مشاكل الخطوبة

هل خطيبي طبيعي

أنا محتااااره في أمري ومش عارفه أقولكم ايه …
أنا مخطوبه بقالي سنه وخطيبي عشان من بلد تانيه مابيزورناش كتير مره كل شهر (هيا مش بعيده قوي عن البلد اللي عايشين فيها ) بس المسألة تحكمات من بابا ..
أنا عارفه مسألة الالتزام الشرعي في الخطوبه …
لأن الحمد لله ربنا من عليا بالتدين من صغري …
المهم أي بنت تكون مقبله على مرحله جديده بتبقى خايفه .. وبتحاول تدرس طباع خطيبها وشخصيته ومدى التوافق الفكري بينها وبينه طبعا في حدود الشرع والدين …
المشكله اني بابقى عايزة أتناقش مع خطيبي في أمور حياتنا المستقبلية وأشياء أنا قلقه منها …
في أول الخطوبه كان يقول لي ابقى رني وانا أكلمك …
يعني نادرا ما بيبدأ بالاتصال …
ظننته بخيل …
لكن الغريب اني ساعات لما أرن عليه يفتح ويكلمني عادي …
أنا مش مدلوقه عليه يعني مش بكلمه يوميا …كل أسبوع مثلا
لكن اللى ملاحظاه اني دايما بأسأل عليه وأقوله انت عامل ايه ووصلت لغاية فين في تجهيز الشقه وكده …
وأنا اللي دايما بافتح موضوعات الحوار …
ونادرا ما يتصل هوا وبسأل عليا …
بعني مش حاسه اني مخطوبه …
ولا حاسه منه بأي اهتمام …
زي ما انا مهتمه بيه ….
حتقولولي ناقشتيه … حقولكم ايوه …
واجهته …
مره يقول لي مشغول …
قلت له انه مش مشغول أكتر مني …
لاني بشتغل وأدرس في نفس الوقت ….
قال مره اته بيتردد يتصل !!!!!!!!!!
قلت له انت شايف الزيارات قليله .. بالعكس حبقى مرحبه ….
قلت يمكن بيتكسف ….
لكن أنا مش حاسه بكده ….
كل مره أقوله يعني انت ما تتصلش الا بالطلب …
يقول ويؤكد انه مش ناسيني وفاكرني على طول …..
(لكن يابنات لو فاكرني حتى مجرد رنه او رسايل ما فيش )
وآخر مره اتضايقت منه وصارحته تاني …
وقلته له انا خايفه ان دي تكون طبيعة شخصيتك بعد الزواج …
لما انت كده دلوقت أمال بعد كده حتبقى ازاي …….
قال لي العواطف بعد الزواج (هوا عارف اني متدينه فاستغربت من كلمته وكمان احنا بنتكلمش كلام حب وغرام
وكلام ملوش لازمه كله في المفيد )
فرديت عليه وقلت له أنا بتكلم على المستوى الانساني …….
لو لقيت حد ما كلمكش من فتره مش تسأل تطمن عليه ؟؟؟؟
وقال لي انتي عايشه الدور ……
وقلت له انت قلت لي الكلمه دي قبل كده واتضايقت منها …

