السلام عليكم,
انا بنت عندى 16 سنة، حبيت اكتر من مره بس مفيش غير اول حب هو ده اللى بجد واثقه انه كان بجد والباقى ممكن يكون حب بس لمجرد التعلق بس ولا حكاية كملت وكل انسان اتعلق بيه لازم نسيب بعض، مش عارفه العيب منى ولا منه ولا هى الظروف.
احيانا بحس انى صغيرة اوى على كل التجارب ال مريت بيها وفعلا اتجرحت وانصدمت كتير، وانا مش بحس انى انسانه غريبة او مختلفة، بالعكس انا اجتماعية وبحب الهزار ومش معقده مثلا بس برضه كان فى بعض الشروط بحتفظ بيها واللى ميقتنعش بيها يبقى مش بيحبنى بجد.
المهم انا اتكلمت مع ولد قدى على النت بس انا عارفاه هو ساكن جنبى وعارفنى وكانت اننا نتكلم كانت صدفه، وكانت فكرتنى عنه انه حد مش لذيذ ولكن فكرتى اتغيرت عنه خالص ويمكن ده ال خلانى انجذب ليه، انا حسيت انه انسان مختلف محترم مش بيكلم بنات تانى يعنى مش بيشرب سجاير وبيصلى الى حد ما مختلف عن كتير من اللى حواليه واللى اعرفهم، فانا ارتاحتله اوى وحاسه اننا خدنا على بعض فى وقت قصير.
لما بتكلم معاه بحس بسعاده كبيره جدا، بحب اتكلم معاه اكتر ما اتكلم مع اصحابى، مع العلم ان اصحابى اه بمشى معاهم دايما وبحكى معاهم بس مش حاسه ان دول الاصحاب اللى بجد، بس مش قدامى حل غير انى امشى معاهم حالى.
المهم انا والولد ده اتكلمنا على التليفون بس برضه اصدقاء مش اكتر، كنت احيانا بحس انى بحبه ونفسى اقوله كده بس مكنتش طبعا بقول حاجه.
وبعدين حصلت ظروف وبطلنا نتكلم ومكناش بنفتح نت بعدها رجعت انا افتح عادى وهو فين وفين لما يفتح، حصلت ما بينا خلافات بسبب انه بيزعل منى بسرعه احيانا، واحيانا بكون عايزاه ويقفل او ميفتحش اساسا وحاجات شبه كده.
وهو كان بيضايق من اسلوبى احيانا وبيحس انى بأحوال وانى بعامله بمزاجى بس انا والله لما بعاتبه بيكون من عشمى الزايد فيه، جيت فمره جمعتله كل المواقف اللى ضايقتنى وقررت انى بعدها مكلمهوش تانى، ويومها هو اتضايق من كل حاجه انا موجهاها ليه حسيت انى ممكن اكون زودتها بس مش عارفه.
المهم بعدها كلمته تانى وكلمنى عادى جدا ومحبناش نتكلم فى اللى عدى المهم دلوقتى انه مش بيفتح كتير مع انى انا بفتح كتيير، يعنى هو لو عايزنى هيحاول يفتح اكتر، ولما بنتكلم بيبقى كلامنا عادى جدا هزار وكده ومفيش اى مشاكل، بس برضه حاسه انه متغير معايا عن بداية علاقتنا بعد ما كان بيفتح كل يوم بقى بيفتح كل فين وفين مش عارفه يمكن ظروف؟؟
فانا بيجى فبالى انه بيتهرب منى او عايز يبعد عنى مع انه مش بيملحلى بأى حاجه كده بس برضه انا مش فاهمه هو زهق منى مثلا؟؟
وبعدين انا مش قادره ابعد عنه حتى لو كان بعض الحاجات ضايقتنى، مع انى انا من الناس اللى بتكره بسرعه لو حد عمل موقف ضايقنى بس هو انا مش قادره اكرهه ولا انساه مش عارفه ده حب؟؟؟ ولا مجرد اصدقاء؟ بس كل اللى اعرفه انى محتاجاله اوى وانه من اغلى الناس عندى، ونفسى يكون فى تبادل لنفس المشاعر انا مش عارفه اعمل ايه؟؟ اقوله واشوف رده ؟؟
بس انا خايفه على كرامتى او اكون بتقل عليه ولا ابعد عنه خالص من غير ما اقوله حاجه؟
احيانا بحس انه بيدارى حاجه، وان حتى لو فيه حاجه جواه من ناحيتى مش هيقولها ممكن تكون دى شخصيته مش عارفه.
انا اسفه جدا انى طولت عليكم، بس يريت تفيدونى انا فعلا محتاجه للرأي.
