مشاكل الشباب مع البنات

متى يجب عليك الإعتراف بالحب

السلام عليكم ورحمة الله وبركاته

الحمد لله أولاً على قضائه وقدره .. فما قدره لنا كله خير

سأحكي لكم قصتي وقد إنتهت .. لكن عاوز رأيكم في اللى أنا عملته

شاب عندي 22 سنة .. انتهيت من دراستي الجامعية والحمد لله

الحمد لله ملتزم قدر الإمكان وبحبش أكلم بنات نهائي ” لا طلبات ولا غيره”
المشكلة عندي بدأت في آخر ترم في آخر سنة من الدراسة
لقيت نفسي غصب عني معجب بواحدة معايا في الدفعة ومكنتش عاوز أفتح السكة دي خالص لحد ما أكون جاهز لكن الحمد لله على كل حال
كانت معايا في كل المحاضرات والسكاشن بصدفة غريبة .. وكان محتم عليا أشوفها يومياً
كان فيه تعلق شديد بعد كده زاد جداً .. ومحاولاتي للنسيان دايما كانت بتفشل
فقلت خلاص وقررت أكلم أهلي في البيت .. كنت عارف إن ظروفنا ماتسمحش بخطوبة ولا بأي حاجة وده برضه كان رأي أهلي
المهم حاولت معاهم على حلول مؤقتة طول فترة الدراسة لحد ما وافقو ا
بقى إني أكلمها أو أبعت ليها مرسال وكنا دخلنا في أجازة أسبوع لشم النسيم فبعت ليها رسالة على الفيس
طبعاً ملقيتش رد زي ما كنت متوقع فقررت إني أستحمل لحد ما تخلص فترة الإمتحانات وبعد كده كل واحد هايختفي من حياة التاني
صليت استخارة كتييير وشفت أحلام كتير معظمها كان بالموافقة .. لكن أنا فضلت ساكت علشان ظروفي وأكره ما عندي إني يتقال ليا لأ ولو هاتقطع !!
عدت الإمتحانات و دخل الصيف ومن وقت للتاني كنت بأتابع أخبارها على الفيس .. لحد ما اتخطبت !!
قلت الحمد لله قدر ولطف … ومع الوقت كنت بأنسى والحمد لله حالياً راضي تمام الرضا
مع دخول فترة الإمتياز في الجامعة .. صادف وإننا إشتركنا في فترة واحدة حوالي اسبوعين
وفي الأسبوعين اكتشفت انها كانت عارفة وكانت مستنية أروح أتكلم وأظنها لمحت كمان .. بس أنا مكنتش بأفهم بحكم خبرتي البسيطة جداً واعتمادي على نفسي في أغلب الأحيان .. فلا صديق ولا ناصح !!
برغم إني كلمت ناس كتير جداً إلا إنهم شتتوني وزودوا الطين بلة .. وضغطي ارتفع وتعبت نفسياً
أنا مكلمتهاش خالص من بداية الموضوع لنهايته حوالي 9 شهور غير رسالة الفيس بس … علشان مسمعش كلمة لأ
أنا مش ندمان أبداً على اللى عملته .. ولو اتكرر الف مرة هاعمل نفس العمل لأني واثق إن ده هو الصح
في النهاية .. كل شيء مقدر ومكتوب والحمد لله
السؤال دلوقت .. رأيكم إيه في اللى أنا عملته وهل كان ده صح لأني برضه مكنتش عاوز أعلقها بيا ولا أتعلق بيها أكتر فسلمت أمري لله وسكت
سؤال أكثر أهمية .. هل لما أجي أخطب إن شاء الله هايبقى فيه حب برضه ولا خلاص هو مرة واحدة بس في الحياة وانتهينا على كده ؟!

