طيب انا هحكي الحلم او الكابوس لان في ناس قالتلي عادي احكيه مدام مش قبل الفجر .. انا كمان عايز احكيه لان اللي ظهر مكانوش بشر دول كانو جن وفي ناس بتقول انه الجن بيكون سحر او عمل حاجه زي كده يعني اللي يعرف ده ايه يقولي .. الكابوس بدأ من شقتنا اللي في المنيا .. انا قاعد فيها لوحدي كنت خارج عادي زي اي يوم فقفلت الباب بالمفتاح ونزلت درجتين من السلم لان الشقه اللي انا فيها شقه رقم اتنين .. اول مانزلت افتكرت اني نسيت حاجه جوه فطلعت الدرجتين تاني وجيت افتح بالمفتاح ملقتش الكالون والدنيا ضلمت فجأه قومت جيت ادوس علي كوبس النور اللي جمب الجرس عشان انور نور السلم ملقتوش .. قومت رجعت لورا خطوتين مستغرب اللي بيحصل لقيت الباب اتفتح لوحده والمفتاح في الكالون مع اني كنت ماسكه في ايدي .. خوفت ادخل الشقه قومت نازل بسرعه للعماره اللي قدامنا اللي فيها واحد صحبي اسمه احمد ناديت عليه محدش رد قومت شوفته وهو نازل من العماره ناديت عليه تاني وقربت منه بس واضح انه ولا كان شايفني ولا سامعني .. قومت جريت ناحيه بيتنا التاني اللي فيه اخواتي ووالدي ومرات والدي لقيتهم نازلين من العماره ومرات والدي بتعيط ولما شافتني ضحكت ضحكه خفيفه وعيطت تاني .. وقفتهم قولتلهم انا في مصيبه وشكلي هموت قالولي نعملك ايه يعني ماكلنا هنموت وفضلت مادد ايدي شويه عشان حد يجي معايا احكيله محدش وافق .. رجعت مكان بيتنا وفتحت بالمفتاح قولت يمكن كان بيتهقيلي لقيت الكالون اتنقل ناحيه الشمال وفتحت بس بصعوبه .. اول مادخلت الباب اتقفل لوحده جامد قومت دخلت اوضتي ونمت شويه لقيت البطانيه بتتلف حوالين جسمي حاولت افكها كانت صعبه بس فكيتها .. طلعت للصاله كنت بدور ع الموبايل اللي كنت سايبه ع الكنبه مقلتوش قومت جيت البس حاجه في رجلي عشان انزل تاني اروح لأهلي ملقتش حاجه البسها قومت لابس ستارز كوره ونزلت بيه ..روحت لبيت اهلي وانا في الطريق لقيت ناس بتبصلي وتضحك وتكلم بعضها وملقتش اهلي .. رجعت تاني شقتي وانا بفتح الباب قولت لازم الاقي الموبايل عشان اصور اللي بيحصل عشان لما اجي احكي لحد يصدقني .. اول مادخلت لقيت الموبايل قدامي مكانه ع الكنبه .. قومت طالع وقفلت الباب وجيت اصوره وهو بيفتح لوحده لقيت ظهرلي ع الشاشه من قدام صورتي وحواليها شعر كتير مع ان الموبايل مفهوش كاميرا اماميه وشعري كان عباره عن ضفاير طويله نازله لحد ضهري وخيال اسود ماشي ع الحيطه وبيقرب مني كل ما ابصله وابص ع الشاشه الاقي وشي بيضحك جامد وانا اصلا مبضحكش وكان شكلي غريب جدا كان وشي لونه ابيض جامد وشعري اسود اوي .. فجأه لقيت الاكونت بتاعي اتفتح وظهرلي ع الشاشه كل الرسايل اللي بتكلم بيها مع الناس ولقيت حد بيتكلم وبيكلم وحده اسمها ايمان بيقولها انتي مسيحيه ؟ قالتله اه وهي في الحقيقه مش مسيحيه قام عاملها بلوك وفي رسايل تاني مع ناس تانيه شويه بيمدح فيهم وشويه بيشتمهم . بصيت علي صوره بروفايلي لقيتها متشاله .. بصيت علي الكوفر لقيت نفس الصوره محطوطه بس انا مبرق فيها جامد وحواليا عفاريت وجن كتير اوي ومصارين حجات ميته .. بصيت لفوق لقيت صوت طفل صغير بينادي عليا بيقولي يا هشام وبيضحك بصتله واول ماوصل لحد عنده فردلي دراعه عشان احضنه جيت اقرب منه لقيته بيضحك جامد برضو وشكله اتحول لجن قومت نازل جري للشارع لقيت بنت بنفس الضفاير اللي في شعري ولابسه ابيض بتبصلي وتقولي انت هشام الكينج ؟ انت هشام ؟ قومت بصتلها ومتكلمتش لقيت خرج من علي يمينها بنت تاني وعلي شمالها بنت تاني وكل ماوحده تخرج تقولي انت هشام ؟ وتضحك .. ده كان اخر حاجه حصلتلي بعدها حسيت بوجع جامد في جسمي وقومت وانا حاسس بنفس الوجع وجسمي منمل ومصدع اوي وقعدت اكتر من 10 دقايق باصص للسقف مش قادر اتحرك ولا ابص جمبي حتي مش مصدق ان ده كان حلم