مش حاسه اني زي أي واحده مخطوبه …
مش المفروض هوا اللي يسأل ؟؟؟

وحتى ما بنخرجش مع بعض (قصدي كعائله طلعا عشان أعرفه أكتر …وحاسه ان الفرح لو قرب مش حبقى مرحبه بيه نفسيا …لأني لا أحس بأنني سعيده يهذ ه الخطوبه … (بالمناسبه خطوبة صالونات ) يعني ما كناش نعرف بعض قبل كده …
قولوا لي بالله عليكم أعمل ايه …
والله أنا مش فاضيه ومش مراهقه ولا صغيره … أنا عندي 28سنه وما اتخطبتش قبل كده …
ومش حاسه اني مخطوبه أصلا …
وهوا كان خاطب قبل كده واحده يدوب ييجي كم أسبوع ورفضته لمجرد انها كانت عايزه شبكه بالشيء الفلاني
دلوقت بفكر اني اسيبه …
لأن أسلوب التحايل ده مش بيعجبني …
ومش عارفه هل هوا غرور منه …
ولا شايف نفسه أحسن مني ؟؟؟
قالي انت عاطفيه جدا … ما كنتش عارف انك كده …
اتضايقت من نفسي أكتر …
ما كنتش عايزه أبين ده …
وأنا الكلام اللي بقول هوله استفسارات ومناقشات …
مش عارفه وصل له ده ازاي …
أنا شايفه ان الاهتمام ده شيء مهم
ولا ايه ؟؟؟؟
بفكر أسيبه لاني خايفه أكون في وادي وهوا في وادي …
وبسبب انه لايعبر عن اهتمامه بالصورة المناسبه …
حتى لما أبعت رساله … ما فيش رد فعل حتى لو برنه
أقوم أقوله وصلتك رسالتي .. يقول أه متشكر …
ويقول جميله وخلاص ( طب انت مستنى لما أسألك ؟؟؟؟؟؟؟؟؟)
حتى تجهيز الشقه هوا صاحب الشأن وبحسه ما بيتحركش الا وكانه بريموت كونترول ..
لو بابا تابعه وسأله …
غير كده يطنش …
مع ان اما بقوله متصلتش ليه …
يقول أهم حاجه اني أخلص !!!!!!!!
جربت اني أطنشه خااااااااالص …
ألاقيه برده زي ماهوا …
واحده استشرتها قالت يمكن يكون خام ؟؟؟؟
وفعلا قالوا لنا كده أول ما خطبني …
لكن مش للدرجه دي يعني …
وانا مش مقتنعه ان فيه راجل في الزمن ده يبقى خام 100%
مش عارفه أقول ايه …
لا اله الا الله ياريت تردوا عليا
ويارب ترزق كل القمرات بالأزواج الصالحين
ولو واحده مرت بنفس التجربه دي مع شخص طبيعته كده تقول لي هل يبتغيروا فعلا بعد الزواج
ولا الخطوبه هيا اللي نحكم بيها عليه ؟؟؟؟؟؟؟؟
عشان الحاجات دي ممكن تأثر على المستوى الاسري
بارك الله فيكم .. …

مشاكل وحلول ذات صلة

اضيف بتاريخ: Sunday, June 26th, 2011 في 14:45

كلمات مشاكل وحلول: , , , , ,

33 رد to “هل خطيبي طبيعي”

  1. مجنون نسوان
    07/01/2016 at 22:25

    اتفق مع الاخ ابو بتول في كل ماقال هو ده الراي الصايب والسليم وصاحبةالمشكلة عليها العمل به لاجل سعادتها وراحةبالهافي الحياة

  2. dodo
    09/01/2015 at 01:20

    لو حاسة بيه بجد استحملى ممكن يكون شخصيته كدة على فكرة انا خطيبى كدة بس رومانسى اوى وانا العكس عشان كده مابيقولش مشاعره ليا وحاولت كتير اسيبه لكن هو ماشاء الله بيقول لا المهم حسسيه بالاهتمام بس العبى على الحبلين شدى وأرخى

  3. ابوبتول
    16/08/2014 at 02:01

    من خلال خبرتي بالحياةوتعاملاتي مع مثل هالمواضيع اوكد لك ان الشاب لايزال يحب خطيبته السابقة ومتعلق فيها ومش عاوز ينصدم مرةاخرى معك ويتكرر نفس سيناريو السابق وتاكدي انه مش يحبك وماخطبك الاعلشان يرضي اهله وينسي حبه الماضي واكبردليل انه مايسال فيك ولايتصل بك ومشاعره وعواطفه كالثلج معك ولاكانك خطيبته ولك حقوق عليه ودي رخامةوقلةذوق وغيراخلاقية تماما دامه يعاملك بالجفاوالبرودوانعدام المشاعروالاحسايس فتاكدي انه لن يسعدك كزوج ولن يعطيك حقوقك من المعاشرةالزوجيةوخلافه افسخ الخطوبةالمشئومةدي بناقص منهاوخليه يغور والف من يتمناكي ياست العرائس بتلاقي ابن الحلال بجداللي يستاهلك ويقدرك ويسعدك في حياتك

  4. ابوبتول
    16/08/2014 at 01:48

    اختي لابدمن المصارحةبخقيقةالمشاعروتعرفي خطيبك ليه بيعمل معك كلده ودي فترةخطوبة المفروض انكم تتعرفواعلى بعض اكثر وكلامنكم يقدرمشاعروعواطف الاخر وامال لماتتزوجواحتعملواايه مافيش عاقل يقبل بالوضع ده انه مايتصل بك اويسال عنك ويتحجج بمواضيع تافهه وغيرمقبولة الافضل انك تضعي حدللخطوبةمعه والافسخ الخطوبةارحم لك من الحياةدي والامايقدرك لاتقدريه ولاتعبريه وكرامتك فوق كل شي ماتجريش وراءه وترخصي نفسك الظاهرانه شاب رخم اوي ومتبلد المشاعروالاحساس ولاعمره حيتغير اطلاقا فكري في نفسك قبل فوات الاوان وربك بيعوضك ويكرمك باحسن منه بابن الحلال اللي يبادلك المشاعروالعواطف وتلاقي معه السعادةوراحةالبال

