عمري 27 سنة وبقالي 3 سنين قاعد في البيت وعارف ان دمي تقيل بس مش عارف اعمل إيه وبيجيلي إحساس اني جبان وبجامل الناس بس جوايا واحد عايز يرمي كلام اللي منعني من دة اني مش عايز لساني يطلع كلمة غلط ، بشوف ناس بتشتم بالأم في كل حتة وبيتقيموا موجب في المنتديات وابقى ليا نفس اتابع واعرف إيه اللي يخلي الطرف التاني مش محترم عشان ييجي واحد يقل أدبه عليه ، ساعات بحس اني ولا حاجة وان كل واحد بيتكلم في السياسة والدين احسن مني
اكل ما اكتب بوست واعمل انفراد في الفيس بوك او في جوجل الاقي عنوان عبارة عن شتيمة واتفرج والاقي اللي بيتقيم موجب عشان عرف ينشن عليه في عرضه حسيت ان هي الدنيا زي ما هربت من شغلي اللي ملتزمتش فيه واعتزلت الناس زي النت بالظبط مستقبل مليان بشوية أوباش وانا واقف بتفرج أتاريني ضيعت وقتي ولا نمّيت ميولي خالص
على فكرة انا اعزب ومش هاتجوز لاني مش مسئول عن اي حاجة وأمي مرضت بسببي وانا إنسان عاق مع اني مش بضايقها بس لاني خيبت أملها هي كان نفسها تشوفني حاجة كبيرة بس طلعت إنسان مش محترم وبروح مواقع مش محترمة على النت والطيور على أشكالها تقع يادوبك المورفين اللي بيعوضني عن اني مش بتمنى الخير لحد واني بكره البنات كلهم أولاً معنديش اخت وكنت اتمنى مرة البس تي شيرت اكتب عليه الكلام دة لان كان عندي استعداد اعامل اللي اساءت ليا بقذارة مالهاش زي عشان اي بنت تتمنى أي شاب محترم وانا جبان وفيه كل صفات الخسة اللي خلقها ربنا بس يعذروني عشان ماليش اخت ، مورفين يعوضني عن احساسي بالنقص لما كنت بلاقي ناس سعيدة مع بعضها وشاب مع حبيبته وخطيبته أحس اني مش راجل واجري ماليش نفس أبص لحد
ضيف اني خسيس وجبان كمان كداب ، بس معرفش انا كداب فعلاً ولا لأ انا كنت في الفيس ولسة بشوف كلام الناس اتعرفت على بنت أحترمها أوي وكنت حزين لانها بتحب واحد زيي واحد بيروح لمواقع إباحية ومبيتكلمش على النت وسلبي ، كانت شايفة فيا اني راجل كبير عشان بنقي تعليقاتي وبقعد ساعة او اكتر عشان اقول تعليق فشافت فيا اني أب وحكيم ورزين مع اني مش كدة ، اعترفت لها اني مش هاتجوز خالص واني معنديش مسئولية وحكيت لها عن اللي جوايا بجد
كانت عينيه بتدمع بجد لانها كانت بتقول لي ماقولش على نفسي كدة وكنت بحل لها مشاكلها ولما فيه عرسان اتقدموا لها كنت بنصحها تخطب الشخص دة ، لكن كل ردها انها مش بتحبه فسمعت كلامها ، وانا بكلمها لحد دلوقتي وبسأل عليها وعلى اخبارها وبقولها عن ماما واخواتي بس كلامنا ماكانش فيه إبتذال بس بحبها وعايز لها الخير حسيت اني كدبت عليها وماقولتلهاش اني دمي تقيل مع اني حسيت اني على طبيعتي لانها اول انسانة غيرت حياتي وخففت من المواقع الاباحية وحسيت اني بني آدم لأول مرة في حياتي وجر كلامنا عن ذكريات الطفولة فجأة افتكرت كل حاجة حلوة كنت طالب شاطر بس شقي وفتوة في روحي