بحبها وهي بتحب شاب مش بيحبها

انا شاب 23 سنه بحب وحده آوى بس هى بتحب واحد تانى والواحد التانى ده ما بيحبهاش لانه بيحب وحده تانيه وكمان انا فيه وحده تانيه بتحبنى لكن انا ما بحبهاش(يعنى كل واحد بيحب من طرف واحد)وما اصعب الحب من طرف واحد
وانا مش عارف اعمل ايه؟ حاولت اخلى اللى بحبها انها تحبنى لكن ما حبتنيش بسبب انها مستنيه اللى هى بتحبه وعندها امل انه يسيب اللى بيحبها ويحبها هى لكن هو مطنشها
وانا نفس الحكايه اللى بتحبنى حاولت تخلينى احبها لكن انا مقدرتش ومستنى اللى انا بحبها تفقد الامل فى اللى هى بتحبه وتحبنى انا وانا عندى امل فى كده
ولما قرآت عن الحب سمعت مقوله بتقول خد اللى يحبك وما تاخدش اللى انت تحبه__بس مش عارف مين فينا اللى يستخدم المقوله دى ويعمل بيها
يا ترى استخدمها انا؟ بحيث انى اخد اللى بتحبنى وما بحبهاش واسيب اللى بحبها وما بتحبنيش لانها بتحب واحد تانى
ولا ياترى اللى بحبها هى اللى تستخدمها؟ بحيث تاخدنى انا اللى بحبها اوى وتسيب اللى هى بتحبه لانه ما بيحبهاش وبيحب وحده تانيه
انا بجد بتعذب ومحتار ومش عارف اعمل ايه؟انا بحبها آوى ونفسى تكون ليا عشان اسعدها واحافظ عليها لانى لوما اخدتهاش هى_ مش هقدر احب تانى ولا هلاقى وحده زيها لانها فيها كل المواصفات اللى انا عايزها وهى احسن بكتير من اللى بتحبنى_ كمان انا بلا فخر احسن بكتير فى كل مواصفاتى من اللى هى بتحبه__وانا نيتى كويسه فى الموضوع ده لانى عمرى ما مشيت مع بنات خالص قبل كده ولا حتى عاكست بنت وكل اللى انا بتمناه انها تسيب اللى هى بتحبه وتحبنى انا وساعتها هتقدم لها واخطبها ويبقى مشروع جواز سعيدبس ازاى وهو الموضوع معقد كده
اتمنى ان تفيدونى من خلال ارائكم وخبراتكم وجزاكم الله كل خير

مشاكل وحلول ذات صلة

• بحب اخو خطيبى
• اسيب حب عمرى وارضى ابويا بأى جوازة؟
• كان نفسى اتستر واجيب اولاد زى اى بنت
• اتفقنا على الزواج لكن حبنا بيقل
• انا وهو قرايب وبنحب بعض
• اخاف ابن خالي يكون بيتسلى معي ولا يريد الزواج
• بحب واحد اكبر منى ومش عارفة اقرر