  5. ابواميرة
    15/10/2013 at 11:26

    شوفي ياست العرايس انت يابنتي الزواج لابدله من شروط ومواصفات من الطرفين اذاتوفرت لكلاهماتم الزواج غيركدالايبقى زواج من اصله وخطيبك دا للاسف الشديد خام جداوبارد الاحساس والمشاعر معك وانتومخطوبين كيف اذاتزوجتوا حتعيشوافي عذاب وشقاءوانت المتضررةالكبرى في هذا لانوراجل ممكن يتزوج عليك وحده تانية وثالثة ماتفرق معه استخيري الله عزوجل وفكري بتروي وحكمة ولاتتسرعي في الارتباط بهذالشخص وتخسري عمرك وحياتك مع انسان لابقدرالمراةولايهتم بمشاعرهاوربي يعوضك بالزوج الصالح اللي يستاهلك ويسعدك في حياتك

  6. Dr-Amr
    21/02/2013 at 01:18

    انا مش شايف ان اللي بتقولي ده مشكلة … لان هو انسان طبعه عملي وبيحكم عقله … قد يكون قلة خبرة في التعامل مع البنات او انشغاله الشديد او استحياءة وكل الامور خير

    ان شاء الله هيتغير 🙂

  7. ابواميرة
    21/12/2012 at 17:21

    انتي عاقلة وبنت ناس ماترمي نفسك عل الشخص الاناني الخام عاطفياوشخصيامايقدرك ولاسايل فيك ايش منتظرة منوبعدالزواج حياتكم مشاكل ونكد في نكد وانت الضحية مش فارقه معه حيطلقك اويتزوج عليك فكري بعقل ولاتستعجل ساعة تندمي فيها

  8. ابواميرة
    21/12/2012 at 17:12

    يااختي حكايتك دي نفس حكايةاختي الصغيرة اتقدم لهاشاب 38سنة وهومتزوج وعندوولاد وفي البدايةانارفضت بشدةلفارق السن وانومتزوج وعندوولاد ولكن الحاجةامي وافقت عليه واقنعت البنت به وكسرت كلمتي واتضح بعدالزواج انو انسان اناني وبخيل جداوكسلان مايحب العمل عايش عل مساعدات الاخرين مماورطه في الديون ودخل السجن 3سنوات وماخرج الابكفالة مالية تحملناهامن اجل بنتناوقلن بيطلع من المشكلة دي وحيتغير ولكن لاحياة لمن تنادي رجع زي الاول ولاهامه بيت اوزوجة واولاد والناس كلهاتلومناليه زوجتو الانسان هذا واسف لواطلت عليكم لكن حبيت الاخت تعرف كل شي قبل الارتباط من هذالشخص اللي لايقل عن صهري بشي نفس الطباع ونفس التصرف واللامبالاة والله يهدي الجميع

  9. البلبل الحزين 666
    01/08/2012 at 01:20

    الى اقدر اقوله الى اغلب الشباب كدا واكترهم الى مروا بخطوبة او قصة حب قبل كدا وكمان متنسوش البلد الى احنا عايشين فيها مفيش استقرار وعايزة اقولك ان بعد الجواز الواحدة هية الى بتشكل جوزها زى مهيه عايشة وبعدين الواحد بيتجوز الواحده عشان هيه تريحوا وبعدين مدام اخلاقة كويسة ودينه كويس انسى اى حاجة تانية وكل البنات نفسها تسمع كلمة حلوة والاغلب مبتسمعش ارضى بنصيبك واتقلى بس مش قوى او عوديه عليكى مش مشكلة انك انتى الى تتصلى حاولى تحببيه فيكى وتوديه عليكى وانه خام دى تحمدى ربنا عليها عشان غيرك ميته من علاقات خطيبها ونفسها يتغير ويبقى ليها لوحدها حتى لو يبقى زى خطيبك احمدى ربنا وادعيه