حسيت ان فيه لون خاص يجمعني انا و البنت اللي غيرت لي حياتي اللي عمري ما قلت لها “بحبك” “حبيبتي” حسيت ان الحب مش بالكلام واتأكدت لما وصلت لموقع “مشاكل” ان دة مش لعب بمشاعرها ولا حاجة بس ندمان لاني مش هلاقي زيها هي انسانة جميلة ومحترمة اوي وبنت ناس اللي مانعني مشاكلي الجنسية لان عندي ألم شديد في العضو من سنة ودي لوحدها مشكلة كمان زي ما قلت بروح للمواقع دي اني للأسف كنت بدمن النظر آسف على الكلمة لصور فيها مواصفات مينفعش اقولها
لما بحس بصفاء نفسي زي دلوقتي كإني راجل عجوز مش همه الدنيا عايز يتبسط وخلاص ومش مهم اي مشكلة جنسية أمر بيها هافضل عازب كدة ، الحقيقة محتار انا مش خايف على البنت الطيبة دي لانها بتحس بالأمان معايا وتعتبرني باباها أدور لها على عريس كمان .. اه بجد
مش عارف اعمل ايه حاسس ان ربنا اخد مني صحتي وقوتي بس اداني روح طيبة
وانه سلب مني نعمة عشان معفتش نفسي وعوضني عنها دروس اتعلمتها خلتني انسان ناضج
ساعات بعتبر نفسي بيبي مولود من جديد معندوش ميول جنسية
ساعات انام واقول هبدأ من جديد
اتخيل في صورة حبيبتي اللي مينفعش اكون زوجها وأبكي
أبكي وانا بسمع قرآن على ايات بسيطة اوي ، أخواتي التلاتة لاقوني انكسرت وعيني بتدمع قدامهم والتزمت الصلاة لأول مرة من أيام الجامعة لكنهم اكتئبوا مني لاني بكلمهم عن الموت ومش حاسس اني هاعيش كتير
اعمل إيه ؟
حبيبى يجب وان تعلم مهما حدث أن الله يختص بعباده الابتلاء وقال العلماء ان الابتلاء من ذنوبنا وقال البعض الاخر أم حسب الذين امنوا ان يقولوا امنا وهم لا يفتنون .
أخى الحبيب أنا اللى أنا عايزوه منك أن حتلاقى حاجات جميلة فى نفسك ماتضيعهاش تابع فى العلاج مهما أهملت مش مشكلة ياما أهملوا وخفوا فى الاخر عارف ليه ؟؟؟؟؟؟
عشان وضعوا أملهم وثقتهم فى الله
ضع ثقتك فى الله وانسى كره الناس ليك صدقنى الناس بتحب الانسان بتصرفاته وافعاله وصفائه الداخلى وليس بالمظهر
والله الموفق
انا مش عايزاك تكره نفسك كده او تقول علىنفسك انك دمك تقيل او رخم او. …. كل انسان طبيعى بيشوف نفسه انه معندوش اى مميزات انا كمان بحس ان معنديش اى مميزات وكمان الانسان الى شايف انه عانده مميزات كتير احب اقولك انو بيبقى اكتر انسان مكروه من الناس كلها بس هما مابيوجههوش بده فيفضل غروره يزيد لغايه ما فيوم هيشوف بس الحقيقه ان مافيش انسان كامل يعنى ولا عنده كل الحاجات ده هما 24قراط يعنى انت ماعندكش اخوات بنات وانا ماعنديش اخوات ولاد وناس تانيه ما عندهمش اخوات خالص ،مامتك تعبانه فى ناس معندهاش ام وناس اهلهم بترميهم فى الشارع وانت لازم تعرف كذا حاجه اولا استفيد من مرض مامتك ده بان انت تحاول تساعدها وترضيها وترضى ربنا قرب من اخواتك انزل الشغل بطل تشوف افلام مش كويسه وعلي فكره مافش حاجه اسمها حب من على النت انت لما تنزل الشغل اكيد هتقابل حد