اتخطبت من سنه وكام شهر خطوبه صالونات عاديه فى البداية خطيبى كان مسافر لشغله باره القاهرة وربنا الحمدلله حلها له ورزقه بشغل فى القاهرة وكنت معاه طول الفتره دى بشجعه وبسمعه لو فيه مشكله عنده فى شغله او فى حياته كنت بحاول احلها معاه وكان دايماً على الموبيل واحنا بنتكلم مع بعض يقولى بحبك ونفسى تبقى فى حضنى ومعايا على طول وكلام حلو كنت الأول بعترض وبقوله لا قول ربنا يارب يجمعنا سوا ، وفى اول الخطوبة كنت بعترض عليه انه يمشى وايديا فى ايديه وقعد فى البداية يعترض ويقولى ليه كده وهو انا كل ما اقرب منك تصدينى اناحاسس انى ماشى مع عسكرى وشويه يرجع فى كلامه ويقولى لا محترمه ويرجع تانى ويحاول يمسك ايديا كل اصحابى واهلى واهله عيبوا عليا وقوليى الجمله الشهيرة فى الأوقات دى (ما تسبيه يمسكها يافوزيه ..) واهله عملوا معايا مشكله جامده وازاى مش عايزه يمسك ايديكى حتى فى يوم الخطوبه ومرت فتره طويله من الخطوبه حصلت بعد كده فى مره مشكله جامده اوى بينا وقعدنا فتره طويله مش بنكلم بعض فيها و خلاص كنا هنسيب بعض ورجعنا بعدها بدأت من بعدها امسك ايده وهو الموضوع ابتدا يطور معاه مبقاش عايز يمسك ايديا وبس بدأ يحاول يعمل حركات تانيه وكنت بصده وكان بعدها بيسألنى انتى بتخافى لما بقرب منك بالشكل ده بقوله ايوه يقولى انا اسف عشان انفعلت اللى جرحنى بعد كده انه قالى ان كل ده كان بيشوف بيه طريقة تفكيرى وبيقيم علاقتنا …. قولتله انت لسه بتقيم بعد ما قربنا على سنتين المفروض التفييم ده يبقى اول سته شهور او حتى اول سنه وبعدها الأتنين بيبنوا حياتهم مع بعض عشان يبنوا بيتهم كل اللى بحكى فيه ده مش حاجه مش بيمحى الحاجات الحلوه اللى فيه انه انسان حنين بس اللى مستغرباه انى دايماً انا اللى اطلب منه اننا نشوف بعض هو مش بيبقى عايز وده من اول الخطوبه وبيقعد يتلكك بحجج بحس انه مش عاوز يشوفنى وان الموضوع مش فارق وانه مش شارينى زى ما انا شاريه .. ده غير طريقه كلامه فى المشاكل لما بيتكلم اللى اكتشفتها انه بيتنزفز اوى وبيقول كلام كله قصده بيه انه يفسخ وميهموش وبعدها بمفيش يتصل تانى ويعتذزويتهمنى انى هابله وبتاعه مشاكل …… بقيت احس انه بيلعب بيا وخصوصاً بعد ما انا كنت بظن فيه انه كان بيحبنى وانه فعلا مقدرنى وعارفنى كويس … انا مش بقصر فعلا فى حقه فى حاجه حتى لو زعل لو اى حاجه بتزعله بسيبها على طول حتى فى ارائى وده اللى تعبنى حسيت ان شخصيتى اختلفت عشان ارضيه وهو مش بيحاول ابدا يعمل ده بقيت كل شويه اقول لنفسى طب ليه ليه اكمل ..لحد ما بقيت احس انه مش شايفنى وانى مش بمثل اى اهميه فى حياته مش اكتر من مكالمه تليفون وحتى دى بقيت احس انها تقضيه واجب منه .. خلاص بجد حاسه انى عملت اللى عليا وزياده اى مشكله كنت بحاول انا اللى احلها عشان متكبرش وابقى بعمل مشاكل زى ما بيقول .. مش بنكر انه احيانا بيحاول يراضينى بأنه يسألنى فيه ايه مالك ؟؟… بس اول مابقول فيه ايه بتقلب خناقه لرب السما ونتخاصم ونرجع بعدها بشويه نتصالح …. زهقت بجد ومش عارفه ..اعمل ايه جوازنا اصلا ظروفه صعبه بس بنحاول نمشى المركب … بس انا بقت مشكلتى مش فى ان المركب تمشى اد ما مين معايا فى المركب …. احساسى من ناحيته اتلخبط وحاسه انى اتجرحت اوى ……. ياريت بجد تدلونى اعمل ايه انا شاريه فعلا ً وبحبه اوى بس مبقتش حاسه بحبه ده وخصوصاً ان تفكيره مش ازاى نكمل بيتنا اد ما تفكيره يكبر ازاى تجارته هو مش المفروض جوازه ده جزء من حياته ولا انا اللى شايفه الصوره غلط وبتعب نفسى وخلاص …. ياريت الله يخليكوا تردوا عليا وتقولولى اعمل ايه …. واللى عنده مشكله زى حالتى دى يقولى اتصرف فيها ازاى …… ربنا يحفظكوا من المشاكل .
