عندي 22 سنه مشكلتي ان فيه انسان عرفته عن طريق شغل وكنت لسه بدرس المهم اني عرفته سنه بس كانسان عادي يعني مكنش بينا حديث ولكن خلال السنه دي مثلا اتكلمنا 4 مرات وكان لاسباب في الشغل وكنت بلاحظ انه بيتعامل مع البنات بحرص جدا انا حتي كان كلامه قليل جدا علي قد الكلام مش بيزيد عن عشر دقايق وانا عشان جد كنت بتعامل معاه كده المهم ان بعد السنه دي اتصل بيا كنا في العيد وكده عيد عليا وقفلنا بعدها باسبوع اتصل بيا واعد يتكلم عن نفسه كتير وقالي انه مش مرتبط وان اهله عايزينه يخطب وبيجيبه لي بنات بس هو جرب الموضوع ومش عاوز يتجوز كده المهم انا قلتله لاء عادي ممكن تشوفهم جايز يكون حد مناسب قالي لاء مش عاوز كده المهم نهينا المكالمه وانا مستغربه انه كلمني واتكلم عن نفسه فلقيته بيكلمني تاني بليل فاتكلمت معاه بحرص شويه قالي انتي مستغربه انا بكلمك ليه مش كده قلتله اه ياريت تفهمني بعدها قالي انه معجب بيا وانه اتشد ليا فقالي اننا عايزين نعرف بعض اكتر واجي اتقدملك علشان منلبسش الدبل ونسيب بعض المهم انا عشان معرفتش حد قبل كده ولا تليفونات ولاكده اتاخدت وقلتله مش هينفع كده لازم عندي في البيت يعرفوا اننا بنتكلم قالي خلاص مستعد اكلم مامتك قلتله اني عارفه في الاصول وان لازم اهله يعرفوالاول قبل مايتكلم قالي انتي عارفه انهم عايزين يختارولي زي ماقالي قبل كده بس هو هيتكلم معاهم وهيقنعهم انه ياخد اللي بيحبها قالي بس لازم نعرف طباع بعض عشان منندمش احنا بنتكلم في التليفون بس الموضوع ده مضايقني اوي اني بعمل كده من ورا اهلي بس فيه حاجه انه كان في اوقات بيستفزني في الكلام وبيحاول يعصبني عشان يشوف انا عصبيه ولا لاء لكن لما كنت باخد الامور عادي كان يقولي انتي طيبه اوي ومحترمه وانا اخترت صح وفي وقت اتضايقت منه اوي لانه كان بيلمح علي ناس مش محترمه وكده وبيتكلم عنهم قلتله بلاش تكلمني في الحاجات دي ولو اتكلمت هنبعد عن بعض ووقتها عيطت جامد اوي وقلتله هنقفل فصالحني وقالي انا مقصدش اضايقك فبعدها بيومين قلتله لازم نبعد عشان كده غلط مينفعش حتي نتكلم قالي انا كنت بقولك الكلام ده عشان اختبرك اعرف اخلاقك كويس فزعلت قالي ده حقي وانا اتاكدت انك محترمه ومتربيه المهم دلوقتي بيكلمني بس انا مش بطلبه خالص وده بيزعله واحيانا ببقا متضايقه واحنا بنتكلم عشان محدش يعرف وساعات بقول كلام يضايقه من غير قصد عشان انا مخنوقه من اللي بيحصل وخايفه من ربنا مع ان والله كل اللي بينا كلام مش اكتر هو بيحكي عن مشاكله وبس انا حتي مش بحكي وبالمناسبه هو بيشرب سجاير وعايزاه يبطلها قالي غيريني مش هلاقي احسن منك يغيرني لو فيه اي حاجه مش عجباكي انا هغيرها عشانك بس وانتي معايا هو بس محتاج حد يظبط حياته لان اهله مسافرين بعيد عنه ومش بيهتموا بيه ابدا بمعني اصح يعتبر ملوش حد غير صحابه بتوع الشغل ومش بيعد معاهم غير في الشغل وهو بيحب الاهتمام اوي يعني اني اسال عليه وكده بس المشكله اني بخاف يكون حرام كده وبحس اني مليش حق لاننا مش مخطوبين وبتكسف اصلا اطلبه مش عارفه ايه معني الحب ومعرفش اللي بيحصل ده صح ولا غلط محتاجه انكوا تساعدوني وانا مزوداها ولا ايه ولا اللي انا فيه صح علي فكره احنا بنتكلم بقالنا شهر واحد من وقت ماقالي انه معجب بيا انما هو دلوقتي بقا بيحبني لما عرف صفاتي اكتر وقالي انه مش بقا ينفع يستغني عني انا تعبانه لدرجه انه كلمه زي دي لما بيقولها بحس انها حرام مع انه عارف انه مش ممكن يتعدي حدوده معايا ابدا واني مش ممكن اعمل حاجه غلط ارجوكوا ساعدوني وعرفوني مدي صحه اللي بيحصل واسفه ع الاطاله
الحب قبل الزواج
بيحبني ومش قادر يفهم شخصيتي
اضيف بتاريخ: Tuesday, October 25th, 2011 في 23:28
كلمات مشاكل وحلول: الحب, الزواج, مشاكل الحب
انتى مكبرة الموضوع اوى لازم يعرفك فعلا قبل مايتجوزك لانه بيدور على الحب وانتى لازم تعرفى ده خليكى معاه بس خلى فى حدود بينكوا علشان يعرف انك برده محترمة بس تقوليله لو بيحبك فعلا يجى يتقدملك وماتحرمهوش منك عشان شكله فعلا بيحبك
بصراحة هوا كدة عرفك بما فيه الكفاية واختبرك وكل حاجة وعرف انك مش عصبية مش ناقص حاجة كدة غير انو يتقدملك بلاش يا بنتى تتطولى معاه لحسن تحبيه وتتعلق بيه وبعد كدة يتخلى عنك اقطعى معاه وقولى لو لازم تيجى تتقدملى ولو نيتوا كويسة هيتقدملك
كل الى اقدر اقولك عليه متعمليش حاجه من وراء اهلك
السلام عليكم اختى الغاليه واضح من كلامك انك ما شاء الله متربيه كويس اوى وانك محترمة و مؤدبه انا عايز انصحك نصيحه ما تعمليش حاجه من ورا اهلك حتى لو صغيره قال رسول الله صلي الله عليه و سلم (الاثم ما حاك في صدرك وخفت ان يطلع عليه الناس) متكلميش حد مش مرتبط بيكى رسمى حتى ولو وعدك وعود الدنيا كلها وهو لو بيحبك زى ما بيقول هييجى يتقدملك حتى لو ظروفه متسمحش هيحاول ……..وفي كل الحالات ان بعد عنك او اتقدملك انتى الكسبانه لأنه لو بعد عنك هتبقي عرفتيه احب اقولك حاجه اللي علي البر مبيغرقش متعمليش حاجه تنكسفي منها
انتم واخدين الموضوع بنيه زواج مش تهريج ولا تسالي يبقه انتي استخيري ربك كتير وهو كمان وبعد الاستخاره يتقدم لاهلك او يتقدم الاول وبعد كده استخيري ربك لانكم نيتكم خير واتخطبي ولو مش متفهمين او حصل حاجه وحشه لقدر الله يبقه انفصلوا ولو كويس وانتي مرتاحه ليه وغير ابوكي ماهايقدر يحكم عليه لانه راجل واكيد بيفهم في الناس يبقه ربي يسعدك معاه وابقي اعزمينا علي الفرح لو لي لولي لولي لولي مبروك ياعروسه