تحبه ومادورش على الحب خليه هو يجيلك بطل تراقب الناس لان الى هما بيعملو غلط وانت الصح يعنى الولاد الى بتكلمو مع البنات دول اصلا بيكونو بيضحكو عليهم وحاول تروح لدكتور متخصص فى اى تعب بيجيلك عشان انت لسه صغير ولازم تستمتع بشبابك واهم حاجه ماتفكرش فى عيوبك حاول تضهر مميزاتك بس بخباسه يعنى ماتروحش تقول انا عندى كذا وكذا ولما تحب ماتحطش فى دماغك اى حاجه وحشه فيك واعرف ان لو البنت دى شايفه الحاجات الوحشه دى اكيد ما كانتش هتكلمك
سبحان اللي جعلني أضحك يوم وأبكي يوم تاني
عندي إلتهاب في جسمي وقصر طولي فجأة وكمان بهتم بنفسي بطريقة سلبية يعني بترسم واتمنظر على الناس وأطلب منهم واءكد علي فلان رأيه فيا ، ربنا قذف في قلوب الناس كرههم لي لإني بضحك من غير سبب قدامهم ولما يواجهوني بنسى الكلام ومش بفكر في حاجة ينتهي بإني حر طليق وانا معزول في البيت حتى اللي بتحبني وبنسى كل المشاكل قدامها بقيت أفكر عشر دقايق قبل ما اطمنها عليا وحاسس ان نا مبقتش انا ، وهي اتعودت على اني أحل لها مشاكلها واقف جنها بس الكلام انتهى والدنيا ضاقت في الأربع حيطان من ساعة ما رحت للدكتور عندي التهاب في مجرة البول لإني أهملت نفسي
اللهم أحييني إن كانت الحياة خيراً لي وتوفني إن كانت الوفاة خيراً لي
الاخ الحبيب السلام عليكم……
أولا أنا أذا كنت بتحكى أودامى بنفس الطريقة ديه لقلت لك أهدأ وطبطبت عليك لأن أنت شكلك كنت متعصب جدا ومنهار جدا وانت بتحكى الحكاية ….
حبيبى أولا لا بد وأن تعلم أن مفيش انسان بلا أخطاء ولا يوجد انسان بلا معاص فكلنا كذلك خطائين وكما قال نبينا خير الخطائين التوابين ..ده أولا
ثانيا أن الله لا يرضى ابدا ياحبيبى أن الاسنان يقول ما قولته على نفسك فلا بد وأن تعلم أن الله أسبغ عليك نعمه حتى ولو كانت فى شخصيتك انظر لنفسك وشوف الحاجات الحلوة واتكلم عليها ..
ثالثا ده مش كلامى ده كلام الانسانة اللى المحترمة المؤدبة الجميلة اللى انت حكيت عنها هى اللى قالت كدة مفكرتش ولو لثانية اذا انت فعلا انسان بالاوصاف المقذذة ديه هى ممكن تعد معاك أو حتى تفكر فيك أصلا الا لأنها وجدت فيك انسانا محترما شهما مسئولا يمكن الاعتماد عليه وان البنت طبعا لها نظرة فيمن تحب.
رابعا ايه المشكلة اللى انت محققتش حلم والدتك فيك أخى يكفي محاولتك وجدك واجتهادك وندمك على ما فات من ماضى ومحاولتك لاسترجاع الحاجات الجميلة بحياة جميلة ولو كان فى الطفولة .
ثم اسأل نفسك هل هناك شخص خاطئ يلوم نفسه الا اذا كان ذاك الشخص فعلا كويس من داخله
سادسا ليه المورفين ليه السعادة الوهمية والنشاط الزائد ليه ما تقولش ان كل ما أصابك من الحاجات ديه ابتلاءات ويجب التوبة عنها
سابعا ليه حابس نفسك فى البيت تلت سنين وسبت العمل ياعمى ايه يعنى الناس زعلتك هل معنى كدة ان احنا بنقابل كل ما فى حياتنا كويس ولا فى وفى .
