مشكلتى انى بحب حد جدا وبقالنا كتير مع بعض وهو كمان بيحبنى اوى وبيحترمنى اوى جه اتقدملى بس حصلت مشكلة والموضوع انتهى وهو قالى استنينى سنة واحدة وكل حاجة هتتصلح وانا عشان بحبه استنيته فعلا وفضلت وقفة جمبه سواء فى حاجة حلوة اوى وحشة لحد مااهى عرفوا تانى فى البيت وقالولى ماشى مدام بتحبيه وهو لسا بيحبك يجى يتقدم تانى واحنا موافقين حصلتله ظروف صعبة وجاش وقولت هستنى تانى مش مشكلة بس فى الوقت ده كله اتقدملى كذا حد وانا كنت برفض عشانه واتقدملى واحد فى الاخر واتضح ليا انه بيحبنى اوى وعاوز يتقدملى فى اسرع وقت وفى البيت عرفوا وعاوزينه جدا المشكلة انى ساعات بحس ان حبيبى فيه حاجة غريبة انه بيكلم حد مثلا وانه بيماطل فى موضوع خطوبتنا يعنى ساعات كتير بشك فيه معرفش ليه انا خيفة ارفض الانسان اللى اتقدملى ده وهو شارينى وبيحبنى كدا ويكون حبيبى اصلا متردد فى موضوعنا مبقتش عارفة اركز واعرف فين الصح من الغك حبى ليه مخلينى مش شايفة غيره بس فى نفس الوقت لما بيتقدملى حد بقلق اوى منه عشان مبيجيش يتقدملى ياريت تساعدونى وتقولولى اللى بعنله ده صح وا غلط استناه تانى ولا اوافق على الشخص اللى متقدملى ودى هتعتبر خيانة ليه ولا لاءواسفة على التطويل
مشاكل الحب والزواج
شاكة في حبيبي وخايفة ارفض العريس
اضيف بتاريخ: Saturday, March 26th, 2011 في 16:07
كلمات مشاكل وحلول: عريس, مشاكل الحب, مشاكل الحب والزواج
السلام عليكم عاوزه ااقولك انى فى نفس مشكلتك ومتردده جدا وخصوصا ان اللى متقدملى بيحبنى اما اللى بحبه قوتله قالى ربنا يوفقك انا ظروفى صعبه بصى بجد الحب بيجى من العشره والموده وتقريبا اللى احنا فيه احتياج للحب حاولى تفكرى فى اللى متقدملك لو فى قبول وقفى انا حعمل كده
اقبلي العريس لان والله نفس الموضوع دا اتعمل معايا وانا قببلت العريس واكتشفت انو بيحبني اوي واكتر ما انا بحبه كمان والله العظيم خدي كلامي دا صدقف مش اكتر والمثل بيقول خودي اللي بيحبك ومتخديش اللي بتحبيه ولا ايه يا قمر؟؟؟؟؟
لو بيحبك بجد ماكانش يماطل ويتحجج ، طب بس يكلم أبوكي ويقوله اديني وقت للجواز ويعمل خطوبة صغيرة بأي إمكانيات ، بس ده مش بيحبك ، وبيماطل ، وافقي على اللي بيحبك وحاولي تقبليه وشوفي الحاجات الحلوة اللي فيه ، والجواز يا بنتي مش حب بس ، الجواز رحمة وتبادل احترام ومشي على الأصول ومسئولية وتربية أولاد والحب يا بنتي بعد الجواز بياخد شكل تاني اسمه العشرة أو المودة والرحمة أو العطاء والتضحية أو أو أو صور كتير وبتلاقي الحب الرومانسي اللي انتي فيه دلوقت في أوقات قليلة قوي وممكن تلاقيه مع اللي بيحبك أوي وكان جرئ واتقدملك يبقى ده اللي يستاهلك ربنا يوفقك للي فيه خير
قوليله اهلي قالولي كفاية رفض لحد كده
وانا مبقاش عندي حجة تاني
او
لو فعلا اتأكدتي باليقين انه بيماطل ومش عاوز يبقي اقبلي التاني بسرعة
او مثلا حاولي تفتعلي مشكلة معاه صغيرى معاه ورد فعله اكيد هيعرفك
بصى انا حصل ليا زيك بس نصيحه من اخت ليكى لو الى متقدم ليكى كويس انسى الى بتحبيه لو قلتى له ومش عمل حاجه وخليكى مع الى متقدم ليكى وصلى اهم حاجه استخاره وربنا يوفقك
معنى انك تفكرى فى اخر اواحد اتقدم ليكى مع ان كان اتقدم ليكى كتير زى مابتقولى مش كانوا بيفرقوا
معاكى ولا بتفكرى فيهم وبتستنى حبيبك يتقدم
ووضع حبيبك زى ماهو مش اتغير الظروف هى هى
كونك فكرتى فى دا بالذات اعتقد
حستيه مميز عن اى حد تانى كان اتقدم ليكى او حسيتى حبه ليكى زى ماهو قال انه بيحبك
فكرى كويس وقارنى بين مميزات وعيوب كل واحد فيهم
وصلى استخاره وربنا معاكى ويقدملك كل خير
قوليله وشوفى رد فعله ايه وقوليله مثلا انهم فى اليت طغطين عليا اعمل حاجة شوفى هو هيعمل ايه لو عمل خطوة ايجابية يبقى طبعا بيحبك وهيخاف تروحى منه ولو لقتيه الموضوع بنسبله عادى ومعملش حاجة يبقى تبعدى ومتعطلش على نفسك اى فرصة احسن منه وانسيه عشان ميستهليكش جربى تصريحه بحاجة زى كدة اعملى اللى بقولك عليه وهما فى البيت عندك لو لقوا عمل كدة عشان حس انك هتروحى منه هيكبر فى نظرهم واكيد فى نظرك وفكرى صح عشان دى حياتك الابدية خدى اللى يحبك وشريكى ومتخديش اللى تحبيه وهو مش بيحبك ربنا يوقفك………….
متصدقيش ان الحب الاول هو الحب الاخير ولا متصدقيش كلمة مخلوقين لبعض ومتصدقيش كلام واحد مترتد هو لو بيحبك بجد عمره ما هيستنا بس ثقة الزيادة فيكي مخليها واثق ومتاكد انك مش هتوافقي انتي وحدك اللي تقرري اذا كان يستاهلك ولا لا بس اللي هقولهولك انا فكري كويس ومن رايي الشخصي في الموضوع ده وافقي وانسي الاول ده … حبيبك هو جوزك هو اللي جه لاهلك واتقدم هو اللي مستني كلمة موافقة علشان تشوفي فرحة في عنيها عمرك مشفتيها في عين حد ولا هتشوفيها
انا مالك المهدى المهنه /دكتور نفسى /بس الى انا هقولهولك مالوش علاقه بالطب النفسى ولاكن ليه علاقه بالانسانيه بصى هو خطيبك ممكن يكون كان بيحبك لحد المشكله الى حصلت وبعدين قرر انوا يضايق اهلك فالحاجه الوحيده الى هتضايق اهلك انوا يعلقك بيه وهو مبقاش يحبك دى عامتا بتبقى فكره فاشله زى فكره انتقام مثلا بس لو عايزه نصيحه دكتور نفسى بجد
ربنا معاكى انا لو مكانك لو شكة فيه اقبلى العريس اللى جايلك
انا عندى نفس المشكلة بس انا قررت انى حوافق ع العريس اللى جاى وسعتها هو لو بيحبنى بجد اكيد حيتقدملى