بسم الله الرحمن الرحيم
انا مصري وعايش بدبي بقالي حوالي 6 سنين خطبت من 3 سنوات وكنت بحب خطيبتي اوي ونفسي اتجوزها المهم محصلش نصيب بسب مشاكل الاهل امي وامها ( ابوها متوفي وابويه متوفي ) الله يرحم اموات المسلمين جميعا. وسبنا بعض والاجازه اللي بعديها بدات المشوار بتاع اني الاقي وحده تكون زوجه ليه خطبت و اختي بتقولي وحده اخلاق وكويسه ومن كتر وسوستي واني بفكر في خطيبتي الاولي شوفتها 3 مرات وقرينا فاتحه وتاني يوم فشكلت الخطوبه مكنتش مقتنع وسافرت ومخطبتش وبعديها نزلت الاجازه التانيه السنه اللي فاتت امي جبتلي وحده من بلدنا شوفتها وعجبتي بس مش اوي والزن بقي بتاع اهلي خلاني اتجوزها وهي حامل دلوقتي وانا مش مبسوط معاها خالص مع انها بتحبني وبتعزني وبتصلي واخلاق واهلها ناس كويسه بس انا مش سعيد في حياتي معاها هي مش جميله اوي بس مقبوله بس الموضوع مش موضوع شكل الموضوع اني مش بحس باي مشاعر نحيتها غير انها مراتي وبس لو بعدت عادي ولو مبعدتش بردو عادي مش ده اللي كنت بتمناه وعارف اني مش بحبها بس طبعا صاينها وبعاملها كويس عشان هي مش زنبها حاجه.
انا تعبت اوي بفكر في الزواج تاني وساعات بفكر اني اعيش كدا وخلاص بقي اهي العيال هتيجي ان شاء الله واعيش بقي وخلاص بلا مشاعر بلا احاسيس .
يا جماعه بجد عايز اخد رئيكم انا تعبان اتجوز ولا اسكت ولا اعمل ايه مع العلم اني عملت كل حاجه تخليني احبها معرفتش والله . معلش يا جماعه اني طولت عليكم
مشاكل الازواج
لا استطيع ان احب زوجتي هل اتزوج عليها
اضيف بتاريخ: Wednesday, August 29th, 2012 في 18:48
كلمات مشاكل وحلول: الحياة الزوجية, الخطوبة, الزواج, حامل
نفس المشكله بظبط ربنا يعينك
ممكن حد يسمع مشكلتي
انا متزوج من 6شهور ومش مبسوط خالص لانها لا تحب الممارسه بستمرار ولا الحديث المستمر ولا تحب الكلام الكتير ولا تغير في حياتها ولا تغير في لبسها تحدثت معها اكثر من مره ومفيش فايده لا حابب اروح البيت ولا اقعد معها انا بحب الواحده اللي بتبتسم دايما وفرفوشه اي حاجه بسيطه ممكن تزعل مني بسرعه ومش تتكلم خالص وانا زهقت عشان كده سبت البيت وسفرت الامارات ومش عاوز ارجع مش عارف اعمل اي وانا حاليا في الامارات.بيني وبين نفسي متزوج ومش متزوج الله المستعان
اخوانى واخواتى الكرام لدى نفس المشكلة
اضم صوتي للاخت -اختكم في الله – واتفق معها في كل ماذكرته لصاحب المشكلة اتمنى انه يستفيد من كل ماقالت له ويعمل به لاجل صلاح حاله واستقرارحياته الزوجية وسعادته والله الموفق
يااخي اسمع لهذةالقصة وهي حصلت لاحد الاقارب كان شاب في مقتبل العمر 28سنة واخلاقه محترمةوابن ناس طيبين والكل يمدح في خلقه وتعامله مع الاخرين فكرفي الزواج وجابت له امه فتاة ذات خلق ودين ومن عيلة كويسة ولكنهاليست متوسطة الجمال وصاحبنا رفض البنت عندماشافها وتحجج انهاغير جميلةولاتناسبه وبعدفترة تعرف على امراة وهي مطلقة ولكنهاجميلة جدا وموظفة ورغم ان اهله عارضواالزواج منهالانهامطلقة ولكن الشاب اصر ولم يستجب لاهله وتزوج بالجميلة وسافرا لقضاءشهرالعسل في الخارج وانصدم هناك وجد المراة متحررة وغيرملتزمةبالاخلاق ولا الاعراف وكانه خدع فيهاولكنه كتم في نفسه وقال لعل الله يهديه وتمادت في السلوك المشين في ملابسهااوتزينهاالمبالغ فيه عندالخروج من المنزل ودايم الخروج للاسواق والسهرمع صديقاتهالاخرالليل وصاحبنالايعجبه الحال هذا حاول معهامرارا لكن لافايدةمن الكلام معها لانومن شاب على شي شب عليه وفي الاخر حصلت بينهم مشاكل وخلافات كثيرة وتغيرات كثيرة في حياتهم واصبحت الزوجة غيرمبالية بزوجهاولامهتمةبه وفي الاخرطلقها وهونادم على الزواج منهاوعرف انه لم يحسن الاختيارجيداوانو الجمال جمال الروح وليس جمال الشكل وان الدين والاخلاق اهم من كل شي
للاسف الشديد اغلب شبابنا العربي بيفكروا في البنت الجميلة والموظفة فقط ولايفكروافي الدين ولاالاخلاق ولا الاصل والحسب ومايعرفوش ان الجمال لوحده مايكفي وان الاساس في البنت الاخلاق والدين فمن غيرهما فسدت البنت ولاتساوي شئيا حتى لوكانت ملكةجمال الكون والرسول الكريم قال- تنكح المراة لاربع لدينهاوخلقهاوجمالهاوحسبها فاظفربذات الدين تربت يداك – فيااخي اتقي الله في نفسك وفي زوجتك واحمدالله واشكرفضله غيرك يتمنى الزواج ولايستطيع ابدا وتقرب من زوجتك واهتم بهاتلاقي الخيروالرزق والبركة والسعادة في حياتك
المشكلة شكلها مشكلة عامة للىبيشتغلوا فى بدل بره بدلهم انا نفس المشكلة بالتفصيل الممل خطبت الاولى وحبيتها حب مش عادى وانفصلنا لاسباب تافهة معرفناش نحلهالانى مش فى مصر وحصل ونزلت اجازة وخطبت خطوبةاى كلام قعدت اسبوعين بس والاهل والزن والوسوسة خلونى أخطب واحده من بلدنا برده مش عارف احس بيها ولا احبها رغم كده الاهل وسواس ليل نهار انها كويسةواخلاق وجمال وناس كويسة .. انا لسه على البر فى الخطوبة يعنى مش عارف اكمل ولا انفصل بهدوء وتبقى المصيبة التالتة وبكده ممكن اخد سمعة فى البلد اللى انا منها وممكن معرفش أخطب تانى ولا الاقى واحده احس بيها لان نفس المشكلة بنزل اجازات وبيكون التدوير على العروسة تلقائى وتقليدى لابعد الحدود … خايف ادبس وابقى زيك وسعتها اقول ياريت اللى جرى ماكان وخايف اسيبها وابقى ظلمتها وربنا يعاقبنى انى مالقيش اللى بحلم بيها ولاالاقى اى حد اصلا .!
سلام عليكم ، أخي حسيت من كلامك إنك انت أصلا ما عارف عاوز إيه بالضبط ، ودا بسبب صدمتك من اول خطبة ليك ، الماضي انساه ومتخلهش يأثر على حاضرك ، واعلم أن ربنا رزقك بما ليس عند آخرين ، وظيفة ، زوجة صالحة ، ذرية صالحة إن شاء الله ، فما عليك سوى حمد الله ، لو تعرف المشاكل الي بنقراها هنت ..، قول الحمد لله ، واستعذ بالله من الشيطان الرجيم ، هذا بس وسواس من عمل الشيطان ، يريد أن يهدم بيتك ، واعلم ان الزواج الثاني أيضا لن ينفع لأن المشكلة مش في الزوجة المشكلة فيك وفي تفكيرك السلبي بصراحة ، خلي حياتك إيمان ، وحس بحلاوة الحياة والنعمة الي أنت فيها ، خصوصا لأن زوجتك صالحة ، بدل أجواء حياتكم وفهم زوجتك أمور انت تبسطك ، يعني غير الروتين بينك وبينها ، والغي فكرة الزواج خالص ، مش حتنفع معك انت بس هايم في تهيؤات وحابب ترسى على بر ، احمد الله كثيرا ، أحسن من أن تعاقب بحرمان النعمة
أذكرك بقوله تعالى {وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ}
نفس مشكلتي بالتمام صارلي متزوج قريب السنة و زوجتي جميلة و جميلة جدا و اهلها كمل
و مع ذلك ابدا مش بنشدلها و احب ما علي ارجع عازب و ذكرياتي الحب العذري القديم لا زلات تراودني