وبعدين من قالك ان دمك تقيل لا لا لا انا كل اللى طلبه منك انك فعلا بجد تنسى تلك الأفكار وتحاول تفتح صفحة جديدة فى حياتك وتعامل نفسك كأنسان تانى خالص وتنفتح عالحياة وتسرع بالعلاج وتذهب للطبيب وتحضر شقتك ده بعد ما تنزل عملك عشان تتقددم للبنت المؤدبه الجميلة المحترمة وقبل كل ده خلى أملك فى الله كبيــــــــــــــــــــــــــر
وابقا طمنا عليك
والسلام عليكــــــــــــــــــــــــم
انت حاسس بالمسئولية الزايدة تجاه والدتك لعلمك معظم الأمهات بتبقى كدة في كبر السن بس دة ميخلكش منعزل عن الناس انت في المواقف دي اعمل لها طلباتها من غير كلام كتير أقف جنبها وخد على قد كلامها وانا والله بيحصل معايا أكتر من كدة الفرق اني كنت بوضح للجيران الكويسة واقول لجاري يستحمل كلامها وعااادي جداً أما مشكلتك الرئيسية لو كان عندك إيمان بربنا أكتر من كدة ما كنش خلاك تحرق دمك خاصة في تصفح النت والحل إقرا كتب كتير وممكن تشتري طابعة والمقال اللي يعجبك إطبعه واعمل منه مجلد واكتب اللي عايز توصله للناس من غير إساءة وانا عارف ان مشاعرك مرهفة ودمك مش تقيل بالعكس اللي في قلبك على لسانك وقرب من ربنا كتير واعرف الحديث دة من النبي عليه أفضل الصلاة والسلام “القابض على دينه كالقابض على الجمر” انت محتاج إيمان قوي بالله وإيمان بقيمة نفسك وربنا يشفي والدتك وتشوفك احسن إنسان في الدنيا وموضوع البنت اللي بتحبها صدقني مشاعرك مرهفة جداً ولو متنشن او قلقان زيادة حسسها انك مهتم بيها اكتر من مشاكلك الشخصية عندك د. باسم يوسف مثال او لما بتشوف أداء ممثل كوميدي بينسى همومه كلها وبيحط هدف بس تكون وسط معاها بين الجد والمرح ومن غير ماتكدب عليها ولو كدبة صغيرة لانها هتأثر فيك وتضيع ثقتك بنفسك فعمرها ما هتزعل منك وتقدرك وتحترمك ولو مش هترتبط بيها خلاص آخر كلام إنزل اشتغل واسأل عليها بالليل ولا حاجة زي ما بتعمل وصدقني هتعلى في نظرها جداً فتحس معاك بالأمان بالذات وانت ناجح في شغلك وحط نفسك مكانها لو لقت إنسان محترم زيك يوافق على العريس اللي هيتقدم لها ويهتم بيها ، بنت مثلاً عملت معاك كدة ودعت لك بالزوجة الصالحة وبتسأل عليك يتهيأ لي مش بتلعب بمشاعرك ابداً فمافيش مشكلة من ناحية حبيبتك ابداً
نصيحة من أخوك ما تزعلش مني إبعد عن المواقع الإباحية ولو صورة تأثر فيك جرب تشوف صورة قبل ما تخرج في مشوار قول يا فتاح يا عليم وشوف النتيجة قلة الرزق ومافيش بركة وزمايلك يعاملوك وحش الكلام بردو وانت بتكتب بوست على النت
أرجو يكون ردي وصل لك انت محترم أوي أوي ربنا يبارك لك
أشكرك وآسف على كل كلمة طلعت مني
انا جوايا حاجة عايز أقولها
حاسس إني في حصار مالوش آخر وعايش في أوساط تحاربك في دينك بسوء النوايا و الأخلاق حتى من طريقة الكلام وكل ما بزكي نفسي ألاقي مشكلة كبيرة فوق الإحتمال مثلاً صاحب العمارة شال موتور المية من عندنا وعشت يومين من غير مية دا اللي يجيبنا لمشكلة تانية لإن أمي عانت مني كتير وهي حبيبتي عندها مشكلة لازمتها سبع سنين وهي الصدمة من الأمور المفاجئة والمعاناة من قلة الحظ في الدنيا فوالدتي كانت طبيبة ناجحة لكن مالهاش تخصص يخليها تبني عيادة أو تشتغل في مستشفى خاص وكانت حياتنا جميلة جداً بس كنت دلوع أي حاجة بتدايقني أقول لماما على طول لحد ما حملتها