مشكلتي ومصيبتي السوده إني حبيت واحد على النت،اتعرفنا على الشات وكلمته كم مرة وحبينا بعض ،هو إنسان محترم جدا وخلوق قوي،بقالنا حوالي 4 شهور،كل شوية نسيب بعض عشان الظروف اللي اتحطينا فيها ، هو بيقولي انه بيحبني قوي وانا اتأكدت من ده،هو اول حب في حياتي وعمري ما حبيت غيره انا عندي 26 سنه وهو اول تجربة ليا،حبيته قوي من كل قلبي ،دلوقتي احنا سبنا بعض بعد صراع طويييييل قوي مع نفسنا وخوفنا من ربنا وان اللي احنا بنعمله ده حرام،بس المشكلة إن شوقي ليه بيموتني،وياريت جوزي مهون عليا بمعاملته ،لأ أنا آخر حاجة بالنسبة له، ومش مهمة عنده،وعلطول انتقاد لأي حاجة أنا باعملها،وده بيجبرني إني أفكر في حبيبي اللي حبيته غصب عني،في الكام مرة اللي سيبنا فيها بعض كنت بارجع اكلمه تاني غصب عني وهو كان بيرجع لما يضعف قدام كلامي وشوقي ليه لكن المرة دي مش قادرة ارجع أكلمه مع إن شوقي ليه بيكويني بس أنا عارفه إنه حتى لو رجع هنسيب بعض تاني،هو مالي عنييا لأبعد درجة ومش شايفه راجل غيره في الدنيا…..أعمل ايه في شوقي ليه اللي بيموتني كل يوم،أرجوكم عايزه حل
مشاكل الخيانة الزوجية
متجوزة وحبيت واحد على النت اعمل ايه
اضيف بتاريخ: Friday, April 15th, 2011 في 16:14
كلمات مشاكل وحلول: الخيانة الزوجية, مشاكل الخيانة الزوجية, مشاكل زوجية, مشاكل زوجية
صدقينى يا اختى هذه المشكله مرت بى وكنت اشعر ان ليس لها حل وان هذه هى النهايه وكنى استعذت بلله من الشيطان الرجيم وتمسكت بلله وصدقينى ربنا بيوقف جنب الانسان وبيساعده وبيقبل التوبه منه على الرغم من ضعفى ومن انى برجع تانى الا انى برضه برجع لربنا تانى ومصره على التوبه والرجوع لله لان ربنا بيقول ولم يصروا على مافعلوا وكون انك بتطلبى الافاده والمساعده من الناس يبقى انتى عارفه انك مش على حق انتى عارفه انك على باطل حاولى تطلبى المساعده من الله وقررى انك هتتغيرى لله عشان ربنا يساعدك هتلاقى الامور هانت وخلصت ومشكلتك اتحلت ونسيتى الانسان ده واللهى ده كداب او حتى لو كان صادق النهايه يعنى هتكون ايه عارفه ايه فضيحه وطلاق وبعادك عن ولادك وحزنك عليهم وبعدها هتملى الانسان ده وهتندمى وهتبقى عايزه ترجعى تانى يوم لاينفع الندم ربنا يهديك ويهدينا والمسلمين
ازاى قادرة تحبى راجل غير جوزك يعنى مش عارفة انتى لية رايحة تحبى الحرام وسايبة الحلال لانك قولتى انو اول حب فى حياتك لية لما اتجوزتى جوزك مش حبيتة انا مش عارفة شوق اية ال بيكويكى دة مجرد التفكير بس فية حرررررررررررررام وازاى تحبى واحد من غير متشوفية حتى لو شوفتية صورة او كام ازاى تحبية حب بالمراسلة يعنى انتى لاسف عندك فراغ عاطفى حاولى عشان خاطر ربنا قبل نفسك وجوزك وبيتك انك تحافظى شوية على نفسك وبيتك وهقولك حل ولعى فى النت دة والغية خالص وركزى مع جوزك
طيب لو تركتى زوجك هل هيتزوجك ؟ هل هيقبل يربى أولادك ؟ يعنى هيخدك بولادك
طيب هو شاب لم يتزوج من قبل ؟ أول زواج له؟ هل أهله هيوافقوا ؟
بتقولى أنا مش ماليا عين زوجى ؟ هل أنتى مش مقصرة ؟ أكيد مقصرة لأنك مشغولة بهذا الشاب وكل الكلام الحلو بيتقال لهذا الشاب ولا بتكررية لزوجك أيضا؟
الحياة فى وسط أولادك مع زوجك أفضل و أجمل بكتييييير. لأنكم اسرة متكامله لكن هذا الشاب لا يصلح و لن يرضى ليكون أب لأولادك.