حياتي جحيم و المشكلة ان وزنها قاعد بيزيد و بيزيد و بيزيد و لما خطبتها ما كانت هيك
و فوق هيك بتمرض كتير و مرضها جيني و واقف جنبها
و فوق هيك انعزالية و عاوزة تربطني فالبيت و انا فغربة
انا مشطايق ابدا عشرتي معها بس ما بدي اظلمها و لا بدي اخلف تزيد الطين بلة و لا ملاقي و المرض الجيني ينتقل لاولادي
و المشكلة المجتمع لا يرحم كوني من ابوين مطلقين
و ما بعرف اشي عن حبي القديم احتراما لزوجتي بس كل ما انسى تقوم تفكرني بيه
انا حائر بين الدين و الاخلاق و المجتمع
ادعولي……
عندي نفس المشكلة
الله يهدينا جميعا
الحل سهل طبعا متتجوزش لان السبب فى انك مبتحسش بيها انك فى بلد وهيه فى بلد انت مسافر ولو جيت وعشت معها هتعرف انها قريبه جدا من قلبك انت لسه متاثر بالحب القديم مع انها خلاص نسيتك عيش الواقع وبلاش الاوهام الى بتعيش فيها خلاص انت بقيت راجل ومسئول من زوجه وابن جاى فى الطريق وبنات الناس مش لعبه فى ايدك تتجوز دى وتسيب دى هيه زنبها ايه انها حبتك وارتبطت بيك واتجوزتك على فكره لو جيت تتجوز عليها هتطلب منك الطلاق وهيروح منك الابن والى هتتجوزها مش هتكون سعيد معها لانك هتحب تشوف ابنك واكيد هيه هتغار عليك لانك هتكلم مراتك القديمه وهتعيش فى مشاكل للسما اتقى اللله فى زوجتك وافتكر السبب الى خلاك تسافر وتتغرب اكيد الفقر القاطع والحاجه متظنش انك بئى معاك فلوس وممكن تتجوز واحده واتنين فى لحظه ممكن تتفنش و هترجع لطبيعتك من جديد لازم تفوق لازم تعيش الواقع
بسم الله الرحمن الرحيم :
♥ انتي عايز تتجوز بجد ؟ طيب هي مين ؟ واحدة بتحبها و هتلاقي نفسك معاها ؟ و لا جوازة و خلاص : جايز تحب فيها و جايز لأ ؟!!!
♥ يا راجل : اتق الله ؛ زوجتك أخلاق و دين و بتحبك ” فاظفر بذات الدين تَرِبَتْ يداك ” .
♥ جاء رجل إلى أمير المؤمنين – عمر بن الخطاب – و قال: يا أمير المؤمنين ، أريد أن أطلق زوجتي ، فسأله أمير المؤمنين : أتعيبُ عليها في خلق أو دين ؟ ، قال الرجل : لا ، و لكني لا أحبها . قال عمرُ – رضي الله عنه : ويحك !!! و هل تُبنى البيوت ُ على الحب ؟!!! .
♥ أخي الفاضل : أَمْسِكْ عليكَ زوجك و اتقِ الله .
*** والله أعلم ***
لا إله إلا الله .. طيب حضرتك بتفكر تتجوز تانى .. هتتجوز مين ..؟ هل فيه حد فى حياتك ..؟ ماهو حضرتك لو هتتجوز عادى برضه يبقى مالوش لزوم طيب حضرتك فكرت تقعد معاها وتعرفها ايه اللى انت بتحبه عشان هى تعمله ..؟ .. حاول تعمل كده وان شاء الله تلاقى منها حب يحرك قلبك ناحيتها .. ربنا يصلح حالكم يااااااااااااارب .. لا تنسى أن تدعو ربك بصلاح الحال
حرام تظلمها معاك مدام هي بتجبك . حاول تنفصل عنها بهدوء وحسسها انك جمبها ف اي وقت تحتاجلك . وطالما مش قادر تنسي خطيبتك القديمة حاول تتجوزها
الأخ العزيز…. اصبر و احتسب عند الله خاصة ان زوجتك تحبك و بالعشرة هتدوم المحبة و المشكلة انها حامل لأنها لو مش حامل كنت هقولك تتطلقها…و بالش فكرة الزواج الثاني لأنه اثبت فشله في معظم الحالات و ستعيش يبن نار الزوجة الأولي و الثانية
عندى نفس المشكلة بنفس التفاصيل ونفس البلد اللى انت عايش فيها
عندى بنت عمرها سنة وابتدى الموضوع ياثر على شغلى ولغيت فكرة الجواز من تانية
ومليش فى الزنا والشرب ….ربنا وحدة يعلم انا تعبان اد اية …الحمد للة