مين اللى غلط انا امى وابويا القرين

فى الحقيقة انا مش عارفة ابتدى منين بس اللى عرفاه انى مت فى كل يوم عشته فى حياتى مش عارفة انا اللى غلطانة ولا أهلى ولا فعلا حكاية انى كان ليا قرين من تحت الارض عشقنى وبيحبنى مش عارفة اذا كانت صح ولا لا ومش عارفة اخرتها ايه حاسة انى ربنا غضبان عليا وبرده مش قادرة احدد اذا كنت انا غلطانة ولا لا مع انى والله العظيم صريحة جدا مع نفسى وباجلد نفسى لما اكون غلطانة
انا بنت لطيفة جميلة رقيقة وحساسة وطيبة حقيقى دى انا والله عندى
– أم قاسية ومستفزة تضرب وتشتم وتسوء سمعتى وتستفز
– أب قاسى ميعرفش يعنى ايه ابوة شكاك فى كل حاجة ضرب وشتيمة واهانة واستفزاز وشك وتحقيق فى كل كبيرة وصغيرة تصدقوا انى لو نزلت الدور الارضى فى بيتنا يقوللى نزلتى ليه وعشان ايه وبتعملى ايه واطلعى فوق بسرعة
– أخ يعتبر مش اخ بنكره بعض هو اصغر منى بسنتين بس على طول بنتخانق والسبب “ر ” سامحنى يارب وسامحونى انا مش قادرة اقول عليها امى
البداية كانت من وانا عندى 16 سنة كنت طفلة بريئة متعرفش حاجة ماتفهمش حاجة عايشة وخلاص المهم رباب اللى هى أمى مكنتش قريبة منى لانها باختصار أم طفلة فى كل تصرفاتها عمرها ما حضنتنى عمرها ما قربت منى اسهل حاجة عندها كان انها تضربنى بالقلم ده كان اقل حاجة عندها على طول شتيمة واهانة ياما قطعتلى شعرى بسنانها ياما رقدت فوقى على الارض وشلت حركتى وضربتنى عارفين وصلت لدرجة انها عرتنى من هدومى مرة وهى بتضربنى علشان تخربش جسمى وكمان ده حصل قدام اخويا لما كنت فى ثانية ثانوى كانت تضربنى بالرجل فى بطنى وانا مرمية زى الكلبة على الارض ياما اغتصبتنى جسديا ونفسيا مكنش ضرب عشان تعلمنى كان ضرب قى باطنه غل زى ما يكون واحد بيغتصب واحدة
كانت بتشوه سمعتى عند أبويا وتشككه فيا كانت بتقوله حاجات خاصة بالبنات زى الدورة الشهرية والسويت كانت مفهماه انى اللى تعمل سويت تبقى مش كويسة ومش محترمة مع انى مكنتش باخرج من البيت وهو كان بيصدقها ويشتمنى وطبعا انا كنت باشتمها من الغذاب اللى شفته على ايديها اصل خلاص كل الحواجز اللى بينا اتهدمت مبقاش فيه احترام ولا حنان ولا محبة
كمان اخويا كان بيضربنى معاها وكرهته فيا وعايشين وكأننا مش اخوات كمان ممكن اى واحدة من قرايبنا تحكيله مشاكلها وهو قريب منهم وبيعذرهم فى مشاكلهم وبيحاول يلاقى حلول لمشاكلهم لكن انا بيكرهنى وعمره ما قرب منى وفيه بينا حساسية رهيبة صنعتها “امه ” ربنا يسامحنى لانى مش قادرة اقول عليها امى لانها متعرفش يعنى ايه امومة ومحدش يقوللى امك اللى شالتك وربتك ياما أمهات بيخلفوا ويرموا او يقتلوا ولادهم
جسمى نحس من الضرب كنت الاول اهرب منها عشان ماتضربنيش لكن بعد ما جسمى نحس كنت باقف قدامها تضربنى
لحد ما اصحاب السوء استلمونى وخلونى اكلم ولد كان فى تالتة ثانوى اكبر منى بسنة وحبيته جدا جدا وهو كمان كان بيحبنى أوى وكان طيب جدا دى حقيقة ولحد دلوقتى بيحبنى ومش قادر ينسانى المهم حبيته جدا وعشنا قصة حب جميلة لحد ما ابويا وامى عرفوا الموضوع وطلبت منى انها تشوفه وهو فعلا وافق وقابل أمى واتاكدت انه بيحبنى جدا المهم بدل ما تقرب منى وتعلمنى الصح من الغلط لا كل اللى قالتهولى عيب كده وما ينفعش تعملى كده طبعا كلام ما يقنعش اى حد وخاصة انى كنت بحبه جدا فضلت اكلمه من غير ما تعرف وللاسف الحب