هموم الدنيا وافتكر يوم كنت في تالتة جامعة والدتي اتهيأ لها انها بتسمع اصوات وكانت قلقانة أوي وتدرج عندها الشعور دة لحد ما هي انسحبت من الحياة وكنت وقتها في سن 20 سنة يعني عشت طفولتي وشبابي أحسن عيشة وتركت لي الحبل على الغارب وهي حزينة فتطور عندها المشكلة انها بتسمع مني كلام غلط وشوية شوية بقت بترفض أي مؤثر خارجي يعني لما بتتفرج على التليفزيون مش ضروري هي تفهم إيه فحاسس ان لها عالم خاص وبتهرب من الدنيا الوحشة دي والشكل النهائي لحالتها انها بترفض أي تغير جديد وانا بجد عايش على الحصار دة فأنا في الثانوية العامة أيام العز كنت بشتري بضاعة وابيعها في الشارع وكونت ثروة كويسة وطبعاً محمدتش ربنا كنت بقول لماما وقتها فلان عاملني وحش وراجل قال لي كذا والفلوس اللي صنعتها دي يجيب لها شقة وعرضت عليها إمبارح انها تسكن في شقة تانية رفضت حتى وصلة الدش اللي مش شغالة وعندي فلوس اتعاقد مع شركة تانية ترفض وتقول لي دول تبع أهل ابوك ، فوالدتي انا بقت بشيل همها بعد ما كنت عاق ليها وانا عينيه بتدمع مش عارف اقول إيه دة ذنب مين ؟ فقعدت في البيت وانسحبت لانها مش بتسمح اجيب لها حاجة جديدة وبتعتبر إني مبعرفش اتصرف في أي حاجة ، من سنة 2010 وانا انسحبت من الحياة ومبقتش اخرج من البيت وبحلق شعري في البيت وكل طلعة ونازلة في العمارة بسمعها بإهتمام عشان ماما متعملش تصرف غير مسئول وتزعق لهم بكلام انا مقدرش اقوله لانها بتعتبر ان الجيران أهل ابونا ومش هتصدقوني لما اقول كمان ان اي ضيف في حلقة من برنامج بتتفرج عليه يتهيأ لها ان دة عمي وان دة أبويا وهتستغربوا 🙂 لما اقول كمان ان والدي توفى في أغسطس 2011 وأخويا تعامل مع موضوع التركة وعرف ان بابا الله يرحمه ساب كل فلوسه لمرات ابويا ومنعنا من الورث وكوووول دة والست أمي مش عارفة حاجة فمرة قلت لها أبويا تعبان وجاتلي مكالمة من قرايبه تقول لي انه لسة عايش ودة اللي بيتصل بيك عايز يخطفك ويعمل فيك @@@@@ كلام بردو مش عايز أقوله ، فظروف أمي غريبة وعجيبة خلاني عايز اهرب والضعف النفسي اللي عندي بقى مضاعف وانا اصلاً إنسان غير إجتماعي قبل اللي حصل لماما دة لكن دلوقتي مقدرش اخرج واتعامل مع حد وماتمناش الخير لحد كمان ولو اشتغلت في وظيفة ممكن اتفصل منها لسبب أخلاقي وسمعتي تكون سيئة فانا فضلت القعاد في البيت والذكريات هي اللي بتعينني أواصل حياتي نيجي لمشكلة تانية إني بهرب من كل دة عندك مواقع النت انا عايش وسط نوعين من البشر ناس عندها كل حاجة مستكتر يفيد أي يوزر يحب يسمع صوته بس وناس محرومة من الحب والتقدير وفي بعض الأحيان يجيبوا المسبة لنفسهم وهم غلابة قلباً وقالباً ومناخ مافيهوش صدق كله لعب بالكلام وتعليقات من ناس بتنتظر الأحداث معندهاش عقلية التغيير المشكلة ان كلامهم ييجي في دينك المصدر اللي بيخليني أزكي نفسي ويخليني أفضفض هو هفضفض لمين غير ربنا ؟ وبقول في سري “لو كل واحد عنده أم زي أمي وفي مشكلتها كان يحمد ربنا ”
نيجي لمشكلة هتدمر حياتي
