مشاكل الشباب قبل الزواج

خطوبة راحت و خطوبة جايه

السلام عليكم ..انا شاب من اسرة متوسطة و اعمل بمهنة ممتازة و على خلق .. زمان كنت بحب بنت و كانت بتحبنى موت يعنى هيه الحب الأول بس ما كنش فيه نصيب اننا نتجوز و لكن هذه هى الحياة و عيشت و كملت و بعد سنين طويلة اتعرفت على بنوتة رقيقة و حلوة و خطبتها خطوبة صالونات و بعد الخطوبة حبينا بعض قوى و كنا طايرين من الفرح و بعدين لقيت احساسها بدأ يتغير من ناحيتى بعد شهر او اتنين و ما بقتش زى الاول لكن برده كانت بتعاملنى الى حد ما كويس و مشيت الدنيا لمدة سنة شويه سعادة و شوية جفا بس انا كنت بحاول اقرب منها و اسعدها على قد ما أقدر و رتبنا كل حاجة للزواج و قبل الفرح بيوم لقيتها فسخت الخطوبة و بدون ما اعرف السبب .. حاولت اكلمها كتير لكن ما ردتش عليا و سابتنى لعذاب الأفكار .. اهلى دلوقتى رشحولى بنت تانية عشان اخطبها و فعلا بقالنا فترة بنتكلم و هيا انسانة محترمة و متربية و عارفة ربنا و بتحبنى و بتحب ترضينى .. بس انا خايف ارتبط بيها لأنى مش حاسس انى مشدود ليها و خايف اظلمها … لما بفكر بعقلى بتكون النتيجة فى صالحها و لما بفكر بقلبى بحس انى مش هقدر احبها و لا اديها اللى تستحقه من مشاعر او هديها بس مش من قلبى … محتار و مش عارف اتجوزها و لا ابعد خايف اخد قرار و اندم عليه او اكون السبب فى ظلم بنت ما لهاش ذنب غير انها وافقت عليا .. محتاج منكم النصيحة

مشاكل وحلول ذات صلة

اضيف بتاريخ: Tuesday, April 9th, 2019 في 03:29

كلمات مشاكل وحلول: , , , ,

ردود to “خطوبة راحت و خطوبة جايه”

  1. Ahmed
    29/06/2019 at 01:18

    شوف يا أخي عجبني فعلا فيك انك حكمت قلبك وعقلك
    ودايما خلي العقل يرجح لان الحب مواقف مش حرمان مشاعر واحاسيس وبعد اذنك يا أخي فرق كويس بين المشاعر والاحساس الجنسي
    بما ان البنت الاولى فسخت الخطبة قبلها بيوم طب اهلها كان مببرهم ايه خصوصا ان في امور كتير كانت بين العيلتين زي الشبكة وارتباط الاهل
    يعني اكيد انت عرفت سبب ـ طب لو انت مقتنعتش بيه طبعا براحتك لانها في الاخر سابتك
    والحمد لله انها سابتك بدل ما انت تسيب بمعني اتجرح افضل ما تجرح

    وبما ان في بنت تانية ومحترمة
    اكيد مش هتحس تجاهها اي حاجة ببساطة لان لسه مفيش بينكم مواقف حصلت تخليك ترتبط بيها عاطفيا
    وهرجع واقولك
    عجبني انك قيمت الامور بعقلك وقلبك
    خليك في عقلك واتوكل على الله في البنت الثانية عسى ان يكون تعويض من ربك في الاولي
    جايز تكون انت قبل ارتباطك عرفت بنات قبلها وظلمت
    ولا تنسى كما تدين تدان
    توكل على الله في البنت الثانية وفي فترة خطوبة يا اخي
    اكيد هتعرفها اكتر
    وساعتها قيمها صح
    والتقييم المبدئي اللي هو الاصعب انك تلاقي فتاة كويسة انت عديته
    باقي بقى تقييمك النهائي قبل جوازك
    اعرفها كويس
    ولا تنكب بمشاعرك مرة واحدة
    ربي يوفقك ويوفنا جميعا

اترك رداً أو حلاً لهذه المشكلة