تكلمت معه لأقنع صديقتي بألارتباط به .. فأحببته

انا واحدة عايشة برا مصر و صحبتي ارتبطت بشاب 4 سنين بس سابها ف الاخر وعملها زي عقدة ومبقتش ترضى ترتبط بأي حد تاني بعده بس هي خلاص رجعت لربها واتقربت من اهلها اكتر ومبقتش حابة ترتبط غير ارتباط رسمي
وكان في واحد اكبر مننا ب 4 سنين وهو في جامعة يعرفها من وهما صغيرين وكلمها فترة مش قصيرة وكان بيحبها جدا
وكلمة بيحبها دي قليلة يمكن بيعشقها كمان وقالها مستعد استناكي لحد ما يتقدم رسمي بس يبقا المبدأ موجود عندها انها تبقا موافقة عليه بس هي مش بتديه رد وبتقوله ربنا يسهل وكانت معلقاه اوي ومش عارف يعمل ايه وهي بصراحة كانت لسا طالعة من العلاقة السابقة وكانت نفسيتها متدمرة ..
ف المهم قالتلي كلميه انتي وفهميه اني مش هقدر ارتبط ولا اوافق على اي حد دلوقتي وخصوصا انو عارف موضوع الشاب اللي سابها دا وعاذرها جدا وصابر عليها اوي .. راح جه كلمني لسا فاكرة اول مكالمة قالي انتي ..
قولتله اه انا صاحبتها وبتحكيلي على كل حاجة وبدأت اشرحله وانها مش هتقدر توافق دلوقتي واصبر عليها شوية ولو بتحبها بجد هتستناها وكده وكلام كتير من دا .. المهم قالي شكرا وربنا يخليكي ومش عارف اقولك ايه .. وبقينا تقريبا بنتكلم كل يوم في الموضوع بتاعهم وكنت بضبطلهم كمان يشوفها واحنا خارجين من بعيد واعملهالها مفاجاة .. او مثلا اخرج انا وهي واقوله لو عايز تشوفها من بعيد احنا ف الحتة كذا وييجي يشوفها ويمشي وكان بيبقا مبسوط اوي وانا كمان كنت مبسوطالهم والله ..
المهم بعد فترة يمكن 5 شهور واحنا بنحاول في الموضوع دا بس هو بصراحة زهق وجاب اخره وغير كدا هي كمان كانت بتعامله ببرود عشان تصده ومتعلقوش بيها .. والفترة دي كلها كنا بنتكلم ولما الموضوع بتاعهم خلص فضلنا نتكلم بردو ويقولي انتي زي اختي بالضبط واوعي اشوفك بتكلمي ولاد مثلا متعرفيش هعمل فيكي ايه ويهزر وكدا بس احيانا كنت بحس انو بيلمح لحاجة بس مش بيرضى يقول عشان مش عايز يغلط نفس الغلطة انو يعترف لواحدة بحبه ليها وتبقا مش بتقدره او تعمل نفس اللي عملته صحبتي ..
بس جت عليه فترة سافر فيها مصر واتغير اوي ساعتها عشان الاحداث اللي كانت بتحصل ونفسيته كانت تعبانة اوي بس كنا بنتكلم وكنت بخفف عليه اوي وبهتم بيه جدا وهو كمان كان يفضل يسأل عليا ويهتم بيا حتى لو مشغول على الاقل يسأل ويقفل علطول ..
وانا من ساعتها وانا حاسة اني اتعلقت بيه اوي عارفة ان احنا ملحقناش نتعرف ببعض او حتى نعرف بعض شخصيا بس مقدرش اقول غير اني في الفترة دي حبيته جدا بس مفكرتش ولا جه في بالي الموضوع دا غير لما اتأكدت منه 100% انه مبقاش يفكر في صاحبتي دي بس مهما حصل انا عمري ما هرضى ارتبط بيه لاني هبقا متاكدة انو لسا بيحبها عشان محدش بينسى حد بالسهولة دي وللعلم كلامنا كان كله على النت.. المشكلة بقا في انو لما رجع من مصر اخويا الكبير عرف اني بكلمه و سحب مني اللاب والموبايل وكلم الشاب دا وقاله ياريت متكلمهاش تاني وكلمه بإحترام والتاني رد عليه بإحترام بردو وقالو انا اسف وانا غلطان وكدا وانا عمري ما فكرت اني اتسلى بيها وصح انا مرضاش على اختي كل دا ف عشان كدا بتأسف وبقولك انا غلطان ..اخويا بقا مردش ع الرسالة دي ورجعلي الموب واللاب وشبه رضي عليا .. بس عرفت انو كلم صحابي وبيطمن عليا من ناحيتهم وبيسأل عليا كل يوم وانا بصراحة متدايقة جدا عشان مش هكلمه تاني مع اني عارفة انو غلط بس مش عارفة اعمل ايه حبيته اوي وبدعي كل يوم في صلاتي ان ربنا يجمعني بيه في الحلال وانه على الاقل يفكر فيا زي ما انا بفكر فيه ..
بس مش عارفة بجد اعمل ايه تعبانة اوي وبعيط كل يوم وزيادة على كدا عرفت انو جاب رقم صحبتي اللي كان عايز يرتبط بيها وكلمها عشان يسألها عليا بس بردو اكيد مش دا السبب بس .. انا دلوقتي عارفة هتقولولي فين المشكلة في كل دا ؟! هقولكو انا نفسي مبقتش عارفة حاجة غير اني نفسيتي زي الزفت ومش قادرة اتخيل اني مش هكلمه تاني ولا هعرف عنه حاجة غير عن طريق اصحابي بجد والله تعبانة اوي ومش عارفة اعمل ايه وبالله عليكو محدش يتريق ولا اشوف اهانه من اي حد اللي عنده حل او افادة ربنا يكرمه ويفيدني واللي هيتريق او هيقول كلمة ملهاش لزمة هقوله ” فلتقل خيرا او لتصمت ”
واسفة جدا على الاطالة حسيت اني بكتب قصة حياتي 🙂

مشاكل وحلول ذات صلة

• حبيبي تركني وصديقتي ستفضحني
• ماذا افعل للتخلص من الحب الاول لكى لا اظلم خطيبتى
• خائن ولكن لا أستطيع نسياته
• انا مش عارف انسى خطيبتى
• بحبها ومش حستحمل تكون لغيرى
• احبه ولا استطيع اعتباره صديق
• احببته ولكن عاداتى وتقاليدى ضد استمرار علاقتنا