جربى تعاملى زوجك كما تعاملى هذا الشاب وتنظرى لزوجك نفس نظرتك لهذا الشاب لأنه يستحق منكى هذا وأكثر لأنه أب لأولادك ولن تجدى من هو أفضل منه.
أن كنتي شفتي شكله أطلقي وتزوجيه
وأن ما كنتيش شفتيه أطلبي رؤيته
وبعد ما تريه إذا لم يتغير حبك له أطلقي فورآ وتزوجيه
العيش ساعة واحدة في أحضان من تحبيه بالعمر كله
انا لله وانا اليه راجعون بتحبيه اوى من غير ما تشوفيه وتشوفى طباعه ازاى يعنى؟؟
هو الحب دا بيجى من الكلام بس؟؟؟ ولا لازم طباعه تعجبك واخلاقه وشكله يكون مناسب ليكى
بصى يا بنت الناس احمدى ربنا انك متجوزة راجل ضل راجل ولا ضل حيطة فى بنات غيرك بيتمنوا
يتجوزوا ولو معزة ومش لاقين احمدى ربنا وسيبك من تخاريف النت دى واستعينى بربنا وافتكرى
ان اللى انتى بتعمليه دا خيانة لزوجك لانك دلوقتى شايله شرف راجل على كتفك لو مش قد
الامانة دى سبيها لكن مش تخونى الامانة
الامانة اللى اقصدها اللى هى شرف جوزك
معلش يمكن كلامى قاسى شوية بس داالصح والله اعلم
حاولى تكلمى اللى بتحبيه عن النت دا تقولى له هات رقم اختك عرفنى عليها وهات ايميل اختك اكلمها وادخلى كلمى اخته من ايميل ولد كدا وخليه يعرف وشوفى هيعمل ايه استحالة يقبلها على اخته
اللى بيحب بيروح على طول من الباب مش من الشباك
اتمنى لك حياة سعيدة
صديقة لي تعرفت على شاب على النت وظل عام بأكمله يضحك عليها بقصص واهية امه ماتت هو تعرض لحادث وكلم ابيها على النت بدون ان يراه وعلى العلم هي لم تراه وهو ايضا وطلبها من والدها على النت وحدد ميعاد وكان من محافظة مختلفة ولم يأت في الميعادوكانت مشكلة كبيرة امام عائلتها
صدقيني والله هذه القصة حقيقية ومن الممكن ان يكون هذا الشاب كاذب وتتركي زوجك ولا يتقدم لك
ليس لأنك تلفتين نظر الرجال انهم سيتهافتون عليك بعد الطلاق
لو طلقت لن تجدي من هؤلاء الا الرغبة في التسلية
انا صاقة معك واعتبرك اختي لا تتحدثي مع هذا الرجل ويفضل الغاء النت مدة حتى تستطيعي السيطرة على نفسك
وتزكري ان هناك ملايين الفتيات يتمنين زوجا وانت تتمردمدين على زوجك
بصي ياختي الحب على النت مش حب و الله دي كلها اوهام و تعتبر نوع من انواع الادمانانتي ادمنتي الكلام مع الراجل دا و اتعودتي عليه و وهمة نفسك انك بتحبيه انتي بتقولي انو جوزك عينو زايغة ماانتي كمان بتحبي ببصبصة الرجالة ليكي و انتي الي اعترفتي بدا لو جوزك مالي عينك و انتي مالية عينو مش حتبوصو لغيركم حاولي تغيري من نفسك عشان جوزك يشوفك حلوة في عنيه و مايشفش غيرك و كلميه و تحاوري معاه الراجل طفل كبير بيجي بمسايسة مش بالعند جربي منو و شوفي الي هو بيحبو و اعمليه و الله مافي زي الواقع الحب على النت اوهام و مرض لازم تكون عندك عزيمة قوية و ماتتحججيش بجوزك حاسبي نفسك انتي الاول قبل ماتحسبيه هو و ربنا حياخد بيدك ربنا خلق النسيان و حاتنسي الراجل الي كنتي بتوهمي نفسك بحبو عوضيه بحب جوزك و الام لما بتبص في عيون اولادها بيهون عليها كل حاجة حتى نفسها و ربنا ان شاء الله حيوفقك يارب
