توفت حبيبتى بعد انفصالنا

المشكله ممكن تحسوا انها دراميه شوية ولكن هى كارثه مش مجرد مشكله
من 4 سنين كنت مرتبط ببنت وبنحب بعض وكنت ناوى انى أتقدملها رسمي ولكن كنت مستنى الظروف تتحسن ، عرفتها فى البدايه عن طريق خطيبة صديقى (كان زى اخويا) ، كنت بثق فى حبيبتى جداً وبثق فى صديقى لانى كنت أعرفه زياده عن 10 سنين ، فى يوم جه وقالى ان حبيبتى بتحاول تكلمه وتغازله و عرضلى سكرينات لكلامها معاه وتقليلها منى معاه وانه رافضها لانه بيحب خطيبته وجه قالى علشان ميبقاش مضحوك عليا وشوية كلام عن اننا اخوات والعشره متهونش الا على ولاد الحرام
انا مصدقتش كلامه وقررت أسألها بصراحه وأوريها السكرينات واللى هى هتقوله انا هصدقه لانى بثق فيها اكتر من صديقى
لما واجهتها كانت متفاجئه من كلامى وكل ما أسألها الكلام ده صح ولا لا مكنتش بترد وبتبصلى وتسكت فطبيعي انى قولت ان الكلام ده حقيقى وانفصلنا
بعدها ب 8 ايام خطيبة صديقى كلمتنى وقالتلى انها عرفت بموضوع الانفصال وأسبابه وان خطيبها (صديقى) كداب لانها كانت شاكه فيه فدخلت على الايميل بتاعه ورسائل الموبايل واكتشفت انه كان بيحاول يكلم حبيبتى وهى كانت رافضه وقالتلى ان المفروض أصالحها وأسافرلها (هى فى بلد تانيه)
حاولت أكلمها كانت مبتردش لحد ما قررت أسافرلها عرفت من خطيبة صديقى و والدتها انها توفت وطبعاً مصدقتش ولكن اتأكدت بعد كده لما شوفت قبرها
دخلت بعدها فى حالة يأس وضميرى بدأ يأنبنى لدرجة انى كنت حاسس انى السبب فى موتها!! وبدأت أتحول من شخص حسب كلام الناس (محترم) لشخص سئ فعلاً تحولت لأسوأ شخص بيت بارد واهملت كل حاجه حتى دراستى وكلمت بنات كتير (عارف انه حرام ولكن ده كان صدمه) كنت بكلم بنات كل يوم وكل دقيقه لمدة سنه وبعدها فوقت لنفسي ومذاكرتى وبدأت أبعد عن الناس وارجع لشخصيتى القديمه ، فى نفس الوقت كنت حاسس ان قلبى بقى تلج او مات وبدأ شعرى يبقى أبيض من الحزن وانا كنت 17 سنه!!!
قررت أعتزل الكلام مع البنات حتى لو ماشي فى الشارع وواحده سألتنى على حاجه مبقدرش أرد عليها وبمشي وأسيبها مش قادر أكلم أى بنت حتى لو كلام عادى فعلياً!!
ولما بنت قررت انها تدخل حياتى فجأه بقيت أتخيلها انها حبيبتى اللى ماتت وكنت بتلغبط وأنادى لها باسم الأولى!! لحد ما عرفت انى ما زلت مريض بالأولى وقررت أبعد عن دى كمان لانى مش قادر أحب واحده تانيه مش قادر أتقبل فكرة ان فيه واحده تانيه ممكن تملأ قلبى
كل ده مكنش حد يعرفه لحد فتره قريبه لما قررت أحكى لأمى على اللى خلانى متغير 4 سنين متواصلين وخلانى كبرت قبل أوانى كانت بتسمع الكلام ده كله وهى فى حاله لا يرثى لها
انا مش مهتم ان حد يحل المشكله دى لان واضح ان ملهاش حل بس لو فيه نصيحه اتمنى تقولوها

مشاكل وحلول ذات صلة

• بحب اخو خطيبى
• اسيب حب عمرى وارضى ابويا بأى جوازة؟
• كان نفسى اتستر واجيب اولاد زى اى بنت
• اتفقنا على الزواج لكن حبنا بيقل
• انا وهو قرايب وبنحب بعض
• اخاف ابن خالي يكون بيتسلى معي ولا يريد الزواج
• بحب واحد اكبر منى ومش عارفة اقرر