مشاكل الشباب مع البنات

البنت اللي بحبها سابتنى و راحت لغيرى

من حوالى 3 سنين عرفت بنت كانت شبه منطوية و انا كنت اجتماعى و مشهور لدرجة قبل ما اعرف انها زميلتى فى الدراسة هى كانت عارفانى من خمسة ابتدائى شكلا و اسما بس..
المهم بطريقة ما اتعرفنا و كنت انا الولد الوحيد الى تعرفه برة نطاق العيلة و الجيران و دخلنا تالتة ثانوى مع بعض و بدأنا نقرب شوية بشوية..
كنت ليها سند بمعنى الكلمة و بحتويها فى اى موقف لدرجة ساعات كان بيبقى فيه مشاكل تتكسف تحكيها لامها و ابوها كانت تسألنى فيها بس انا مكنتش لسة بحبها و بقينا نقرب اكتر و اكتر و لما دخلت جامعة و عرفت صحاب ولاد و بنات متغيرتش معايا نهائى بالعكس بقت تقرب منى اكتر خصوصا لما حست انها بقت غير كل البنات صحابى الى فى حياتى عدت اول سنة جامعة و فى بداية السنة الجديدة لما اتأكدت انى بحبها من كلامى فاجأتنى بان زميلها فى الجامعة و هى متفقين انهم هيتجوزوا لما يتخرجوا و هى هتستناه…!!
اتفاجأت طبعا لأنى كنت فى حالة يقين 100% انها بتاعتى بس مرضيتش افاتحها فى الموضوع عشان مش وقته و احنا لسة فى سنة اولى جامعة..
و لقيتها بتقولى انا قولتلك لما حسيت منك انك بتحبنى و انا اسفة و انا عمرى ما هتغير معاك و مش هسيبك و لو هو طلب منى انى ايعد عنك هرفض عشان انت شخص مهم اوى فى حياتى بس عمرى ما شوفتك جوزى انت صاحبى…
مش هطول و اقول انا اتصدمت قد ايه و قد ايه أثر على دراستى و بقيت بسرح كتير و بقعد لوحدى عشان الكلام مش هيوصف بس معرفش ازاى دا حصل و ازاى فضلته و حبت غيرى بعد كل الى عملته عشانها
عارف ان الحب بالقلب مش بالعقل بس لما بصيت للبنى ادم الى اخترته و سابتنى عشانه و قارنته بيا مفيش وجه مقارنة نهائى بواحد بيشرب شيشة و سجاير و مدبلر سنتين بيا انا الى الى فى كلية بيقولوا عليها فى كلية قمة و بلعب رياضة حتى شكلا بردو الكفة تميلى انا مبعيبش على حد و انا مش كامل بس مش لاقى نقطة واحدة اخسرها قدام الشخص الى سابتنى بكل الى ممكن اقدمهولها و قدمتهولها للواحد زى دا مبيشوفهاش و هى عيانة او تعبانة او بتعانى من اى مشكلة حتى لما اخوها الصغير عمل حادثة انا اول واحد فكرت تكلمه و تعيط معاه و تشكيله و تحكيله الى حصل قبل حتى ما يوصلوا المستشفى و من دا مواقف كتير زى لما اهلها زنوا عليها عشان يجوزوها لعريس مقالتلوش هو و جت قالتلى انا بالرغم ان دا كان من بعد ما عرفت انى بحبها ….
متغيرتش معايا بالرغم من سخافتى الشديدة معاها جابتلى هدايا كتير بالرغم من انى كنت قاصد اطنش عيد ميلادها عيطت لما لقيتنى ببعد و مبقتش معاها و كنت بستغرب من الحاحها الشديد انها تشوفنى و عن كمية الفرحة الى فى عينيها و هى معايا
انا مش هينفع اقعد مقرب منها و بشوفها مع واحد تانى بالرغم من ان دا هيأذيها و هيسيب فراغ كبير اوى فى حياتها فهل انا غلطت انى مقولتلهاش بحبك من الاول؟؟
و لا هى الى حاستنى مضمون و معاها فرميتنى فريندزون
طب افضل و لا ابعد و لا انساها و متعبش ازاى؟؟

مشاكل وحلول ذات صلة

اضيف بتاريخ: Sunday, April 23rd, 2017 في 03:30

كلمات مشاكل وحلول: , , , , ,

2 رد to “البنت اللي بحبها سابتنى و راحت لغيرى”

  1. Dr
    24/04/2017 at 04:48

    وماتزعلش ان كانت اختارت غيرك، ربناكاتب لك الخير مع غيرها وبيجي يوم بتشعر كم ربنا اكرمك لمااختارت غيرك، أما هي فستتعب لأنه بحسب مواصفات الشخص الذي اختارته فلا أظنها سترتاح معه، لكن أنت لاتجعل نفسك احتياطي واسحب نفسك فورا حتى لو حاولت التقرب بحجة الصداقة والأخوة فلا صداقة بين ولد وبنت

  2. Dr
    23/04/2017 at 22:14

    ابعد تمام، مافيش صداقة بين بنت وولد، الدين بيقول كده، انت كان المفروض تدق باب أهلها وتتقدم لها من زمان، بس غلطت ودخلت في علاقة غلط فلايصح لك إقامة علاقة معها، المهم الآن عي اختارت غيرك فابتعد عنها تماما واختفي من حياتها،

اترك رداً أو حلاً لهذه المشكلة