  10. محب المحامى
    01/03/2012 at 18:28

    اختى الكريمة اسالى نفسك هذه الاسئلة
    لو بقى على حاته دى معاكى بعد الجواز هتقبلى ولا لا ؟
    هل طباعه تناسب طباعك ولا لا ؟
    هل ظروفه الصحية والنفسية والمالية والاجتماعية انتى موافقه عليها ولا لا ؟
    هل هو بيحبك ولا لا ؟
    هتقولى ازاى اعرف انو بيحبنى ولا لا ؟
    هرد واقولك ” الحب اهتمام فوق اهتمام مش مجرد كلام ”
    انتى بالنسبة ليه ” زوجة صالحة ”
    لكن انت هل هو الشخص اللى يملا عواطفك وفكرك ومشاعرك ؟
    هل كنتى تحبى ترتبطى بشخصية افضل منو ؟
    اكتبى فى ورقة ” ايه هى الشروط والصفات اللى كنتى بتتمنى انها تكون فى شريك حياتك
    وقارنيها بخطيبك وشوفى الفرق قريب ولا بعيد ؟
    مش عشان وصلتى ” 28 ” سنة ترمى نفسك فى زواج فاشل لاسمح الله 0
    ” القعده فى الخزانة ولا جوازة الندامة ”
    انك تبقى بلا زواج طول حياتك – ودا مش هيحصل – افضل واكرم لكى من صفة تضاف الى حياتك ” مطلقه ”
    الحب اهتمام ”
    من لايهتم بك لايحبك
    ومن لايحبك فى الخطوبة ” فترة الحب والرومانسية الجميلة ” لا ولن يحبك بعد الزواج 0
    هروبه المستمر من التواجد معاكى يعطينى مؤشر على ان هناك ” امور خطيرة ” فى حياتو عاوز يخبيها ولا تكتشفيها 0
    ولو هو ” خام ” زى مافسرو ليكى البعض 0 لاترتبطى به لانه لن يملا مشاعرك ولاحياتك 0
    الحل
    الفسخ 0
    وقبل كل شىء ” اطلبى من الرب ان يرشدك للقرار الصحيح والمريح ”
    الرب يعطيكة ” شجاعة ونعمة ” على القرار الصحيح المريح 0
    سلام 0 

  11. ustazi
    17/02/2012 at 18:49

    اللي أنا شايفه إن خطيبك كان بيحب خطيبته الأولانية جدا ، واتصدم لما أهلها طلبوا منه شبكة كبيرة هوه مش قادر عليها و حصل الانفصال .
    *خطيبك خايف يسيب عواطفه و مشاعره على حقيقتها معاكي ، فيحبك و هوه مش ضامن هتسيبيه انتي كمان ولا لأ .
    *المسألة نفسية بحتة ، مش عاطفية . يمكن لو حس منكم انكوا عايزينه أوي ترجع له ثقته بنفسه و باللي حواليه : خصوصا انتم.
    *** و الله أعلم***

  12. طمطم
    30/01/2012 at 03:20

    طبعا مفيش زعل من الكلام ده حاولى معاه تانى وبراحة يمكن يكون فى حجات مضيئة حاولى معاه مره وتنين وشوفيه بس يمكن هو خطبك علشان امه او عشان زى ماقولتى كانت ليه حبيبه وهى اتخطبة فحب هو كمان يخطب وخلاص بص انتى كلمى خطيبك ولومافيش قبول خالص هاتيه من عندك انتى وربنا يقدملك اللى فيه الخير

  13. ريم
    21/11/2011 at 00:33

    بصراحة لازم تفهميه وتعرفى ديماغوا ايه عشان دى جواز مش لعبة يعنى انسان هتادى معاه بقيت عمرك لازم يكون فيه تفاهم

