انا عندى 22 سنه من حوالى سنتين ارتبطت بواحد عنده 28 سنه قريبنا من بعيد …فى بدايه الارتباط حكالى عن ماضيه وانه كان بيحب واحده تانيه بس حصل مشكله ووراح اتقدملها واهلها رفضوه و معرفش يخطبها المهم انها سابته والبنت دى اتخطبت لواحد غيره…الحكايه دى كانت مأثره عليه اوى….المهم فضلت اقنع فيه انها مش بتحبك بس هو كان مصمم انها اتخطبت غصب عنها.والبنت دى حاليا فكت خطوبتها فى بدايه ارتباطى بيه..المهم ارتبطت انا وهو وكنت قلقانه ليكون لسه بيحبها او بيفتكرها وكل لما اواجهه يقولى لالا نسيتها والموضوع القديم كده كده بايظ …فضلت معاه حوالى 6 شهور وبعديين جالى عريس وكنت منهاره طلبت منه يتقدم او اهله يكلموا اهلى لاننا قرايب بس من الاخر اتحججلى وكان فاضلى سنه ف الكليه قالى انه كان مرتب نفسه لما اخلص كليه يتقدم ..المهم قررت ابعد عنه نهائى لحد مارجعلى تانى وطلب منى اصبر عليه يمكن ربنا يهديه وانه حياته مش متظبطه ومن هبلى رجعتله تانى وكان فاضلى سنه فى الكليه وفضلت معاه وحبيبته اكتر من الاول وكنت كل يوم بصلى وبدعى ربنا بانه يبقى من نصيبى ويكتبلنا الخير وكنا دايما اقول لربنا اكتبهولى وانا ححاول اعوضه عن اللى فات واسعدده …المهم لما السنه قربت تخلص وكنا حلويين جدا جدا مع بعض لقيته فجاه اختفى وبعد عنى …قلقت عليه …اتصل بيه مش بيرد..ابعتله ماسجات مش بيرد…كنت حتجنن لحد مافى مره اتصل بيا لوحده وقالى انه حاسس ان كلامنا مع بعض غلط..انا اتفاجات ومكنتش عارفه انطق وقولتله انت جاى بعد كل ده وتقولى كده قالى انه لحد دولوقتى مش قادر ياخد قرار انه يجى يتقدم او نسيب بعض …انا كنت منهاره جداا وقفلت معاه وبعدت ..وفعلا عرف يدمرنى نفسيااا ومش ببطل حسبنه عليه ورغم كل ده كنت بدعى ربنا انه يهدييه من ناحيتى واقوله يااارب انت ليه مش بتسجبلى دعائى …لحد مافى يووم كنت سهرانه وبدعى ربنا وجيه فى بالى ادخل على حساب الفيس بوك بتاعه رغم انى ماعرفش الباسورد بتاعه لانه دايما كان بيقعد عليه…المهم دعيت ربنا وقولتله يارب انت شايف هو ظالمنى قد ايه اقف جمبى وساعدنى اعرف الباسورد …..المهم اقسم بالله عرفت اوصل للحساب بتاعه رغم انى مش بفهم اوى وحسيت ان حصلت معجزه….وفتحت الفيس بوك بتاعه وكانت المفاجاه…..انه من اول يوم عرفته فيه وهو لسه على علاقه بحبيبته القديمه وبيتكلموا وطبعا جابوا سيرتى وقالها انه مش بيحبنى وانه مش ناوى على حاجه معايا مع انها احسن حد قابله فى حياته ..وكان بيتحايل عليها انها تحل المشكله اللى موقفه موضوعهم ويروح يتقدملها . وكمان كان مفهمها انه جيه خطبنى عشان هى مش وقفت جمبه (( عشان يغيظها يعنى )) وبعد شويه فكنى عشان مش ارتاح معايا …..وطبعا الكلام ده محصلش …انا كتر ماكنت مش مصدقه عنيا اتصلت بواحده صحبتى تيجى تقرى واقولها الكلام ده بجد…..وهو حاليا عمل فيس بوك جديد وضافنى عليه عادى لان علاقتنا دولوقتى اننا ضايفين بعض عالفيس لاننا قرايب يعنى بس مش بنكلم بعض .. وكل الناس نصحتنى انى مش اوجهه ولا اقوله انى عرفت حاجه نهائى …واسيب ربنا ياخدلى حقى وهو قادر ان شاء الله….معلش طولت عليكم بس انا تعبانه اوى معرفش ان حد ياخدنى عشان يغيظ حد تانى وكمان انا انضحك عليا حموووت واوواجهه ….جوايا غل جامد …ده اكتر انسان حبيته بجد ودعيت ربنا كتير …وهو اللى يعمل معايا كده….اعمل ايه….بجد جوايا نار نفسى تنطفى
ربنا يعوض صبرك خير ويرزقك بابن الحلال اللى يقدرك ويحافظ عليكى
انامش عاوزك تضايقي ابداانسيه خالص وفكري في نفسك وانت مشاءالله في عزشبابك والف مين يتمناك ياقمرالبنات وهومايستاهل الجزمةاللي انت لبساها خليه يغورفي داهية واشتري سعادتك وراحةالبال وربي بيكرمك ويعوضك بسيدسيدو اللي يستاهلك ويسعدك