مشاكل الخطوبة
بحاول ارضي خطيبي وهو بيبعد عني
اضيف بتاريخ: Tuesday, July 26th, 2011 في 23:37
كلمات مشاكل وحلول: الخطوبة, مشاكل البنات, مشاكل الخطوبة
انا بردة مخطوبة بس كملت السنتين يعنى عشرة عمر اتخطبنا فاخر سنة فالكليةوفضلت معاة لغاية مبدا شغل كويس وبدانا نخطط سوا لحياتنا كانت الدنيا لسة وردى لغاية وتمكن منى وبدا يثق فنفسة ومستقبلة من هنا بدات الامارة.تعرفى انا حاسة جدا بالحيرة الى انتى فيها دلوقتى لانى فيها وحسة انى تايهة مجروحة اوى ودموعى محبوسة مش عاوزة ازود هموم الى حوليا ومقلبهمش علية اكتر والمركب تغرق بس انا لوحدى الى هغرق لان كلام الناس مبيرحمش وكمان لما تكون دى رقم3يبقى الى حوليا هيشوفونى بانى وحشة عالرغم انى واخدة من كل واحد مقلب محترم بس احنا دلوقتى متخاصمين ومش طايق يكلمنى وكل حاجة بتضغط عليا ومخوفانى انى اخد خطوة واتخلص من الاكتئاب الى انا فية دة خايفة من كلام الناس وان مفيش حد يستامن انة يخطبنى ومن ناحية تانية كلام الاهل الى يضايق وشماتة الصحاب وسواد الدنيا قدام عنيامن غير نجاة انا مثلا حاولت افتح كلام بس اتحرق دمى اكتر.اقولك علحاجة فعلا من النادر انك تلاقى راجل يستاهل اننا نتنازل ونراضيهم لان زى محصل معايا من كتر التنازل عن حاجات معينة فالجواز هى اة خاصة بينا بس من حقوقى لما وافقت واتنازلت بدل ملاقى تقدير لا الاقى الى يتمادى اكتر وعايزنى اتنازل اكتر ويزلنى انة يقاطعنى وانا لو عايزاة ارجعلة وطبعا بظروفى دى مضطرة لكدةياريتة حتى مدينى فرصة لكدة حسة انى عايزة اصرخ من كتر مقلبى موجوع اوى انا الى محتاجة الى يدلنى اعمل اية………..
