مخنوقة من التفكير في مرات زوجي السابقة

انا جوزي شغال في دولة عربية وكان متجوز هناك مدة سنة وانفصلوا، ولما اتقدملي قالي ومكنش عندي مشكلة.
بالصدفة لاحظت ان فيه واحدة بتعمله لايكات على كل صوره فسالته مين دي كدب، لكن بعدين عرفت انها الزوجة الاولى. قلتله ليه كدبت قالي خفت تدايقي، بس انا بردو قلقت من فكرة الكدب. المهم قلتله طب ليه انتوا لسة عند بعض عالفيسبوك قالي عادي، قلتله انت مش قلت انكم اتخانقتوا قبل ما تنفصلوا وانك مش طايقها وما صدقت خلصت منها، وبعدين هو عادي تكون متابعاك ومتابعة صورك وانت كمان بتعملها لايكات ، قالي هي مش عاوزاني اشيلها وبتزعل كل ما الغيها تبعتلي!! قلتله طب يفرق معاك ايه انها تزعل ولا متزعلش؟ والمهم اختلفنا شوية وف الاخر شالها.
لما سافرتله وبدأنا نخرج مع بعض، لقيته نبقى في مكان معين مع بعض فيقلي ان الست الاولى دي كانت بتبقى معاه في نفس المكان هنا وتعمل كذا زيي، اول مرة طنشت لكن لما الموضوع اتكرر اتعصبت وقلتله متقارنيش بيها.
قالي ماشي واعتذر بس انا كنت متنرفزة فغلطت فيها واتكلمت انها واحدة اقل مني فلقيته اتنرفز وبقى يتخانق معايا عشان بغلط فيها. طبعا انا كنت بغلط من باب اني متدايقة ومن باب كمان اني اختبر رد فعله خصوصا بعد المواقف اللي فاتت، لكن دفاعه بقى يغيظني اكتر.
اللي حصل كمان انه سكني في نفس البيت اللي كان عايش فيه معاها، حتى مغيرش السرير اللي بننام عليه.
وشفتها حاطة صورتها على الفيسبوك وهي في نفس البيت، ورغم انه حاس اني مش مبسوطة لكن محاولش يغير البيت رغم انه ايجار وتغييره انا عارفة بدون الدخول في تفاصيل سهل جدا جدا.
المشكلة ان كل التفاصيل دي قلبت معايا لحالة نفسية، بقيت لما انام عالسرير اتخيله معاها، بقى كل ما يلمسني اتخيل انه عمل كدة معاها في نفس المكان دة واتقفل منه تماما.
بلاقي حاجات بتاعتها في البيت، بلاقي جوابات جايلها على العنوان دة. بقيت مش عارفة انساها. كل ما اشوفه بيعمل حاجة معايا خلاص اتخيل انه كان بيعملها معاها. الموضوع دخل في حالة نفسية مش حاجة انا عارفة اسيطر عليها ولا اعقلها.
هو مش بيحبها وانا عارفة، بس فكرة انه لمس ست قبلي وكان بينام معاها بقت وجعاني اوي، مكنش دة فارق معايا في الاول لاني اعتبرتها قصة في الماضي وانتهت، لكن بسببه انا شفت الست وبروفايلها والبيت والسرير اللي كانت معاه فيه، بسبب مقارنته وكلامه خلاص مخي استدعاها واستدعى كل التفاصيل اللي كانت بينهم وبقيت مش متقبلة اعمل نفس الحاجات معاه.
معنديش شك انه بيحبني لكن ازمتي اني خلاص مش عارفة اسيطر على مخي وفقدت الاستمتاع بكل اللحظات الحلوة لاني بقيت اتخيل انه لما عملها كانت لاول مرة معاها انما دلوقتي خلاص هي مجرد تكرار في حياته.
انا تعبانة وعايزة أعرف لو واحدة تانية مكاني كانت حتحس بايه، انا فعلا مخنوقة.

مشاكل وحلول ذات صلة

• لماذا يتغير الرجل بعد الزواج
• ابتزازي بفضحي انا وزوجتي وخوفي من المجتمع
• سنة ونص جواز وجوزي رجع يلاحق طليقته
• لدي مخاوف بأن خطيبتي لا تحبني
• أحببته و تزوج غيري و يريدني زوجة ثانية
• التعدد ومرض الزوجة
• حلم فستان زواج وعمل تعديلات عليه