السلام عليكم ورحمه الله
أنا عندى 21 سنه حبيت واحدة جدا جدا بطريقه لا يمكن تخيلها بقالى حوالى 7 سنين بحبها بس انا مشكلتى أنى خجول جدا مكنتش بعرف اوصلها احساسى او حتى اكلمها ولانى انا مهتم جدا بدراستى فمليش خالص باى علاقات انا مهندس كمبيوتر ومن الناس المتميزة جدا فى المجال دة ووقتى كله مش ملكى ولكن بحب البنت دى من ايام الثانوى عملت كل حاجة عشان الفت نظرها لدرجه انى كنت احيانا بزاكر فى البيت الحاجة اللى هاخدها فى الدرس واسيب الدرس واستناها قدام الدرس بتاعها عشان اشوفها
كنت بعمل اى حاجة عشان اكون فى نفس المكان اللى هييا فيه وكنت متابعها جدا وهيا كانت ملاحظة كدة هيا وزمايلها وكنت بحس بتجاوب منها فى نظرات عنيها وابتسامتها لكن برضه مكنتش بعرف اكلمها
ولما دخلت الجامعه دخلت جامعه فى محافظة تانيه خالص غير اللى انا فيها هيا كانت ادبى ومكنتش بتزاكر اوى
أنا كنت علمى والحمد لله ربنا كرمنى ودخلت كليتى فى المحافظة اللى انا فيها
حاولت انى اعمل اى حاجة تبينلها انى لسه بحبها
لدرجه انى كنت احيانا بسيب محاضرات فى كليتى واسافر المحافظة اللى هيا فيها عشان بس اشوفها واطمن عليها
كانت بتبقى فرحانه لما بتشوفنى بس انا للاسف مكنتش بعرف اكلمها لانى دايما كان بيبقى معاها شله بنات وعددهم كتير ومكنش بيجيلى فرصه انى اكلمها
وحتى جات كذا فرصه لكن انا مكنتش بعرف ايه اللى بيحصلى
كنت بحص انى بتسمر فى الارض ومش بعرف حتى اقدم ليها عشان اكلمها لانى كنت بخاف لاقول حاجة غلط او ارتبك اضيعها من ايدى خالص
ويبقى ماليش عين اكلمها تانى لانى كنت اتمنى انها تكون ليا وكان غرضى شريف جدا انى ارتبط بيها وعمرى ما تمنيت حد غيرها
ففكرت انى اول مرة اكلمها فيها لازم اكون بعرف رأيها انى اطلب ايديها بعد لما ابدأ اكون نفسى
صممت انى فى الاجازة هسافر شرم الشيخ واشتغل عشان اكون نفسى عشان اخطبها وابقى يعتمد عليا
بس برضه فضلت طول مانا فى الدراسه اروحلها عشان اعرفها انى لسه بحبها وكنت بروحلها يجيى فى الاسبوع مرتين او تلاته وبسافر يجيى ساعتين فى الطريق رايح بس عشان كانت بعيدة عن المحافظة اللى انا فيها
وكان الامن بيرفض انى ادخل الكليه بتاعتها كنت بفضل واقف قدام الباب بال 3 ساعات لحد لما تخلص محاضراتها وتطلع برة الجامعه عشان تجيب حاجة عشان اشوفها تخيلو لما افضل 3 ساعات بدور بين الناس كلها عليها لحد ما الاقيها وفضلت على كدة لحد لما خلصت امتحانات نص الترم وفى اخر يوم فى الامتحانات وانا راجع حجزت تزكرة لشرم الشيخ وجهزت الشنطه وفى نفس اليوم سافرت شرم الشيخ وبالفعل بواقع خبرتى الكويسه اشتغلت فى فندق كبير فى مجالى برضة فى صيانه اجهزة الفندق والسيستم وشبكات الفندق وكدة
وبدأت اعمل شغل مع واحد تانى هناك وبدأ الشغل يكبر وبدأنا نعرض تعاقد مع فنادق تانيه والحمد لله اتقبلت وكل حاجة بقت تمام
كنت باخد مرتب كويس جدا جدا فكرت انى اقعد حوالى شهرين هناك وانزل اكمل الترم التانى وامتحن واسافر الاربع شهور بتوع الاجازة الكبيرة وانزل على بدايه الدراسه اللسنه الجديدة هيكون معايا مبلغ كويس جدا اخطبها بيه
وفعلا كنت ببقى فرحان جدا وانا بمسك فلوس فى ايدى وانى اشتغلت وانى قربت للحلم بتاعى وبعد شهر بالظبط كانت لسه الدراسه بادئه وانا لسه هناك كنت هنزل بعد شهر من بدأ الدراسة او شهر ونص
بكلم واحد من صحابى عرفت منه انها اتخطبت بقيت مش عارف اعمل ايه والدنيا اسودت قدامى مبقتش انزل الشغل وحسيت انى الفلوس ملهاش اى لازمه من غيرها
فضيت الشغل هناك مع اللى كنت شغال معاه
ونزل البلد وانا مدمر ومليش مزاج حتى انى اروح الكليه او اعمل اى حاجة ومرضتش اروحلها هناك تانى عشان مضايقهاش ولنى كنت خايف على شعورها
عدت سنتين وانا بتقطع من جوايا بعدها اتجوزت حسيت انى بموت بجد
خلال السنتين دول برضة معرفتش انساها وكنت على اأمل ان خطوبتها تتساب مش انانيه لكن لانى عارف انا بحبها قد ايه وعارف انى هحافظ عليها اكتر من اى حد تانى
