كسرت اخلاقي وسابني عشان مرضي|مشاكل البنات مع الشباب

مشاكل البنات مع الشباب

كسرت اخلاقي وسابني عشان مرضي

انا بنت عندي 17 سنه محترمه جدااا والناس كلها عارفه كدا في المنطقه اللي انا عايشه فيها وعاديه لا حلوة ولا وحشه المهم من يوم شم النسيم اللي فات ده وفي واحد من الشارع بيحاول يتعرف عليا اطلع من البيت الاقيه في وشي اروح مكان الاقيه بيبصلي وفضلنا نبص لبعض كتير في كل مره يشوفني فيها وانا بدات اضايق خصوصا انه بدا يتكلم ويقولي انا ناوي خير ومش بعاكس وكدا وانا مكنتش بديله اي اهتمام او اعتبار لحد ما في مره قالي انه عايز يخطبني فوقفتله عشان اعرف منه ليه بيطاردني مع اني مش حلوة ولا حاجه قالي عشان محترمه وجميله وصعب تلاقي بنت كدا دلوقت المهم كل ما اطلع دلوقتي من البيت ويشوفني يروح يقف في الحاره اللي ورا بيتي بشارع وانا بقف معاه بيكلمني انه بجد عايز يتقدملي وكدا فهمته اني لسه صغيره راح فضل يصر علي انه ياخد رقمي عشان يطمن عليا بس في اليوم اللي مش بطلع فيه من البيت انا رفضت طبعا لاني متربيه كويس مره في مره بقابله فيها بدات اتعلق بيه وخصوصا لانه مش بيلعب بيا لا انا حاسه انه صادق في كلامه وقالي انه اتعلق جدا بيا ومرتاح لكلامه معايا اوي وانا لما اتاكدت انه بدا يتعلق بيا قلت اصارحه بحاجه منها اعرف اذا كان هيفضل يتعلق بيا ويبدا يحبني فعلا ولا اذا كان مكنش بيحبني اصلا من الاول قلتله اني مريضه بالسكر من 4 سنين ودي فعلا حقيقه لقيته اتخض واتصدم ومكانش مصدقني رجع تاني يوم يقولي انتي بتتكلمي بجد ولا بتهزري قلتله لا بجد قالي انه روح عيط وزعل جدااا ومش مصدق بس هيفكر يكمل معايا ولا لا وهيشوفني تاني يوم العيد الكلام ده كان قبل الوقفه انا اتهربت ومكنتش عايزة اقابله تاني يوم العيد ومخرجتش اليوم ده انا اصلا حسيت اني بقيت بنت وحشه ومش كويسه لاني بقابله مع ان كلامنا عادي جدا ومش بكمل ربع ساعه وقوف معاه المهم عدي حوالي 20 يوم وانا بلاقيه قدامي ساعات علي القهوه اللي جنب بيتنا وبيشوفني بس ولا بيقابلني ولا بيكلمني ولا حساه زي الاول وبصراحه اتخنقت من نفسي ومن اني سمعتله ووقفتله في الاول خالص وكل يوم بعيط لما بشوفه بروح البيت مخنوقه واعيط ان واحد سابني عشان مرضي واني كسرت اخلاقي بوقوفي معاه بس انا لحد دلوقت مش عارفه مين الغلط فينا ومين الصح ومش عارفه اعمل ايه ابعد وانساه وخصوصا اني شخصيه قويه مش بهتم بالولاد زي اي بنت بس حاسه اني اتعلقت بيه بلييييز حد يجاوبني

مشاكل وحلول ذات صلة

اضيف بتاريخ: Friday, September 30th, 2016 في 13:16

كلمات مشاكل وحلول: , , ,

9 رد to “كسرت اخلاقي وسابني عشان مرضي”

  1. اخوكي
    06/03/2017 at 13:38

    معلش انتي لسة بنت كويسة ماحصلش اس حاجة

    واشكري ربنا انك اكتشتفتي انه مش بيحبك من الأول لكن بيحب نفسه وبيدور على واحد مؤدبة تجوزه لفايدته الشخصية

