انا مخطوبة من اكتر من سنة وخطيبى مسافر وتقريبا كل كلامنا على النت انا بثق فيه جدا وبحبه وهو كمان بيحبنى بس المشكلة انه من فترة كنا بنتكلم على الفيس بوك وكدة وهو ادالى كلمة السر بتاعته ولما دخلت عنده لقيته ضايف بنات قالى اعملى اللى انتى عايزاه طبعا مسحتهم كلهم وبعد فترة لقيته ضاف عدد اكتر ولما سالته قالى اخوه اللى عمل كده لان معاه كلمة السر وبعدين غيرها تانى بس العدد فضل يزيد وبعدين من فترة قصيرة دخلت على الرسائل بتاعته لقيته بيكلم بنت وبيقولها كل كلام الحب اللى كان بيقوله لية طبعا زعلت وواجهته حلف انه كان اصحابه ف الشغل بيدخلوا وهو كان بيقعد معاهم وبيكتبوا كده مجرد هزار وانه مش قصده وحلف وبكى وقالى اقفليه انتى خالص واترجانى اسامحه المهم انى قلت كلنا بنغلط وسامحته بس المشكلة انى بقيت مش بصدق اى كلمة حب يقولها ومش عارفة ارجع الثقة فيه تانى والمهم ان فرحنا قرب وانا مش عارفة اعمل ايه ساعات بشتاق وبحن ليه وساعات افتكر وقلبى ينجرح انا عايزة ارجع ثقتى فيه تانى اعمل ايه ساعدونى وردوا عليا
والله أنا حاسس إنه بعد كده هيبقى يسيب مفتاح شقته لاخوه وأصحابه ولما تعرفي هيقولك اصلهم اخدوه من ورايا.شوفي الكدب طبع وممكن الإنسان يكدب عشان ياخذ حاجه بيحبها من باب حب الامتلاك..حطي في دماغك إن اعذاره حاليا بسيطه وانتي كمان ما عرفتيهوش الفتره اللي لازم يكون فيها قدامك بتقولي كله من النت وده اكبر غلط.من الاخر مش عايز اطول عليكي الموضوع ده لو كملتيه هتكتشفي بلاوي بعد الجواز وعموما النهايه يا تعيشي وترضى وخلاص يا انفصال وتعاسه عشان ما حكمتيش عقلك سيبك من البكاء والمحايله نصيحتي ليكي لو فاضل علي الفرح يوم سبيه واشتري راحت بالك وربنا يرزقك بابن الحلال الصادق اللي ما يبقاش في حياته غيرك وربنا يوفقك