  14. dode
    29/10/2011 at 05:07

    بصي مش عيزاكي تزعلي من الكلام الي هقوله انا كنت في نفس الوضع بالضبت بس بالعكس يعني هو كان كل شويه مكالمات وخروج ويجي البيت ويمشي بعد الفجر والله وهدايا وانا كنت زي خطيبك مش بسال عنه ومش برد بردو بحجت اني مش فاضيه او نايمه او في الشغل بس انا كنت بعمل كدا لاني مش بحبه وهو عارفوكنت بتعمد تاجيل الجواز برده باي حجه وده لاني اتخطبت بعد ماسبت الانسان الي كنت بحبه بايام وممكن يكون خطيبك زي ويكون بيحب خطيبته الاولى فانتي لازم تتاكدي منه الاول اذا بيحبك ولا لا ولازم تتجوزي واحد يكون في بينك وبينه مشاعر ده مش عيب او غلط او حرام كل حاجه في حدود الادب بس فتره الخطوبه دي تمهيد علشان متتصدميش وتحسي انك عايشه مع انسان غريب بعد الجواز يعني لازم تتكلمو وتفهمو طباع بعض ولو هو رفض ده يبقى بلاش تكملي وخطوبه مكملتش احسن من جواز وطلاق انما لو اتاكدتي انه بيحبك بجد وبيحاول يقرب منك س هو طبعته كدا يبقى متخفيش انا اعرف واحده لما كانت بتقول لخطيبها صباح الخير كان بيتكسف وميردش ويمشي وبعد الجواز اتغير تماما ومعاها دلوقتي 4 اولاد عقبالك وسوري ياقمر اني طولت عليكي

  15. اسراء
    20/10/2011 at 02:52

    اصبرى عليه شويه وربنا يوفقك

  16. لازم تقرى الرد ده
    10/09/2011 at 15:37

    نفس المشكلة حصلت مع خطيب اخت مراتى كان اكتر من كدة وكانت بتصبر اكتر منك وتقول يمكن محترم بيتكسف ولكن المفجأة بعد الزواج اكتشفت انه مش راجل يعنى زيه زيها بالضبط فهمتينى وبالفعل هى هتطلق خلى بالك يا اختى جدا جدا ولازم تكونى صريحا معاه لاحس تخصرى حياتك وتكونى انسانة مطلقة انت لسة معملتيش حاجة وعندك مليون سبب لتركة

  17. HanyMoh
    20/08/2011 at 04:54

    من الواضح أنه شخص يهتم بالمادة أكثر من العاطفة وغالبا الفتيات كعس هذا الوصف..

    قد يكون متدينا ولكنه يجهل أمور دينه ويخشى الخطأ في الكلام معك

    أو قد يكون جاهل بدينه ويعلم أنك متدينة ويخشى أن يتحدث إليك وتغضبي منه

    وقد يكون منشغلا ولا يجد الوقت الكاف للتحدث إليك..

    نصيحة لك أختي

    طالما أنه شخص محترم كما قلتِ وطالما أنه يوجد بينكما قبول فلم الحيرة والقلق..

    إن كانت أفكاره هكذا اليوم فبإذن الله في الغد ستتغير..

    ومشكلتكِ بسيطة جدا

    فغالبا ما تشكو المخطوبة من تعدي خطيبها عليها سواء تعد جنسيا أو تعد بالضرب..

    وأنت تشتكين من (برود) خطيبك..

    لا تقلقي سيتغير معك ولكل مشكلة حل ولكن إذا وقعت أصلا..

    توكلي على الله وأرجو أن يتم الله عليكما بخير..

  18. ايمى
    16/07/2011 at 17:29

    بصى انا عندى عشرين سنه ومخطوبه من سنه تقريباوخطيبى نسخة من خطيبك مش بيعرف يهتم بيا كنت الاول بزعل واقلب الدنيا وقولوا لا الوضع دة مش هينفع بس بعد كدة اتقلمت على الوضع دة عشان متاكدة انوة بيحبنى حتى لو مش بيقول كبرى دماغك والمعاملة بالمثل وانسى فكرة انك تفسخى الخطوبه دى نهاااااااااااااائى لما يقولك مشغول صدقيه والتمسيلوه اعذار وربنا يوفقك ويتمملك على خير

  19. انا زيك بالظبط
    14/07/2011 at 01:11

    بصى حبيبتى كانك بتحكى عنى بالظبط والتمام والكمال
    خطيبى نسخة من خطيبك
    وانا لما بتصل او ارن او ابعت رسالة والله بندم بعدها لانى رغم انى انا اللى ببعت بلاقى رد فعل مش كويس اللى هو مافيش رد اصلااااا على اى حاجة ببعتها وبتصل بيه مش بيرد
    والمبررات بقى
    مشغول والله
    كان معايا اصحابى
    الموبايل سبته وخرجت
    وهكذااااا
    ويقولى هو انا لازم ارن او ابعت رسالة عشان ابقى بفكر فيكى
    انا والله بفكر فيكى وبتوحشينى مش لازم اقعد ابعت يعنى
    هو كده وطبعه كده اعمل ايه يعنى
    ومتاكده انه باذن الله هيتغير بعد الزواج
    لاننا هنكون سوا لحظة بلحظة باذن الله هيكون الوضع احسن من دلوقتى
    صلى استخارة وعودى نفسك مترنيش ولا تبعتى حاجة الا لما يبعت هو
    لما يبقى يفتكر يبعت او يتصل ابقى ردى عادى جداا
    عشان هو يتعود يكلمك حتى لو قليل
    انا عارفه ان الاهتمام مهم جداا والله بس فى ناس طبعها كده بجد والله
    ربنا يكرمنا ويجمعنا بخطابنا على خير يارب

