السلام عليكم ورحمة الله وبركاته ، أطرح مشكلتى عليكم يا سادة أملًا أن أجد عندكم الحل ، أنا طبيبة مصرية يتيمة الام قاربت على انهاء العقد العشرين أعمل بإحدى دول الخليج العربى ، تعرفت على اخت فاضلة من سلطنة عمان تحديدًا (أهل الطيبة) جاءتنى للكشف مع والدتها وتكرر الامر ده كتير لدرجة اننا بقانا اصحاب جدا جدا وبنزور بعض وبنخرج مع بعض للمولات والمراكز التجارية وبنشترى الحاجات مع بعض وعرفيتنى على أهلها وأخواتها وانا اصلًا فى الغربة ولوحدى فتعلقت بيهم اكتر واكتر لإنهم ناس طيبين جدًا وذوق خالص فى التعامل وخدومين ودمهم خفيف وحسيت بالحب تجاههم وخصوصًا أمها بموت فيها وبعدين جاتلى صاحبتى دى وفاتحتنى بموضوع الزواج من اخوها وهوا مهندس معمارى يكبرنى ببضع سنوات ، الأول افتكرتها إنها بتهزر لحد ما لقيته جاى معاها ومع والدته وايللى اعتبرتها زى أمى فى حنانها وحبها ليَّ ، وكان مستنينى تحت العيادة بعد كده وطلبنى بجد وقدام والدته ومرة فمرة لقيت نفسى اتعلقت بيه جدًا وبصراحة كنت أول مرة أحس بالحب لإن حسيت بردو إنه محترم ومثقف وعقليته متفتحة وذقه راقى فى التعامل وصوته هادى ومهندم ومش لعوب وقال انه مستعد ينزل مصر يطلبنى من والدى بأى طريقة وإنه هيعامله بالظبط زى والده المتوفى وأحسن كمان وإنه مش هيسيبنى وإنه بيحب مصر بس شرطه الوحيد هو الإقامة فى بلده وده الطبيعى ولىَّ حقوقى طبعًا إنى أزور والدى معاه فى الإجازات ، مشكلتى بئا إنى فعلًا بحبه جدًا وبفكر فيه كتير ، وفى نفس الوقت مش قادرة أتخيل إنى هنشغل عن والدى المسن مع اختى الصغيرة وهم لواحدهم فى مصر واتغرب بعيدعنهم بالشكل ده وبردو خايفة إنه ممكن يرفضه مع إن والدى بيحبنى ومتعلق بيَّ جدًا ودايمًا بيشجعنى ، فأنا الوقتى متحيرة بجد بين الحب وبين انشغالى عن والدى وعن أهلى ، مع العلم إنى بحبه قوى لدرجة الولع ولأول مرة أتكلم كده عن الحب ومش هقدر أسيبه ولا هقدر أزعل صاحبتى وأمى منى لإنى اتعلقت بيهم بجد اعمل إيه؟ بموت كل يوم وخجلانة ومش عارفة هفاتح والدى ازاى؟
فى الأول والآخر لازم يوافق الوالد أكيد حبي ، وبالنسبة للاغتراب عادى على الأقل تهربي من الأرف والصوت العالى والضرب ووجع الدماغ زيجة المصرية من الأجنبى حالياً أنجح من زواجها من المصرى بآلاف المرات والعُمانيين طيبين وفى حالهم دايماً وملهمش فى المشاكل والصراعات ، بارك الله زواجكما وعادى مصر يعنى معديتش زى الأول والعيشة فيها ماتلذش وتقدرى تتواصلى مع الأهل أكيد عن طريق الايميل وفى العطلات بالتوفيق حبيبتى .
على بركة الله ، الشعب العمانى طيوب جدا وبيحبونا كمصريين ـ استعيني بنصيحة الاخ ابو البتول وشوفي هل هوا سنى ولا شيعى وفاتحي اهلك وكلك ثقة ورحابة صدر انتى دكتورة ما شاء الله واكيد والدك واثق في خطواتك وفى قراراتك بس كله إلا الأهل ، الأهل هم ايللي با قينلك لا قدر الله لو رفضوا مثلا .. حظ موفق وادعيلنا احنا كمان (: .