انا زيك وقع في نفس الغلط بسبحاو اتوب لله وتفس سنك نقريبا
ك ده بسبب اننا بنفتحباب الشيطان علي النت
صدقيني ساعه الجد حبيبك نفسه مش هيرضي بيكي وهيقول لاثقه لخائنه
استغفرى الله انتى مش حاسه بالذنب ده
وليس ليكى مبرر للخيانه
وحتى لو زوجك مش كويس معاكى
قربى من زوجك حلالك
وخافى من عقاب ربنا
وربنا يهديكى
بصى يا اختى كل لما تضعفى وتحسى عنك عاوزة تكلميه قومى فورا وصلى ركعتين لله وتكلمى ربنا فيهو وتستغفرى ربنا وانتى ساجده وتقولى قوينى يا رب ابعد عنى معصيتك انا مليش غيرك وتوب عليا واغفرلى ذنى كل لما تحسى بالرغبه فى التحدث مع الشخص ده اعملى كده فورا وقولى لربنا ندمت على ما فعلت يا رب وصدقينى كل مره هتعملى كده هتنسى الشخص ده وهيملى قلبك حب اكبر واجمل هو حب الله
صلو على رسول الله اولا ياا ختى انتى غلطتى لما سمحتى لنفسك تتكلمى اصلا مع بنى ادم غريب على النت ده حرام حتى لو كنتى غير متجوزة بردوا حرام ثانيا مهما كان جوزك وحش وفيه العبر انتى كده مش بتخونيه هو انتى بتغضبى ربنا يعنى لو واحده مش متجوزه وعملت كده تبقى بتغضب ربنا وانتى بقى متجوزة وبتعملى كده تبقى بردوا بتغضبى ربنا يعنى فى دينا الاسلامى البنت اللى بتزنى عقابها الجلد لكن المتجوزة ولها زوج عقابها الرجم الى الموت يعنى مصيبتك اكبر ثانيا مفيش حد كامل يعنى زوجك لازم يبقى فيه عيوب مفيش حد كامل بس بردوا هتلاقى فيه مميزات رغم عيوبه كفايه انه اويكى فى بيت جميل ومخلف من ذريه جميله وعلاقته بيكى على سنه الله ورسوله وسترك وبعدين كل الرجاله بيبقواكده بعد الزواج انتى بس حاولى تقربى من زوجك وتملى عينيه واعرفى انه حلالك وكل كلمه حلوة له هتبقى حلال وكل كلمه لغيره حرام صدقينى مفيش احلى من حبك لواحد بس هو ربنا ومن ترك شىء لله عوضه يعنى لما تسيبك من العلاقه اللى ممنهاش فايده ومش هتعود عليكى غير بالخراب وتشريد عيالك ودمار نفسيتهم وتفكرى فى حبيب واحد وتقوليله انا هبعد عن علاقه حرام علشانك انت وحدك يا رب ربنا ربنا ربنا يا اختى اهم من كل حاجه تغضبيه ليه ده سترك وكرمك بزوج وبيت وعيال متبعيش كل ده علشان مجهول وتفتكرى ربنا هيباركلك لو استمريتى مع الرجل الغريب ده ياه دى كفايه النظرة فى وش ولادك بالدنيا وما فيها باللهخ عليكى يا اختى حافظى على النعمه اللى انتى فيها وبلاش بطر لاحسن تزول منك