  20. مش لازم
    10/07/2011 at 15:03

    خطيبك ده طبيعا جدا سيبك من اي كلام تاني وتوكلي علي الله والرسول صلي الله عليه وسلم قال فيما معناه من اتاكم ترضون خلقه ودينه فزوجوه فان لم تفعلو يكن بلاء عظبم . ومشاء الله خطيبك ده اخلاقه كويسه ده الواضح من كلامك وممكن عدم اهتمامه ده يكون حرص شويه منك قبل الزواج وذلك لمروره بتجربه خطوبه فاشله مسبقا وبعدين لو كان هوه مش بيحبك او مش مهتم بيكي كان زمانه سابك من زمان وبالتالي انتي حاولي تطنشيه شويه اتقلي عليه متبقيش خفيفه وشوفي هوه هيعمل ايه وكل شئ قسمه ونصيب وانشاء الله يكون نصيبك كويس

  21. ندا
    01/07/2011 at 05:18

    بصي ياحبيبتي .. أولا ربنا يكتبلك الخير يارب .. انا شايفه انك تتكلمي معاه تاني وقوليله لو انت كدا مش هينفع نكمل مع بعض أنا مش حاسه منك بأي اهتمام خالص و مش معقول انت مشغول أوي للدرجادي يعني.. وقوليله انا زهقت من الطريقه دي لو انت طبعك كدا انا مش هقدر استحمل ولو انت طبعك أصلا مش كدا يبقى انت مش بتحبني وفي الحالتين مش ننفع نعيش مع بعض كدا .. طبعا كدا الكلام معناه انك بتقوليله مش هينفع نكمل .. شوفي بقى رده ، هيتمسك بيكي وقتها ولا ايه ولا برضو هيقولك اي مبرر وخلاص .. لو مش حسيتي انه خاف انك تسيبيه واتمسك بيكي وكدا .. يبقى تنهي الموضوع ، صعب تعيشي مع واحده مش حاسه انك ف حياته اصلا خالص كدا .. وانتي بنت ماشاء الله باين عليكي كويسه .. وبالله عليكي متحطيش السن عائق ادامك وتكملي ف الخطوبه غصب عنك ، حتى لو اتأخرتي شويه ف الجواز أحسنلك من انك تتجوزي جوازه تزهقك والله .. ربنا يجعل نصيبك مع إللي يحبك ويخاف عليكي .. وأيا كان إللي هيحصل طبعا هيكون دا نصيبك إللي ربنا كاتبه ليكي .. ربنا يسعدنا كلنا

  22. روميساء
    01/07/2011 at 01:31

    اعملى استخاره وربنا هيبين لك

  23. دودو
    29/06/2011 at 14:06

    بصي ياحبي انتي لازم تعرفي انة لو مش مهتم دلوقتي بيكي بعدين هيعمل اية وكمان فترة الخطوبة دي بتبقي العواطف فيها جياشة وكمان بتبقي اجمل فترة في الدنيا ولازم تعيشوها انماانتي بتحبية بس لو متغيرش يبقي سيبة احسن علشان ممكن تتعبي بعدين وربنا يوفقك

  24. باسم
    29/06/2011 at 09:20

    وسيبك من كلام لؤلؤ وخليكى لحد الاخر يمكن يتغير

  25. باسم
    29/06/2011 at 09:18

    هو كلامه صح فى حكايه العاطفيه بعد الجواز بس لازم يكون فى اهتمام والا تكون النهايه وحشه بس اوعدك انشاء الله هبهدل خطيبتى رغ لو هدخل الحمام هتصل بيها اقولها علشان انا عارف انى البنت بتفرح لو بكلمه وبتزعل من كلمه

