السلام عليكم ورحمه الله انا متجوزه من 7 سنين وعندي 29 سنه ومخلفه اتنين والحمدلله اول الجواز طبعا كانت ظروف جوزي زفت ومكنش بيقعد سنه كامله في شغلانه بسبب القطاع الخاص وما ادراكم القطاع الخاص وحصلت بينا مشاكل كتير بسبب الفلوس واسباب تانيه
المهم جوزي من 5 شهور جاله عقد عمل في السعوديه وسافر والحمدلله حالتنا الماديه بقت كويسه
بس انا بقي نفسيتي تعبت حسيت اد ايه هو مهم في حياتي حتي مع المشاكل اللي كانت بينا عرفت اني مقدرش استغني عنه جدا خالص وبدعي كل يوم ان ربنا يخليهولي ويقربنا يارب ويلم شملنا ونفسيتي مارتحتش الا لما عرفت انه هيعملنا زياره انا والولاد ومن يوميها واحنا عايشين علي الامل ده
وجوزي حبيبي مسافر علي امل انه يعمل استقدام ليا وانا كمان بس المفاجئه انه عرف انه مش هيقدر يعملي استقدام مش قبل 5 سنين عشان شروط المرتب
وجوزي قالي انه هيجبنا السنادي ان شاء الله بس مش هيقدر ياخدنا تاني لاني الموضوع مكلف جدا وبيطير كل اللي بيحوشه طول السنه
وانا حاسه بيه بس مش قادره اتخيل اني مش هشوفه غير شهر في السنه بس ياعني مش هبقي زوجه غير شهر في السنه وحقوقي واحتياجاتي وحضنه حبه وكل حاجه شهر في السنه وخفت جدا من بكره ونفسيتي في النازل
ياتري هعرف اربي ولادي لوحدي وخصوصا اني معايا ولد عنده 6 سنين والسنين اللي جايه صعبه
هعيش ازااي وولادي كمان هيعيشوا ازاااااي دول عايشين علي امل انهم هيروحوا لبابهم دي بنتي لما بتشوف اب مع بنته تدمع وتقولي وانا بابايا فين ياحبيبي هيتحرموا منه وهو علي قيد الحياه
ومش قادره اقولوا انزل حال البلد زفت وهو كان قاعد من الشغل اصلا قبل السفر ب6 شهور مش لاقي شغل ونفسيته تعبت
قولولي بالله عليكوا اعمل ايه انا تعبانه اوي اوي بجد
مشاكل الازواج
سفر جوزي وحياتي الجديده هتموتنى من الخوف
اضيف بتاريخ: Saturday, October 21st, 2017 في 17:58
كلمات مشاكل وحلول: الزواج, السعودية, زوج, زوجة
السلام عليكم
اسمعي يا بنت الناس الكلام اللي هقوله لك كويس وافهميه
انا مش هرضي خاطرك ولا هديكي مسكنات
مفيش حياة وردية كاملة اما تعيشي مع زوجك وجنبه في اضيق الظروف وتكون بينكم مشاكل بسبب عدم قدرته علي تلبية طلبات واحتياج البيت بسبب ظروف البلد . او انك تتحملي بعده عنك وتعيشو حياة كريمة
وعلي فكرة مش كل اللي عايشين مع بعض سعدا ولا كل اللي بعاد تعساء
بالعكس لما يجيلك كل شهر ويلاقي ولاده في احسن حال دراسة وتعليم وصحة ولبس افضل الف مرة انه يقعد معاكم وهو حاسس بالعجر لعدم قدرته علي توفير حياة كريمة لكم
وساعتها هتبقي حالته النفسية زفت والمشاكل للركب
اعرف ناس بيجو 21 يوم في السنة لكن كل يوم محادثات صوت وصورة والأمور تمام
اصبري علي جوزك واستحملي واوقفي جنبه وربنا يبارك لك في اولادكم
تحياتي
اولا يااختي بارك الله فيك وفي زوجك واولادك وجمع شملكم به عماقريب ان شاءالله ثانيا- نعم ظروف الاستقدام بالسعودية صعبة ومكلفة جدا وكمان رسوم الاقامة للمقيمين بقت في ارتفاع غالي جدا ولانصحك بالعيش انت والاولاد بها بيكون اعباء مكلفة على عاتق الزوج غير السكن والمواصلات والمدارس ومصاريف العيشة لكم ثالثا- اصبري وكل فترة زوجك بيقضي الاجازة معكم وده حال اغلب اخواتنا المصريين لازم تراعي ظروف زوجك وتقدريها والان التواصل عبر النت صوت وصورة تقدري تخلي الابناء يشوفون ابوهم ويتكلمون معه وكانه موجود معاهم وربنا يخليكم لبعض ولايحرمكم منه ويرده لكم بالسلامة ويؤفقكم ويسعدكم ويسترعليكم طوال العمر