مشاكل الخطوبة

اهلى مصممين على زواجي في مصر وخطيبي معترض

السلام عليكم ورحمة الله
انا بنت عندى 25 سنة مخطوبة وبحب خطيبى جدا مشكلتى ان خطيبى مسافر ومخطوبين من سنة والمفروض هينزل اجازة شهر بس فهو عايز نعمل كتب الكتاب واسافر معاه نتجوز فى السعودية وهو شايف ان الشهر ده مايستاهلش يضيع فيه مصاريف على شقة ايجار جديد وعفش وكل ده مش هنقعد فيها الا اسبوعين بالكتير اوى وبيقول ان المصاريف دى اولى نجيب شقة تمليك ومانضيعش فلوس على الارض بس لو جاب الشقة التمليك مش هيتبقى معاه فلوس لمصاريف شقة ايجار وعفش ومصاريف جواز فى مصر انما نستفيد بالفلوس دى فى حاجة للعمر المشكلة بقى هنا فى اخواتى ووالدتى مصممين اننا نتجوز هنا فى مصر وبعدين اسافر معاه انشالله ياخد شقة اسبوع طيب ما كل دى فلوس على الارض وهو كده معتبر انهم مش مقدرين ظروفه وحاسه انه شال منهم انا مش حابه ان العلاقة بينهم تكون كده فى اول حياتنا انا مخنووووقة ومش عارفه الصح فين وعايزة حل لانى بجد تعبت انا بابا لو كان عايش عمره ما كان عقدها كده
واسفه جدا على الاطالة بس احب اعرف رأى محايد غير رأى اهلى اللى شايفين ان هما كده بيعملوا لمصلحتى ورأى خطيبى اللى شايف ان هما محبكينها وبيضغطوه عالفاضى ومش مقدرينه وانا اللى ضايعه وسطهم

مشاكل وحلول ذات صلة

اضيف بتاريخ: Saturday, January 8th, 2011 في 21:56

كلمات مشاكل وحلول: , , , , , , , , , ,

12 رد to “اهلى مصممين على زواجي في مصر وخطيبي معترض”

  1. مجنون نسوان
    16/02/2016 at 15:14

    اختي في الظروف الحالية اللي تمربها مصر وغلاءالمعيشة والتكاليف ارى ان خطيبك معه كل الحق في كلامه اي نعم اهلك يحبوك ويتنموا لك الخيروالسعادة لكن الواقع والظروف تتطلب كدا تعملوا كتب الكتاب في مصر ويكون الفرح في السعودية مع الاخذفي الاعتبار ان كل شئ مرتب وجاهز في السعودية مش مجرد كلام وتطمينات من العريس لا تتاكدوا من وجود الشقة وعقدها والعفش والاثاث والى اخره يبقى مافيش مشاكل توكلوا على الله واتمنى لك حياة سعيدة وزواج مباركا نشاءالله وعقبال البكاري ياست العرائس

  2. ابواميرة
    21/12/2012 at 18:00

    اللي مش معه مايلزموزواج دام هومش قادريعملك فرح وسط اهلك وناسك امال حيعيشك منين في الغربة فكري في نفسك واهلك معهم حق وعارفين مصلحتك اكترمنك ومن اي احد وتاكدي ان للي يعملوه اهلك من اجلك بدل الشحططةوالمرمطة

  3. الله معى
    02/08/2012 at 07:44

    انا اختى حصل معاها نفس الموقف و صممت عليه وخطيبها كان كويس فى الاول وراحت له عروسه واتجوزو فى بلد تانيه وفى اول مشكله حصلت بينهم قالها انتى رخيصه اهلك بعتوكى لحد عندى ( اسمعى كلام اخواتك وامك عمرهم ما حيعقدوا ليكى حاجه خير )

  4. اسامه توحيد
    04/07/2012 at 08:39

    كتير ناس مسافره بتعمل كده فعلا … اختي الحياه بقت صعبه ومس زي زمان والشباب معظمهم غلبان وعاوز يتجوز وخلاص … ومش مهم ازاي … انتي حاولي توفقي يعني ممكن تروحي ليه عروسه بس هو يعمل القايمه بتاعتك لازم وتكون زي ماانتي عاوزه …. او يدخل في شقه مفروشه اسبوع واحد بس او يومين تلاته والف مبروك ياعسل