يا جماعه انا معاكم والله في كل اللي بتقولوه بس المشكله اكبر من كده الشخص ده ماكانش يعرف اني متجوزه اساسا وحبني قوي وحبيته قوي ولما عرف انه انا متجوزه سابني بس رجع تاني غصب عنه ورجعنا اتفقنا ان ده حرام وما يصحش نعمل كده بس كل مره كنا بنضعف ونرجع ويرجع الحب اقوى من الاول ,وانا كتيييييير قوي حاولت مع جوزي مش راضي يتغير وعينه زايغه انا مش ماليه عنيه انا فكرت في الطلاق بس خايفه على ولادي والمشكله اني كمان بحب نظرات الرجاله ليا انما اللي حبيته غير ده فيا والله لحد دلوقتي بنحاول نبعد بس مافيش فايده بنرجع تاني غصب عننا ايه الحل انا خايفه الموضوع يكبر مني
هناك اشياء كثيرة تنقص رسالتك حتى تكون الاجابة مفيدة وهى ..هل انتى فتحتى معه كاميرا هل رايتى له صور هل هو متزوج ماالفرق بينكم فى السن هل انتى مارستى معه الجنس على النت … ولاكن الرد لا يتغير كثيرا الان وبعد الاجابة عن هذه الاسئلة ..ما تفعليه هذا هو بداية الانحراف التى يليها الفضيحة ثم الطلاق ثم الندم وبعدها يتضح بان الحبيب هذا طلع مش انتى لوحدك ال حبيبته ..لا .. كل البنات ال بتكلمه على النت حبايبه مثلك بالضبط وممكن تكونى انتى اخر واحدة فى الصفحة ولاكن هو بيتقل عليكى شوية حتى يجر رجلك لاكثر من نت ..ارحمى نفسك قبل الندم ..وبدل ما تبحثى عن حبيب يعوضكى اهتمام زوجك ابحثى كيف تجزبى زوجك ليهتم بك لو اهتميتى بهذا مثل اهتمامك بهذا الشاب لوصلتى لحل ..هل انتى تهتمى بمظهرك فى البيت ..هل انتى مثقفة جنسيا مع زوجك ..بمعنى انكى تشبعيه جنسيا ليس بعدد المرات ولاكن بالفعل فى المرة الواحدة ..(( اى تكونى فنانة بمعنى الكلمة )) تبتكرى اشياء جديدة تغيرى من اسلوبك كل مرة تغيرى الاماكن …حاجات كتير ..هل تهتمى ببيتك باولادك..يا اختى العزيزة ارجوكى اجيبى عن هذه الاسئلة وسأرد عليكى وان شاء الله حتستفيدى وتخرجى من الوهم هذا..ولاكن من اليوم لا تكلمى هذا الشاب وأجعلى اهتمامك كله ..كيف اجزب زوجى الية ..وان شاء الله مع ردود القراء ستجدى الحل .. بشرط النية..طارق بورصعيد
متزعلش منى ازاي تستحملي ان ربنا ينظر ليكي بنظرة غضب ايه فى الحياة يستاهل حرام عليكي جوزك الى واثق فيكي والى اخترتيه زوج ولو كان الانسان بتاع النت ده كويس كان عمره مفكر فيكي كده لانك متزوجه لو متقدريش تكملي مع زوجك ابعدي عنه واطلقى ارحم من خيانتك ليه بس صدقينى صدقينى مش هيملى عينك غير التراب والشيطان بيحاول يوقعك فى الغلط
الحقي نفسك بحاجة واحدة بس تقربك الي الله سدئينى مش هتندمي
الله يكرمك انت لسه على البر الحقى نفسك قبل ماتغرقى فى الوحل والطين الى انت فيه خطوه من خطوات الشيطان والى بعديها الله اعلم بيها وحبيبك بتاع النت يمكن اخلاقه اوحش من زوجك ولكن لابد انه يحلى نفسه لما يوصل للى فى دماغه الله يكر مك ابعدى وخافى الله وما تتحججيش لان كل واحد بيعمل خطا لابد يقول اسباب علشان يبرر خطاه والسلام ختام
