء دي ولاعمره يتضايق منهاابدا فخلاص على بركةالله صلي صلاةاستخارة وادعي ربك ان يسهل لكم اللي فيه الخير وربي يوفق بينكماويسعدكمافي حياتكماالزوجية القادمة

  2. سيسك
    02/03/2013 at 05:22

    عادى جدا الحب لا يعرف فرق السن ولا المستحيل بس المشكلة انى بحب واحدة اكبر منى ب 6 سنين و هيا بتحب واحد تانى

  3. mido salem
    23/12/2012 at 20:50

    انا رايي ان الحب لا يعرف اي فرق في الدنيا هما قلبين اتقابلو في اي ظروف كانت بس اهم حاجه انهم حبو بعض “” وعلي فكره الشباب مش شباب السن الشباب شباب القلب ومتحسبيش فرق السن قد ايه اهم حاجه تحسبي ان قلبك هيفضل يدي حب قد ايه واظن اننا لو وصلنا ل 1000 سنه القلب الذي ينبض بالحب مش هيكبر وهيفضل طول الوقت شباب ,, طالما انت قادره علي انك تعطيه مشاعر واحاسيس تشعره انه اسعد انسان في الكون انا اضمنلك انه عمره ما هيحس باي فرق مهما كان وعلي فكره الحب يكسر اي حدود مهما كانت ؛؛؛ انا عايز اسألك سؤالين واجابتهم هتدلك للاختيار الصحيح ؛؛ هل لو كان الفرق بينكم ماديا وليس مشكله السن يعني مثلا هو ابن وزير وانت بنت غفير كنتي هتنظري للمشكله من نفي الزاويه ولا ايه ؟؟؟؟؟؟؟؟
    وسؤال تاني كمان لو اتجوزتي انسان مناسب في سنه ومستواه الاجتماعي بس مش بتحبيه ولا بيحبك تخيلي الدنيا هتبقي عامله ازاي ؟؟؟؟
    انا عايز اوضح فكره ان الحب لايرتبط بتي عوائق ويكسر اي عوائق في طريقه طالما اللي بيحبو بعض مستعدين انهم يكملوا عمرهم مع بعض”””””
    نصيحه مهمه جدا جدا جدا:: الحب الحقيقي المنقي من اي شهوانيات او غرائز او مصالح اللي من اجل الحبيب وللحبيب ومن الحبيب (الحب الحقيقي ) مش بنقابلو كتير في عمرنا عشان كده حافظي علي حبيبك ومتضيعهوش من ايديكي عشان لو حصل كده هتندمي كل عمرك :. السعاده بنفضل ندور عليها طول عمرنا ممكن نعيش ونموت ومنقابلهاش ابدا وممكن نقابلها ونفرط فيها ونعيش طول عمرنا ندمانين بس الانسان الذكي هو اللي لما تجيله يحافظ عليها وميضيعهاش من ايده والاهم من كده انه يحافظ علي الانسان اللي هو مصدر سعادته وميفرطشي فيه ابدا ويحطه جوه عنيه ويعيشه جوه قلبه …………… ده رايي الحب ثم الحب ثم الحب اللي يديني حب اديه عمري واللي يسعدني يوم اسعده كل يوم ؛ اني احب ومستناش من حبيبي اي حاجه غير كلمه واحده “”ربنا يخليك لي يا حبيبي ” اني اعطي لحبيبي حب يخليه اسعد انسان في الدنيا وانا من سعادته هكون انا اسعد انسان في الدنيا ؛ ان يكون كل همي ان ارسم الفرحه دايما علي وجهه …. هو ده الحب اللي لازم كلنا نتعامل بيه . انا شخصيا حبيبتي اديها عمري كله وانا مبسوط وهكون برده كسبان ولو دخلت عشانها معركه وخسرت الدنيا كلها ( اهلي والناس والمجتمع ) هبهي برده انا الكسبان عشان هكون كسبتها وساعتها هكون كسبت الدنيا كلها معايا ؛ انا حبيبتي هي دنيتي كلها اللي انا مينفعش اعيش غير ليها ومينفعش اعيش غير بيها

  4. اخوكم فلله
    27/10/2012 at 11:37

    السلام عليك جميعا يبنت الناس توكلي لي الله سيدنا النبي صلي الله عليه وسلم تزوج امنا خديجه رضي الله عنها وكان الفارق اكبر من كدا بكطتير قوي