    لو بيحبك فعلا ماكنش ده فرق معاه خالص انا خطبت مراتي من 6 سنين واكتشفت بع الخطوبة يالصدفي في التحاليل ان عندها فيرس سي وجبت لها الحقن ب 60000 جنيه وخدتهم وبقت زي الفل الحمدلله وده لأني بحبها وقدرت انها وقفت قدام أهلها عشاني

    وواحد زي ده لو اتجوزتوا وجالك اي مرض لا قدر الله، هل هيشيلك ويخدمك؟ ولا هيتجوز عليكي او هيطلقك ويرميكي

    ده اناني وبيحب نفسه والحمدلله انك كشفتيه بدري ده عشان ربنا بيحبك

    وانتي لسة بنت كويسة وزي الفل لانك ماوقفتيش تكلميه الا لما حسيتي انه جد وهدفه جواز

    وده مش عيب

    وان شاء الله ربنا هيرزقك باحسن منه ارميه من ورا ضهرك وعيشي حياتك بكل ثقة انتي لسة بنت كويسة

    ربنا معاكي ويوفقك

    قَـيّـم هذا الحل: Thumb up 2 Thumb down 0

  2. بصراحة
    30/10/2016 at 11:25

    اولا ربنا يشفيكي من السكر شفاءا عاجلا لا شقاء فية
    ثانيا
    انتي الغلطانة
    لانكي سمحتي لحد غريب يكلمك ويحبك وتحبية انتي الغلطانة وممكن يقول عنك شمال

    قَـيّـم هذا الحل: Thumb up 0 Thumb down 1

  3. زهره
    19/10/2016 at 09:27

    انا من راى تبعدى عنه تماما وتنسيه خالص ومتزعليش عشان انتى غلطى لا مفيش حد معصوم من الغلط كلنا بنغلط بس الصح بقى الى يغلط ويتعلم من غلطه يعنى ويستفيد منه يعنى تبعدى عن الولد ده تماما وتنسى الى فات ومتزعليش ومتسمحيش لنفسك تانى انك تكلمى اى ولد وبكرا لما تكبرى كمان سنتين او تلاته تلاقى ابن الحلال الى يتقدملك مش لعب عيال وربنا يوفقك

    قَـيّـم هذا الحل: Thumb up 0 Thumb down 0

  4. mohamed
    03/10/2016 at 00:11

    مبدأيا شخصية البنى ادم دا متوصلش حتى لشخصية انسان عادى هوا اقل من كدا بكتير بحكم انى شاب بقولك ان لو حد فعلا حب واحدة لو حتى عندها سل هيتصرف ولا كأنو سمع حاجة ولا هتفرق معاه الحجات دى ابدا وانا مش شايف مرضك بنفس الطريقة اللى شيفاه شخصيا شايف ان ربنا ابتلاك بالسكر عشان يبعد عنك واحد اتخلى عنك بعد معشمك من اول مطب ازاى شخص زى دا كنتى هتأمنيله لو كان فى سر اكبر بعد كدا ؟؟ .. بصى من الاخر الحق واضح وصريح والانسان الصادق هيبان ومش هيلف ولا هيدور بكلاموا وهيجى معاكى دغرى من اول خطوة لاخرة خطوة .. وقبل ممشى على فكرة هوا معيطش ولا حاجة دا كداب وضلالى .

    قيم هذا الحل سلباً او ايجاباً: Thumb up 4 Thumb down 1

  5. مصرى
    02/10/2016 at 08:38

    انت بنت جدعه ومتربيه ومتفرطيش فى نفسك ومتتخليش عن كرامتك انا شاب وحابب اقولك ان الشاب بيفضل البنت اللى محددش حتى كلمها مجرد كلام ومرض السكر ده حاجه عاديه جدا وليس بمرض وربنا يشفيكى ثقى فى نفسك وربنا هيكرمك بالافضل ومتقبليش حد تانى اللى عايزك يروح يخطبك واوعى تمكنى حد من نفسك واحب اقولك ان الجمال مش كل حاجه الاخلاق والاحترام والذوق والادب والتربيه كل ده اهم من الجمال

