انا طالبه فى تانيه طب بشري بحب اقعد على النت بس عمرى ماعملت شات قبل كده او كلمت اى حد على النت الا لما اكون عارفاه وعمرى ماحبيت قبل كده وفى يوم قبلت واحد صدفه على موقع المهم اتكلمنا عادى انا كنت بكلمه عادى صحاب يعنى وطبعا عمره ماشافنى ولا حتى صور لانى رفضه الحكايه دى خالص وفى مره بعتلى مسج اوف لاين قالى بحبك انا ساعتها مش كنت عارفه انا فرحانه ولا خايفه ولا ايه فضلت فتره مش افتح وبعدين لما فتحت لقيته باعت مسج كتير اوف لاين وقايل انت لو اديقتى خلاص مش تدايقى نفسك وكده يعنى انا اصلا حسيت انى بحبه من حتى قبل ماهو يقولى كده المهم اتكلمنا بعد كده بكون مبسوطه اوى وانا معاه وقالى مره عايز شوفك واتخنقت معاه طبعا وبعد كده قالى خلاص ربنا عالم انى عايزك وعايزك كده باللى اعرفه عنك بس المشكله دلوقتى انه فى معهد وانا هبقى دكتوره اكيد انتوا فاهمين هو فى نظرى انا احسن حد فى الدنيا بس احنا فى مصر ده غير انه عنده مشاكل مع باباه على طول كمان انا مش عارفه اعمل ايه حاولت ابعد عنه لكن مقدرتش انا بجد تعبت ياريت لو حد يقدر يساعدنى بس بجد
الحب على النت
بحب واحد تعليمه اقل مني
اضيف بتاريخ: Thursday, September 23rd, 2010 في 04:02
كلمات مشاكل وحلول: الحب على النت, شات, طب بشري, مشاكل, مشاكل الحب, مصر, معهد
علي فكره حكايه التعارف من علي النت ديه عاديه انا اتعرف علي جوز من علي النت ووبعديها طلب مني انه يقابلني طبعا رفضت بس حسيت اني بحبه وفقولت لماما واتقبالنا واتعرفنا علي بعض واحنا دلو قتي متجوزين وعندنا اياد وسلمي
بصراحه انا شايفه انه مينفعش الارتباط من علي النت وهي دكتوره وهو معهد
مغيش حاجة اسمها حب علي النت يا دكتوارة
انا واحد من الناس متجوز وزوجتى اعلا منى فى التعليم ومع زلك متفاهمين جدا يا بنتى مش مهم التعليم ولا الجمال المهم التفاهم وعلى فكره كده كده الناس هيتكلموا وفى الاخر انتى عايزه تسعدى نفسك ولا الناس ؟ لو هوا صحيح بيحبك مضيعيش الفرصه وانتى حره واتمنالك التوفيق .