  5. الادهم
    01/05/2012 at 13:46

    بدون اي تردد تزوجيه لاني مررت بالتجربه وهي ناجحه فعلا الحب يزيل اي عائق او فرق سوف تعيشين اجمل حياه ان شاء الله

  6. سيكو
    25/02/2012 at 05:28

    يا اخى لو انتى مرتحة لهذا الرجل وقلبك مرتحلوة توكلى على الله ولا يهمك شى غير سعتك مشمكن
    تلقى سعتك مع الصغر منك وممكن متلهش مع المن سنك مع العلم انة بيحبك ودة شى غلى جدان ويطمنك ولا يعلم الغيب الا الله وعلينا ان ناخذ بالسبب

  7. sam
    18/06/2011 at 15:05

    يا اختى انا فى نفس مشكله وفارق السن 8سنوات ايضا ب هو تررد شويه لا بعض اهله مش موافقين بس الى معاكى بيحبك اكيد لانه متمسك بيكى اتجوزيه وسيبك من كلام الناس وادعيلى انى اتجوز الى بحبه

  8. احمد ايطاليا
    25/04/2011 at 00:48

    اولا هعرفك حاجة الناس كدة كدة هتتكلم اتجوزتية سبتية ماتجوزتيش هيتكلمو هتكلمو يبقي سيبك من الناس وكلام الناس اهم حاجة اهلك واهلة والباقي يخبط دماغة في الحيط ومتعبريش حد وتوكلي علي الله اذا انتي كنتي بتحبية وشيفاة الزوج المناسب يعني الحل في ايدك انتي وشكرا

  9. الرومانسي
    24/04/2011 at 15:21

    انا بحب واحدة اكبر مني ب5سنين نفس المشكلة وهي بتحبني اوي بس لازم نرضى بالواقع اللي فية مينفعش ارتبط بيهاعشان بعد كدة حنتعب اوي نفسيا ومعنويا غصب عننا كل المشاكل ولكن ربنا حيعوضنا خير ان شاءالله وممكن نسأل على بعض ونطمن على بعض انتي متزعليش ان شاء الله ربنا حيعوضك خير انتي وهو وكل واحد واقع في نفس المشكلة نتقرب لربنابرغم انا بقول هذا الكلام وهو صعب عليا اوي وانا حاسس بيكي اوي وحاولي تقنعية بكدة

  10. الجبل
    12/03/2011 at 20:04

    العقل يقول لا يصح هذا الزواج مع هذا الفرق الكبير فى السن اما القلب فحاليا هو المتحكم كما ارى من كلامك احسك مياله له بس اذا كان هو راضى وانا راضى مالك انته ياقاضى ربنا يسعدك

  11. زائر
    12/03/2011 at 02:07

    اتوكلى على الله واتجوزيه رسولنا الكريم تزوج بأمنا خديجه بنت خويلد وهى أكبر منه ب15 سنه وهى التى طلبت القرب منه لأمانته وصدقه. المهم يكون هذا الشخص بيحبك. توكلى على الله وخلصى فى الموضوع.

  12. كيكو
    11/03/2011 at 03:48

    انا علي فكره مخطوبه لواحد اصغر مني ب 3 سنيين و بقالي سنه و عادي خالص مش حاسه بفرق السن ولا هو و سوري يعني طظ في الناس اهم حاجه تكوني انتي مقتنعه
    والله انا اللي بقول لناس اني اكبر منه و عادي خالص و اهله مش بيحسسوني اني اكبر منه خالص و بتقبل اي كلام من الناس لما يقولو علي حد بس دي اكبر منهانا برد عليهم و اقولهم ما تحتلرموا نفسكم ما انا اكبر من خطبي و بهزار
    بس اهم حاجه يكون انتي عندك القابليه تتحملي كلام الناس و مش تخدي علي كرامتك