    قَـيّـم هذا الحل: Thumb up 2 Thumb down 0

  6. هشام
    02/10/2016 at 00:58

    يابنتى هو فيه حل تانى قدامك غير انك تنسيه وبعدين انتى غلطتى انك صارحتيه على طول بحقيقة مرضك وكان المفروض تنتظرى شويه لحد ما يتعلق بيكى وبعد كده تجيبهاله واحده واحده مش ترزعيه بقالب طوب فى وشه وبعد كده تستغربى انه ابتعد عنك وعلى رأى المثل جوزى يحبنى عفيه وأهلى يحبونى غنيه…معلش هتتعبى شويه لحد ما تنسيه وان شاء الله هتقدرى تنسيه ما دمتى انسانه قويه وبعدين انتى لسه صغيره والعمر لسه قدامك وان شاء الله هتلاقى اللى يحبك وتحبيه… ربنا يشفيكى ويعافيكى ويرزقك بالزوج الصالح

    قَـيّـم هذا الحل: Thumb up 0 Thumb down 1

  7. ابوالبتول
    01/10/2016 at 10:43

    اولا- انت فتاة كويسة ومحترمة واللي حصل منك غلطة بسيطة مش مستاهله انك تعملي في روحك كدا ثانيا-الشاب برضه معذور اي احد في مكانه ويعرف بان البنت اللي فكرفيها وحبها طلعت مريضة وعندها السكر اكيد يتضايق ويزعل وربما يبتعد وده اللي حصل من الشاب ثالثا- عايزك تهتمي بحالة السكر اللي عندك وتاخدي العلاج المفيد واتباع الحميات في التغذية ونشاء الله يزول مرض السكر معك للابد رابعا- نصيبك لسه ماجاش وهتلاقي ابن الحلال اللي يستاهلك ويقدرك ويصونك ويسعدك في حياتك ياقمر ربنا يوفقك ويسترعليك

    قَـيّـم هذا الحل: Thumb up 2 Thumb down 2

  8. mostafa
    01/10/2016 at 08:11

    تعلقك بيه عشن كان بيقولك كلمتين حلوين و بيديكي اهتمام شوية فانتي دلوقتي مفتقدة الكلام الحلو و الاهتمام ده اكتر منه هو شخصيا فانشاء الله لما تكبري شوية و يجيلك ابن الحلال هيعوضك بالكلام الحلو و الاهتمام بس المرة دي هيبقي حقيقي فعلا مش اي كلام و السلام

    قَـيّـم هذا الحل: Thumb up 2 Thumb down 1

  9. ريمه
    30/09/2016 at 18:48

    عزيزتي صاحبة المشكله..ربما يكون اعجب باخلاقك لكن لديه عقل طفل وهو مراهق اذ ان مرض السكر لا توجد به مشكله وهو شيء يدعو للتعاطف لا للانزعاج لكن هو غير ناضج ولايعرف ماهذا المرض او ربما انتي طرحتي مشكلتك على انها شيء سيء بالعكس مرضك شيء يدعو للتعاطف وليس به شيء لا على سمعتك ولا على مظهرك واخلاقك وهو ليس امر بيدك من احبك سيحب كل مابك فما بالك بمرض قد يؤذيكاذ عليه ان يخاف عليك امثر ويتعاطف معك لخوفه على صحتك.. اذآ فهي مجرد نزوة شاب مراهق وقد حماك الله منها و هو شاب غير ناضج لابأس عزيزتي انسي الماضي وانسيه واهتمي بنفسك لأجل نفسك واهتمي بدراستك وعودي كما كنتي وستنسينه بإذن الله انسي الشيطان واشكري الله انك لم تتمادي في خطئك معه واعلمي انك محظوظه في ان الامر لم يتفاقم معه ارجو ان تعودي الى صوابك وتتوبي لله تعالى فمن يريدك سيأتي الى منزلك ويطلب يدك من عائلتك فلا حرام يوفق به الانسان لكن الله غفور رحيم ثقي بنفسك وانسي مامضى وعودي كما كنتي سواء بمشيتك او احترامك لاخلاقك وثقة عائلتك بك ..

    قَـيّـم هذا الحل: Thumb up 2 Thumb down 0

اترك رداً أو حلاً لهذه المشكلة