ببساطة كدة انا مش عارفة اقول ايه من كتر ما انا مش مصدقة الى وصلت ليه انا مخطوبة من سنة وانا وخطيبى كنا بنحب بعض اوى لدرجة ان الناس كانت بتحسدنا ع الحب دة و انا من كتر حبى ليه كنت بخاف عليه اوى وهو كان شايف خوفى عليه دة سيطرة على شخصيته لغايه مالقيته بقا بيعاملنى بطريقة وحشة جدا وبدات اكون مش فارقة معاه ووصلنا لدرجة ان احنا كنا هنفركش الخطوبة وطبعا الاهل اتدخلو وبعدين رجعنا لبعض تانى ولقيته بيقولى متزعليش منى فى كل الى عملته بس انتى الى وصلتينى لكدة وان انا بحبك وهفضل احبك ومأقدرش استغنى عنك قولت دة لسة بيحبنى رجعنا لبعض بس انا حاسة ان هو مبقاش بيحبنى زى الاول بقا بيزعق لى كتير وكمان بقا كل شوية يقولى اناكلمتى هى الى تمشى وانتى ملكيش دعوة بيا اعمل الى انا عاوزه لدرجة ان انا كل ما اتناقش معاه عن مستقبلنا يقولى ملكيش دعوة انا حر اعمل الى انا عاوزه وانا مش عارفة اعمل ايه فى حاجات كتير كانت بتضايقه زمان انا بطلت اعملها بس هو مش عاوز يرجع زى الاول ونفسى حد يتكلم معايا يقولى اعمل ايه واتصرف ازاى وايه الغلط وايه الصح ياريت حد يساعدنى انا مضايقة اوى
أنا طبعا شايفة إنك تتجاهلية تماما وتحاولى تحسسيه إن إنتى مش فارق معاكى حاجة هيتجنن طبعا وهتلاقيه هو اللى عاوز يرجعك زى الاول هما الرجالة كلهم كده صدقينى بس ياريت تقدرى انا كمان عندى نفس المشكلة مع خطيبى وعارفة الحل لكن مش بقدر انفذه ادعولى أقدر برضو وادعولى نرجع احسن من الاول وادعولى ربنا يبعد عننا الحسد والشيطان وكل حاجة وحشة
اكيد عملتى حاجة زعل منك عشان كدة وصلتو النفصل بس اللى بيحب حد اوى ولو اللى بيحبها زعلتو بينسى الحب خالص لزم تشوفى اى اللى مزعلو منك الاول وتعملى معه كويس
حاولي تعامليه احسن من الاول وحاولي تتغيري للاحسن معاه وحسسيه انه اهم شيئ في حياتك يعنى باختصار حاولي ترجعى ايام الحب اللي كانت بينكم وهتلاقيه هو كمان بدأ يبادلك نفس الشعور
عايزه اقلك حاجه ان هو لو مكنش بيحبك مكنش رجعلك تانى بس انتى شوفى هو عايز ايه علشان متزعليش تانى ولا هو وانا بقولك كده لان لا يمكن ان تتزوجى من واحد لايحبك ولا يمكن ان تدخلى اهلك فىهذا الموضوع لان ديه حاجه مابينك وما بين خطيبك وياريت تعرفى قبل الجواز لان الجواز ليس لعبه انما هو جزء من الحياة
بسم الله الرحمن الرحيم :
* أختي الكريمة : انتي عارفة و متأكدة إنك سبب أساسي في المشكلة بتاعتك دي ، لأنك حاولتي تلغي شخصية خطيبك و تحاصريه و تفرضي رأيك عليه .
* أي شاب محترم في الدنيا بيعتز بشخصيته جدا ، حتى لو كان بيغلط في تصرفاته وحكمه على كل اللي حواليه .
* عقلية الرجل في بلادنا أساسها القوامة : ودي تتلخص – في فكر الرجالة – في إن الست مهما كانت محبوبة و عزيزة عليهم ، ما لهاش حق رأيها يسبق رأيهم أبدا ، حتى لو كان صح ورايهم خطأ .
* واضح إنك ما فهمتيش نفسية خطيبك و حاولتي – من غير ما تحسي – تسيطري عليه . وواضح كمان إنه في صراع بين اعتزازه بأن كلمته من رأسه لأنه شايف نفسه راجل أوي ، و بين حبه الشديد ليكي ( و اللي مش بيلاقي فيه نفسه ) ، فبيلجأ لافتعال مشكلة علشان يقولك : أنا أهو !! الراجل ، و الكلمة كلمتي أنا بس ، و ما فيش ست هتمشيني على مزاجها ، حتى إنتي .
* مش معنى اللي بيحصل ده إنه مش بيحبك !!! لأ لأ لأ !!! بس صراع نفسي بين رجولته و حبه ، و كل ده لمصلحتك في النهاية .انتي عايزة راجل تعتمدي عليه ، مش هوه اللي يعتمد عليكي .
* إديله الثقة في نفسه و في كرامته ، و هتلاقيه بيترمي تحت رجليكي ، بس إوعي تحسسيه بضعفه أبدا : الراجل بيحب الست اللي تتغزل في قوته و كرامته و رجولته ، و يبعد عن الست اللي تحسسه بعجزه و حيرته حتى لو روحه فيها .
* ما تسيبيش خطيبك ، بس خليه هوه اللي يتمسك بيكي أكتر لأنك عنده أكبر من حبيبة : انتي تحدي رجولة بالنسبة ليه .
* ربنا ييسر لك الأمور .
*** و الله أعلم ***
رئيى انك متغامريش فخطوة زى دى بما انى اعرف هوا ازاى بيفكر فهو بعد الجواز هتلاقي تصلطه بيزيد ومش هترتاحى ابدا حاولى تفكر بعقل وتصلى استخارة عشان ربنا يفرج همك
حاولي تطنشي كام يوم لغايه ما يتصل هو بيكي ولما يتصل كلمي عادي وكان مفيش حاجه وحاولي تحسي انك اتغيرتي ولما يحس بكده هيخاف ويرجع ذي ما كان