◘◘◘ بسم الله الرحمن الرحيم:
أولا : أهنئك على اختيار عنوان الرسالة ( ..الحب و الضمير ..) .
ثانيا : لم تذكري أنك أخبرت أهلك بالأمر ، فلربما وافقوا .
ثالثا: إذا قلنا إن أهلك رفضوا لأنهم محتاجون إليك معهم ؛ أبوكِ طاعن في السن و أخوك ما زال صغيرا ، فهل ستتركينهم و قد وثقوا فيكِ !!؟
رابعا : الحب في الغربة مشوب بالاحتياج و الانتماء ، و ربما الوحدة و الفراغ ، و لا أظنك أرسلت رسالتك هنا و قد عزمت أمرك قبلها . ما دمتِ طلبت نُصحَنا فها هو ذا .
خامسا : أنتِ طبيبة ؛ و الحزم شيمتك ، و ما يحتاج إلى بتر بترتيه ، و ما يحتاج إلى الإبقاء عليه أبقيت عليه ، فأيهما يستحق الإبقاء عليه : ( حبيبُكِ ) أم أهلك ؟
سادسا و أخيرا : أهنئك ( مرة ثانية ) على اختيار عنوان الرسالة .
◘◘◘ و الله أعلم ◘◘◘
عادى حبيبتى هى الحكاية هتكون صعبة بس فى أول شهور جواز لكن بعد كده هتتعودى مادام بتحبيه وبتحبي اهله ، وبعدين وسائل التواصل الاجتماعى خلاص قصرت المسافات بين البلاد ، أنا برضو مصرية متجوزة من أجنبى وكل أسبوع بكلم أهلي صوت وصورة وفي الاجازة الكبيرة بنزل مصر أنا والعيال عادى يعنى ، وربنا يتمملك بخير يارب ، شعب عُمان بردو شعب طيب جداً جداً وبيحبوا المصريين. تحياتى
شوفي يااختي الطبيبة من مصر لاشك ان الزواج ستروعفاف للمراة ومسوليات عظيمة كزوجة وام للاولاد وحياة جديدة للمراة كل اللي ذكرتيه عن هذالشاب العماني وعن اهله كويسه بس عايزك تعرفي هل الشاب سنى او شيعي لانواغلب الشعب العماني مذهبهم شيعي اباظية وانت فتاة مصرية سنية وقد تواجهك صعوبات في التعامل مع عاداتهم وعباداتهم ولهم معتقدات مخالفة للدين ولماجاء في كتاب الله عزوجل وسنة نبيه عليه الصلاة والسلام منها 1- انكارهم رؤية الله عزوجل في الاخرة 2- صفات الله ليست زائدة على ذات الله ولكنها هي عين ذاته 3-يعتقدون ان افعال الانسان خلق من الله 4- يزعمون بان القران مخلوق ومن يرتكب الكبائر يكفرونه اتمنى ان الصورة اتضحت لك وعرفت حقيقة من يتبع هذا المذهب المخالف لمذهب اهل السنة والجماعة ويجعلك ترفضي الزواج من هذالشخص تماما وثاني حاجة ابوكي بحاجة لك توقفي معه في اخرعمره ويريدك تعيشي بجواره بدل من الغربة اللي انت عايشه بها ربنا نشاء الله بيكرمك بابن الحلال من بلدك ومن اهل السنة والجماعة وهتلاقي معه كل الخير والرضا والسعادة والاستقرار في حياتك
من كلامك انك قربتي تدخلي علي سن التلاتين و انتي مغتربة و مش عايشة في مصر يعني العرسان صعب ييجوا ليكي و انتي مسافرة اصلا فبالتالي الشخص ده هو و عيلته فرصة كويسة جدا أما بالنسبة لوالدك المسن فانتي حاليا مش قاعدة معاه و جوازك مش هيزود غيابك عنه اكتر من الشغل برة مصر و كمان فرحة عمره هتبقي انه يتطمن عليكي فالعقل بيقول ان مدام ده فرصة كويسة فالاحسن انك تكملي فيها و ربنا يوفقك