اتعرفنا على بعض وشعرت بانها بتحبني فقولتلها احنا اصحاب وبس زعلت وقالتلي انا بحبك ومش شايفاك صاحب، قولتلها انا ظروفي وحشة ومش مستقر في شغل، قالتلي وانا جنبك ولسه في اولى كلية ومش هاسيبك ابدا.
وعدتها اني اتقدملها وهي طالعة 3 كلية ويبقى الفرح بعد التخرج على طول واذا عرفت اتقدم قبل كده هاروح، فرحت جدا وقالتلي وانا قد الوعد.
اتحمست وعملت مشروع حطيت فيه كل الفلوس اللى كانت معايا واستلفت وهي كانت بتشجعني وواقفة جنبي، اهتمامها وحبها ليا كان مخليني طاير من السعادة.
فجأة يوم الخميس 25 فبراير كان عيد ميلادي اتقابلنا واحتفلنا بالمناسبة وقالتلي ان فيه عريس متقدملها وابوه يبقى صاحب ابوها وهو هايتقدملها بكره اللى هو الجمعة 26 فبراير وكانت ليلة امتحان اول مادة من التيرم الاول في كليتها رياض اطفال، وطمنتني وقالتلي ماتقلقش هاطفشه
جه يوم الجمعه بعتتلي بالليل ان العريس جه مع مامته وخالته ومجابتش سيرة والده، وانه في الجيش وهو خجول ومحترم وعرفت الكلام ده لما امها نادت عليها من اوضتها وخرجت عشان تقعد معاه، وبعدين قالتلي ان امه طيبة وخالته دمها زي العسل وهي معرفتش تطفشه لانها كل ما تقوله حاجة يقولها موافق واللي تشوفيه، وبعتتلي صوره.
دمي اتحرق جدا وبعدين لقيتها بتقولي انا بحبك وصارحت امي بحبى ليك ولازم تيجي تتقدملي، قولتلها صعب جدا بل مستحيل اعرف اجي اكلم اهلك لاني معييش فلوس خالص ومديون وكمان كان لسه عندي حالتين وفاة في عيلة مامتي وابويا، قالتلي اهلي لما عرفوا اني مرتبطة بيك وافقوا عليك بس تيجي تتكلم عليا وتلبس الدبلة، قولتلها هاجي بس من غير تلبيس دبل ابوها عرف ومرضاش.
فلقيتها بعتالي تقولي انا هاتخطب واضحي بسعادتي عشان وعدك ليا وقته لسه مجاش وكمان مش عايزة احط في مأزق بالاضافة الى ضغط اهلى عليا.. قولتلها طب ووعدك ليا قالتلي ده مكنش وعد ولا اتفاق.
عملتلها بلوك على الماسنجر وعلى الواتس اب.. وفضلت اعاني يوم واتنين بحاول الاقي حل زي اني اتصرف في 5 الاف ج اجيب دبلتين لكن والله معرفتش.
مبقتش اكل ولا انام وعدي مشاكل اصلا في المشروع بتاعي ودماغي تاعباني جدا، دخلت وكلمت اصحابها قالولي انها عملت اللي عليها ويكفي انها حكت لاهلها عني واني تخليت عنها لما مرضتش اكلم ابوها واشرحله ظروفي،، فهمت اصحابها اني مقدرتش اكلم ابوها لاني لازم اكون برضه مكلم اهلي وماينفعش اصغرهم وانا والدي امه متوفيه وامي ابوها متوفي وكل ده ورا بعضه وشغلي بايظ، اصحابها بعتولها اني بسال عليها فقالت لسه فاكر يعمل حاجة عشاني، وردت وقالت انها بتحبني بس خلاص شبكتها جت والفستان وانها مش هاتقدر توعدني تعمل حاجة عشاني تاني (على اساس انها عملت اولاني) واني لازم اهتم بصحتي وبشغلي واسيب الامور تمشي زي ما ربنا عايز.
بعد كده اختها كلمتني وقالتلي ياريت معتش تبعت لاصحابها تاني ومتتكلمش عن اختي عشان ماتخربش حياتها، ويوم الجمعة 26 مارس كانت خطوبتها، انا متدمر ومتضايق اوي ومش طايق اعمل حاجة غير اني عمال اجلد في نفسي عشان معرفتش اتقدملها بسبب الفلوس.
انا بحبها اوي ومش قادر اتخيل حياتي الجاية من غيرها ولا متصور انها اتخلت عني بسهولة كده وخاصة انها عارفة اني راجل وشاريها، مش عارف ايه اللي ممكن اعمله؟ وكمان انا بقيت متاكد انها مستحيل تفكر تفسخ الخطوبة دي وان الفسخ لازم يجي من طرف العريس ومن كلامها بانه خجول ومحترم وهادي واوبه صاحب ابوها يبقى خلاص الموضوع بالنسبالي انتهى.
افيدوني بالله عليكم ايه اللي بايدي عشان اتجاوز الفترة الصعبة اللي بمر بيها دي؟