  13. محمد
    10/03/2011 at 12:59

    اتزوجيها عادي

  14. الموضوع كبر جدا ياترى مين المستفيد؟؟؟
    10/03/2011 at 11:04

    والله مش عارفة اقولك ايه
    بس فى بنات مش بيبان عليهم السن
    يعنى لو شكلك اصغر من سنك عادى لكن لو شكلك عادى وخاصة انك بتقولى مكن تكون مامته مش مقتنعه هتسمعى كلام بعد كدا يجرحك
    وخاصة الست بعد الجواز شكلها بيكبر شوية وخلفة وكدا
    صلي صلاة استخارة وكلمى مامتك وكلمى مامته بينك وبينها وقوليلها انتى موافقة ولا عشان ترضيه بس وباباه برضو
    لان هو ممكن يكون بيحبك بس الحياة لا تخلوا من المشاكل ممكن بعد كدا تتخانقوا حد يرمى كلمة كدا او كدا هتضايقك انتى
    لو عندك استعداد خلاص توكلى على الله
    بس صلى صلاة استخارة وقوليله يعنى تخيل مثلا هيبقى عندك 42 سنة وانا 50 سنة هتتقبل دا
    ولو قالك مش عاوز اتكلم قوليله لا لازم اتاكد انك مقتنع مش مندفع
    وربنا يوفقك

  15. Essam Ayyad
    09/03/2011 at 18:40

    اختي الكريمة .. اسعد الله مسائكي بكل خير ..
    بالنسبة لمشكلتك انا معك بانها مشكلة مش سهلة .. والقرار اللي بدك تاخديه رح يكون اله سلبيات وايجابيات عليكي وعلى الشب .
    بس يا اختي اذا كان الموضوع بس كلام الناس لا بقدم ولا يأخر .. اعملي اللي انتي مقتنعة فيه واللي تشوفيه مناسب لالك واله .. ولو كان فارق السن بينكم كبير شوي .. بس الحب يا اختي لا يعرف السن .. ولو الكم نصيب ببعض رح تاخدو بعض لو شو ما كان .. بس انا بقلك ادرسي الموضوع كمان مرة وخلي بحسابك انك انتي بتحبيه وهو بحبك .. واللي بحب من قلبه ما بتخلى بالسهولة اللي انتي متوقعاها .. الله يجمع بينكم بخير اذا الكم نصيب ببعض .. ويقدملكم اللي فيه الخير لالك واله .. احتراماتي

  16. توتا
    08/03/2011 at 22:35

    بصى يا حبيبتى صلى صلاة استخارةوربنا يقدم اللى فية الخير لو انتى مش باين عليكى السن وشايفة نافسك شكلك صغير اتوكلى على اللة والسن معدش مشكلة زى الاول وبعدين الرسول صلى اللة علية وسلم كان زوجتة اكبر منة ب حوالى 15 سنة بس لقها زوجة صالحة لو واثقة فى حبة ليكى اتوكلى على اللة بعد ما تصلى استخارة

  17. عاقل ومفكر
    08/03/2011 at 22:06

    ات اتعجب من كلام الاخت المتفائله بالحياه واتعجب اكثر من التصويت 23 حل مناسب __ يا اختي الرسول صلي الله عليه وسلم تزوج ب طفله 9 سنوات فهل هذا متاح الان ؟؟ او زواجه تزوج ام المؤمنين خديجه بنت خويلد

  18. ابرام بشاى
    08/03/2011 at 18:02

    قد يكون من الافضل ان اكون صريحا جد1 معك حتى لا تقعى فى موقفا صعبا – ان فارق السن فى حالتك ليس فى الصالح لكما لانه فسيولوجيا و نفسيا سيكون له تاثيرا سلبيا عليكما معا او بمعنى اخر اؤكد لك ان الحفاظ على الحب و التجانس سيكون اصعب فى حالتكما عنما اذا كان الرجل اكبر ب 5-8 سنوات عنك. الرجاء التفكير اكثر و لك الحق فى اى اختيار تشائين

  19. المتفائله
    08/03/2011 at 15:43

    شكرا لكل من راى ان راى فى هذه المشكله راى صحيح ولكنى اريد من كل اخواتى وحبايبى الذين يكتبون حلول لكثير من المشاكل ان يضعوا انفسهم فى مكان صاحب المشكله وان نعمل على حل مشاكل الاخرين واشكر كل من يترك حلا لاى مشكله موجوده فنحن اخوه يجب ان نساعد بعض وادعولى يااخواتى وفقنا الله جميعا

  20. الحياة كلها امل
    07/03/2011 at 23:50

    يااختى لو شاعره انك متجاوبه معاه وان صدق فى اخساسه نحيتك توكلى على الله هو حسبك
    لحسن تندامى لو ضاع من ايدك وشوفتيه مع وحده غير اتمنى لكم السعاده والرضا والمحبة

