السلام عليكم
اتمني اني الاقي حل لمشكلتي باذن الله معاكم
انا عمري 28 سنة خريجة جامعة ومش بشتغل وعمري ما ارتبطت او مريت باي تجربة عاطفية قبل كدا من حوالي اربع شهور اتعرفت علي انسان اكبر مني بسنة ملتزم دينيا وعارف ربنا كويس والحقيقة هو اول ما اتعرف عليا وحس اني انسانة كويسة طلب انه يتقدم ليا ومن خلال تعارفنا حكي لي عن حياته قبل كدا انه ماكانش انسان ملتزم عن كل نزواته وعلاقاته الغير شرعية بمنتهي الامانة لكن شاء ربنا انه يهتدي ويتوب عن كل معاصيه انا في الأول كنت رافضة ارتبطت بانسان ليه ماضي لكن حسيت انه انسان كويس وملتزم دلوقتي فقررت اني انسي ماضيه المهم هو اتقدم فعلا لكن للاسف اهلي ماوفقوش لاختلاف بسيط بينا وبينه وافتكرت ان الموضوع انتهي عند كدا لكن بعد شهر لقيته بيكلمني تاني . وكنت فاكرة انه رجع يتكلم معايا كاصدقاء لكن الحقيقة فوجئت بيه بيقوللي انه بيحبني وان الفترة اللي بعد فيها عني ماكنش قادر ينساني وطلب مني اني افاتح اهلي في موضوع الأرتباط تاني بصراحة انا كمان حسيت اني حبيته اول مرة احس بالاحساس دا وكنت مبسوطة اوي اني ممكن فعلا اتجوز الأنسان اللي بحبه
لكن اكتشفت انه خبي عليا حاجات مهمة اوي في حياته
فبعد حوالي شهر من ارتباطنا عاطفيا صرحلي انه خبي عليا انه كان متجوز وعنده بنت عندها ست سنين وانه حصلت مشاكل بينه وبين اهل مراته وصلت الموضوع للطلاق بعد اقل من شهر من جوازهم الحقيقة انا زعلت منه اوي انه خبا عليا وقلتله موضوع الجواز دلوقتي بقا اصعب من الأول لان اهلي كانوا عارفين انه ماتجوزش ولا ارتبط قبل كدا هاقول ايه لاهلي ؟ انه كان مخبي علينا موضوع جوازه؟ قلت له لكن انا ممكن احاول مع اهلي ان اصلح الأمور علشان يقدروا يوافقوا
لحد كدا وافتكرت انه خلاص حكي لي عن كل حاجة في حياته لكن بعد الكلام دا بشهر قالي انا عارف ان احنا قربنا اوي من بعض لكن انا فيه موضوع لازم احكيه ليكي لان انا مكنتش عايز اقوله ليكي قبل كدا لاني كنت خايف اخسرك
اكتشفت انه كان متجوز ومطلق تلات مرات وليه من كل زوجة بنت كانت صدمتي فيه كبيرة اوي انهرت اول ماعرفت حسيت ان الدنيا اسودت اوي مابقتش قادرة افكر اعمل ايه قاللي انه حاسس انه غلطان لما خبي عليا حاجات زي دي مهمة وهو لسه عايز يتجوزني
المشكلة دلوقتي اني بحبه وفي نفس الوقت خايفة لو وافقت ارتبط بيه حياتي تكون مش مستقرة معاه لان حسيت انه مستسهل موضوع الطلاق لان زواجه الاول كان اقل من الشهر والتانية كانت 7 شهور والتلتة 3 شهور
والحاجة التانية صرحت اهلي بالموضوع طبعا انزعجوا جدا لما عرفوا كدا وبلغتوا قرار اهلي بالرفض وبعد شهرين لقيتوا بيتصل بيا وبيقولي انه لسه بيحبني وبيتهمني اني مش بضحي علشان خاطر حبنا بس انا ذنبي ايه اعمل ايه ساعدوني
