امى متوفية منذ حوالى 26 يوم … اول امس حلمت اختى : ان احنا قاعدين فى البيت عادى انا و اختى و ابويا و اخويا و عارفين ان ماما ماتت من الفترة و قاعدين عادى يعنى و فجاة جه ع موبايل اختى رسالة و كانها من ربنا و مكتوب فيها ان ماما صحت تانى بعد ما ماتت و اننا نروح نشوفها بعد العصر فى العناية المركزة اللى كانت فيها قبل ما تموت و مكتوب فى الرسالة كلام كتير حلو عن ماما و مكانتها و كلام كتير حلو اختى مش فاكراه يالتفاصيل و فيما معناه برضه ان ماما فى مزلة اولياء الله الصالحين و كده و اننا من كتر جمال الكلام كنا كلنا بنعيط فرحانين .. و بعدين قررنا انا و اختى ننزل نروح دلوقتى و مش هنستنى وبابا قالنا استنوا مش هيرضوا يدخلوكوا علشان مش معاد زيارة بس احنا مرضناش و نزلت انا و اختى بس و روحنا المستشفى و طلعنا عند العناية و لاقينا ناس كتير مستنين ع الباب و الدنيا زحمة جدا و الاخر كلنا دخلنا و كانت العناية زحمة اوى و روحنا عند سرير ماما اللى المفروض كانت عليه قبل ما تموت ملقنهاش و لاقينا السرير فاضى المهم سالنا عليها قالولنا لا ديه خرجت و نزلت اوضه عادية فرحنا و نزلنا المهم روحنا الاوضة اللى هيا فيها بس مكانها كان مختلف عن مكان الاوض العادية و المكان كانه متغير غير اللى متعودين عليه المهم دخلنا و لاقيناها قاعدة ع السرير و شكلها حلو جدااااا و لابسة لبس حلو و مسرحة شعرها و شكلها جميل جدا و كان فى زى راجل كده واقف فى الاوضة و برضه شكله حلو و لابس بدلة و اول ما دخلنا هو طلع و بعدين اول لما ماما شافتنا قالتنا بهزار كده انتوا فين و سبتونى لوحدى ليه ؟ المهم قاعدنا نسالها هى عاملة ايه و كده و كانت بتقول انها كويسة و حكتلنا انها و هى بتموت شافت حياتها كلها قدامها من و هى صغيرة و قعدت تتملم معانا و كانت كويسة و كان معاها طبق فيه اكل و كانت عمالة تاكل منه بنفس مفتوحة كده رغم انها قبل ما تموت مكنتش بتاكل خالص و احنا كنا فرحانين فى الحلم اوى … المهم ماما فى الحقيقة كانت قبل ما تموت جالها غيبوبة كبدية و كانت بتنسى و مش مركزة فى اى حاجة .. المهم ان فى الحلم برضه خالى جه زارها و هى عرفته و اتكلمت معاه كويس و كده و بعدين نامت شوية و قامت ناسية شوية و مش مركزة فاختى سالتها انتى تعبتى تانى قالتلها لا ده من تاثير العيا انا بيحصل كده كل لما اجى انام و بعديها ببقا كويسة و قالتلها ماهو اكيد مش هرجع كويسة خالص زى الاول … المهم ان اختى لاحظت ان الراجل اللى فى الاوضة ده بيدخل كل لما احنا نمشى و بيطلع من الاوضة اول لما ندخل … و الاوضة اللى ماما كانت فيها كانت حلوة اوووووى مش زى اوض المستشفى خالص و كانت واسعة و منورة و حلوة جدااا جداااا .. المهم احنا سبنا ماما و روحنا البيت و لما روحنا جه رسالة لاختى ان ماما هيدخلوها تعمل غسيل كلوى .. بس برضه احنا فرحنا و قولنا الحمد لله قضا اخف من قضا اهو احسن ما كانت ميتة …. و خلص الحلم ع كده
الاخت العزيزة، هذه الرويا بخصوص امك والدتك خير ان شاء الله هي من الصالحين،والاودة اي الغرفة التي هي فيها كما رايتيها انت ليست كالغرف اللتي في الدنيا لانها في عالم اخر يختلف عن عالم. الدنيا التي نعيش فيها وهي ان شاء الله بشارةخير يقول الله عز وجل في القران الكريم في سورة الفرقان اية ٧٥اعوذ بالله من الشيطان الرجيم ،اولاءك يجزون الغرفة بما صبروا ويلقون فيها تحية وسلاما ، ان شاء الله هي في الجنة عليكم انتم ابناءها ان تكثروا من قراءة القران وتهبوا لها بعض منه والسلام،