  26. اللي كان في غيبوبة
    28/06/2011 at 23:04

    أنا كنت فاكر كدة برضو إن بعد الجواز مراتي هاتحبني بالرغم اني مبتئخرش عليها في أي حاجة !!! من أيام الخطوبة برضه ماكنتش معباراني لدرجة إن سألتها هل حبيتي أي حاجة في الدنيا قبل كدا كلب ، قطة ، لعبة ، أي حاجة يا رب راجل تاني مكنتش هازعل كنت هابقة متفهم ، كلنا لحم و دم ، لكن مفيش خالص ،ما كنتش حاسس اني خاطب فعلاً، و الناس كانت بتقولي بنت خام ، تشكلها بعض الجواز ،البنت مؤدبة، البنات اليومين دول معرفش مالهم ، ألخ … ،الأدب مهم بس مش كل حاجة ، الدنيا مش سرير لا مؤاخذة يعني ، لازم يكون في مشاركة في التفكير يكون في حوار تبادل أفكار ، تفهم احترام ، تخطيت لبكرة المستقبل، أنا بنصحك زي أختي بالظبط أمام الله ، إتجوزي واحد عنده قلب و بيحب، الحب هو تضحية ايا كانت نوعها ، هو من دلوقتي مش قادر يضحي بدقيقة يكلمك فيها و زيارات نادرة، يبقي المسؤلية اللي بعد الجواز هيعمل فيها أيه؟!!!!!! إذا كان الفرح قرب ، هل اتفقتي معاه على الشغل بعض الجواز ؟ أو بعض ما ربنا يرزقكم بأولاد؟ هل هيبقى في مشاركة في المسؤلية أم هتبقي قاعدة في البيت زي ال.. ،

    إذا كان في الخطوبة مش فاضي امال بعض كدا هيبقى فاضي ؟!!!

    لأ و ألف لأ

  27. said
    28/06/2011 at 16:45

    السلام عليكم شوفى ياأختى انا فى مرحلة الخطوبة زيك بالظبط لكنى بكون فى اسعد لحظات حياتى لما اسمع صوت خطيبتى وع فكر انا مسافريعنى
    بعيد عنها بكتير والواضح من كلامك انك رومنسية وخطيبك عكس كدا خالص وبعدين قبل ماأسافر كنت بشوفها اكتر من 4ساعات يوميا ومكانوش بيكفونى فاشوفى خطيبك دا يمكن يكون بارد مش خام بس او لايحبك واسألية فى كدة مش عيب وجبيهالة بصراحة قبل الارتباط الرسمى وهددية لو متمسكش بيكى سيبية

  28. أسيــــــــ مشكلتي ـــــــــــر
    28/06/2011 at 04:53

    اختي العزيزة
    انا من رأيي انو عادي جدا يعنى مش عادي على الاخير لكن من كلامك افهمت انو كان خاطب قبل هيك واكيد مر بتجربة قاسية مع خطيبتوا الاولنية وبهيك مش عاوز تتكرر الغلطة بتاعتوا كمان مرة وانا من رأيي الشخصي انك راح تكوني سعيدة معاة لدرجة الجنون بعد الزواج وبكرة تقولي والله فى واحد قلى وبعدين انتى لازم من جهتك تعملي شوية برستيج لشخصيتوا يعنى عزومة كل شهر طشة سهرة يعنى ما دام انك هيك وهيك انتى يلى بتبدي بالمبايلات والرسائل والمواضيع اعزمية هيك على مطعم على حفلة على اي شي انتى بتكونى سعيدة فية على شرط (هوة يحاسب فى الاخر)هههه
    وفى الاول والاخير ما حد بحل مشكلتك غيرك انتى وما تفكرى انو قراية الكلام وكتابتوا زى ما تكوني عايشاه يعنى ما راح حد يقدر يجاوبك الجواب الصافي غير نفسك انتى

  29. لؤلؤة
    27/06/2011 at 22:47

    سيبيييييه
    هايتعبك ف حياتك
    سيبيه
    صلى صلاة استخاره واديله فرصه تانية وعرفيه شخصيتك قبل بيها واتعدل خلاص ماتعدلش ف ستين داهيه انتى تبورى احسن ماتتجوزى واحد مش يحس بيكى انتى انسانه متعلمه