خلال الفترة دى بدأت اشغل نفسى بالدراسه مقدرتش انساها برضه حتى بعد ما اتجوزت عدى لحد دلوقتى يجيى 4 شهور وانا برضه لسه بحبها ومش بحلم غير بيها انا عارف انى دة مش من حقى بس بجد غصب عنى أنا حبيتها اوى طول الفترة دى وانا مفيش تفكير غير فيها
انا مع نفسى جدا ومليش علاقه باى حد لانى مهتم بمجالى بس الاوقات اللى بفضى فيها بتقطع لانى بفتتكرها ومش عارف اعمل اييه
ورافض حتى انى احب حد تانى
رغم انى فى ناس حبتنى وكلمونى بس انا كنت بحاول اخلع لانى مش عاوز اعيش مع حد ويكون احساسى مع حد تانى
أنا اولا اسف على الاطاله لكن انا حكيت كل دة عشان اعرفكم جزور الىل انا فيه دة من اييه
أرجوكم حد يساعدنى ازاى انساها
الموضوع بقى مستحيل بجد بالنسبه ليا لسه بحبها ومش بفكر غير فيها غصب عنى
أرجو الرد
الحب الاول
حبيتها واتجوزت غيري ولسه بفكر فيها
اضيف بتاريخ: Wednesday, December 27th, 2017 في 06:03
كلمات مشاكل وحلول: الجامعة, الحب, الدراسة, الكلية, بنت, حب, شاب, شرم الشيخ
يااخي العزيزة السلام عليكم ورحمة الله وبركاته لاشك ان الحب شئ عظيم في الحياة لكن لما يكون من الطرفين وحبك للفتاة من طرف واحد وهو انت اما هي فلم تكن تحبك ابدا وانما ربما كانت معجبه بك وبوسامتك واخلاقك و طريقة تعاملك مع الاخرين ترددك وصمتك الغير مبرر له اضاع منك الفتاة والا كنت عاوزها تجري وراءك وتقولك والله اني بحبك ومعجبه بك وعاوزك تتقدم لي عمر ده مايحصل من اي بنت مهما كانت الظروف انت بخجلك وحياك ضعيت البنت ولايجدي االبكاء على اللبن المسكوب اللي راح ماعاد يرجع وكل شي انتهى واحنا ولاد النهاردة عايزك تفكر في مستقبلك ياباشا حرام عليك تعمل في روحك كلدا اللي خلقها خلق احسن منها مليون مرة ياجدع جرى لك ايه ماتفوق ياابني وتبص لروحك ومستقبلك انت الحمدلله شاب وكسيب وعندك صنعة تاكلك الشهد احسن من غيرك من الشباب الضائعين قول الحمدلله على النعمة اللي ربنا اعطاك اياها وطور نفسك للافضل ولاتلفت الا لشغلك والسعي فيه وتاكد ان ربنا عزوجل بيؤفقك ويكرمك بكل الخير ويسهل امورك ويفرجها عليك من اوسع ابوابه من يتقي الله يجعلله مخرجا ويرزقه من حيث لايحتسب هتلاقي نصيبك لامحال مع بنت الحلال اللي تشرفك وتستاهلك وتقدر مشاعرك وتصونها وتسعدك طوال حياتك انسي تلك الفتاة واعتبرها ماضي وانتهى واطوي صفحتها للابد وابتدي حياتك من ثاني بوجه مشرق وبشوش وتفاؤل كبير بمستقبل واعد ومشرق باذن الله وحافظ على تقربك من ربنا عزوجل في اداء الصلاة في اوقاتها واكثارمن قراؤة القران والصوم وكثرة الاستغفار والصلاة على النبي والدعاء لله عزوجل بان يؤفقك ويبارك لك في رزقك ويوسع عليك ويكرمك بالزوجة الصالحة في حياتك والله يحب دعوة عباده المضطريين الملهوفين وبيستجيب لك وبتلافي كل الخير والرضا والسعادة والامان والطمانينة والاستقرار طوال عمرك ان شاء الله
ياباش مهندس منورنا عامل ايه ؟ ! ، طاب وقتك !!! …..
بص هكلمك بالبلدي :: فوكك ،، أمعلم انت شاب وممكن تشاور على اى انسانة انت عايزها ،، فكبر دماغك ،، وبعدين اهوه ما انت عملت كونترول على نفسك ومروحتلهاش بعد ما اتخطبت عشان متأذييش مشاعرها وكدة ، طب معملتش ليه من الأول الكونترول ده وفضلت تروح ورا مشاعرك وتسيب محاضراتك ودروسك ما انت يابني اللي جبت لنفسك الألم ده !! ، انت بتعمل كل ده ليه وعشان ايه ، دراستك ليها الأولوية حاليا وسابقا حتى اذا كنت قصرت فيها ،، وليها الأولوية بردوه من الشغل حتى بردوه اذا كنت وصلت فيه ….
بص هتعيش نفسك في الدايرة ديه مش هتخرج منها هتفضل متنطوح من أولها لأخرها لشرقها لغربها كلها شبه بعضها فيها مش هتطلع منها ،، هتعتبره درس ان في حاجة اسمها فكر واركن مشاعرك على جنب مش أى حاجة تلاقي مشاعرك رايحلها تروح تجري انت وراها والنتيجة تؤذي نفسك في الاخر !
درس أكيد ، بس شطارتك انك تكون اتعلمت منه ، انك متمشيش ورا مشاعرك كتير عشان في الاخر القولة لما هتتكسر هتنزل على نفوخك انت وبالتأكيد هتوجعك
طاب وقتك يارب بكل الخير
وأسعدك الله وفرح قلبك ياباش مهندس
أخوك الانسان الطيب
وشكرا