انا ماليش أخت والناس عايشة على حاجتين النجاح والحب وانا صعب عليا أحب واتحب عشان دة حال واحد لا هيحب ولا هيتحب .. فيه شباب كتير بتذل نفسها على النت اللي يقول لبنت مش بتردي عليا ليه انا بحبك وبموت فيكي ومش عارف إيه والبنت تشتمه بأمه وتطعنه في عرضه ويوزر يوافق على كلامها ويشتمه وهي تحبه وبحاول اعرف الإسلوب دة عشان اعمل زيه ومعملش بإسلوب اللي بيقول لبنت بحبك وتقييمه سئ بإختصار شفت ناس بتدوس على كرامة ناس فوقتي ضاع في الترقب عن الأخبار السيئة بس بعصر على نفسي ليمونة عشان اتعلم واشوف الدنيا ماشية إزاي ، فعرفت حاجة مهمة أوي ان غريزة الحب تجاه البنت بتتوظف غلط جداً جداً لإن الشاب اللي فشل في العلاقة وسمع مالا يرضيه وظف غريزته خطأ .. هو حب بنت ودايب فيها ومعجب بكلام يصدر منها وجسمها كمان ممكن وهو زعلان يتخيل انها تحبه وانها بتكلمه وبتحضنه فمعنى دة انها بتديله الحب لكن في الحقيقة هو مش بيحسسها بالأمان خالص لو كلمها بالإسلوب دة بشكل مباشر “انا بحبك” “مش عارف اعيش من غيرك” وممكن تتحول لعقدة فيصبح سلبي يشوفها ويتعامل معاها بس ميحسساش بالأمان ، كل واحد فينا عنده المادة الخام دي في تفكيره ، بس فيه تجربة عملتها حسيت إني بني آدم وغير مسيرة حياتي فاتعرفت على شابة في موقع جوجل وهي بنت ناس جداً وجميلة وقمر والف عريس يتمنوها ، لاقيت منها قبول وحب ناحيتي وشفت صورتها وحبيتها أوي أوي بس انا قلبت الآية يعني كل الكلام اللي بتمنى اسمعه في خيالي من اللي بحبها انا بقيت اقوله بسأل عليها ولو حاجة تزعلها بكون زي باباها وادلعها وتحس انها ماشية في جسر اللي هو انا عشان تحس بالأمان مني وعمري ما علقت على شكلها فاديتها بدون مقابل حتى وهي بيتعرض عليها الخطوبة بقولها تختار العريس دة تكمل معاه وبهون عليها أي مشكلة بتمر بيها ، زي ما انا كنت بحط راسي على المخدة واتخيل اللي بتكلمني انا حسستها بدة انها مش لوحدها ان الف واحد يتمناها فالحب بالنسبة لي مبقاش غريزة بقى زي ما تقول عطاء وقلب طيب ميشكش في حبيبه وقوة لو معندوش حضور يكون ع الأقل طيب وقوته هي اللي بتديه
بس انا خايف لتسبني او تتغير معايا وربنا يعلم قد إيه عايزها أسعد إنسانة في الدنيا ، خايف اكون لوحدي وارجع تاني لأيام كنت بشوف البنات سلعة للي أرجل من التاني وهاكون إنسان منبوذ في أهل حتتي ، خاصة وانا المشاكل ملاحقاني فمعنديش خفة الدم اني أحافظ على اللي بحبه ، يعني لو حبيبتي يتم خطبتها يكون فراق جميل على الأقل اكون ساعدتها وهي ساعدتني اني اتغير
انا معنديش مناعة وممكن اتدمر في لحظة
إدعوا لي ربنا يثبتني ويشفي أمي ويسعد حبيبتي
بسم الله الرحمن الرحيم قصة حضرتك من أكتر القصص اللى الواحد اتأثر بيها بجد وربنا يجزيك خير على الصراحه فى إلقاء المشكله
إليك بعض الحلول التى تساعدك على مواصلة الحياه بكل سلامه
1- عليك بالتقرب أكثر من الله عن طريق قراءة القرآن الكريم بالإضافه إلى مرافقة أصحاب الخير
2- داوم على الصلاه فى ميعادها
3- متخليش للفراغ وقت عندك اشغل نفسك بأى حاجه
4- حط لنفسك هدف فى الحياه وحاول توصله
5- التقرب من الناس ومحاولة التعامل معهم بهدوء ومتحطش نفسك فى مواقف حرجه
6- عليك بوالدتك اذهب إليها وخليها تسامحك وبوس ايديها ومتزعلهاش تانى
7- عليك بالاستغفار الدائم لله وادعيه كتير
8- حط لنفسك موانع عند الخطأ فى الحياه فمثلا لما تيجى تعمل حاجه غلط افتكر قول ربنا وهو يقول ( واتقوا يوما ترجعون فيه الله ) و ( ولمن خاف مقام ربه جنتان ) وهكذا
ان شاء الله ربنا يهديك ويصلحلك الحال ويجعلك من المستغفرين القانطين الشكرين له