  21. خالة ام رقية
    06/03/2011 at 16:44

    تزوجية يا ابنتى الحب يذيب اية فوراق

  22. صحيحة
    06/03/2011 at 10:14

    لو كويس وحسيـــــــــتي ان فرق السن مش عقبــــــة اوك

  23. أبو سعده
    06/03/2011 at 09:56

    على فكرة موضوع فرق السن ده مش حاجه وحشه وأكبر دليل على ذلك زواج سيدنا رسول الله من السيدة خديجة وهى تكبره بعشرون عاما وكم كان هذا الزواج ناجحا ويضرب به المثل خليها على الله ووافقى

  24. MIDOOO
    06/03/2011 at 01:41

    اولا بالعكس عمر ما السن كان فرق بين اتنين بيحبوا بعض ماهو زي ما في بنت اكبر من ولد ب 8 سنين وانتى خايفه انه يتزوج عليكي على كده بقى لو هو كان اكبر منك 8 سنين هتطلبى منه الطلاق وتتجوزى غيره علشان مجرد انه كبر
    فرق السن ده وهم وبعدين هنروح بعيد ليه السيده خديجه كانت اكبر من يدنا محمد ب 20 سنه تقريبا توكلى على الله ووافقى وقبل كل ده استخيري ربنا وربنا يقدملك اللى فيه الخير

  25. سميه
    06/03/2011 at 01:21

    متفقة تماما مع ( المتفائلة بالحياه )

  26. واحد من الناس
    06/03/2011 at 00:28

    اختي توكلي على الله انا اكبر من زوجي بي كتير منك والله والحمد لله سعيدة معه وسبق ليا الزواج وهوا لاء
    ومعي اطفال وه دائما مخلص ليا انا ما اقدر اعيش من غيره توكلي على الله
    وا لاء والحمد لله انا اسعد انسانة في الوجود واسئلك الدعاء ليا كتيرا ربي يخليه

  27. المعلم
    05/03/2011 at 20:55

    انتى مشكلتك الناس نفترض انه لو اكبر منك ب10 سنوات مش كنتى هتخافى من كلام الناس ولو فى نفس عمرك هتاخفى من عيون الناس الناس مبتسبش حد فى حاله لو امره مش كويس تلومه ولو امره كويس تحسده ولى هياخد باله من الناس مش رايح ولا جاى وصغر سنه مش عيب شرعى توكلى على الله واتجوزيه

  28. المتفائله بالحياه
    05/03/2011 at 10:47

    ياحبيبتى يا اختى فى الاسلام من كلامك حسيت انك انسانه حكيمه وتزن الامور جيدا ولكن علشان فرق السن تهدمى حياتك وحياته مش يمكن ده نصيبك وبعدين يا اختى العزيزه الرسول عليه الصلاه والسلام خير البشر تزوج ام المؤمنين خديجه بنت خويلد رضى الله عنها وهى كانت اكبر منه بكتير ولكنها خير النساء حبيبتى اذا كان هو يحبك وانت تحبيه وكلم والدته يبقى هو يريدك بجد فلا تفرطى فيه انى اعرف انك خائفه من كلام الناس ولكن ماذا ستفعل لكى الناس عندما تهدم حياتك وحياته مشكلتنا جميع اننا نفكر فى كلام الناس ولا نفكر فى انفسنا ولا نفكر فيمن نحب توكلى على الله وانت انسانه محترمه ولن يخزيكى الله ابدا لانك اتوكلت عليه وسيهديكى ويرزقكى الذريه الصالحه وسيجعلك جميله دائما فى عين زوجك وسيظل يحبك باذن الله واتمنى لكم حياه سعيده وادعيللى يا اختى فى الله بالحياه السعيده وان اتعلم تعليما جيدا وفقك الله وستكونى فى رعاية الله وامنه من اختك فى الله

  29. ziad
    05/03/2011 at 10:45

    انصحك بعد اللزواج منه لانه بعد مرور الاعوام سيظل هو شابا وانتي سوف يكون تقدم بكي العمر وبالتالي سوف يبحث عن اخرى لارضائه جنسيا ومعنويا هذا رائي

اترك رداً أو حلاً لهذه المشكلة