انا بنت عندي 16 سنة مشكلتي هي اني كل سنة و من ايام الطفولة ما عنديش اصدقاء خالص الا واحدة بس و لكن نادرا بشوفها و ساكنة بعيد عني .. المهم دايماً بحاول اكون صداقات كل سنة بس بفشل و بحسهم بيكرهوني حتى من اول يوم كدة في الدراسة اول ما بروح احكي مع واحدة بحيث اني اكون معاها صداقة بيبان عليها تعبيرات انها مش حباني و عايزاني اقوم من جنبها و مش مركزة معايا خالص و الله أعلم ليه و لو خرجت مع بنات صفي الاقيهم بيبصو لبعض كدة بصات انو لالالالالالا ليه جت فيقومو يخدعوني ويهربو مني و كمان كل ما اعمل حاجة لو كانت بسيطة يفضلو يتريقو عليها .. و لما بتخانق مع بنت الكل يقف ضدي و يقف معاها و يحتقروني ..انا بحاول اتكلم و اندمج مع الناس بس كل ما اتكلم ما حدش بيرد علياو لا بيعملي اعتبار حاسة ان مليش قيمة رغم اني و الله بتمتع بالمرح و خفة الدم .. بجد مش عارفة انا مستحملة كل ده ازاي بعيط كتير بسبب الموضوع ده بقيت اخاف اتكلم مع حد لدرجة اني اخد التليفون معايا المدرسة و اقعد عالنت و المدرسين بقو يعاقبوني و انا الله بضطر علشا ما بلاقيش حد اتسلى معاه … ضيعت احلى سنين عمري في التفكير بالموضوع ده و بجد خايفة يحصلي كدة في الجامعة لانه ضروري نتعامل الناس في الجامعة علشان المشاريع و كدة و انا خلاص فاضل عالجامعة و لسة ما اتحسنتش … قولولي اعمل ايه انا بجد تعبت نفسيا اتمنى الموت و كارهة كل حاجة و بقيت عصبية جدا و ما استحملش حد و اتخانق معاه بسرعة على اسباب تافهة
بصي انا هقولك اللي اعرفه في الموضوع ده فيه صفات مستحبه تكون في البنت وفيه عيوب لازم تبعدي عنها وهي :
1 – اول حاجه الأبتسامه لازم تكوني مبتسمه على طول ابعدي عن التكشير والأحباط اللي في كلامك خليكي مبتسمه بلاش تبقي كأنك قاعده في جنازه.
2 – خفه الدم بس مش زياده عن اللزوم خليكي وقت اللزوم جد يعني مثلا مش تبقي في موقف محتاج منك وقفه وقرار وتهزري فيه واللي قصدي ان يكون ليكي شخصيه .
3 – المظهر وقصدي بالمظهر لبسك ونضافتك وترتيبك مش قصدي انك لما تكوني رايحه المدرسه تعملي حفله في وشك ولا في لبسك لأ ياروحي البسي اليونيفورم زي ماجبتيه ماتغيريش فيه حاجه يعني الشوز زي الطرحه وأن اليونيفورم يكون محترم وشيك والمهم نضافتك لازم تهتمي بيها قوي .
4 – اهتمي بمذاكرتك ودروسك كويس اولا عشان ربنا يرضى عنك ثانيا عشان مصلحتك ومستقبلك ثالثا لأن مفيش حد بيحب يصاحب التلميذ البليد دايما تلاقي المجتمع والناس تحب المتفوق في دراسته وشغله .
5 – الثقه بالنفس خليكي واثقه في نفسك مش معنى كده تبقي مغروره اتعاملي مع الناس بتواضع بس تكوني واثقه من نفسك .
6 – والأهم أنك تخلي علاقتك بربنا كويسه لأن ربنا لما بيحب عبده بيحبب خلقه فيه .
وأخيرا أنك لازم تكوني راضيه عن نفسك وتتغيري عشانك مش عشان تعجبي حد معين ربنا يوفقك .
بس على فكره انا اكتشفت الحل فى انى بعيد عن ربنا
انا مثلك تماما وبقالى تلات سنين مش بروح جامعتى غير الامتحانات فقط حتى لا اتعرف على احد
يا حبيبتي اهدي الموضوع مش مستاهل كدا خالص صحيح شي كويس انو الواحد يكون عنده حد يتمشي معاه و يفضفضله بس لو مافيش مش نهاية العالم قال موت قال! علي ايه يمكن كدا احسن لك عشان البنات وجع راس غيرة و غيبة و رغي حاولي تصحبي اخواتك لو ما فيش بنات خالتك او عمتك او الجيران بعدين بلاش تشائم الجامعة غير و ان شالله هتلاقي ركزي في مذاكرتك و صاحبي كتبك و بلاش تجيبي موبايل و تتعاقبي! املي فراغك ارسمي اكتبي اشعار قصص اتمشي ساعدي في شغل البيت أقري قصص غيري جو احفظي قران و بعدين لو بنات المدرسة كدا وحشين كلها شويه و هتسيبيلهم المدرسه اهم حاجة انت تكوني رايقة و مرتاحة ربنا يوفقك و يسعدك =)