مساء الخير
اني بنت عراقيه من بغداد عمري 20 سنة اسرتي متكونة من ام و اخ و اب ….ابوية هوة اكبر مشكله بحياتي من جيت للدنية المفروض اكون اني اول فرحته و بنته المدلله…لكن لكيت العكس لكيت اب ما يهتم ببنته الا من تسوي مكسورة حته يضربها و يخوفها لكيته ملتهي بشغله و فلوسه الي يجمع بيها و مايصرفهه علينة بخيييل الى ابعد الحدود و ماعنده غير الكلام الجارح و القسوة بالتعامل…لكيت ام تعبانة بحياتها و صايره مثل الخادمه بالبيت بدون اي مقابل مع العلم والدتي قبل الزواج جانت تشتغل و بعد الزواج ابوية خلاها تبطل من شغلها هاي (بسنين التسعينات)المهم فاتت السنين و المشاكل و التعب يزيد مره على مره .واني كبرت و صار عمري 14 سنه جنت بالمتوسطه والدي قسى عليه بالزايد و خلاني ارتدي الحجاب (بالكوة و بدون ارادتي)بحجه خوفة عليه…و حته موبايل ما اشترالي اولا لان الموبايل لازم يدفع فلوسه هههه و ثانيا لان هم يكول علساس يخاف عليه و ما اشتريت موبايل الا قبل سنتين بمساعده امي و ربي طبعا…و ضليت اسنين الدراسه اتفرج على بنات جيلي و اتحصر و اكل بنفسي…ومرت الايام حسيت نفسي وحدي كلش حته كرايبنه ينضرولنة بعين الصغيره بسبب ابوية…صادفني شاب انعجب بيه واني هم عجبني وتعلقت بي كلش و فعلا حسيت الله عوضني و اعتبرته كلشي اليه و هوة هم فهم شكد اني عانيت بحياتي وحبني كلش و بعد 8 شهور دز امه حته تخطبني(و بنفس اليوم ابوية خابرهم رفضهم لان همه شيعه و احنة سنة)
و ما خلاني حته اكول رايي ولا احترم كلام امي… من بعدهه الانسان الحبيته اعتبرهه اهانه و تغير وياية و كام يتعارك باقل سبب و اكثر من مره تعاوفنة و رجعنة لحد ما اقتنعت انو هوة مدا يكدر ينسه قسوة اهلي وياه و رفضهم اله بهالسرعه.و تفاركنة و قبل سنه سمعت بي كطع مهر على بت عمه و ازوجو هلشي دمرني اكثر من حياتي الصعبه وية اهلي بس دست على نفسي و تركته يشوف حياته…مشت الايام و مشاكل اهلي ضلت تزيد و تزيد و بده ابوية يقسي على امي اكثر و وصلت بينهم للضرب..لحد ما امي رفعت قضيه طلاك و اطلكو بعد ماخلاهه تتنازل عن كل حقوقها
و رحنه اجرنه شقه و كعدنه بيها اني و امي و اخوية الصغير لان الكرابه ماتقبلو فكره طلاك اهلي و ماكدرنة نعيش وياهم…و هسه اخر شي امي رجعت لشغلها و عايشه حياتها بالطول و العرض و ابوية همين شاف حياته و عايشها ع راحته (واني صفيت وجدي) ماعندي غير التلفزيون و النت اكعد وياهم و اتحصر …اني اعرف ماكو حل بس اترجى من الله يجي يوم ارتاح والله العضيم مابقه نفس بيه حته اشهكه تعببت والله تعبت اريد حل اترجاكم شسوي ؟؟واعتذر لان طولت بس اني حجيت ربع مشاكل حياتي مو كلهه للعلم انتضر ردودكم
مشاكل عائلية
حياتي الجحيم مع عائلتي
اضيف بتاريخ: Friday, December 19th, 2014 في 22:14
كلمات مشاكل وحلول: العراق, بنت
حبيبتي اصبري ان مع العسر يسرا والتزمي بعلاقتج مع رب العالمين وان شاء الله يسعدج ويوفقج ويعوضج عن حياتج القاسيه وشدي حيلج وابني مستقبل حلو وان شاء الله بالكليه تلكين شاب مناسب الج ويحبج وحاولي تصنعين سعادتج بنفسج والله يسعدج بحق كل حق*
حبيبتي انا مقدرة معناتك وشعورك ، وابوك مااالك الا تدعين ربي يسامحة ويغفرله لانه مهمها عمل يضل ابوك وعليك بالدراسة والاجتهاد عشان تبنين مستقبلك لاحب بيفيدك ولا زواج اهم شي مستقبلك وبعدين الاشياء الثانية وعليك بالدعاء و قيام الليل و الاستغفار والمحافظة على الصلاة و تذكري قول الله ان مع العسر يسرا واكيد الشاب هذا مو من نصيبك ولا كان ربي رزقك به ولو كان في الصين قوي املك بالله وتوكلي عليه وهو بيفرجها عليك من اوسه ابوابها الله يفرجها علي و عليك و على جميع المسلمين