مشاكل الخطوبة

محتار ومش عارف اختار وقربت انهار

يا جماعه ساعدونى عندى مشكله صعبة انا شاب عندى23 سنه

فيه فى حياتى بنتين اول بنت فيهم بحبها اوى وما حبتش ولا عرفت بنات غيرها واتقدمتلها وخطبتها هى كمان مع مرور الايام حبتنى وبنبقى ماشيين كويسين مع بعض بس المشكله انها ليها ماضى كانت بتحب واحد قبل كده وكل ما تفتكره تتضايق وتتغير من ناحيتى وبعد ما تهدأ ترجع كويسه تانى وهكذا ممكن ابسط حاجه تفكرها بيه حتى لو كلمه قلتهالها سمعتها منوا قبل كده يعنى هى بتضايقنى كتير كل ما تفتكره

البنت التانيه بتحبنى اوى وهتموت عليا ومالهاش ماضى خالص بس المشكله ان انا ما بحبهاش ولا عمرى فكرت فيها

عشان كده انا فى مشكله وصليت استخاره لقيتنى متمسك باللى بحبها بس بتخنق كل ما تفتكر اللى هى بتحبه وتضايقنى بسببه

والتانيه هتريحنى من تذكار الماضى بس المشكله انى ما بحبهاش

وكمان هى ممكن تحس معايا بنفس المشكله اللى انا بحسها مع حبيبتى بمعنى ان هى هتبقى مالهاش ماضى بس انا هبقى لى ماضى مع اللى بحبها وانا اللى ما ارضهوش على نفسى ما ارضهوش على غيرى

طب اعمل ايه استحمل ماضى غيرى ولا اخلى غيرى يستحمل ماضيا وفى الحالتين عذاب بس ايهما اخف وكمان التانيه انا حاسس انى عمرى ما هحبها نفس الحب اللى بحبوا للى بحبها وكمان ممكن ابقى بخونها لو هبقى لسه بفكر فى اللى بحبها___ طب اعمل ايه

اتمنى من كل من قرأ هذه المشكله يكون فهم انا عايز اقول ايه ويرد عليا

مشاكل وحلول ذات صلة

اضيف بتاريخ: Tuesday, October 12th, 2010 في 06:37

كلمات مشاكل وحلول: , , , ,

12 رد to “محتار ومش عارف اختار وقربت انهار”

  1. ابواميرة
    14/02/2014 at 18:09

    يااخي الفاضل ليس كل مايتمناه المرءيدركه تجري الرياح بمالاتشتهي السفن وقديماقالوافي الامثال -خذاللي تحبك وماتاخذش اللي تحببه- والافضل لك البنت رقم 2 لوكنت مكانك لاخدتها وحاقول لك ليه 1-البنت رقم 1 لهاماضي وقلبهامع الولداللي كانت تحبه واللي في القلب عمره مايروح ولاينتسى ابدا 2-احتمال البنت رقم 1 تخونك بمجرد ظهور الحبيب الاول في حياتها 3- البنت رقم 2 مالهاتجارب اوماضي وده يدل على اخلاقهاوعفتهاوتربيةاهلهالها 4-البنت رقم 2 تحبك وتموت فيك بحسب كلامك انته وده اكبرحافزللارتباط بها وفورا والاتبقى اعمى قلب وبصيرة ولاعمرك حتعرف الحب وتبقى ظلمت البنت من غير اي ذنب 5- تاكدان الحب الحقيقي ياتي بعدالزواج

  2. أحمد فارس
    14/10/2010 at 15:13

    والله يا جماعة أنا بجد عندي نفس المشكلة وبجد طول الوقت باقول بنت عمي اللي بتحبني وبتموت فيا وانا مش بحبها رغم اني اول حب واخر حب في حياتها هي الافضل ليا وفعلاً ممكن الحب يجي مع الزواج والعشرة وخاصة انها هتديلك كل شيئ لأنها بتحبك جداً.

  3. محمد
    14/10/2010 at 14:06

    انا رقي ان البنت الاولي لسا بتحب الاولاني وعمرة ماهتبك وممكن ان لو حببها الاولاني رجعلها في اي وقت حتي لو كنتو متزوجون هتخونك وتبقي في مشكلة اكبر اما البنت الثانية فهيا بتحبك ومثل بيقول خد اللي يحبك ومتخدش اللي انتي بتحبو وكمان انتي هيجيلك يوم وتحبها فكر كويس هتلقي كلمي صح ولي يقول غير كده يبقي مبيفهمش حاجة

  4. dr/ H
    13/10/2010 at 17:08

    ببساطة أنا لو مكانك ساتزوج الثانية أنا مش عارف انت قابل على نفسك ازاى تبقي رقم 2 فى حياة الانسانة دي حتي لو بتحبها تزوج من الثانية والعشرة بينكم ستولد الحب كما اردد دائماً تمنياتي لك بالتوفيق