معذرة لطول الحديث .. وبإنتظار آرائكم

مشاكل وحلول ذات صلة

اضيف بتاريخ: Tuesday, June 17th, 2014 في 05:43

كلمات مشاكل وحلول: , ,

4 رد to “متى يجب عليك الإعتراف بالحب”

  1. ELKASSABY
    30/06/2014 at 10:35

    بص يا prince أنا تقريبا كنت زيك كدة بس عاوز أقولك حاجة ورب العباد عمرك ما تقدر تتحكم فى أنك تحب أو لاء لأن سبحان الله بتلقى نفسك مشدود لوحده وبدئت تحبها وبص عاوز أقولك على حاجة خلىعندك يقين بالله سبحانه وتعالى أنه هيكرمك والله ولا تعلم ربك قادر على كل شئ وقادر أنه يفتحها عليك

  2. prince
    27/06/2014 at 03:43

    السلام عليكم ورحمة الله وبركاته
    أنا صاحب المشكلة ..
    ELKASSABY .. بالنسبة للمرسال اللى بعته لها على الفيس هو إني فلان وعاوز أتقدم لكن ظروفي متسمحش .. لا جبت سيرة حب ولا يحزنون ولا ينفع أصلاً أتكلم في حب طالما مفيش رباط شرعي

    أنا موقن تمام اليقين إن ربنا هايعوضني خير .. ومطمن ومش عاوز حاجة أكتر من كده
    كفاية شعوري بالراحة الدائمة بعد التعب الطويل
    وإن شاء الله كل حاجة تيجي في وقتها المناسب

    mostafa .. والله يا حج أنا قفلت السكة دي خالص من بابه وعايش مرتاح على كده جداً جداً
    ولو على البنات فهما كتير .. بس الواحد مش عاوز يدخل تجارب ويلكلك في الفاضي طالما النتيجة معروفة

    وأنا شخصياً مش هاحاول أجري ورا حد طالما مش جاهز علشان ما أحرجش نفسي وأعلقها بيا في الفاضي وصدمات تانية ووجع قلب تاني

    الحمد لله حالياً شغلت نفسي بشغل مبيخلصش أحسن من الفراغ + قفلت فيس بوك وسكايب وأي سكة حتى البيت مبخرجش إلا قليل علشان أروح الشغل بس

    أنا عارف إنها مسألة صبر مش أكتر .. مجرد وقت وربنا هايفرجها .. حتماً بإذن الله
    الحمد لله على نعمة الرضا .. وكفى بها نعمة

  3. ELKASSABY
    18/06/2014 at 16:31

    بص يا سيدى أنت المرسال الى بعته كان عبارة عن أيه بالظبط هلى انت بقولها انا عاوز اخطب ولا بتقولها بحب وأنشاء الله هخطبك أزاى هانحكم عليك وأحنا ما نعرفش المرسال عبارة عن أيه مرسال عن مرسال بيفرق ياريس لكن الى أنت عملته فى تصرفاتك كويس مش صح وكويس أنك مؤمن بالله وما تعرفش الأيام مخبيه ايه أتوكل على الله وشوف مستقبلك وأهم حاجه راعى ربنا والدنيا لس ياما هتشوف فيها كتير وهتعلمك أهم حاجه تتعلم وتشوف الصح من الغلط وما تندفعش خليك عاقل شوف وأتعلم و شوفى يأأبن الناس عمرك ما هتكون بتراعى ربنا وهيرزقك بحاجة وحشة أستحاااله وبكره هتجيلك أنشاء الله بنت الحلال وبرده بقولك تانى يعالم الأيام الى جايه مخبيه أيه ربك قادر على كل شئ وبيختبر عبده أهم حاجه خلى أيمانك بالله قوى ربنا ييسر الأحوال وأوعى تيئس لان اليأس هيأخرك وهجيبك ورا خليك مع ربنا

  4. mostafa
    18/06/2014 at 15:37

    ما أصابك لم يكن ليخطئك و ما أخطأك لم يكن ليصيبك
    و أكيد لما تخطب هتلاقي حب بس ده لو خطبت حد مناسب و ممكن تخطب و متلاقيش حب لو كان الشخص اللي هتخطبه مش مناسب بس في كل الاحوال متعلقش مشاعرك في اي تجربة جاية علي التجربة دي , افصل ده عن ده و هتلاقي كله تمام , اللي جاي ملوش علاقة باللي فات

اترك رداً أو حلاً لهذه المشكلة