انا شاب عندى 32 سنة يعنى ناضج
باشتغل مهندس فى احدى الشركات .. اتعرفت على زميله ليا فى العمل
حاسيت انى من اول يوم شوفتها حاجة شدتنى فيها ( اكيد كل الللى حبوا منكم عارفين الشعور ده طبعا )
المهم ابتديت انا اقرب منها اكتر .. و ابتديت احس انها مياله ليا برضه .. كنت بحس ان معاملتها ليا مختلفة
واللى اكد ليا الكلام ده زمايلنا فى الشركة ان هم كمان شايفين انها مياله ليا و ان احنا لايقين على بعض و فعلا ابتديت احبها و ابتديت اشوف الدنيا بلون و شكل تانى
اى حد فى الشركة كان متوقع اننا هنرتبط حتى اللى مايعرفوناش .. كله كان بيقول اننا اكيد هانسمع خبر حلو قريب
حسيت بجمال الدنيا زى المراهق اللى بيحب بنت زميلته فى المدرسة
الفرحة كانت عطيانى طاقة ايجابية و حافز للشغل و للحياة بصفة عامه غير طبيعية .. بدون مبالغة ديه كانت اول مرة احس بطعم الفرحة و السعادة ( طعم سعادة بجد ) انى بنى ادم و عندى حق اعيش و احب و اتجوز و ابنى اسرة و بيت رغم الظروف المعيشية اللى زى الزفت و القطران اللى بتمر بيها البلد
قولت احاول بقى اقرب منها اكتر و اكتر و نبتدى نعرف بعض و نتعود على بعض اكتر طالما هي مياله ليا
المهم فجأة البنت اللى بحبها ديه جالها شغل فى شركة تانية و مشت من الشركة … قولت خلاص بقى مافيش وقت يبقى مبدهاش و اكلمها دايركت انى عايز ارتبط بيها و فعلا كلمتها و قولتلها انا عايز ارتبط بيكى طلبت يومين تفكر
و جه الرد الصاعق : انى مجرد اخ !!! و ان احنا لازم نفضل مجرد اصدقاء
طبعا الدنيا اسودت فى عنيا و بعد ما كنت طاير فى سابع سما و الدنيا هاتبتدى تضحكلى بعد 12 سنه سواد لقتنى فى سابع ارض
اكتئاب شديد و مش طايق اروح الشغل ولا طايق اكلم حد ولا طايق اعمل حاجة .. و مفيش حاجة فى عقلى و تفكيرى غير صورتها .. 24 ساعة مش بفكر غير فيها
هى ليه علقتنى بيها ؟؟ طب لو انا كان بيتهيئلى .. طب و كل اللى شغالين فى الشركة بيتهيئلهم ؟؟ حد عنده تفسير ؟؟
دلوقتى انا مش عارف اعمل ايه .. لا انا قادر ولا عايز انساها اصلا ( عشان محدش يقولى انساها ) نفسي احاول تانى و تالت و رابع لحدد ما توافق ..دايما انا مؤمن بمثل ان الزن على الودان امر من السحر ..
اكيد ياما حصل قصص زى ديه كتير و فى الاخر انتهت نهاية سعيدة … بس مش عارف انفذ ازاى
ملحوظة : احنا لسه بنتكلم على الماسنجر ( بس قليل ) كا اصدقاء
نفسي تكون من نصيبى نفسي يا رب
اعمل ايه ؟؟؟؟