كل ما اقوله بإختصار ان موضوع الإرتباط من خلال النت أمر لا أحبذه لأنه من الممكن ان يقول كلاما خلاف عمله وأرجو من الشباب أن يتمسك بالدين وان يكون على درايه بما يحدث من حوله ***
حبيبتى انتى ما شاء الله هتكونى دكتورة يعنى الانسان ده مش هينفعك خالص خلينا نكون واقعييين لو حصل نصيب بينكوا هيفض طول عمره حاسس بعقدة نقص وانتى هتندمى صدقينى لانك هتاخدى واحد مكن عشان اقل منك يغير منك ويحصل بينكوا مشاكل كتير
وبعدينحكاية الحب دى غريبة شوية من غير حتى ما تشوفيه ولا يشوفك طيب ما انتى ممكن تتكلمى مع واحد تانى برضو وترتاحى لطريقة كلامه يبقى انتى كده بتحبيه؟وخصوصا زى ما قالك احمد المصرى انتى عشان اول مرة تكلمى ولد يعنى مشاعرك زى ما بيقولوا بكر اول واحد بيلمسها بتحسى بيها اوى
ياريت تحكمى عقلك عشان متندميش طول عمرك على قرار متسرع خدتيه
ياريت بجد تعملي زي ماهقولك انتي اكيد بنت كويسة وتعرفي ربنا ولا ازكيكي على الله اكيد مافيش فرق بين معهد وغيره بس انا اسف هو ده الواقع اللي احنا عايشينه(إن اكرمكم عند الله اتقاقم) ياعني لا بطب ولا هندسةالمهم الخلق الكريم والدين بس المجتمع بيفرض رايه لذلك بقولهالك يااختي العزيزة انتي ليه لم تلجأي الى الله الواحد الاحد ؟ عارفة ليه ….. لأن قلبك معلق بغير الله قلبك معلق بالبشر وليس بالله فياريت تسمعي كلامي ولو عملتي بكلامي بجد ربنا هيوفقك عاوزك تكوني دائما على وضوء وتستغلي اوقات استجابة الدعاءوتصلي الصلوات في وقتها وتدعي ربنا بإخلاص انه يوفقك لما يحبه ويرضاه …..خدي بالك …..انتي هتدعي ربنا بانه يوفقك لما يحبه ويرضاه… مش اللي انتي بتحبيه وترضيه لنفسك……. ليه؟ لانك ممكن تكوني بتحبي حاجة وراضية بيها لنفسك ولكن ربنا مش بيحب الحاجة دي لذلك فوضي الأمر لله الواحد القهار …وتأكدي تماما….لو الشخص اللي انتي بتحكي عليه ده من نصيبك يبقى مش هتتزوجي غيره لان ده رزق ومكتوب مش ارادة حد فينا لذلك بقولك ريحي بالك وخليكي مطيعة لأهلك في غير معصية الله انتي مش هاتتزوجي الا زوجك المكتوب ليكي لذلك انشغلي بحب الله فإن الحب في سوى الله حرام ………..وعلى فكرة انا اول مرة ادخل الموقع ده …… ودخلته بدون قصد ياعني انا ماليش حاجة فيه انا كنت بعمل حاجة لقيت الصفحة دي قدامي …… فشدني عنوانك اللي انتي كتباه…..فحبيت اقدم نصيحة …..
انتي عشان مكلمتيش ولاد قبل كده فجالك الاحساس ده من اول واحد قالك بحبك وانتى ما تعرفهوش الا عن طريق النت متعرفيش شخصيتة او هو بيسلا بيكى وممكن يكون متجوز يعني انا لو كلمت اي بنت على النت حقولها اننا اتعلقت بيكى وبحبك ومقدرش استغنا عنك بس عشان اتكلم معاها في كلام ملوش لازمة وانتي اتعرفتى على خط واحد على النت مش يمكن يكون مش هوا فتي احلامك او مش الصورة اللي رسماها في عقلك فكري في الكلام ده كويس وربنا معاكى ويوفقك في الاختيار السليم بس خلي بالك محدش في الدنيا دي بقي ليه امان من اخ صادق فى كلامه
ماعتقدش ان التعليم يعمل فرق الا اذا كان الأعتراض هيكون من الأهل نفسهم يعنى مامتك تقولك ايه دا دا معاه معهد .بس صدقينى مش بالمعهد ولا حتى بالماجستير اوقات كتير ممكن يكون واحد جاهل ويكون انسان عنده اخلااق ومحترم احسن من دكاتره الجامعه.المهم الأخلااق والتربيه وانه يتقى الله فيكى ويعاملك بما يرضى الله ويصونك ويخاف عليكى .وقتها اهلك هيحسوا انهم جوزوكى لراجل .اما ان كان ع مشاكله مع باباه فدى مقدور عليها هو كفيل يحل مشاكله بس بالصبر والحكمه وربنا معاكوا ويقدم لكم اللى فيه الخير.خلى اهلك يقابلوه اما ييجى الوقت المناسب وشوفى ايه هيحصل وربنا يوفقكوا.