  30. ايمى الزملكاوية
    27/06/2011 at 19:12

    بصى اقولك على حاجة وجربيها لمدة ابوع بظبط لو معاكى رصيد 50 جنية وعايزة تخلصيهم مش هقولك كلمية دقيقة دة انا هقولك مترنيش علية لو قعد كل شهر يكلمك دقيقة او كل شهر رنة منو مش منك وكلمية زى ما يكلمك بظبط ازيك الحمد لله انت ازيك الحمد لله عاملة اية تمام الحمد لله انت عامل اية ازاى مامتك تمام وانت ازاى مامتك تمام والله هيدايق جربى ومتتكلميش ولا ترنى لمدة اسبوعى لو لقيتية ؟……………متزعليش منة الدنيا بقيت قصيرة عيشى فيها متحرميش نفسك من حاجة الدنيا مش هتقف على واحد واوعى فى يوم تقولى لنفسك انا كبرت وتندمى انك متكلمتيش مع الواد دة ولا عرفتية ولا ولا لا عيشى لسة بدرى خالص قدامك اسبوعين يا بنت الحلال تحددى فيهم ازا كنتى تكملى او لا

  31. صاحبة المشكله
    27/06/2011 at 17:14

    والله ربنا يجزيكم خير مش عارفه أقولكم ايه ..هوا في الأول كان بيبعت رسايل بالمعقول وبيعبر فيها عن شعوره بكل احترام واللي عاجبني فيه انه محترم جدا وعاقل …
    وكل ما اناقشه في موضوع الاهتمام ده يضحك .. يعني هوا عارف اللي بيعمله بالضبط …
    حاسه ان حد من اصحابه هوا اللي قال له يعمل كده مع اني لما سألته مره أنكر …
    وانا قصدي بخام ان مالوش خبره في التعامل مع الفتيات .. مش بالمعنى الوحش .. قصدي انه مالوش تعامل أو اختلاط بالبنات … محتاره ومش عارفه وصليت الاستخاره …
    وساعات لما أطنشه ألاقيه يتصل بس نادرا …
    يعني مش حاسه انه ملهوف كده … بدليل ان بقالنا سنه ولسه مش عارف يخلص تجهيز الشقه وكله عشان هوا ما بيسعاش السعي المطلوب….
    وربنا يكفينا شر النت ….
    يعني قولوا لي برده ممكن يتغير بعد الزواج ؟؟؟؟

  32. حازم الاهلاوى
    27/06/2011 at 01:03

    اختى
    انا اصغر منك بس يمكن اقدر اساعدك
    انا مفهمتش خام دي اوى يمكن قصدك انو غلبان وملوش في الروشنه والكلام مع البنات
    ممكن اقولك انه ياما شخص انطوائي او منعدم العواطف والاحاسيس الله اعلم
    بس انتى شغلى مخك الاول حاولى تبصلى لبعد الجواز ايه اللى هيحصل لو اتجوزتوا
    ومش بيكلمك في الشعور والاحاسيس واى بنت في الدنيا بتحب اى كلمه حلوه من جوزها
    وده حلال طبعا حتى في فتره الخطوبه مسموح بيه بس بحدود طبعا
    المشكله بقي لو ده طبعه ان هو انسان بارد
    وانتى عاطفيه هو معظم البنات عاطفيين
    ممكن تكونى في اشد الحاجه انك تسمعي منه كلمه حلوه وهو ولا هو هنا
    وبعدين تملى وتزهقي وتطلبي الطلاق بيحصل كتير
    وممكن كمان تخشي ع الشات الله يحرقه بجاز وسخ وتتعرفي ع شاب هايف
    وسيمعك كلمتين من اللى بيعجبوا البنات وتقعي في حبه بتحصل مع بنات متدينه اكتر منك
    اه والله انا مش بشكك في اخلاقك لا بالعكس شكلك اخلاق كبيره ومحترمه
    بس انا بقولك بصي لقدام لو مش هتستحملى العيشه دي من دلوقت
    يبقي سيبيه احسن ما تكونى ” حامله لقب مطلقه ”
    وانتى عارفه يعني ايه مطلقه في مصر يعني زى ما يكون واحده قتلت جوزها
    فكرى وشوفي الصح فين وصلى استخاره
    ربنا يكرمك

  33. حياتى كلها لله
    26/06/2011 at 22:51

    السلام عليكم ورحمة الله
    اختى ممكن يكون دة طبع خطيبك وممكن يكون انه بيحسبها بالعقل اكتر من العاطفه بس انتى اللي تقدري تحددى اذا كنتى تتحمليه كدة او لاء ممكن يكون عقلانى وواخدها جد شويه بس علي العموم صلي استخارة وشوفي الاقرب لقلبك وربنا يوفقك ويصلح الحال

اترك رداً أو حلاً لهذه المشكلة