  5. صاحبة المشكلة
    09/01/2011 at 21:49

    السلام عليكم ورحمة الله
    احب اشكر حضراتكم على الاهتمام والرد على مشكلتى بس انا عايزة اقول ان انا عارفه ان خطيبى عنده حق وانا مش معترضة خالص لكن انا مش عارفة اقنع اهلى ولما احاول مجرد النقاش معاهم بسمع منهم كلام فى منتهى القسوة وانى مش بكبرهم وماينفعش يكون ليا رأى فى حاجة زى كده ولما اتكلم فى حاجة زى كده ابقى انا كده مش محترمة وصلونى انا كرهت البيت والله انا طول الوقت قافله على نفسى اوضتى

  6. محمد شهريار
    09/01/2011 at 19:02

    بصى لو عنده شقه ملكه مش ايجار يبقى يفرشها
    اما لو هياجر شقه يبقى بلاش
    وسافروا اتجوزا بره احسن
    وبالهداوه وبلاش عصبيه
    والف مبروك

  7. خالد
    09/01/2011 at 18:33

    كلام خطيبك صح ويا ريت تتمسكى بموقفك

  8. قلوب في الغربة
    09/01/2011 at 06:54

    أختي في الله الكلام اللي بيقوله خطيبك صحيح ومنطقي
    لأن أنا مسافر برا وزمايلي المتجوزين جديد اللي مسافرين معايا
    ومعاهم فرش في مصر بيقولو يا ريتنا ما كنا جبنا عشان باظ
    من غير ما يستخدموه.
    واللي أهلك متمسكين بيه دا حقك أن يكون ليكي الفرش بتاعك.
    فممكن يكون في حل وسط إنه يعطيكي مبلغ بقيمة الفرش لأنه حقك طبعا

  9. انسان
    09/01/2011 at 04:14

    اهلك ثم اهلك هما مش عايزين غير مصلحتك وبعد فترة هتدركي حبهم ليكي وهتفهمي وتقدري موقفهم

  10. حبيبة الرحمن
    08/01/2011 at 23:50

    بصي اعملي فرح في مصر وسافري معاه بالفستان وعرفي الجيران والاهل بزواجك وفرحي امك واخواتك وفي نفس الوقت يبقه ضمنين منه انه هايجيب عفش وشقه ويثبت ليهم باكده تبقه اتحلت اهم شي اني امك تبقه راضيه وسعيده وتفرح بيكي وممكن تاخدي شقه مفروشه ب 600 جنيه لمده اسبوع وتدخلي في مصر ويسافر بيكي

  11. مؤمنة
    08/01/2011 at 23:22

    والدتك واخواتك خايفين عليكي لانهم نفسهم يطمنوا عليكي معاه حتي لو مدة بسيطة متنسيش انك هتبعدي عنهم فترة طويلة لازم يبقوا خايفين عليكي انتي هتبقي معاه في مكان بعيد جدا عنهم اعملي صلاة حاجة وادعي ربنا يوفق بين افكارك وافكار خطيبك وافكار اهلك واعلمي ان هما مش عايزين غير مصلحتك وبعد فترة هتدركي حبهم ليكي وهتفهمي وتقدري موقفهم

  12. واحد وخلاص مش فارقه
    08/01/2011 at 22:58

    يعني مش فاهم وجهة نظرهم انتوا مش هتعملوا فرح مثلا ف مصر ؟؟؟ ولا ايه طالما هتعملوا فرح ف مصر خلاص يعني يبقوا فرحوا بيكوا عاوزينك تدخلي ف مصر ومحبكينها خلاص يفضلكم شقتكم اخواتك يباتوا يوم بره ومامتك عند اخواتها حتى وتتجوزا وتسافروا تاني يوم مثلا اسئليهم يرضوا بكده رضيوا يبقى هما عاوزينك الدخله تبقى وسطيهم وبس الصباحيه وكده يعني لكن مش شايفلها لازمه بصراحه طالما هتعملوا الفرح ف مصر وبعديها تسافروا طبعا خطيبك عنده حق الدنيا ف مصر غاليه اصلا ودلوقتي لازم تحافظوا ع كل قرش وده مش بخل منه ع فكره خااالص ده عنده حق بس وحاولي تشوفي دماغهم ايه بالظبط وربنا يوفقكم ويتمملكم بخير ان شاء الله ويرزقكم بالزريه الصالحه

اترك رداً أو حلاً لهذه المشكلة