الشديد تطور لقبلات واحضان كنت باحس بحاجة غريبة انى مش مبسوطة كنت باحس انى مجبرة انى اعمل كده المهم اول اما دخلت اولى كلية العرسان اتقدمولى كتيير منهم واحد كان مذيع الحقيقة انا كنت صغيرة وحكاية المذيع دى زغللت عينيا وكمان امى وابويا اصلهم قدام الناس طيبين جدا وبيخافول يحرجوا حد حتى لو كان على حسابى انا واخويا المهم سيبت حبيبى وكان هيموت فيها وتعب جدا وزى نهاية كل القصص قاللى المهم تكونى انتى مبسوطة كان شهم وبيحبنى بس امى غوتنى بشهرة وفلوس المذيع فوافقت عليه واتخطبنا لكن هههه طلع انسان غريب هو كان بيصلى وبتاع ربنا بس كان بيشتم الناس وبيستهزأ بيهم مكنش بيحبنى مكناش بنتكلم كنا بعيد جدا عن بعض أهننى مرتين وطبعا اهلى ضغطوا عليا عشان اكمل ذلونى وعلمونى انى اطاطى راسى استباحوا جسمى بالضرب فاستبحته المهم فسخت الخطوبة وفى الفترة دى حبيبى رجعلى لانه مكنش يقدر يعيش من غيرى واتقدملى واحد تانى وانا كنت عبيطة وعايزة اتخطب وافرح وفى نفس الوقت اخلص من عذابهم واتخطبت له مع العلم انه امى وافقت عليه علشان تقول للناس انى انا اللى سيبت خطيبى الاولانى مش هو ههه لا وكمان كانت عارفة انى خطيبى التانى بيشرب حشيش زى كتيير من الشباب قربت منه جدا وتطورت العلاقة للقبلات والاحضان المهم فسخت الخطوبة بعد شهرين كنت وقتها فى تانية كلية وطبعا كان العذاب والضرب والاهانة مستمر حتى وانا مخطوبة كنت باحس ساعات انها بتغير منى كل ما تخطب المهم اتخطبت تالت مرة لواحد غنى جدا بس كان بيشرب برده حشيش وعمل علاقات مش كويسة قبلى المهم انا صبرت عليه كتيير جدا اصلى مكنش قدامى غير انى اصبر وفسخت الخطوبة بعد ما قرفت وتعبت من اهانته وتصرفاته لدرجة انه كان عاوز يتجوز واحدة اجنبية عشان ياخد الجنسية الكندية واحنا مخطوبين شوفته عذاب اكتر من اللى انا فيه ده
قالولها يمكن حد عملها عمل عمى جابلى واحد ضامنه جدا بيعرف فى الاعمال والحاجات دى المهم قعدنى قدامى وقاللى غمضى عينيكى وافردى ايديكى قدام فى مواجهة بعض عملت كده وبعدين قال” لو كان عمل ارفع ايديها اليمين فوق “طبعا كان بيخاطب الجن اللى بيتعامل معاه فا ايدي ما اتحركتش قال لو عشق من تحت الارض ضم ايديها فعلا لقيت قوة بتدفع ايدى وبيضموا على بعض انا كنت مركزة وفى وعيى حتى عشان اتاكد حاولت انى ابعد ايدى القوة كانت اقوى منى والراجل قاللى سيبيه وعرفت انه عشق من تحت الارض وقرا كلمات فى سره وقاللى بعدها انى هاكون كويسة وقاللى انه كان ليا قرين عشقنى من اول ما بلغت كمان كان عندى دبدوب وانا صغيرة كنت باعمل معاه حاجات غريبة
المهم من اللحظة دى وانا بيتقدملى ناس وانا مش شايفاهم كويسين بالنسبة ليا وبارفضهم وطبعا مازالت الاهانات والشتيمة مستمرة
نفسيتى بقت فى الحضيض ومش باثق فى حد خالص قربت أموت نفسى وكل ما كنت اقرب من ربنا واقول خلاص حياتى هتتغير للاحسن الاقى كل قلم والتانى وارجع ابعد تانى نفسى افهم مين الصح مين الغلط انا غلطت ولا القرين ده حكايته صحيحة تعبت وكت مليون مرة

مشاكل وحلول ذات صلة

• ممكن يتردلي اللي عملته وخطيبي يحب غيري
• ابن عمى اصبح يتعمد جرحى بعد أن صارحنى بحبه
• مخطوبه بس مش سعيده
• مخطوبة وحاسة اني مرتبطة بطفل
• كرهت الارتباط باي شاب بعد الخطوبة لثلاثة
• الحب الاول ضاع بسبب الطباع
• اجاري خطيبي ولا اوقفه وامنعه