  5. MOOD
    13/10/2010 at 14:56

    اهرب من الاثنين لاتن لادة هتنفعك ولا دة هتنفعك

  6. القلب الطيب
    13/10/2010 at 13:57

    اريد ان ارد على الاخmody
    خد بالك ان انا لو اتجوزت التانيه اللى ما بحبهاش ممكن يحصل معايا نفس الموضوع لو يعنى فى مره من المرات قابلت اللى بحبها فى اى مكان وخصوصآ انها قريبتى يعنى شئ طبيعى انى هشوفها او اسمع اسمها او سيرتها او افتكرها لما اشوف حد من اهلها او اى حاجه ممكن تفكرنى بيها ساعتها يبقى موقف مراتى ايه

  7. mody
    13/10/2010 at 11:44

    آسف تعمل ايه لو انت اتجوزت اللى انت بتحبها وبعد فتره من الزواج خرجت معاها ومثلا روحت تشترى حاجه من اى محل ورجعت وشوفت اللى هيا كانت بتحبه معدى ولو صدفه وحتى متكلموش مع بعض ايه اللى هيجى فى دماغك ممكن ااتواعدوا ان هما يشوفوا بعض ممكن هى لسه بتحبه ممكن ممكن ممكن …….الخ ارحم نفسك من التفكير ومن انك تحط نفسك فى الموقف ده وانت اكيد شاب وعندك كرامه هويابنى حد لاقى حد يحبه باخلاص اليومين دول ربنا يوفقك ويسعدك

  8. مملكه الحب
    13/10/2010 at 11:16

    صدصديقي العزيز مشكله حلها صعب ولكن لابد ان تعرف انه الحب الاول صعب نسانه ولكن ليس من المستحيل وعزيزي كلامي ممكن يكون صعب عليك شويه ولكن دي الحقيقه وهي انك مهما تعمل لحبيبتك لان ترضي عنك ابدا ولن تنسي حبيبها الاول وفي مثل بيقول اللي بيحب عمره مابيكره ودي عمرها ماهتكره ابدا اما الانسانه الثانيه في انسب واحده ليك وخصوصا انها هاتفهم مشاعرك بس في البدايه لابد وان تكون معها صريح وتقولها علي حقيقه مشاعرك وانك تتطلب منها انها تساعدك علي نسيان البنت الاولي وصدقني هي هاتتقبل الوضع وهاتفهم مشاعرك وهاتحبها مع مرور الوقت بس في حاجه مهمه عاوزة اقولك عليها انك لابد من جواك الاراده علي نسيان الاولي وفي مثل قالواه اجدادنا خد اللي يحبك ومتخدشي اللي تحبه

  9. فارس الظلام
    12/10/2010 at 16:58

    سهله جدا خد الى يحبك ولا تخد الى بتحبه عشان لو حصل حاجه مش هتجرح و الى بتحبك مستحيل انها تجرحك و تفضل تعمل المستحيل عشان تسعدك ولا يوم تزعلك

  10. dr smsm
    12/10/2010 at 15:30

    بص يا ابن خالتى هى كلمة واحدة اللى هقولهاللك علشان انت تستريح
    خد اللى تحبك ما تخودش اللى انت تحبها
    لان اللى انت بتحبها ممكن فى اى يوم من الايام تخونك
    لكن اللى بتحبك عمرها ما هتخونك

  11. الأب الروحي
    12/10/2010 at 10:40

    ياابني ياحبيبي
    انت بتتمنى ان الناس كلها تجمع على اختيار البنت رقم 1
    اللي انت بتحبها ولكن هذا خطأ فادح كيف تقبل على نفسك
    ان ترتبط بأخرى لا تحبك بل مشغوله بغيرك ؟
    ياحبيبي عندما تجد ان رقم 1 تخلصت نهائيا من التفكير بمن تحب
    سأقول لك حاول ترتبط بها بحيث ان تشعرها بحبك
    أما انا افضل لك رقم 2 التي تحبك لان السعادة ستكون معها
    فأمثال اجدادنا لا تخطئ عندما قالوا
    ( اتجوز اللي تحبك وماتجوزش اللي بتحبها )
    لان اللي بتحبك ستفني حياتها لاسعادك اما الثانية فسوف تفني انت
    حياتك لاسعادها وربما هي تسقيك التعاسه بالرغم من حبك لها
    فالعيب فينا نشتري من يبعنا ونبيع من يشترينا
    وفي الختام احب اعرفك انك لن تأخذ غير نصيبك ربما تكون رقم 1
    وربما تكون رقم 2 وربما تكون رقم 3 التي يعلمها الله والمكتوبة لك
    قبل ان تولد
    متمنيا لك كل السعادة مع نصيبك ومكتوبك

  12. love angel
    12/10/2010 at 10:15

    حاول تتماسك واتأكد انه الحب الاول بصعوبه جدا انه ينتسى بعدين انت بشطارتك بتخليها تنسى

اترك رداً أو حلاً لهذه المشكلة