من الأخر مش مرتاحه مع زوجك وحاسه ان ما فيش فايده منه اطلبى الطلاق حتى لا تعيشى باقى حياتك فى عذاب وربما تقعى فى الخيانه وقد وقعتى فيها فعلا عن طريق النت. لذالك اطلبى الطلاق واتقى الله وسوف يرزقك الله زوجا صالحا يعوضك عن حرمانك
ايه الكلام الفارغ اللي بتقوليه ؟ ازاي تقولي عن هذا الذئب البشري «هو إنسان محترم جدا وخلوق قوي» أي احترام وأي أخلاق لرجل يخاطب سيدة متزوجة ويعلم بهذا ويسدي لها كلمات الحب والغرام؟ هذا الشيطان الذي لايصرف بالاستعاذة.. لو كل امرأة انشغل عنها زوجها تسارع بعمل علاقات محرمة مع آخر كانت غالبية السيدات وقعن في الخطيئة.. عودي إلى ربك واقطعي علاقتك بذلك الشيطان الآدمي بل اقطعي «الزفت» أقصد «النت» المدمر للأخلاق والبيوت العامرة.. تقربي إلى زوجك اجعليه إذا خرج من البيت يتلهف للعودة إليه فأنت طرف مهم في المعادلة.. أسأل الله أن يهدي قلبك ويصلح أحوالك مع زوجك والله الموفق.
قربى من زوجك بكل الوسائل وجددى حياتك والشخص اللى بيتسلى بيكى حرامى ولص ومخادع بمعسول الكلام وساعت الجد بيهددك ويبتزك علشان ياخد منك شرفك ويتسلى بيه
ربنا ينتقم من الراجل الخايب اللى مش يحتوى زوجته ويعتبرها بنته واخته وامه وحبيبته وصديقته
اختي العزيزه لازم تعرفي اني مجرد التفكير في راجل تاني يعتبر سامحيني ده خيانه
وطبعا حبك للشخص التاني حب علي الهواء يعني شغل كلام وحواديت ولازم تعرفي اني الجواز مسئوليه كبيره ومش كلها عسل حوللي تصلحي العلاقه مع جوزك لاني التاني بيتسلي لانك في حاله جوع عاطفي
اختي الفاضلة انا و الله عزراك صعب انو الواحد بفترق عن شخص لقى فيه كل حاجة حب و حنان و تفهم و اتعود عليه بس ماتقريش ورى عواطفك حكمي عقلك لانك ست متجوزة و ليك زوج قربي منو اكتر اصبري عليه و حاولي معاه ماتياسيش حبيه و تكلمي مع حبيبك دا عشان لو افترقتو و انتو الاتنين مقتنعين و حكمتوا عقلوكو احسن من انكو تفترقو من غير كلام عشان لو افترقتو كدا مش حتنسيه و حتغفكري فيه طول الوقت بس لو افترقتو و انتو فاهمين بعض حيكون اسهل ليكي و له
و ربنا يقدرك و تخلي زوجك يتجاوب معاك يارب اتمنالك اتوفيق
كل من يفعل الخطأ يجد مبرر لخطأه لكن إذا كنت تحاولي خداعنا فهل تحاولي خداع نفسك وقبل كل هذا هل تحاول خداع ربك سبحانه وتعالى؟
لامبرر للخطأ مهما كان؟ قد نخطأ وقد نرتكب ذنوب لكن نعترف ونتوب من قريب حتى يتوب الله علينا
هاد بسسبب الفراغ العاطفي بينك وبين زوجك وممكن هو كذلك ومشكل الالفة و التعود وهاد للاسف خيانة في حق زوجك وزجك وش ذنبه راجعي نفسك واهتمي بزوجك و احكي مع حبيبك من نت انو لازم تنفصلو لانو مش حلو تنفصلو هيك و خلاص بدوم كلام لانو الي دخل بكلام لابد ان يخرج بالكلام والعقل و حاولي تحكمي عقلك لانك وحدة متزوجة مش سهل وضغ هاد انا اقول لازم تنفصلين من حبيب النت وتهتمي بزوجك