معظم كلامك ال قولتهي حصل معايا بالظبط
انا عايزة اسالك سؤال وجاوبي بصراحة
وهو معاكي بيبقي كويس وعايز يمسك ايدك وحنين وبيتمنالك الرضا ترضي ، ووهو بعيد عنك بيفضل ينكد عليكي وفي التليفون كلام يضايقك وتحسي انه بيبعد عنك؟؟؟
لو اجابتك كانت ااه يبقي متزعليش مني ده حد مش شاريكي ومش عايزك لشخصك انما عايزك لعلاقة وبنت امسك ايدها احضنها ابوسها كدة يعني .. بمعني انها مجرد شهوة
طبعا هو عمره ما هيقولك دي شهوة وهيقولك انا بحبك وبحب اعمل كدة معاكي وحبة كلام كدة في الهوا وبيبقي كله كدب لانه لو كان كدة كان اشتاقلك حتي وانتي بعيدة عنه وكان حبك بجد ومنكدش عليكي ابدا دي حاجة
تاني حاجة بجد لو انتي حاسة انه مش شاريكي وبيجرحك وبيهينك بجد اشتري نفسك وابعدي
انا والله مااقصد اخرب عليكي خراب البيوت مش بالساهل بس برضه انك تعيشي مع انسان مش بيقدرك برضه حاجة صعبة اوووي
ربنا يعفي عنك ويسعدك ويقدملك الخير
نصيحتي ليكي بقي بجد صللي استخارة وادعي ربنا انه يسعدك ويقدم الخير واحكي لحد كبير ممكن مامتك او حد دماغه كبيرة وهيفهمك ويفهم كل التفاصيل وهيدلك صح
ووانتي بتخد قرارك شيلي قلبك ده علي جنب خااااااااااااااالص وفكري بعقلك وبس
الانسان ده هتقدري تعيشي معاه ولا لا؟
امسكي ورقة وقلم واكتبي الايجابيات والسلبيات وشوفي هتقدري ولا لا
وقرري
الحب لوحده مبيقتحش بيت
خصوصا لو الراجل مش بيحب البنت زي ما هيا بتحبه
ربنا يسعدك والله اتمنالك كل خير
انتي غلطتي كتير في حق نفسك
1-انك اتخليتي عن مبدأك في انه ميمسكش ايدك وبالتالي الموضوع قلب على حاجات تانيه ولما ترفضي طبيعي انه يقلك كنت بختبرك وده عشان ميحرجش نفسه وده برضه بيبين انه مش بيحترمك
2-لغيتي شخصيتك وبتوافقي على كل حاجه هو بيقولها حتى لو مش عجباكي وتقفلي اي موضوع انتي محتاجه تتكلمي فيه لو هو مش عجبه ودي طبعا اخطر حاجه وده وصلك للي انتي فيه دلوقتي (احساس بانك زهقتي ومش عارفه راسك من رجلك وكده)
3-يعني ايه انتي اللي تعدي تطلبي منه انه يقابلك ولما ده يحصل يبأه عايز يمسك ايدك بس. ياسلام!
بصي يابنت الحلال ده واحد بيسلي وقته ومش بعيد لما يلاقي بنت تانيه يرميكي لانه اصلا مش بيحبك وده مش منظر حب اصلا ولا حتى مس ريحة الاحترام
ابعدي عنه احفظي اللي اتبقى من كرامتك وخلي نفسك دايما غاليه واعرفي وكوني متاكده انك اما تتمسكي بمبادئك هتحفظي نفسك وكرامتك وهتخلي اي حد غصب عن عينه يحترمك ومتعديش تقوللي اصله هيزعل (ما يتفلق) المهم انتي فكري في نفسك شويه وازاي ترضي نفسك الاول على الاقل ازاي تبقي مبسوطه
انتي كده بضيعي احساس جميل كلنا بندور عليه .احساس بالامان والحب وده عمرك ما هتلاقيه مع النوعيه دي لانك انسانه كويسه
اعرفي قيمتك واختاري اللي يصونهالك ويبقى مالي عينك وكل ما تفكري فيه تحبيه اكتر مش تزهقي وتنكدي على نفسك
بصى ما دام بتحبيه وشارياه حاولى وهعاه تانى وتالت ورابع .. لكن حسيتى المشاكل بتكبر ما بينكم وانك بتدى وما بتخديش حاجه .. لا .. احنا لسا على البر .. بس بينى وبينك حاولى تاخديه فى بدايه المكالمه بكلمتين حلوين وبعد كده اسأليه اللى انتى عايزه بس براحه وبتدريج .. خليكى زكيه .. يعنى حاولى تعرفى حبه ليكى قل ولا لأ زى ما كان الأول .. وحاولى قدرى المشاكل اللى بينك وبينه يا ترى تقدرى تتحمليها بعد الجواز ولا لأ