السلام عليكم ورحمه الله وبركاته …انا طالبه جامعيه وفي احدي كليات القمه ..انا 20 سنه واصلا من ارياف بس كليتي في محافظه تانيه
ارجو من اي حد يقرا مشكلتي انه يرد عليا ولو بكلمه
طول عمري من النوع الرومانسي اوي واللي بيدور علي الصدفه والقدر والنظره اللي هتجمعه بنصه التاني ..من النوع اللي رابط سعادته بوجود النص التاني في حياته ..كنت متفائله دايما ومبسوطه علطول لحد ما قابلت نصي التاني او اتهيالي انه هو نصي التاني ونصيبي
اول ما دخلت الجامعه وبما اني جايه من ريف فنقدر نقول كنت قطه مغمضه ..هو كان وسيم جدا وشاطر جدا وكان انطوائي فمحدش كان يعرف عنه حاجه
للاسف حبيبته حب اعمي ولا عمري شفت ان فيه عيب.ضحيت بحاجات كتير وكان مفهمني انه برضو بيحبني الحب ده ..شفت ذل واهانه ومرمطه شفت اللي محدش شافو بجد بجد ظلمني بس دايما كنت اقول اني مادام بحبه لازم اتحمله وكمان شفت خيانه…لحد ما جه قاللي ان صاحبتي معجبه بيه وانه بيحبها ..سابني بعد سنه ..بعد ماسابني باسبوع كان ارتبط بصاحبتي
حبيته بجد بجد اوي ومن كل قلبي واتكسرت جامد اوي واتغيرت كليا بعدها شكلا ومضمونا وبقيت واحده تانيه ..واحده يمكن حلوه وشيك ووو بس كئيبه وقلبها ميت
بعدها كذا شخص قرب مني وناس كتير اتضحلي انهم معجبين بيا وبيحبوني علي حد قولهم…سمعت كلام اصحابي واديت لحد فيهم فرصه وسبته يقرب مني ويعرض عليا شرحه ومساعدته ..كان بني ادم كويس جدا بس للاسف عيبه الوحيد انه من دفعه حبيبي الاولاني وانهم كانو اصحاب في يوم من الايام ..ودي كانت دايما عامله حاجز…حاولت احبه بس مقدرتش..ونفس المحاوله دي مع ناس تانيه ..دايما اشوف عيوبهم..دايما مش قادره احبهم…دايما افتكره واقارنهم بيه ,,,,للاسف انا قلبي عمره ما دق ولا حب زي ما حبه هو
فات علي موضوعنا سنه وشويه ..وانا مش بحبه يمكن اكون بكرهه ..بس مش قادره احب غيره
امي مره قالتلي ان الحب طاقه وان البنت لازم تحافظ علي الطاقه دي وتديها لخطيبها ,,,انا بقي خايفه اكون خلصت كل الطاقه دي عليه هو
بدات ادخل في دوامه الملل والبكاء علي اللي فات ..وهو بقي حب صاحبتي وصاحبتي سابته وشافت غيره وهو ماشي في الكليه تمام وتقديراته بتزيد اكتر واكتر
انا تعبانه بقيت لما احس ان حد معجب بيا اسيبه يقرب وبرضو مش احبه
هو فعلا انا مش هحب تاني ..ومحدش يقولي مجاش الاوان انا تعبت ونفسي احس بسعاده زي زمان ..انا بقي الطبيعي بتاعي الاكتئاب والحزن في الوقت اللي كل اللي حواليا بيعيشو اسعد ايامهم
مشكلتي اني رومانسيه زياده ومؤمنه جدا بالحب ونظريات واحكام الحب …
ارجوكم ساعدوني …انا مستنيه منكو الكلام اللي هيغيرلي كل حياتي
اسفه جدا اني طولت عليكو
مشاكل الحب الفاشل
ذل واهانه ومرمطه مبقتش اعرف احب
اضيف بتاريخ: Saturday, February 3rd, 2018 في 14:41
كلمات مشاكل وحلول: الجامعة, الحب, بنت, حب, شاب