ربنا يبارك فيكم كلكم…ادعولى بس ان ربنا يكتبلى الخير وياخدلى حقى…ومعلش وجعت دماغكوا…وحسبى الله ونعم الوكيل
واجهيه عشان تعرفيه قد ايه هو صغير وبكره ربنا ينتقم منه واهل خطيبته مش يوافقوا ويتحرق قلبه زى ما حرق قلبك وزى ما كان نفسك تعوضيه ربنا بكره يبعتلك سيد سيده يعوضك عن ده كله ده ربنا كريم اوى
احمدي ربنا كثيرا وصلي واشكريه انه نور بصيرتك قبل مايخدعك اكتر لانك كنتي وسيله يضغط بيها علي التانيه ويسيبك بس بعد نفسيتك ماتضمر ،لكن بعد ماعرفتيه علي حقيقته لازم نفسيتك تهدا ولا تفكري ترتبطي بيه ابدا،وربنا يرزقك بأحسن منه
كلنا لازم تمر علينا فترة نختار فيها غلط فى حياتنا اقسم بالله لو ربنا شايف ليك الخير مع الشخص دا هيجعله من نصيبك ل يعلم الانسان ما يدبره الله له من خير فى السر لا احب الله ثم احبه ثم احبه
ومتحاوليش لما تدعى ربنا تقولى ليه يارب مش بتستجيب ليا عشان كدا حرام الدعاء لما بيتاخر ربنا بيمنع بيه نصيبه كانت هتحصل للانسان او بيداخر له به اشياء يوم القيامة تسدعه سوف ياتى رجل يوم القيامة ويقف بين يدى الله ويقول له الله يا عبدى دعوتنى بكذا وكذا يوم كذا وكذا فيقول نعم يارب فيقول له لك حققت لك كذا وكذا ومنعت عنك كذا فيقول نعم يارب فيول له الله انظر ما ادخرته لك بما كنت تدعوا اليوم توفى اجرك ولا تظلم شئ فينظر العبد الى الخير الذى ادخرته له الله فيقول يارب يارب ياليتك لم تحقق لى اى شئ فى الدنيا من الخير الذى شاهده
ان شاء الله ربنا هيقف جنبك ويساعديك فكرى فى الحاجات السيئة اللى عملها معاكى وانتى هتنسيه ان شاء الله
أختي الغالية أنا أفهم معاناتك جيدا وإعلمي جيدا أنه لا يستحقك وأن الله سبحانه يريد لك الأفضل وكل ما حدث لك هو إمتحان من رب العالمين وبرهان على حب الله لك لأنه وضح لك نية هذا الشخص قبل فوات الأوان وقبل أن تقعي في الهاوية، وعسى أن تكرهو شيئا وهو خير لكم، تقربي من الله فهو القادر على كل شيئ وإعلمي أن من يريدك بنية صافية سيطرق باب والديك أولا، إبتعدي عنه تماما وإحرقي كل شيئ يذكرك به، وعسى أن تحبو شيئا وهو شر لكم، أختي الغالية إعلمي أن كل ما حدث هو خير لك
مش هقدر اقولك حاجه غير انك تقولي حسبي الله ونعم الوكيل وخليكي فاكره دايما ان” كما تدين تدان” ومش تشكي ولو لحظه واحده ان اللي عمله فيكي ده هيتعمل فيه اكيييييييييد
انا مقدر كمية الاهانة اللى حاسة بيها وانك عايزة تقولى كل اللى جواكى لكن للاسف انتى ادام الامر الواقع هوا انه مكنش مرتبط بيكى رسمى يعنى حتى لو كلمتيه ممكن يجرحك زيادة ومش هتاخدى منه حاجة الحل الوحيد انك تنسيه تماما وتبقى مجرد تجربة لازم تتعلمى منها وكمان انسيه عشان متظلميش زوجك فالمستقبل انسي كل الكلام دا واتفرغى لعبادة ربك وهوا اكيد هيجبلك سيد سيده والعريس اللى يستاهلك بس لازم تكونى مؤمنة بجد وربنا يرزقك بابن الحلال ان شاء الله وشكرا …
انسيه خالص وشيليه من دماغك لان هى اللى مالكه قلبه مش انتى وبمجرد مايوافقوا اهلها عليه هيسيبك
الواد ده ولا عمره حبك – لان اللى مالكه قلبه هى حبيبته الاولى
هو بس كان بيضرب عصفورين بحجر ( يغيظ حبيبته بيكى ويشعلل قلبها وعشان لما هى اتخطبت نار كلت فيه قام جرى هو كمان خطبك بما انك انتى جيتى فطريقه ولقاكى بنت كويسه ومنها يلهى نفسه بيكى وتخففى عنه – وقد كان ان هى فكت خطوبتها بعد ماهو خطب على طول يعنى خطته نجحت ومش باقى غير ان اهلها يوافقوا عليه وده اللى شفتيه فى رسايله معاها عالفيس وشفتى ربنا عظيم قد ايه واستجابلك واوحالك بالباسوورد بتاعه ؟ اشكرى ربنا لانها معجزه وكرم منه وخليكى مع ربنا دايماً واطلبى منه راجل يستاهلك ويكون احسن منه
ربنا يقف معاكى يارب ومعانه جميعاً